Te Akono Anga Okotai

Kua akamataia teia akono anga e Iesu i te ra i mate ei aia. Kua akamaaraara aia i te kaikai anga ngati Iuda o te Pasa ma tana au apotetoro. I reira kua pati atu aia i etai o te varaoa opue kore o te Pasa kia ratou, na ko atura: “Toku kopapa teia, e orongaia no kotou.” Aru mai, kua pati atu a Iesu i tetai kapu uaina, na ko atura: “Teianei kapu, ko te koreromotu ïa i toku nei toto, e akamaringiia no kotou nei.” Kua karanga katoa atu aia e: “E akapera kotou ei manako anga iaku.” (Luka 22:19, 20; 1 Korinetia 11:24-26) Teia akono anga kua kapikiia e ko te Kaikai Anga Aiai a te Atu, me kore ra ko te Akanaaroa Anga. Ko te reira anake te akono anga ta Iesu i akaue i tana au pipi kia akonokono.

E manganui te au ekaretia tei karanga e te mou ra ratou i teia akono anga kia piri atu ki tetai au kaikai anga ke atu a ratou, inara ko te maata anga te akamaaraara ra i te reira tuke mei te tu ta Iesu i akaue. Penei ko te tuke kitea uaia koia oki ko te maata o te taime e raveia ra te akono anga. Etai au ekaretia te akono ra i te reira i te au marama, te au epetoma, pera katoa i te au ra tataki tai. Ko teia ainei ta Iesu i akakoro i tona tuatua anga ki tana au pipi e: “E akapera kotou ei manako anga iaku”? Te na ko ra The New English Bible e: “E rave i teia ei akanaaroa anga iaku.” (1 Korinetia 11:24, 25) Mei teaa ra te putuputu o te akonokono anga i tetai akanaaroa anga me kore ra akamaara anga? Te mea matauia, okotai rai taime i te mataiti.

E akamanako katoa e, kua akamata a Iesu i teia akonokono anga e kua mate iora ia Nisana 14 i te karena a te ngati Iuda.a Ko te reira te ra o te Pasa, e oroa tei akamaara atu i te ngati Iuda no te akaora anga maata tei kiteaia e ratou i Aiphiti i te 16 anere mataiti M.T.N. I te reira taime kua riro te atinga o te mamoe ei ora no te au tama mua a te ngati Iuda, inara kua ta atu te angera a Iehova i te au tama mua ravarai o Aiphiti.​—Exodo 12:21, 24-27.

Akapeea teia i te tauturu anga i to tatou marama? Ina, kua tata te apotetoro ko Paulo e: “Ko te Mesia oki ta tatou pasa i taia ïa na tatou.” (1 Korinetia 5:7) E atinga Pasa maata rava atu to Iesu matenga, te orongaanga ki te tangata i te tuatau no tetai ora maata rava atu. No te au Kerititiano, i reira, te Akanaaroa Anga i to Karaiti matenga kua mono i te Pasa a te ngati Iuda.​—Ioane 3:16.

Te Pasa e akono anga ia e okotai taime i te mataiti. E tika rai, i reira e ka pera rai te Akanaaroa Anga. Te Pasa​—te ra i mate ei a Iesu​—kua tupu ua rai i te ra 14 o te marama ngati Iuda ko Nisana. No reira, e tau rai te matenga o Karaiti kia akanaaroaia okotai taime i te mataiti i te ra i runga i te karena tei aiteite ia Nisana 14. I te 1994 e Maanakai te reira ra, Mati 26, i muri ake i te opunga ra. Eaa ra i reira, te au ekaretia o Kerititome i koreʼi e akariro i teia ei ra akonokono anga takake? Na te akara anga poto ua i te tuatua enua e pau i te reira uianga.