Te Autu Anga ki Rungao i te Kino

“EAA ra teianei puaka-aoa mate i akakino mai ei i taku pu i te ariki nei? teia taku tuatua kia koe, e tuku akena koe iaku e aere au e tipu mai i tona mimiti.” E patianga teia na Abisai, ko tetai pu vaeau Iseraela. Ko tana pauanga riri tikai ia i tona akarongoanga i te akakino angaia tona atu, te Ariki ko Davida, e tetai tangata Beniamina ko Simei tona ingoa.​—2 Samuela 16:5-9.

Kua tuku ua a Abisai ki tetai manako anga tei arikiia i teia tuatau nei​—te apiianga kia tamaki te ai ma te ai. Ae, kua inangaro a Abisai i te tamamae ia Simei no te au akakino anga tana i tuku ki rungao ia Davida.

Inara, eaa to Davida manako? Kua arai a Davida ia Abisai, i te tuatua anga e: “E vaoo ua atu.” Noatu tona tu apa kore i ta Simei au akakinoanga, kua arai akaaka a Davida i te timata anga kia akakino atu. Inara, kua akaruke aia i taua turanga ra ki te rima o Iehova.​—2 Samuela 16:10-13.

I te oki anga mai a Davida ki te terono i muri ake te oroanga mei tetai orureau anga manuia kore a tana tamaiti, i roto i te aronga mua tei aravei iaia e te pati i te akakoreanga ara ko Simei. Kua inangaro akaou a Abisai i te ta iaia, inara kare a Davida i akatika i te reira.​—2 Samuela 19:15-23.

I teia turanga, kua tano tikai a Davida i te akatutu ia Iesu Karaiti, ta te apotetoro ko Petero i tata ra: “Ko tei kore i akakino atu, kia akakinoia mai aia ra; . . . kua tuku ra iaia uaorai kiaia nona te manako tika ra.”​—1 Petero 2:23.

I teia tuatau nei, te akamaroiroiia maira te au Kerititiano kia akaari i te “ngakau maru, ei ngakau taunga. Auraka e tutaki atu te kino i te kino.” (1 Petero 3:8, 9) I te aruanga i te mataara ta Davida raua ko Iesu Karaiti i akanoo maira, ka rauka katoa ia tatou ‘kia mate ra te kino i te meitaki.’​—Roma 12:17-21.