Kua apii katoa oki a Epikuro e kare rava e ora anga i muri ake i te matenga. Inara, ko teianei te patoi ra i ta te Pipiria apiianga no te tuakaouanga. Ko te tika, i ta te apotetoro ko Paulo ra tuatua anga i te Areopago, penei ko to te Epikuro i roto i te aronga tei maro atura ia Paulo no te apiianga o te tuakaouanga ra.​—Angaanga 17:18, 31, 32; 1 Korinetia 15:12-14.

Penei ko te apinga kino rava i ta Epikuro apiianga ko te mea kikite katoa ia. Ko tana akakore anga i te ora anga i muri ake i te matenga kua taki atu iaia ki te manako anga e ka tau te tangata kia noo mataora ua i te ka rauka iaia i tona tuatau poto ki runga i te enua nei. Mei ta tatou i kite ana, kare tona manako e kia noo ua ma te rave anga ara mari ra, kia rekareka i te tu o teianei tuatau, i te mea ko teianei anake ta tatou ka kite.

E no reira, kua akamaroiroi kore a Epikuro i te raveanga tarevake kia kopae i te mataku no te kitea anga, i tetai akakoko anga tikai ki te mataora anga i teianei. Kua akamaroiroi aia i te kaikai e te inu anga tau, auraka e maata, ei kopae i te au tupu anga kikino, ei tetai atu araianga i te mataora anga i teianei. Kua akamaroiroi katoa aia i te au pirianga memeitaki ma etai ke ra no te mea e tutaki meitaki to ratou. E tika ra, ko te kopaeanga i te raveanga tarevake muna ra, te raveanga i te tu tau, e te tatanu anga au oa anga i meitaki anake ia ratou. E no reira eaa ta Epikuro apiianga i tu kino ei no te Kerititiano? No te mea kua akatumuia tana ako anga ki runga i tona akara anga akarongo kore ra: “E kai tatou, e e inu oki; apopo oki tatou e mate ei.”​—1 Korinetia 15:32.

E tika ra, te akakite maira te Pipiria ki te au tangata akapeea ratou me akono i te ora anga mataora i teianei. Inara, te ako maira ia: “Tamou tikai kotou i to kotou uaorai inangaro i te Atua, i te tatari anga i te aroa o to tatou Atu o Iesu Mesia, e tae ua atu ki te ora mutu kore ra.” (Iuda 21) Ae, te akaketaketa maira te Pipiria ki runga i te tuatau mutu kore ki mua, kare ki teianei tuatau te ngaro ke atu nei. No tetai Kerititiano, ko te tavinianga i te Atua te manakoanga maata, e kua kite aia e me tuku aia i te Atua ki te ngai mua ra, te mataora ra aia e te ki katoa ra oki. I roto i tetai tu aiteite, kare a Iesu i riro kia akapou i tona taime ma tona uaorai au inangaro ra, kua akapou i tona au ririnui ma te karapii kore i te tavini anga ia Iehova ra e te tauturuanga i te au tangata ra. Kua apii aia i tana au pipi kia rave i te meitaki kia etai ke ra, kare no te manakonako anga kia tutakiia mai, mari ra no te aroa tikai no ratou ra. Te taka meitaki ra, e ko te akakeu anga tumuanga no te apiianga Epikuro e to te akonoanga Kerititiano e tuke roa raua.​—Mareko 12:28-31; Luka 6:32-36; Galatia 5:14; Philipi 2:2-4.

Noatu rai e kua ngaro ke atu te apiianga Epikuro i te a anere mataiti T.N., te vaira i teianei tuatau te aronga te manako aiteite ra e ko teianei anake to tatou tuatau. Ko teia au tangata te tuku ra e meangiti e me kare ua e akarongo i ta te Atua ra taputou no te ora mutu kore. Inara, ko tetai papaki o ratou e turanga manga teitei to ratou i te tu akono ra.

Penei ka timataia tetai Kerititiano kia akatupu i tetai pirianga vaitata ma taua aronga ra, penei na te manako anga e ka tau ua i to ratou au tu meitaki te akaoa anga. Inara, noatu e kare tatou e manako ana ia tatou uaorai e meitaki atu ia ratou, ka tau tatou kia tauru ki roto i to tatou manako e ko te au “kapiti anga kikino” katoatoa​—kapiti katoa te aronga e mana kikite atu to ratou​—‘ka akakino i te tuatua meitaki.’

Te tu maira te apiianga e ko teianei anake to tatou tuatau ki roto i etai uipaanga pitiniti, i te au puka tauturu ia koe uaorai, te au puka tua ua, te au teata, te au porokarama tivi, e te akatangi anga imene. Noatu ra e kare e akatupu mai ana i te tu akono rave ara, ka mana ainei teianei manako akarongo kore kia tatou na roto i te au tu kikite? Ei akatauanga, ka rauka ainei kia riro kia maata roa te tuatau akapouia no tatou uaorai e ka ngaro ia tatou te manako no to Iehova ra tu ngateitei? Ka rauka ainei kia akaaere keia to tatou manako ‘kia rave ngoie ua,’ auraka “kia maata nei te rave anga i te angaanga a te Atu”? Me kare ka rauka ainei kia akavareia tatou ki te ekokoanga i te tika e te au puapinga oki o to Iehova ra au turanga? Ka tau tatou kia paruru atu i te pirianga ki te akono tau kore tikai, te ta ua, e te purepure e i taua aronga oki tei riro ra i te mana o te au manako anga o teianei ao!​—1 Korinetia 15:58; Kolosa 2:8.