Akarangatiraia Tatou no te Aroa ua o te Atua

1, 2. Akapeea a Roma 5:12 te tauturu anga ia tatou?

TE KARANGA ra a Roma 5:12: “No te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.” Ko teia tetai irava kua kite meitaki tatou e e taangaanga putuputuia ana me apii i te Pipiria ki te tangata.

² Kua taangaanga maataia teia irava i roto i te nga puka Eaa Tikai ta te Pipiria e Apii Maira? e te What Can the Bible Teach Us? Me apii tatou i te pene 3, 5 e te 6 ki ta tatou tamariki e tetai ke, e mea papu ka tatau tatou ia Roma 5:12. Penei ka taangaanga tatou i teia irava ei tauturu ia ratou kia mārama i te tumu kare te enua i te parataito, te tumu ka anoanoia te oko, e te tumu i mate ei tatou. Inara ka tauturu katoa teia irava ia tatou pouroa kia oonu atu te āriki rekareka no to tatou pirianga kia Iehova. Ka tauturu te reira ia tatou kia tauta maata i te akamareka iaia e kia tapapa ua atu i te au mea tana i taputou mai kia tatou.

3. Eaa ta tatou ka akamaara no runga i to tatou turanga?

³ Te mea mii ra, e aronga ara tatou pouroa. E rave ana tatou i te tarevake i te au rā ravarai. Inara e tu aroa to Iehova. Kua kite aia e aronga apa tatou, e ka puareinga ua aia i te akakore i ta tatou ara. (Salamo 103:13, 14) Akakite a Iesu e ka anoanoia tatou kia pati ki te Atua kia akakore mai i ta tatou ara. (Luka 11:2-4) Me akakore a Iehova i te au tarevake ta tatou i rave i mua ana, kare tatou e anoanoia kia akamanako i te reira. Ka akara ana tatou akapeea a Iehova te akakore anga i ta tatou ara.

AKAPEEA A IEHOVA ME AKAKORE I TA TATOU ARA

4, 5. (a) Eaa te ka tauturu ia tatou kia mārama ia Roma 5:12? (e) Eaa te aiteanga o te “aroa ua”?

⁴ Ko te puka a Roma, i te pene 6 tikai, ka tauturu ia tatou kia mārama akapeea a Iehova me akakore i ta tatou ara. I te pene 3, ka apii tatou e “kua ara katoatoa.” E oti akamārama a Paulo e: “I akatika uaia mai e tona aroa ua, i te ora e vai i te Mesia ra ia Iesu.” (Roma 3:23, 24) Te tuatua Ereni tei uriia e “aroa ua” te akataka maira i te rave anga i tetai angaanga takinga meitaki tikai ma te kore e tapapa atu i te tutaki, e mea kare e tika anga kia rauka e kare e tau kia orongaia.

⁵ Akamārama mai tetai tangata kite e te akataka ra teia tuatua Ereni i ta te Atua e Karaiti i rave kia akaora i te tangata mei te ara e te mate. No reira i roto i te New World Translation reo Papaa, kua uriia teia tuatua Ereni e “takinga meitaki kare e tau kia orongaia.” Ka akara ana tatou i ta te Atua i rave no tatou e akapeea tona aroa ua te riro anga ei puapinga no tatou i teianei e te manakonakoanga no te tuatau ki mua.

6. Koai ma ka puapingaia mei te aroa ua o te Atua, e akapeea ra?

⁶ No te mea kua ara a Adamu, kua ara e ka mate te aronga apa pouroa tei ora. Te tumu teia i karanga ai te Pipiria “no te ara oki a te tangata okotai ra i manaʼi te mate.” Inara kua akaari a Iehova i te maata o tona aroa ua e kua oronga i te ravenga ei akaora i te tangata katoatoa na roto i “te tangata okotai ra, ia Iesu Mesia.” (Roma 5:12, 15, 17) “Manganui oki tei akariroia ei tangata tuatua-tika i te akono a te tangata okotai ra.” E ka rauka ia ratou i te akara ki mua ki “te ora mutu kore, i to tatou Atu ra ia Iesu Mesia.”​—Roma 5:19, 21

7. No teaa ra te apinga aroa a te Atua koia te oko i riro ei ei mea takinga meitaki e kare e tau kia orongaia?

⁷ Akamanako ana i teia: Kare a Iehova i anoanoia kia oronga i tana Tamaiti ei oko. Inara kua akaari aia i te takinga meitaki maata na te oronga anga i te ravenga kia akaora ia tatou mei te ara e te mate. Kare tetai ua atu ia tatou i tau kia rauka i ta te Atua e ta Iesu i rave no tatou. Mei teaa atura to tatou āriki rekareka kua rauka ia raua i te akakore i ta tatou ara e kia ora e tuatau ua atu! Kia akaari tatou ki te Atua mei teaa te maata i to tatou āriki rekareka na roto i to tatou tu oraanga.

ĀRIKI REKAREKA I TE AROA UA O TE ATUA

8. Eaa te tu ka anoanoia tatou kia kopae?

⁸ Kua kite tatou te puareinga ua ra te Atua i te akakore i te ara, noatu e kino te reira. Inara auraka rava tatou e akariro i te aroa ua o Iehova ei kotoeanga no te rave i te tarevake ma te akamanako e, ‘Ka akakore mai a Iehova i taku ara.’ I te anere mataiti mua, noatu e te ora ra tetai pae o te au apotetoro, kua akaari tetai au Kerititiano i teia tu. (E tatau ia Iuda 4.) I teia rā, ka anoanoia tatou kia matakite auraka kia akanauruia e tetai ke e kia akamata marie i te manako akapera.

9, 10 Akapeea a Paulo e tetai pae i akarangatiraia ai mei te ara e te mate?

⁹ Akakite a Paulo ki te au Kerititiano e mea tarevake i te manako e me rave ua atu ratou i te ara, ka akakore rai te Atua i te reira. Karanga a Paulo e ka tau ratou kia kopae i teia manako no te mea ko ratou “tei mate i te ara.” (E tatau ia Roma 6:1, 2.) Eaa te aiteanga o tana tuatua?

¹⁰ Na roto i te oko, kua akakore te Atua i te ara a Paulo e te au Kerititiano o te anere mataiti mua. Kua akatainu a Iehova ia ratou ma te vaerua tapu kia riro ei tamariki nana. Me vai tiratiratu ratou, ka noo ratou i te rangi e ka tutara kapiti e Karaiti. Inara, i te mea e te ora nei ratou i te enua nei, akapeea ratou i “mate [ei] i te ara”? Kua taangaanga a Paulo i tetai akaaiteanga kia akaari e kua taui takiri to ratou tu oraanga. Karanga aia e i muri ake i to Iesu matenga, kua akatuia aia ei vaerua mate kore. Ko te tumu teia “kare oki e mana akaou te mate iaia.” Pera katoa, mei te mea rai e kua mate te au Kerititiano. Kua taui takiri to ratou oraanga no te mea kare ratou i tuku akaou i to ratou au anoano tarevake kia akatere ia ratou. Mei reira mai, kua tauta pakari ratou i te aruaru i te tu oraanga tei akamareka i te Atua. “Kua mate mou [ratou] i te kino ra, kua ora ra i te Atua, i to tatou Atu ia Iesu Mesia.”​—Roma 6:9, 11

11. Akapeea te au Kerititiano i teia tuatau i “mate [ei] i te ara”?

¹¹ Akapeea ra tatou? Akapeea tatou i “mate [ei] i te ara”? I mua ana, penei e maata te au mea tarevake ta tatou i rave ma te kore i kite i to Iehova manako no runga i ta tatou e rave ra. Kua aite rai tatou ki te “tavini no te mea viivii ra, e te kino ei rave i te kino ra,” koia oki, te “tavini anga i te kino ra.” (Roma 6:19, 20) Inara i te apiianga tatou mei te Pipiria i ta Iehova i inangaro no te oraanga, kua taui tatou i to tatou oraanga, kua akatapu ia tatou uaorai kiaia, e kua papetitoia. E anoano pakari to tatou kia akarongo kia Iehova e kia akono i te oraanga tei akamareka iaia. “Kua matara kotou i te kino,” e “kua riro io nei ra kotou ei tavini no te tuatua-tika.”​—Roma 6:17, 18

12. Eaa te ikianga ta tatou tataki tai ka rave?

¹² Noatu ra, e ikianga rai ta tatou. Karanga a Paulo: “Auraka e vai autu te kino ki roto i to kotou kopapa mate ua nei, ka akarongo ei oki kotou i te kopapa i tona anoano.” (Roma 6:12) No reira, me ka tuku ua atu tatou ki te au manako e te au anoano tarevake, me ka akatere tatou i te reira. E ui kia koe uaorai: ‘Ka tuku ainei au i toku au anoano tarevake kia tupu e kia pakari roa e ka rave i te kino? Me kore ka viviki ainei au i te kopae i te reira?’ Me āriki oonu tikai tatou i te aroa ua o te Atua, ka tauta pakari tatou i te akamareka iaia.

E TAMAKI ATU KOE I TE ARA

13. No teaa ra tatou ka papu ei e ka rauka rai i te rave i te mea tika?

¹³ I te anere mataiti mua, kua riro tetai pae aronga i Korinetia ei keikeia, sodoma, akaturi, akamori itoro, e te kona kava e kua kite ratou ia Iehova ma te inangaro iaia, e kua taui. Kua akama ratou i ta ratou i rave i mua ana. (Roma 6:21; 1 Korinetia 6:9-11) Kua anoano katoaia te au Kerititiano i Roma kia rave i te au taui anga. Akakite a Paulo kia ratou: “Auraka e orongaia to kotou kopapa ei taoonga-tamaki na te kino i te tuatua-tika kore ra; ka oronga ra ia kotou uaorai i te Atua, e to kotou kopapa ei taoonga-tamaki na te Atua i te tuatua-tika ra, mei te aronga i mate ana, e kua ora.” (Roma 6:13) Kua papu ia Paulo e ka rave ratou i te mea tika e ka puapingaia mei te aroa ua o te Atua.

14, 15 Eaa ta tatou ka ui kia tatou uaorai?

¹⁴ Koia katoa i teia tuatau. Penei kua aite rai tetai pae o te au taeake e te au tuaine ki te aronga i Korinetia. Inara i muri ake i te apiianga ia Iehova, kua taui ratou. Mei te mea rai e kua oreiia ratou kia mā. Kia akamareka ia Iehova, kua rave tatou pouroa i te au taui anga i roto i te oraanga. I teia taime katoa ka inangaro tatou kia akaari i to tatou āriki rekareka no te aroa ua o te Atua. No reira ka tauta pakari tatou i te tamaki atu i te au anoano tarevake e kia taangaanga i to tatou oraanga kia tavini ia Iehova.

¹⁵ E tika, ka anoanoia tatou kia kopae i te rave i te au ara kino mei ta tetai pae i Korinetia i rave. Kare tatou e rave ua atu i te reira e i taua taime rai ka tapapa atu i te Atua kia akaari i tona aroa ua e kia akakore i ta tatou ara. Akapeea ra te au ara ta tetai pae e manako ra e kare e kino roa ana? Ka tauta ainei tatou i te akarongo kia Iehova i te au mea ravarai?​—Roma 6:14, 17

16. Akapeea tatou i kite ei e ka anoanoia kia kopae i te au ara kare i taikuia ia 1 Korinetia 6:9-11?

¹⁶ Akamanako ana i te apotetoro ko Paulo. Kua tata aia: “No te kopapa ra au, kua okoia i raro ake i te kino. Ko taku oki e rave nei, kare oki au e akatika: e ko taku e anoano ra, kare au e rave; ko taku ra mea makitakita ra, ko taku ïa e rave nei.” (Roma 7:14, 15) Noatu kare aia i rave ana i te au mea tei taikuia ia 1 Korinetia 6:9-11, kua akakite rai a Paulo e e ara ana aia. Kua inangaro aia i te akamareka ia Iehova, no reira kua tamaki aia kia kore e rave i te au mea tarevake. (E tatau ia Roma 7:21-23.) Kia aru tatou i tona akaraanga e kia rave i te au mea ta tatou ka rauka kia akarongo kia Iehova.

17. No teaa ra koe ka inangaro ei i te akaari i te tu tika?

¹⁷ Ei akaraanga, kua kite tatou e rauka ai i te tavini ia Iehova ka anoanoia te tu tika. (E tatau ia Maseli 14:5; Ephesia 4:25.) Kare tatou e inangaro kia aite kia Satani, te “metua oki no te pikikaa.” E te maara nei tatou e kua mate a Anania e tana vaine no te mea kua pikikaa raua. No reira kare tatou e pikikaa. (Ioane 8:44; Angaanga 5:1-11) Inara no te tu tika, e maata atu te ō maira i te kopae ua i te tuatua pikikaa. Me āriki rekareka tikai tatou i te aroa ua o te Atua, ka akaari tatou i te tu tika na roto i te au mataara ke.

18, 19 Eaa te aiteanga kia akaari i te tu tika?

¹⁸ Ka akaari tetai tangata i te tu tika kore noatu e kare aia e tuatua i te pikikaa. Ei akaraanga, akakite a Iehova ki to Iseraela: “Auraka kotou e keia, auraka e tapikipiki, auraka e pikikaa ki tetai ki tetai.” No teaa ra ratou ka anoanoia ai kia rave i teia? Karanga a Iehova: “Kia tapu kotou, no te mea te tapu nei oki au, ko to kotou Atua ra ko Iehova.” (Levitiku 19:2, 11) Noatu e kare tatou e tuatua i te pikikaa, me akakeu tatou i tetai ke kia irinaki e tika te reira, e tu tika kore to tatou.

¹⁹ Ei akaraanga, akakite tetai tangata ki tona pu angaanga e te au oa angaanga e ka anoanoia kia akaruke vave i tana angaanga no te mea ka aere aia ka aravei i te taote. Inara kare ko teia te tumu tikai. Ka inangaro aia kia akaruke vave no tana orote. Ko te tika tikai i tana “aravei anga i te taote” koia oki e atoroanga viviki i te are toa vairakau me kore te opati o te taote no te tutaki pira. E tu tika ainei tona, me te akavare ra ainei i tetai ke? Kua akakeu teia tangata i tetai ke kia irinaki i tetai mea kare e tika ana. I tetai taime, ka akavare te tangata i tetai ke kia rauka mai tetai apinga ta ratou i inangaro me kore kia kopae i te utunga. Inara ka akarongo tatou kia Iehova, tei karanga e: “Auraka e tapikipiki.” Ka inangaro tatou i te rave i tana e karanga ra e mea tika e te tapu.​—Roma 6:19.

20, 21 Me āriki rekareka tatou i te aroa ua o te Atua, eaa atu ta tatou ka kopae?

²⁰ E tika, ka kopae tatou i te akaturi, te kona kava e te au ara kino. Inara tei maata atu, ka inangaro tatou i te kopae i tetai ua atu mea te ka akamareka kore ia Iehova. Ei akaraanga, kare tatou e kopae ua i te ainga tau kore, mari ra ka kopae katoa tatou i te tamataoraanga tau kore. Kare anake tatou e kona i te kava, mari ra kare katoa tatou e inu maata kia vaitata i te kona. Penei ka anoanoia tatou kia tauta pakari tikai i te patoi i te au timataanga mei teia te tu, inara ka rauka rai i te rave i te reira.

²¹ E akakoroanga to tatou kia rave i ta Paulo i karanga: “Auraka e vai autu te kino ki roto i to kotou kopapa mate ua nei, ka akarongo ei oki kotou i te kopapa i tona anoano.” (Roma 6:12; 7:18-20) E tika rai kare e rauka ia tatou i te kopae i te au ara ravarai. Inara me tamaki tatou i te tu ara ravarai, ka akaari tatou i te āriki rekareka tikai no te aroa ua ta te Atua e Karati i akaari mai kia tatou.

22. Eaa te tutaki ka tapapa atu tatou me āriki rekareka tikai i to Iehova aroa ua?

²² Kua akakore a Iehova i ta tatou au ara e ka akakore ua atu i te reira. Mei teaa atura to tatou āriki rekareka i tona aroa ua! No reira kia angaanga pakari tatou i te kopae i te rave i te au mea tana i karanga e e tarevake, noatu e ka manako tetai pae e kare te reira i te ara. Eaa te tutaki ka tapapa atu tatou me pera tatou? Karanga a Paulo: “I teianei ra, kua matara kotou i te kino, e kua riro ei tavini no te Atua, ko te tapu ta kotou e akatupu, e e ora mutu kore oki te openga.”​—Roma 6:22.