Au Tangata “Mei ia Tatou Katoa te Tu”

E ARIKI aia e e peroveta oki inara e metua aroa katoa oki. Kua tupu ake tetai o tana nga tamaroa kia riro ei puapinga kore e te ngakau parau. I te manako tauta anga kia riro iaia te terono, kua akamataia e teia tamaiti tetai tamaki anga, ma te akakoro anga kia mate atu tona metua. Inara i te tamaki anga tei aru maira, ko taua tamaiti ra tei tamateia. I te kite anga te metua e kua mate tana tamaiti, kua aere atura aia ki runga i te tapoki o te pia koia anake ua e kua aue: “E taku tamaiti, e Abasaloma e! e taku tamaiti, e taku tamaiti, e Abasaloma e! naringa ko au tei mate ei tupau ia koe, e Abasaloma, e taku tamaiti, e taku tamaiti e!” (2 Samuela 18:33) Ko te Ariki ko Davida taua metua ra. Mei etai atu au peroveta ra o Iehova, koia ‘e tangata mei ia tatou katoa te tu.’​—Iakobo 5:17.

I te au tuatau Pipiria ra te au tane e te au vaine tei tuatua ra na Iehova no te au tu oraanga ravarai e kua kitea i roto i te au turanga ravarai. Mei ia tatou nei rai, e au manamanata to ratou e kua mamae katoa oki no te tu apa ua. Koai ma etai o teianei au peroveta, e i akapeea oki to ratou au tu i aite ei mei ia tatou katoa?

A Mose Mei te Irinaki Maata Rava Mai ki te Taakaaka

Ko Mose tetai peroveta rongonui i te tuatau i mua ake i te tuatau Kerititiano ra. Inara, noatu i te 40 mataiti, kare aia i papa no te tavini ei vaa tuatua no Iehova. No teaa ra? I te tuatau takinga kinoia ra tona au taeake e Pharao o Aiphiti, kua akonoia a Mose i roto i te ngutuare o Pharao e kua “mana atura aia i tana tuatua e tana ravenga.” Te akakite maira te tataanga kia tatou: “Maara akera aia e kite tona ai taeake e, e ora oki ratou iaia i te Atua” ra. No te irinaki maata rava, kua rave ta ua aia i te paruru anga i tetai tuikaa Epera ra, i te taanga i tetai tangata Aiphiti.​—Angaanga 7:22-25; Exodo 2:11-14.

I teianei kua oparaia a Mose kia oro ke atu, e kua akapou aia i tetai a raungauru mataiti ei tetai tiaki mamoe i Midiana mamao ke ra. (Exodo 2:15) I te openga o taua tuatau ra, kua 80 mataiti a Mose i teianei, kua akaueia e Iehova ei tetai peroveta. Inara kare a Mose i te irinaki maata rava. Kua manako ngakau tau kore aia uaorai e kua ekoko i ta Iehova ra akaueanga iaia ei peroveta, ma te taiku anga e, “Koai oki au, ka tae ei au kia Pharao ra?” e, “E akapeea atu au?” (Exodo 3:11, 13) Ma ta Iehova ra akapapu anga aroa e te tauturu anga, kua aere ua atu a Mose kia rave i tana angaanga ma te autu anga maata.

I tuku ana ainei koe i te irinaki maata rava mei ia Mose rai kia taki atu ia koe kia rave me kare kia tuatua te au apinga tei riro ra ei pakari kore? Me koia ia, e ariki i tetai atu terenianga ma te taakaaka oki. Me kare kua manako ngakau ainei koe e kare koe i tau kia rave i etai au apainga Kerititiano? Kare kia akakore, e ariki ra i te tauturu tei orongaia mai e Iehova e tana akaaerenga oki. Ka rauka i Tei tauturu ra ia Mose kia tauturu katoa oki ia koe.

A Elia Mei ia Tatou Katoa te Tu i Tetai Tuatau no te Ako Anga

“E tangata oki a Elia mei ia tatou katoa te tu e mate ua, e i pure viviki atura aia e, auraka ei ua: kare atura e ua i topa mai ki runga i te enua e e toru akera mataiti e e ono akera oki marama.” (Iakobo 5:17) Kua rotai ta Elia pure ma to Iehova ra anoano kia ako atu i tetai iti tangata tei akaruke maira Iaia. Inara, kua kite a Elia e ko taua tuatau maro tana i pure ra ka akatupu i te mamaeanga no te au tangata. E aronga tanutanu te maata anga o to Iseraela ra; ko te au e te ua te ora anga o te au tangata ra. Ka tupu te manamanata maata me roa te maro anga. Ka mae ua te au mea tanuia ra; e kore atu te au kai tanuia ra. Ka mate katoa te au manu rave angaanga ra e te kai katoa oki, e ko etai au pamiri ka akakokoia ma te onge. Koai ma te ka maata te mamae anga? Ko te au tangata noa ua ra. Kua akakite tetai vaine takaua kia Elia i muri akera e i topa roa tana apinga e manga varaoa okotai rima e ki e tetai manga inu. Kua manako tikai aia e kare e roa atu ka mate raua ko tana tamaiti i te onge. (1 Ariki 17:12) No Elia kia pure mei tana i rave ra, ka tau e e irinaki ngaueue kore tona e ka akono a Iehova i Tona au tavini​—te apinganui me kare te putaua​—tei kore ra i akaruke i te akamori mou. Mei ta te tataanga i akaari ra, kare a Elia i reka kore.​—1 Ariki 17:13-16; 18:3-5.

E toru mataiti i muri iora, i ta Iehova akakite anga e kare e roaia ka apai mai aia i te ua, kua kitea to Elia anoano kia kite i te openga o te tuatau maro ra i tana rave putuputu anga, i te pure akatenga e “kua tipapa iora aia ki raro i te one, kua tuku iora i te mata i rotopu i nga turi.” (1 Ariki 18:42) Kua putuputu aia i te raurau i tona tavini: “E aere ki runga i tenana, e akara tika ki tai” no etai akakite anga e kua rongo mai a Iehova i tana au pure. (1 Ariki 18:43) Mei teaa ra tona rekareka anga i te openga ra, i te pauanga ia tana au pure, “kua oronga maira i te ua, kua tupu akera te kai o te enua nei”!​—Iakobo 5:18.

Me ko koe tetai e metua me kare ko tetai o te aronga pakari i roto i te putuputuanga Kerititiano, penei ka tau koe kia kukumi ma te au manako ngakau oonu i te oronga anga akatikatika anga. Inara, ko taua au manako ngakau tangata ra ka tau kia kairoia ma te irinaki anga e e mea umuumuia te ako anga i etai tuatau, e me ka orongaia ma te aroa, “ko te meitaki ra ïa, koia rai te tuatua-tika te tupu i taua ako ra.” (Ebera 12:11) Ko te au tupu anga no te akarongo anga i te au ture a Iehova ko tetai mea anoanoia ia. Mei ia Elia rai, ka pure tatou mei te ngakau maira kia akatupuia te reira.

A Ieremia Kua Akaari i te Tu Maroiroi Noatu te Akamaroiroi Koreia

To te aronga tata Pipiria katoatoa ra, penei ko Ieremia tei maata ra te tata anga no tona uaorai manako ngakau. Ei tetai tangata ou ra, kare aia i inangaro kia ariki i tana angaanga. (Ieremia 1:6) Inara kua rave aia ma te maroiroi maata i te akakite i te tuatua a te Atua, e kua u atu aia ki te patoi anga pakari mei tona au tangata Iseraela mai​—te ariki e te tangata noa ua ra. I etai tuatau kua akatupu taua patoi anga kia riri aia e kia taʼe te roimata. (Ieremia 9:3; 18:20-23; 20:7-18) I etai atianga ke ke kua pokia aia, kua taia, kua tapekaia ki roto i tetai puta rakau, kua tapekaia i te are tapekaanga, kua tamatakuia no te mate, e kua akarukeia kia mate ki roto i te vari i raro i tetai vaarua ra. I etai tuatau noatu ko te tuatua a Iehova ra kua tamamae iaia, mei tei akatutuia maira e tana au tuatua: “E taku ngakau, e taku ngakau e! kua mamae, kua tae rava ki te paruru o toku ngakau.”​—Ieremia 4:19.

Inara, kua inangaro aia i te tuatua a Iehova, i te na koanga: “Ko taau tuatua, ko toku ïa rekareka anga, e te pereperekavana anga o toku ngakau.” (Ieremia 15:16) I taua tuatau rai, no te pekapeka kua taki atu iaia kia kapiki atu kia Iehova: “E riro ainei koe iaku nei mei te kauvai pikikaa? te vai mou kore,” mei to tetai kauvai te ka maro ngoie ua ra. (Ieremia 15:18) Inara, kua kite a Iehova i tona au manako ngakau tuke ra e kua rave ua atu i te turu anga iaia kia rauka iaia te akatupu i tana angaanga.​—Ieremia 15:20; akara katoa oki i te 20:7-9.

Kua aite ainei koe kia Ieremia, kia aro atu i te tu pekapeka me kare patoi anga i te raveanga i taau angaanga orometua ra? E akara atu kia Iehova. E aru tamou marie i tana arataki anga, e ka tutaki katoa oki a Iehova i taau au tauta anga katoa.

Ko Iesu Tetai Mei ia Tatou Katoa te Tu

Te peroveta maata rava o te au tuatau katoa ko te Tamaiti a te Atua uaorai, ko Iesu Karaiti. Noatu rai e tangata apa kore ua aia, kare aia i akakore i tona au manako ngakau. I putuputu tatou i te tatau anga i tona au manako no roto roa, tei kiteia ra i tona mata e i tana akono anga kia etai ke ra. E putuputu a Iesu i te “aroa atura” e kua taiku katoa aia i taua tuatua ra i te akataka anga i te aronga i roto i tana au akatutu anga ra.​—Mareko 1:41; 6:34; Luka 10:33.

Penei kua akateitei katoa aia i tona reo i tana tuaru anga i te aronga okooko ra e te au manu oki mei te iero ra ma te au tuatua: “Apai ke atu i tena au apinga!” (Ioane 2:14-16) I ta Petero ako atu anga iaia e, “Auraka takiri ïa, e te Atu,” kua akatupu mai i te pauanga ririnui, “Ka aere ke atu koe, e Satani, ki muri iaku.”​—Mataio 16:22, 23.

E inangaro takake to Iesu no etai aronga tei piri vaitata ra kiaia. Ko te apotetoro ko Ioane tei akatakaia ra ko te “pipi akaperepereia e Iesu.” (Ioane 21:7, 20) E ka tatau tatou: “E akaperepere a Iesu ia Mareta, e tona teina, e ia Lazaro oki.”​—Ioane 11:5.

Ka mamae katoa oki a Iesu. I te manako ngakau anga i te tumatetenga no to Lazaro ra matenga, “Aue iorā Iesu.” (Ioane 11:32-36) I te akakiteanga i te mamae ngakau tei akatupuia no tona pikikaa angaia e Iuda Ikariota, kua tuatua atura Iesu i tetai taikuanga mamae ngakau no te Salamo mai: “Ko tei kai i taku ra kaingakai, kua akateitei aia i tona poo vaevae iaku nei.”​—Ioane 13:18; Salamo 41:9.

Noatu rai iaia e kite ra i te mamae anga kino rava i runga i te rakau ra, kua akaari a Iesu i te oonu anga o tona manako ngakau. Kua oronga maru atura aia i tona metua vaine ki “te pipi akaperepere nana ra.” (Ioane 19:26, 27) I tona kite anga i te tu tataraara i tetai o nga tangata rave kino tei akatatauroia i te pae iaia ra, kua tuatua aroa atura Iesu e: “Ei Paradaiso taua katoa.” (Luka 23:43) Ka kite tatou i te manako ngakau mamae i tana kapiki ma te reo maata: “E taku Atua, e taku Atua, eaa koe i akaruke mai ei iaku?” (Mataio 27:46) E te akaea maira tana au tuatua matenga i te aroa e te irinaki anga: “E taku Metua, te tuku atu nei au i toku vaerua ki to rima na.”​—Luka 23:46.

Mei teaa ra te akapapu anga ta teianei katoatoa i oronga mai kia tatou! “Kare oki to tatou i te taunga maata e kore e tika kia aroa mai ia tatou i to tatou au paruparu nei; i rokoia katoa oki [a Iesu] i te au timataanga katoa, mei ia tatou katoa nei rai, kare rava ra e ara.”​—Ebera 4:15.

To Iehova ra Irinaki Anga

Kare rava a Iehova i tataraara i tana iki anga no te au vaa tuatua. Kua kite aia i to ratou tiratiratu ki aia, e kua manako kore, aroa ua aia i te au tu paruparu o te aronga e apa ua ra. Inara kua manakonako atu aia ia ratou kia akatupu i ta ratou angaanga. Ma tana tauturu kua rauka ia ratou i te rave i te reira.

E akaari akakoromaki marie tatou i te irinaki anga i to tatou au taeake e te au tuaine tiratiratu ra. Ka vai apa ua ra ratou i roto i teianei akatereanga o te au mea nei, mei ia tatou katoa nei oki. Inara, kare tatou e tau kia manako i to tatou au taeake ei tau kore no to tatou aroa e te manako anga. Kua tata a Paulo: “E teianei, ko tatou ko tei maroiroi nei, ka akakoromaki i te apikepike o te maroiroi kore e tikaʼi, eiaa e akatika i ta tatou uaorai.”​—Roma 15:1; Kolosa 3:13, 14.

Kua tupu ki te au peroveta a Iehova ra te au tu manako ngakau ravarai te tupu nei kia tatou. Inara, kua irinaki ratou kia Iehova, e kua akamaroiroi maira Iehova ia ratou kia autu. E tere atu oki i te reira, kua oronga atura Iehova kia ratou i te au tumu no te rekareka​—tetai akava ngakau meitaki, te kite anga i tana akaperepere anga, te au oa tiratiratu tei akamaroiroi atura ia ratou, e te akapapu anga i tetai tuatau mataora ki mua. (Ebera 12:1-3) Kia mou piri katoa oki tatou kia Iehova ma te irinaki anga ki katoa ia tatou e aru ra i te akarongo o te au peroveta i taito ra, te au tangata “mei ia tatou katoa te tu.”