7. E au ture meitaki ta te Patireia o te Atua

E maani ana te au kavamani i te au ture puapinga ei paruru i te iti tangata. E au ture ta te Patireia o te Atua kia aru tona iti tangata. E tatau ia 1 Korinetia 6:​9-11, e oti uriuri i teia au uianga:

• Eaa toou manako i te oraanga o te tangata i teianei ao me aru ratou i te au ture meitaki a te Atua?a

• I toou manako e tau ainei kia tapapa mai a Iehova i te iti tangata o te Patireia kia akono i tana au ture? Eaa te tumu?

• Eaa te akaari maira e ka rauka i te aronga akarongo kore i te taui?​—Akara i te irava 11.

E maata te tangata kare ratou e reka ana i te pukapuka no te pirianga āinga. Inara, te akakite ra te Pipiria i te reira ma te tika e te ngateitei. Ka puapingaia tatou mei te reira. E manako meitaki tikai to te reira. E tikai, na Iehova tatou i Anga. Kua kite aia tei meitaki no tatou. Akakite mai aia eaa ta tatou ka rave no te akamareka iaia e akapeea e rauka ai te oraanga mataora e tuatau ua atu.

1. Eaa to Iehova manako no te pirianga āinga?

E apinga aroa te pirianga āinga no ko mai ia Iehova. Te anoano maira aia kia mareka te tane e te vaine akaipoipo ia raua uaorai. E apinga aroa teia ki te au tokorua kia anau i te tamariki e kia akaari i to raua inangaro na roto i tetai pirianga manea. No reira te Tuatua a te Atua i akakite ei: “Kia rekareka koe i te vaine o toou ou anga ra.” (Maseli 5:​18, 19) Te tapapa maira a Iehova i te au Kerititiano akaipoipo kia tiratiratu ki to ratou tokorua, e auraka e akaturi.​—E tatau ia Ebera 13:4.

2. Eaa te pirianga āinga tau kore?

Te akakite maira te Pipiria ‘kare te aronga kanga [āinga tau kore] e noo i te basileia o te Atua.’ (1 Korinetia 6:9, 10) Kua taangaanga te aronga tata Pipiria i te tuatua Ereni por·neiʹa kia akataka i te pirianga āinga tau kore. Te kapiti maira te reira tuatua i te (1) te pirianga āingaa i rotopu i te aronga kare i akaipoipo, (2) te oraanga homosexual, e te (3) te pirianga āinga ki te manu. Me kopae tatou i te āinga tau kore e ‘kia kore e akaturi’ ka akamareka tatou ia Iehova e ka puapingaia tatou.​—1 Tesalonia 4:3.

KIMI OONU

3. Rere ke atu mei te pirianga āinga tau kore

Kua patoi te tangata tiratiratu ko Iosepha i tetai vaine tei inangaro i te piri āinga kiaia. E tatau ia Genese 39:​1-12, e oti uriuri i teia au uianga:

• Eaa tei akakeu ia Iosepha kia oro ke atu?​—Akara i te irava 9.

• I toou manako kua rave ainei a Iosepha i te iki anga tau? Eaa ra?

VITIO: E Rere Ke Atu i te Anoano Tika Kore o te Āinga (5:06)

Inangaro a Iehova ia tatou kia kopae i te āinga tau kore. E tatau ia 1 Korinetia 6:18, e oti uriuri i teia au uianga:

• Eaa te au turanga te ka taki atu ki te āinga tau kore?

• Akapeea koe me oro ke atu i te āinga tau kore?

4. Ka rauka ia koe te patoi i te timata anga

VITIO: Tatau i te Pipiria Kia Patoi i te Timata Anga (3:02)

• Te kite anga te taeake i roto i te vitio e ka riro tona au manako e tana e rave ra kia tiratiratu kore aia ki tana vaine, eaa tana i rave?

Ka ngata rai i te au Kerititiano tiratiratu kia vai mā ua te manako. Akapeea koe me kopae i te au manako āinga tau kore? E tatau ia Philipi 4:8, e oti uriuri i teia au uianga:

• Eaa te au mea ta tatou ka akamanako?

• Akapeea te tatau Pipiria e te maroiroi i te tavini ia Iehova te tauturu anga ia tatou kia  patoi i te timata anga kia rave i te ara?

5. Puapingaia tatou mei te au turanga o Iehova

VITIO: Ngereanga i te Manako Tau (9:31)

• Akapeea te mapu tane te o anga ki roto i te timata anga?​—Akara ia Maseli 7:8, 9.

• Ia Maseli 7:​23, 26, ka tupu te kino maata mei te pirianga āinga tau kore. Me vai mā ua ra tatou, eaa te au manamanata ka kopaeia?

• Akapeea te tu mā i te pae o te tu akono me tauturu ia tatou kia rauka te oraanga mataora e tuatau ua atu?

Manako tetai pae kare o te Pipiria aroa no te aronga homosexual. Inara te inangaro maira te Atua aroa ko Iehova ia tatou kia rauka te oraanga mataora e tuatau ua atu. Ka rauka te reira me aru tatou i tona au turanga. E tatau ia 1 Korinetia 6:​9-11, e oti uriuri i teia uianga:

• I to te Atua manako, ko te au anoano homosexual ua ainei te au anoano tau kore?

Ei akamareka i te Atua, ka anoanoia tatou kia taui. Ka paunaia ainei te taime? E tatau ia Salamo 19:8, 11, e oti uriuri i teia au uianga:

• I toou manako e meitaki ainei to Iehova au turanga tau? Eaa ra, e eaa ka kore ei?

APIIANGA

E apinga aroa no ko mai ia Iehova te pirianga āinga ki te tane akaipoipo e tana vaine.

Uriurianga

• Eaa te pirianga āinga tau kore?

• Eaa te ka tauturu ia tatou kia kopae i te pirianga āinga tau kore?

• Akapeea tatou e puapinga ai me aru i te au turanga meitaki o Iehova?

KIMI KIMI

Apii kia kite eaa te Atua i anoano ei i te au tane e te au vaine tei noo kapiti kia akaipoipo.

“Eaa ta te Pipiria e Karanga ra no te Noo Kapiti Kare e Akaipoipo?” (Web atikara)

Apii kia kite kare te turanga a te Pipiria e akatupu ana i te makitakita ki te aronga homosexual.

“E Tarevake Ainei te Oraanga Homosexual?” (Web atikara)

Apii kia kite akapeea te au ture a te Atua no te pirianga ainga me paruru ia tatou.

“E Pirianga Āinga Ainei te Āinga na Roto i te Vaa?” (Web atikara)

I roto i te tua “Akono Ratou Iaku ma te Tu Ngateitei,” akara eaa tei akakeu i tetai homosexual kia taui i tona oraanga no te akamareka i te Atua.

“Taui te Pipiria i te Oraanga” (Te Punanga Tiaki, Aperira 1, 2011)

I te ao katoa, e tukeke te manako o te tangata no te kava. E reka ana tetai pae i te inu ma to ratou au oa. Kua iki tetai pae kare e inu. Kareka tetai pae te inu ra e kua kona. Eaa ta te Pipiria e akakite ra no te kava?

1. E tarevake ainei te inu kava?

Kare te Pipiria e akaapa ana i te inu kava. Kua akakite mai te Atua i te au apinga aroa e manganui, kapiti mai te Pipiria i “te wina, e rekarekaʼi te ngakau o te tangata nei.” (Salamo 104:​14, 15) Tetai au tane e te au vaine tiratiratu tei taikuia i roto i te Pipiria kua inu ana ratou i te kava.​—1 Timoteo 5:23.

2. Eaa te akoanga Pipiria ki te aronga tei inu i te kava?

Akaapa a Iehova i te inu maata i te kava e te konā kava. (Galatia 5:21) Akakite tana Tuatua: “Auraka koe e kapiti katoa ki te aronga i kona i te wina ra.” (Maseli 23:20) No reira, me ka inu tatou​—e ko tatou anake ua​—auraka tatou e inu maata kia neneva te manako, kare e rauka i te akatere i ta tatou tuatua e te angaanga, e ka kino te oraanga kopapa. Me kare e rauka ia tatou te akatere i ta tatou inu kava, e akamutu i te reira.

3. Akapeea tatou me akangateitei i te ikianga a tetai ke no te kava?

Ka iki te tangata tataki tai me ka inu i te kava. Eiaa tatou e akava i te ikianga a tetai no te inu kava ma te tau, e eiaa tatou e māro i tetai kia inu me kare aia e inangaro. (Roma 14:10) Kare tatou e inu i te kava me ka akatupu teia i te manamanata ki tetai ke. (E tatau ia Roma 14:21.) Ka kimi ra tatou kare ‘i to tatou uaorai meitaki, e kimi ra i to etai ke ra.’​—E tatau ia 1 Korinetia 10:​23, 24.

KIMI OONU

4. E iki me ka inu koe i te kava

Eaa to Iesu manako no te inu kava? E kitea ai te pauanga, akamanako i tana semeio mua i rave. E tatau ia Ioane 2:​1-11, e oti uriuri i teia au uianga:

• Mei teia semeio, eaa ta tatou i apii mai no to Iesu manako i te kava e te aronga tei inu i te reira?

• No te mea kare a Iesu i akaapa ana i te inu kava, eaa to tetai Kerititiano manako me iki tetai tangata i te inu?

Noatu ka rauka ua i tetai Kerititiano te inu i te kava, kare teia i te mea tau kia pera ua aia. E tatau ia Maseli 22:3, e oti akamanako i teia au tumu me ka inu koe:

• Ka akaoro e ka taangaanga koe i te apinga akaoro.

• Kua nui koe.

• Akakite mai te taote auraka koe e inu kava.

• E ngata te akatere i te maata taau ka inu.

• Tureia koe auraka e inu kava.

• Tei te pae koe i tetai tei kopae i te inu kava no te mea e ngata ana iaia i te akatere i tana ka inu.

Ka oronga ainei koe i te kava ki te ngai kaikai anga akaipoipo me kore i te au ngai umukai? Akara i te ka tauturu ia koe kia iki, akatangi i te VITIO.

VITIO: Kia Oronga Ainei au i te Kava? (2:41)

E tatau ia Roma 13:13 e 1 Korinetia 10:​31, 32. Muri ake te tatau anga i te irava, uriuri i teia uianga:

• Akapeea taau taangaanga anga i teia kaveinga me tauturu ia koe kia akamareka ia Iehova?

5. E iki i te maata taau ka inu

Me iki koe i te inu kava, akamaara i teia: Noatu kare a Iehova e akaapa ana i te inu kava, te akaapa ra aia i te konā kava. Eaa ra? E tatau ia Hosea 4:​11, 18, e oti uriuri i teia uianga:

• Eaa te ka tupu me inu maata tetai i te kava?

Akapeea tatou me kopae i te inu maata i te kava? Akaari i te tu mako e te kite i toou kotinga. E tatau ia Maseli 11:2, e oti uriuri i teia uianga:

• Eaa i meitaki ei kia kotinga i te maata o te kava taau ka inu e kia akamou ki reira?

6. E akamutu i te inu maata i te kava

VITIO: ‘Kare Oku Mataora i Toku Oraanga’ (6:32)

• I roto i te vitio, eaa tei tupu kia Dmitry no te inu maata i te kava?

• Kua rauka ainei iaia te akamutu vave i tana inu kava?

• Eaa tei tauturu iaia kia akakore i tona kaki i te kava?

E tatau ia 1 Korinetia 6:​10, 11, e oti uriuri i teia au uianga:

• Eaa te kino o te konā kava?

• Eaa te akaari maira e ka taui rai tetai tei inu maata i te kava?

E tatau ia Mataio 5:30, e oti uriuri i teia uianga:

• Na te tipu anga i te rima, te akatutu maira i ta tatou ka rave no te akamareka ia Iehova. Eaa taau ka rave me ngata ia koe te akakore i te inu maata i te kava?a

E tatau ia 1 Korinetia 15:33, e oti uriuri i teia uianga:

• Akapeea toou au oa me tauturu kia kite koe i te maata taau ka inu?

APIIANGA

Kua oronga mai a Iehova i te kava ei rekareka anga no tatou, inara te akaapa ra aia i te inu maata e te konā kava.

Uriurianga

• Eaa ta te Pipiria e akakite ra no te kava?

• Eaa te au mea kino me inu maata i te kava?

• Akapeea tatou me akangateitei i te ikianga a tetai no te inu i te kava?

KIMI KIMI

Akapeea te au mapu me iki meitaki me ka inu i te kava?

Akamanako Meitaki me Inu i te Kava (2:31)

Akara i taau ka rave no te akakore i te inu maata i te kava.

“Kia Tau ua Taau Inu Kava” (Te Punanga Tiaki, Tianuare 1, 2010)

Ka rave ainei tetai Kerititiano i te peu tāki anga karati?

“Au Uianga a te Aronga Tatau” (Te Punanga Tiaki, Peperuare 15, 2007)

I roto i te tua “Kaki Ua Au i te Kava,” akara akapeea tetai tangata i te akakore anga i te inu maata i te kava.

“Taui te Pipiria i te Oraanga” (Te Punanga Tiaki, Me 1, 2012)

Noatu taau akaperepere ia Iehova e kare koe e inangaro i te tamamae iaia, ka rave rai koe i te tarevake i tetai au taime. Inara, te vaira te au ara kino. (1 Korinetia 6:9, 10) Me rave koe i te ara kino, akamaara kare a Iehova i akamutu i te akaperepere ia koe; puareinga ua aia i te akakore i taau ara e te tauturu ia koe.

1. Eaa ta tatou ka rave kia akakore mai a Iehova i ta tatou ara?

Me kite te aronga tei akaperepere ia Iehova e kua rave ratou i te ara kino ka taitaia ratou. Inara te akapumaana maira a Iehova ia ratou i tana taputou ki tona iti tangata: “Aite ua rai ta kotou au ara ki te mea kutekute ra, e teatea ïa mei te kiona ra.” (Isaia 1:18) Me tataraara tatou ma te ngakau tae, ka akakore takiri a Iehova i ta tatou ara. Akapeea tatou me tataraara? Me akakeuia tatou kia tataraara ma te ngakau tae, ka akamutu tatou i te rave i te kino ma te pati akatenga kia Iehova kia akakore mai i ta tatou ara. E oti ka angaanga pakari tatou kia taui i te au manako e te au peu tarevake, e ka tauta i te aru i te au turanga mā o Iehova.​—E tatau ia Isaia 55:6, 7.

2. Akapeea a Iehova me taangaanga i te aronga pakari kia tauturu ia tatou me ara tatou?

Me rave tatou i te ara kino, te akakite maira a Iehova ‘e tiki tatou i te aronga pakari o te putuputuanga.’ (E tatau ia Iakobo 5:​14, 15.) Akaperepere te aronga pakari ia Iehova e tana au mamoe. Kua papa meitaki ratou i te tauturu e te rapakau i to tatou pirianga kia Iehova.​—Galatia 6:1.

Akapeea te aronga pakari me tauturu ia tatou me rave tatou i te ara kino? E rua me kore e toru aronga pakari te ka akatikatika mai ia tatou ma te au Tuatua Tapu. Ka akamaroiroi mai ratou ia tatou kia kore tatou e ara akaou. Ei paruru i te putuputuanga mei te au tu kino, ka akaatea te aronga pakari i tetai ua atu tei rave i te ara kino e kare i tataraara.

KIMI OONU

3. Ka ora tatou me tataraara

Me ara tatou ka mamae a Iehova, e tau rai kia tataraara tatou kiaia. E tatau ia Salamo 32:​1-5, e oti uriuri i teia uianga:

• Eaa i meitaki ei kia aaki i ta tatou ara kia Iehova auraka e uuna i te reira?

VITIO: “Ta te Atu e Akaperepere ra, ko Tana ïa e Ako Mai” (3:01)

• I roto i te vitio, akapeea te aronga pakari te tauturu anga ia Canon kia oki mai kia Iehova?

Ka anoanoia tatou kia akakite i te tika ki te aronga pakari; ka tauturu ratou ia tatou. E tatau ia Iakobo 5:16, e oti uriuri i teia uianga:

• Akapeea e māmā ei i te aronga pakari kia tauturu ia tatou me akakite tatou i te tika?

4. Aroa a Iehova i te Aronga Ara Kino

Me rave tetai tangata i te ara kino e kare e inangaro i te aru i ta Iehova au turanga, ka akaateaia aia mei te putuputuanga e kare tatou e kapiti atu kiaia. E tatau ia 1 Korinetia 5:6, 11, e oti uriuri i teia uianga:

• Mei te opue tei akaopue i te varaoa, akapeea te kapiti anga ki tetai tei ara e kare i tataraara, te takino anga i te putuputuanga?

Akapeea a Iehova me akono i te aronga ara kino na roto i te tu tau, aroa e te takinga meitaki?

5. Me tataraara tatou ka akakore a Iehova i ta tatou ara

Taangaanga a Iesu i tetai akatutuanga ei tauturu ia tatou kia mārama ia Iehova me tataraara tetai tangata. E tatau ia Luka 15:​1-7, e oti uriuri i teia uianga:

• Eaa ta teia e apii maira no Iehova?

E tatau ia Ezekiela 33:11, e oti uriuri i teia uianga:

• Eaa te takainga puapinga ei akaari e kua tataraara tikai tatou?

APIIANGA

Me rave tatou i te ara kino inara kua tataraara ma te ngakau tae e kua tauta i te akamutu i te rave i te kino, ka akakore a Iehova i ta tatou ara.

Uriurianga

• Eaa i meitaki ei kia akakite i ta tatou ara kia Iehova?

• Eaa ta tatou ka anoanoia kia rave kia akakoreia ta tatou ara?

• Me rave tatou i te ara kino, eaa tatou ka aere ei ki te aronga pakari no te tauturu?

KIMI KIMI

Akara akapeea tetai tangata te kite anga i to Iehova tu akaaroa i roto ia Isaia 1:18.

Auraka e Ekoko i to Iehova Tu Akaaroa (5:02)

Akapeea te aronga pakari me tauturu i te aronga tei rave i te ara kino?

“E Aroa e te Tangi i te ArongaTei Rave i te Ara Kino” (Te Punanga Tiaki, Aukute 2024)

Akamanako ana i te tu aroa e te tangi tei akaariia ki te aronga kare i tataraara.

“Ka Tauturu te Aronga Pakari i te Aronga Tei Akaateaia” (Te Punanga Tiaki, Aukute 2024)

I roto i te tua “Ka Inangaro Au i te Oki Kia Iehova,” apii kia kite eaa tetai tangata tei akaruke i te tuatua mou i manako ei e na Iehova i akaoki mai iaia.

“Taui te Pipiria i te Oraanga” (Te Punanga Tiaki, Aperira 1, 2012)