Au Uianga a te Aronga Tatau
Ia Roma 12:19, te akakite ra ainei te apotetoro ko Paulo e auraka te au Kerititiano kia riri ua i te tuatua anga aia: “E taku au akaperepere e, auraka e akaoko, tuku ua atura i te riri”?
I te tuatua tika anga, kare. Te taiku ra te apotetoro ko Paulo i konei i to te Atua tu riri. E tika, kare teia e te tuatua nei kare e tau tetai au Kerititiano kia manako e kia tuku ua ki te riri. Te ako taka meitaki maira te Pipiria ia tatou auraka e riri ua. Ka akamanako ana i etai akaraanga i te ako anga tu-Atua.
“Akapakia te makitakita, e akaruke i te riri otooto: auraka toou ra kinokino kia tae roa ki te rave i te mea kino.” (Salamo 37:8) “Ko te tangata e riri ua ki tona taeake, e tau katoa iaia te akavaanga.” (Mataio 5:22) “Te au angaanga a te kopapa, kua kitea meitakiia ïa; koia oki te moeaana, te akaturi, te tuatua viivii ra, e te kanga, te akamori idolo, te purepure, te makitakita, te tamaki, te akarere, te riri, te karo.” (Galatia 5:19, 20) “Kia kopae ravaia oki te maru kore, e te rotoriri, e te makitakita, e te taumāro ra, e te tuatua akakino, e te vareae, auraka takiri ïa.” (Ephesia 4:31) “Kia rapurapu ua te tangata ravarai i te akarongo, kia tavarevare i te tuatua, kia tavarevare oki i te riri.” (Iakobo 1:19) Pera katoa, te ako ripiti ua maira te puka o Maseli ia tatou auraka kia tuku ki te riri me kare kia riririri ua no tetai manga apinga akakino e te au tarevake tangata. —Maseli 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.
Te tau ra te tuatua i roto ia Roma 12:19 ki te reira ako anga. Kua tuatua mai a Paulo e auraka to tatou aroa e ma te pikikaa, e kia akameitaki tatou i te aronga te takinokino ra ia tatou, e kia tauta tatou i te manako meitaki i etai atu, e auraka tatou e tutaki i te kino ki tetai, e kia tauta tatou e kia au ma te katoatoa. E oti kua raurau mai aia: “E taku au akaperepere e, auraka e akaoko, tuku ua atura i te riri; kua tataia oki e, ‘Te tuatua maira te Atu, ei iaku te akaoko, e naku e tutaki atu.’”—Roma 12:9, 14, 16-19.
Ae, auraka tatou e tuku i te riri kia akakeu ia tatou kia akaoko ma te tutaki. E tu apa ua to tatou kite anga i te au turanga e te tu tika. Me ka tuku tatou i te riri kia akakeu ia tatou kia akaoko i te tutaki, e putuputu te taime ka rave tatou i te kino. Ka akatupu te reira i te akakoroanga o Tei Patoi i te Atua, ko te Tiaporo. I tetai atu ngai kua tata a Paulo: “Kia riri kotou ra, auraka kia araia: auraka e topa te rā i to kotou riri anga: Auraka e tuku i ta te diabolo ngai kia o mai.”—Ephesia 4:26, 27.
Te aerenga meitaki, e te mea pakari, koia oki kia tuku i te Atua kia akataka e aea e ki runga iaai ka akaokoiai te kino. Ka rauka iaia te rave i teia ma te kite anga i te au tika, e ko tetai ua atu utunga tana ka rave te akaata ra i tona tu tika apa kore. Ka kite tatou e ko teia to Paulo tumu manako i roto ia Roma 12:19 me akara tatou i tana taiku anga ia Deuteronomi 32:35, 41, te kapiti maira i teia au tuatua: “Tei iaku oki te riri, e te tutaki.” (Akaaite ia Ebera 10:30.) No reira, noatu e kare i kitea te au tuatua a “te Atua” i roto i te irava Ereni, kua tauru etai aronga uri e manganui i teia tuatau ia ratou i roto ia Roma 12:19. Te taki ra teia ki te au tatauanga mei “e tuku i te Atua kia akaoko” (The Contemporary English Version); “e akaruke i te ngai riri o te Atua” (American Standard Version); “e tuku i te Atua kia akautunga me ka rave aia” (The New Testament in Modern English); “e akaruke i tetai ngai no te akaoko anga tu-Atua.”—The New English Bible.
Noatu me ka akakinoia me kare ka tamamaeia e te au enemi o te tuatua mou, ka rauka ia tatou i te akaari i te irinaki papu i roto i te akataka anga o te Atua ko Iehova ta Mose i rongo atu: “Ko Iehova, ko Iehova, e Atua takinga-meitaki, e te aroa ua, e te akakoromaki maata, e te meitaki maata, e te tuatua-mou, e te vaoo marie i te aroa e tausani ua atu, e te akakore i te tuatua-tika kore, e te ara, e te kino; e kare e tuatua ki te tangata kino e, e tangata kino kore.”—Exodo 34:6, 7.