Akaari i te Tu Tangi Aroa
Te Manamanata
Me akara tatou i te tuke o tetai aronga, penei e au tarevake to ratou e e au tu tau kore to ratou. Penei ka akara anga puapinga kore ratou. Me tupu teia manako tau kore, ka ngata ia tatou te akaari i te tu tangi aroa. Me kare tatou e akaari i te tu tangi aroa, e manamanata kino tetai—te tu papakitai.
Kaveinga Pipiria
“Kia rekareka kotou i te aronga e rekareka ra, ka aue katoa oki i te aronga e aue ra.”—ROMA 12:15.
Eaa te apiianga? Te kaveinga, akaari i te tu tangi aroa. Te aiteanga e tuku ia koe uaorai ki roto i te turanga o tetai kia kite koe mei teaa te tu.
Meitaki te Tu Tangi Aroa
Me tangi aroa tatou i tetai, ka kite tatou aiteite ua to tatou tu. Aiteite ua ta tatou ka rave. Aiteite te tangata katoatoa noatu noea mai ratou, okotai rai tatou. Te maata atu ta tatou i kite e aiteite ua tatou, kare i reira tatou e akava tau kore ia ratou.
Na roto i te tu tangi aroa, ka akangateitei tatou i tetai e tetai. I Senegal, kua akavaavaa a Anne-Marie i te iti tangata no roto mai i te au katiri rikiriki. Akakite aia akapeea te tu tangi aroa te tauturu anga iaia: “I toku kite anga e te akakoromaki ra teia iti tangata i te tu ngata, kua ui au kiaku uaorai, akapeea me ko au tera. Kite mai au kare toku turanga i runga ake i to ratou—kare aku apinga i rave ana kia puapinga atu au ia ratou.” Ae, me mārama tatou i te au tu ngata o tetai ke, ka tangi aroa tatou kare e akavaavaa ia ratou.
Taau ka Rave
Eiaa e akara i te au tuke, e kimi i te au tu aiteite i rotopu ia koe e tetai pupu taau e manako tau kore ra. Ei akaraanga, akamanako ia ratou
Na roto i te tu tangi aroa, kite tatou aiteite te tangata katoatoa
e kaikai kapiti ra ki te ngutuare
e akamutu ra i te angaanga
e akapou ra i te taime ki te au oa
e akarongo ra i ta ratou imene reka
E oti, akamanako ko koe tera. E ui kia koe uaorai:
‘Eaa taku ka rave me akavaavaa tetai iaku?’
‘Eaa taku ka rave me akava tetai iaku i mua ake ka pukapuka mai ei kiaku?’
‘Me ko au tetai ia ratou, akapeea tetai me akono mai iaku?’