Te Akamaata ra te Oko i to te Atua Tuatua Tika

I MURI ake i to Adamu raua ko Eva meameaau anga, kua akakite Iehova i tana akakoroanga kia akatupu i tetai Uanga te ka akaparuparuia i te pooavae. (Genese 3:15) Kua akatupuia teia i te akakeuanga te au enemi o te Atua i te mate o Iesu Karaiti i runga i tetai rakau tamamae. (Galatia 3:13, 16) Kare e ara ia Iesu, mei te mea e ma te temeio kua nui mai aia e te mana o te vaerua tapu i roto i te kopu o tetai paretenia. No reira, kua rauka tona toto akamaringiia i te taangaangaia ei tutaki i te oko kia akarangatira i te au tangata ravarai, tei tu i te ara e te mate mei ia Adamu.​—Roma 5:12, 19.

Kare e rauka i tetai apinga i te tapu i te Atua mana katoatoa, ko Iehova, mei te akatupu anga i tana i akakoro. No reira, i muri ake i to te tangata inga anga i roto i te ara, mei to Iehova manakoanga kua peke te tutaki no te oko e ka rauka iaia i te angaanga atu ma te aronga tei akono i te akarongo i roto i te akatupuanga o tana au taputou. Kua akariro teia i te au uanga ara a Adamu, mei ia Enoka, Noa, e Aberahama, i te aaere e kia akataeakeia e te Atua ma te taviivii kore anga i Tona tu tapu.​—Genese 5:24; 6:9; Iakobo 2:23.

Tetai au tangata e akarongo to ratou i roto ia Iehova kua rave i te au ara kino. Ko te Ariki ko Davida tetai akaraanga. ‘Akapeea,’ i ui ei koe, ‘i rauka ai ia Iehova i te akameitaki ua atu rai i te Ariki ko Davida i muri ake i te akaturianga a Davida kia Bate-seba e oti kua akatupu i te mate o tana tane, ko Uria?’ Tetai tumu maata koia oki no to Davida tataraara anga tika tikai e te akarongo. (2 Samuela 11:1-17; 12:1-14) Akatumuia ki runga i te atinga no te tuatau ki mua o Iesu Karaiti, kua rauka i te Atua i te akakore i te au ara a Davida tataraara e kia vai tamou katoa rai i Tona uaorai tu tuatua tau e te tuatua tika. (Salamo 32:1, 2) Ei akapapuanga no teia, te akamarama maira te Pipiria eaa te akatupuanga umere maata rava o to Iesu oko, koia oki “ei akakite anga mai i tana tuatua-tika i te akakore anga i te au ara i raveia i muatangana” e “i teianei.”​—Roma 3:25, 26.

Ae, kua tae ua te au akameitakianga maata ki te au tangata ravarai no te puapinga o to Iesu toto. I runga i te tumuanga o te oko, ka rekareka te au tangata ara tei tataraara i tetai pirianga vaitata ki te Atua. Kapiti katoa, te akatuera ra te oko i te mataara no tetai tuakaouanga no tei mate i roto i to te Atua ao ou. Ka kapiti mai teia i te au tavini akarongo mou no te Atua tei mate i mua ake i tutaki ei a Iesu i te atinga e te manganui katoa tei mate kite kore ua e kare i akamori ana Iaia. Te karanga ra te Pipiria e: “E tuakaouanga to tei mate, te aronga tuatua-tika e te aronga tuatua-tika kore.” (Angaanga 24:15) I taua taime ra, tei akatumuia ki runga i te oko, ka oronga a Iehova ki te au tangata akarongo katoatoa i te ora mutu kore. (Ioane 3:36) Kua akataka mai a Iesu uaorai: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Ka tae ua teia au akameitakianga pouroa ki te au tangata ravarai no ta te Atua oronga anga o te atinga oko.

Inara, te apinga puapinga maata rava no runga i te oko, kare oki e ko te akameitakianga tei rauka ia tatou mei te reira. Ei mea puapinga maata rava atu koia oki eaa to Karaiti oko e rave ra no to Iehova ingoa. Te akapapu maira ia Iehova e e Atua no te tuatua tau apa kore tei kite i te akono i te au tangata apa ravarai e kia vai tiama ua rai e te tapu. Naringa kare te Atua i akakoro i te oronga mai i te oko, kare te uanga a Adamu, kare katoa a Enoka, Noa, e Aberahama, e rauka i te aaere ma Iehova me kore i riro mai ei taeake nona. Kua kite te tata taramo i teia e kua tata: “Naringa koe, e Iehova, e akairo ana i te au ara nei, e te Atu, koai te ka mou?” (Salamo 130:3) Mei teaa tikai to tatou akameitakianga kia Iehova no te tono mai anga i tana Tamaiti akaperepere ki te enua e kia Iesu no te oronga puareinga ua i tona oraanga ei oko no tatou!​—Mareko 10:45.