Kua Rave Ratou i to Iehova Anoano

Kopae Tetai Vaine Kite Meitaki i te Tumatetenga

E VAINE manako tau tei akaipoipo i tetai tangata puapinga kore​—ko te turanga ia o Abigaila e Nabala. E “kite meitaki [a Abigaila] i te tuatua, e te meitaki oki i te tu.” Ei akatuke anga, e ‘rotoriri a Nabala e te ravenga kikino.’ (1 Samuela 25:3) Te turanga tei tupu no runga i teia tokorua kapiti tau koreia kua ira meitaki to raua ingoa ki roto i te tuatua enua Pipiria. Ka akara ana tatou e akapeea.

E Rave Anga Meitaki Kare i Arikiia

I te 11 anere mataiti M.T.N. kua akatainuia a Davida ei ariki no te tuatau ki mua no Iseraela, inara i te mea e tutara anga te oro ra aia. Kua titau te ariki tutara, ko Saula, i te tamate iaia. Tei tupu, kua maroia a Davida kia noo ei tangata oro kimiora. I te openga kua kitea e ia e etai 600 au tangata te akapuanga ra i roto i te metepara o Parana, te tua tonga o Iuda e ki te metepara o Sinai.​—1 Samuela 23:13; 25:1.

I reira, kua aravei ratou i te au tiaki mamoe tei angaanga na te tangata ko Nabala. E 3,000 au mamoe e 1,000 au puakanio, a teia uanga tangata apinganui o Kaleba, e pakoti mamoe ana aia i Karamela, e oire i te tua tonga o Heberona e penei e 40 rai kiromita mei Parana mai.a Kua tauturu a Davida e tona pupu tangata i te au tiaki mamoe a Nabala te tiaki i ta ratou anana mei te aronga kekeia tei ori aere ua i roto i te metepara.​—1 Samuela 25:14-16.

I te reira taime, kua akamata te pakoti anga uru mamoe i Karamela. E ati anga mataora teia, tei aite ki te tuatau kokoti anga no te au tangata tanutanu. E taime katoa te reira no te oronga ua, e tutaki ei te au ona mamoe i te aronga tei angaanga na ratou. No reira kare a Davida i manako rapurapu ua i tona tono anga e tai ngauru tangata ki te oire o Karamela no te pati kai kia Nabala ei tutaki i te angaanga ta ratou i rave no tana au anana.​—1 Samuela 25:4-9.

Kare a Nabala i oronga mai ana. “Koai oki a Davida?” i kata aviri ei aia. I reira, te tuatuaanga e au tavini oro ke a Davida e tona au tangata, kua ui aia: “Ka rave ainei oki au i taku faraoa, e taku vai, e taku puaka i koia e au na taku au pakoti mamoe nei, ka apai atu ei na te au tangata i kitea koreia e au to ratou ngai no reira ratou ra?” I te rongo anga a Davida i teia, kua karanga aia ki tona au tangata: “Ka tatua ana kotou ravarai i ta kotou koke.” Mei te 400 au tangata tei akapapa ia ratou uaorai no te tamaki.​—1 Samuela 25:10-13.

To Abigaila Tu Kite Meitaki

Kua rongoia ta Nabala au tuatua akakino e tana vaine, ko Abigaila. Penei kare teia i te taime mua tona taru anga atu iaia e kia riro ei akatupu i te au no Nabala. Noatu eaa te tu, kua rave viviki atu a Abigaila. Te kore anga e akakite kia Nabala, kua akaputu mai aia i te au apinga​—kapiti mai e rima mamoe e te au putunga kai maata​—e kua aere i te aravei ia Davida i roto i te metepara.​—1 Samuela 25:18-20.

I to Abigaila kite anga atu ia Davida, kua viviki ua aia i te tuturi ki mua iaia. “Auraka to ngakau, e taku pu, e akono i teianei tangata puapinga kore ia Nabala,” i pati akatenga ei aia kiaia. “Kia apaiia teianei atinga, i apaiia mai e to tavini vaine nei naau, e taku pu, na te au tangata ou e aru mai i taku pu.” Kua tuatua katoa aia: “Kare oki teia [turanga no runga ia Nabala] e riro ei irieaanga naau i reira, kare to ngakau e tumatetenga, e taku pu.” Te tuatua Epera i uriia i konei “irieaanga” te tuatua ra no runga i te au manata anga o te akava ngakau. No reira kua akamatakite a Abigaila ia Davida kia kore e rave viviki ua i tetai tuku anga ko te tataraara aea aia.​—1 Samuela 25:23-31.

Kua akarongo a Davida ia Abigaila. “E kia ora oki koe i taau tuatua meitaki, e kia ora oki koe, ko tei tāpu mai iaku i teianei rā, kia kore e maringi iaku te toto,” i karangaʼi aia kiaia. “Naringa koe kare i aere viviki mai kia aravei mai iaku nei, kare takiri e tane toe to Nabala apopo i te akirata anga.”​—1 Samuela 25:32-34.

Au Apiianga no Tatou

Te akaari maira teia papaanga Pipiria e kare i te mea tarevake no tetai vaine tu Atua kia manako ua i te rave i tei tau me te anoanoia ra te reira. Kua rave atu a Abigaila ma te kore te kite anga a tana tane, ko Nabala, inara kare te Pipiria e akaapa ra iaia no teia. Tei tuke, te akapaapaa ra te reira iaia ei vaine tu kite meitaki e te manako tau. Na te manako ua anga i te rave atu i roto i teia turanga tumatetenga, e manganui te au oraanga ta Abigaila i akaora mai.

Noatu tei matauia ka akaari tetai vaine i te vaerua kauraro tu Atua, penei ma te tau ka patoi aia i tana tane me o mai te au kaveinga tau. E tikai, ka tau aia kia tauta i te tamou i tetai “ngakau maru e te muteki ua” e kare e tau e rave ua i tana i manako no te tu taitoito, te parau, me kore te meameaau. (1 Petero 3:4) Inara, kare tetai vaine tu Atua e tau kia manako taomiia kia rave i tetai mea tana i kite e e pakari kore me kore te aati ra i te au kaveinga Pipiria. E tikai, te oronga maira te papaanga o Abigaila i tetai maro anga papu te patoi i te aronga tei karanga e te akatutu ra te Pipiria i te au vaine ei au tavini ua.

Te apii katoa maira teia papaanga i te tu akatere-uaorai kia tatou. I tetai au taime, kua akaari pu ua a Davida i teia tu. Ei akaraanga, kua patoi aia i te tamate i te ariki akaoko ko Saula, noatu e aka tuatau tona i te rave i te reira e ka riro mai to Saula matenga ei apai mai i te au kia Davida. (1 Samuela 24:2-7) Ei akatuke anga, i to Nabala akakino pakari anga iaia, kua topa a Davida e kua taputou i te akaoko anga. E akamatakite anga taka meitaki teia ki te au Kerititiano, ‘auraka e titau i te tutaki i te kino ki te kino i te tangata ravarai.’ I te au turanga katoatoa, ka tau ratou kia aru i te ako anga a Paulo: “Pe­nei­ake ko te tika, ko ta kotou ïa e aruaru e, kia noo au ua kotou i roto i te tangata katoa nei. E taku au akaperepere e, auraka e akaoko, tuku ua atura i te riri.”​—Roma 12:17-19.

[Tataanga Rikiriki i Raro]

[Tutu i te kapi 15]

Apai a Abigaila i te au apinga kia Davida