To te Atua Ra Akaoko Anga

MEI ta tatou i kite i roto i te atikara i mua ake, te vaira te au tumu e manganui e no teaa i tarevake ei no tatou kia kimi i te akaoko atu. E tarevake no te mea i te openga, kare te reira e rapakau i tetai mea. E tarevake no te mea ka akaketaketa te reira i te tu akaenemi kare e patu i te au tapeka anga o te akataeake anga. E tarevake no te mea e kino te reira no te tangata te akaputu ra i te au manako no te akaoko atu.

Inara, te tumu puapinga maata rava atu, e no teaa ra te akaoko anga a te tangata i tarevake ei kua kiteia te reira i roto i te au tuatua a Mose ki to Iseraela: “E Atua aroa ua oki toou ra Atua ko Iehova.” (Deuteronomi 4:31) I te mea e e aroa ua te Atua, e tau tatou kia aroa ua rai mei iaia rai. Kua akakite a Iesu ki tana au pipi: “E aroa oki to kotou, mei to kotou Metua e aroa maira.”​—Luka 6:36.

Noatu rai, te akatutu katoa maira te Puka Tapu ia Iehova ei “Atua, ko tei akaoko ra.” (Salamo 94:1) Kua tuatua te peroveta a Isaia no runga “i te mataiti inangaroia e Iehova” e pera katoa “te rā akaoko anga na to tatou Atua.” (Isaia 61:2) Akapeea e raukaʼi i te Atua kia aroa ua e te akaoko atu? E me ka aru tatou i to te Atua tu aroa ua, eaa i reira tatou ka kore ei e aru iaia i te tu akaoko anga?

Ei pau i te uianga mua, e aroa ua te Atua no te mea te inangaro ra aia i te au tangata ravarai, e e maata tana e akakore ana e ka rauka no tetai tuatau roa no te oronga i tetai tuatau no te au tangata kia taui i to ratou au mataara. E manganui mei te apotetoro ko Paulo rai, tei taangaanga meitaki i teia tu aroa ua. Inara e Atua akaoko katoa aia​—mei te tu ra o te rave anga i te tika anake ua—​no te mea ka rauka teia tu aroa ua i te aere ua atu no tetai manga tuatau roa. Me akaari etai pae e kare rava ratou e taui i to ratou au mataara, ka oronga i reira te Atua i te akava anga i te tuatau tei kapikiia e ko tona ra akaoko anga.

Ei pau i te uianga rua, kare, e kare tatou i tikaia kia akaoko atu no te mea na te Atua ua e rave i te akaoko anga. E tiama a Iehova e te tika. Kare ra te tangata nei. Te kite ra te Atua i te au tua katoatoa o tetai mea e e rave ua ana rai aia i te pau anga tuatua tika. Kare tatou e irinakiia kia pera rai. No reira a Paulo i ako ei: “E taku au akaperepere e, auraka e akaoko ia kotou uaorai, tuku ua atura i te riri; kua tataia oki e: ‘Te tuatua maira te Atu, ei iaku te akaoko, e naku e tutaki atu.’” (Roma 12:19) Ei meitaki rai no tatou, kia akaruke tatou i te akaoko anga ki to Iehova nga rima.

No Teaa ra te Ra Akaoko Anga?

Noatu rai, te akatika ra te Puka Tapu i te au ngai e manganui i te anoano no tetai tutakianga ki te aronga rave kino tei kare i tataraara. Ei akaraanga, kua akakite takere te apotetoro ko Paulo, e ka apai mai te Atua na roto ia Iesu, “i te akaoko anga ki rungao i te aronga tei kare i kite i te Atua e te aronga tei kare i akarongo i te tuatua meitaki no runga i to tatou Atu ra ko Iesu.” (2 Tesalonia 1:8, NW) E au tumu meitaki ta tatou kia akarongo meitaki i teia au tuatua. No teaa ra?

I tetai tua, no te mea te maata anga o te tangata i teia tuatau te rave ua atura ratou i te akakino i te tu ngateitei rava o Tei Anga ra, te patoi ra ratou i tana au ture tuatua tika. I te mea e te akatutu ra ratou te irinaki ra ratou i te Atua e me kare, te akaari papu maira to ratou tu akono e kare ratou e manako ana e te kaiou ra ratou ki mua i te Atua. Te tano ra te au tuatua a te tata taramo ki te katoatoa mei teia te tu: “Eaa te aronga kino i akavaavaaʼi i te Atua? Kua tuatua aia ki roto i tona ngakau e, Kare koe e ui mai.” (Salamo 10:13) Papu tikai e kare rava a Iehova e tuku ua iaia uaorai kia akakinoia na teia tu e tuatau ua atu. Noatu e e Atua aroa aia, e Atua tika katoa aia. Ka aru aia i te au aue anga a te aronga te manako tika tikai ra i te tika: “Ka tu, e Iehova; e akateitei i to rima, e te Atua e! auraka tei tairoia nei e akangaropoina roaia e koe.”​—Salamo 10:12.

Tei maata atu, te takore ra te au tangata patoi i te ture i teia enua tikai ta tatou e noo nei. Te takino ra ratou i te reva, te enua, e te vai; te akaki ra ratou i te enua ki te au tika kore e te takinga kino. Te akaputu ra ratou kia maata te vairakau, te nukiria, e tetai atu au apinga tamaki no te tamataku i te oraanga o te au tangata nei. Te anoano tikaiia ra kia akao mai te atua iaia e raukaʼi i te akapapu i tetai tuatau tinamou ki mua no te au tangata akarongo. (Apokalupo 11:18) Ko teia te ako anga ta Isaia e tuatua ra e ko te ra akaoko anga.

Eaa ta te Atua Ra Akaoko Anga ka Akatupu?

I tau ki ta Vine’s Expository Dictionary of Old and New Testament Words, i roto i te au Tuatua Tapu Ereni, te tuatua no te akaoko anga, me taangaangaia e te Atua, te aiteanga tikai “‘ko tei aru mai i te tika,’ kare, mei tei matauia i ta te tangata akaoko anga, e ka tamamae atu me kare te manako makitakita ua anga.” No reira, kare ta te Atua akaoko anga i tona au enemi i tetai tuatau no te akamaringi anga toto tei kare i rauka i te akaaereia, mei tetai ta anga ko koe anake ua. Te akakite maira te Puka Tapu kia tatou, “Kua kite mari te Atu i te akaora i te aronga akono i te Atua i roto i te timataanga ra, e te tāpu i te aronga tuatua-tika kore e, kia tae ki te rā akava anga, kia mate.”​—2 Petero 2:9.

Te akara atura te au tavini o te Atua ki te ra akaoko anga o te Atua ei tuatau e akamaataiaʼi te tu akono tau e ka akaoraia te aronga tuatua tika mei te takinga kino anga a te aronga kino. Kare te aiteanga e e aronga makitakita ratou me kare ra akaoko anga. Te akamatakite maira te Puka Tapu, “e ko tei rekareka i te kino ra, kare e karangaia e kare e ara.” (Maseli 17:5) I tetai tua, te tatanu ra ratou i te aroa ua e te tu tangi, te akarukeanga i tetai ua atu au tuku anga tuatua no runga i te akaoko anga ki te Atua.

E tika, kare i te mea ngoie ua no te aronga makitakita kia rave na teia tu. Inara ka rauka te reira, e e manganui tei rave i teia. Ei akaraanga, kare to Pedro utuutu angaia mai ei tamaiti i mataora ana, e ta ua ana tona tuakana iaia. No reira tona maata anga mai, kua ta ua rai aia, e putuputu aia i te o ki roto i te manamanata ma te au akava, te ta anga atu i tana vaine e te tamariki no te riri tana i manako no tona tuakana. I te openga, kua akarongo aia ki tetai o te Au Kite o Iehova e i muri mai kua akamata i te apii i te Puka Tapu. Kua tuatua aia “ma te tauturu a Iehova, kua taui au i teianei, i te mea e i ta ana i te tangata, te tauturu nei au ia ratou ei Kerititiano aronga pakari.” Ma te tauturu a te Puka Tapu e te vaerua tapu, e manganui mei teia rai tei taui mei te tu akariri me kare te akaoko atu ki te akaarianga i te tu aroa e te akakoromaki ki tetai pae.

Eaa Taau ka Rave?

Te manako tamou anga i te aerenga mai o te ra akaoko anga o te Atua ka tauturu te reira ia tatou kia rave i te tu akakoromaki o Iehova. Inara te tuatau no te rave atu i te reira kare te reira i kotingaia. Kare e roa atu ana ka tae mai te reira ra. Kua akaari te apotetoro ko Petero e no teaa ra kare i tae takere mai: “Kare ua te Atu i akaroaroa i tana i tuatua maira, mei ta tetai pae e karanga ra e, e akaroaroa; e akakoromaki maata ra tona ia tatou, kare rava i anoano e kia mate atu tetai, kia rauka katoatoa ra te tataraara.”​—2 Petero 3:9.

E ngakoikoi tikai i reira, no te akapapa i teianei no ta te Atua ra kaiouanga na te apiianga i te au Tuatua Tapu e te taangaanga anga i to reira ako anga. Ka tauturu teia ia tatou kia aru i te au tuatua a te tata taramo: “Akapakia te makitakita, e akaruke i te riri otooto: auraka toou ra kinokino kia tae roa ki te rave i te mea kino. Ka riro oki te aronga i rave i te kino ra i te tipu keia; ko te aronga ra i tapapa ia Iehova ra, ko ratou te ka noo i te enua.”​—Salamo 37:8, 9.

[Tutu i te kapi 7]

I muri ake i te ra akaoko anga o te Atua, “ko te aronga ra i tapapa ia Iehova ra, ko ratou te ka noo i te enua”