Auraka e Tuku i Toou Tuatua Tika Kia Kino i Tetai

“Auraka e vavare; e kino te tuatua meitaki i te kapiti anga kikino ra.”​—1 KORINETIA 15:33.

1, 2. (a) Eaa to te apotetoro ko Paulo manako ngakau no te au Kerititiano i Korinetia, e no teaa ra? (e) Eaa te ako tikai ta tatou ka akamanako atu?

MEI TEAA ra te manako ngakau ririnui o te aroa metua ra! Te akakeu ra te reira i te au metua kia tuku atinga no ta ratou tamariki, kia apii e kia ako ia ratou. Penei kare te apotetoro ko Paulo i te metua tamariki tikai, inara kua tata aia ki te au Kerititiano i Korinetia e: “Raungauru ua atu rai i te tausani anga o to kotou orometua i te Mesia nei, kare e rainga to kotou metua: naku oki kotou i anau ei pipi na te Mesia ra na Iesu, i te evangelia nei.”​—1 Korinetia 4:15.

² I mua ua akera, i aere ana a Paulo ki Korinetia, i reira kua tutu atura aia ki te au ngati Iuda e te au Ereni. Nana i tauturu te akamata anga i te putuputuanga i Korinetia ra. I tetai atu reta na Paulo kua akaaite atu aia i tana utuutu anga ki te akono anga a tetai metua vaine ra, inara mei te metua rai aia ki to Korinetia ra. (1 Tesalonia 2:7) Mei tetai metua aroa tikai ra, kua akamaroiroi atura Paulo i tana au tamariki i te pae vaerua. Penei ka puapinga koe mei tana ako mei ta te metua rai ki te au Kerititiano i Korinetia: “Auraka e vavare; e kino te tuatua meitaki i te kapiti anga kikino ra.” (1 Korinetia 15:33) Eaa ra a Paulo i tataʼi i te reira ki to Korinetia ra? Akapeea tatou me akono i taua ako ra?

E Ako no Ratou e no Tatou

3, 4. Eaa ta tatou i kite no Korinetia i te anere mataiti ra e te maata o tona au tangata?

³ I te anere mataiti mua ra, kua tata te tangata apii i te tu o te tua o te enua ko Strabo e: “Kua tapaia a Korinetia e ‘apinga nui’ no tana angaanga okooko, i te mea e tei runga i te Itimati e koia te pu o nga ava e rua, ko tetai tei taki tika atura ki Asia, e ko tetai ki Itale; e na te reira i akariro kia ngoie ua te okooko anga i rotopu i nga enua e rua ra.” I nga rua mataiti katoa kua aere mai te au urupu mamaata ki Korinetia no te Tarekareka Anga Itimati rongonui o taua ngai ra.

⁴ Eaa te tu o te au tangata ra i te reira oire, ko te ngai ra ia no te mana kavamani e te akamori anga i te manea o Aphrodite? Kua akataka maira te Poropeta ko T. S. Evans e: “E vaitata i te 400,000 tangata i reira. I [mua ana] e totaiete teitei to ratou te kite, inara e apikepike ua te akatere anga i te tika, e ko te katoa i o ratou ra. . . . Kua akairoia te aronga Ereni o Akaia ra i te tu nga­ueue ua te kite e e maata to ratou anoano kia kite i te au tuatua rikiriki ou ra. . . . Kua ngoie ua to ratou manako no to ratou uaorai puapinga ra i te akatupu i te keanga i roto ia ratou ra.”

5. Eaa te tu kino tei aroia atu e te au taeake i Korinetia ra?

⁵ I muri akera noatu ko te putuputuanga kua tataka ke i etai o ratou tei vaira te manako akaparau tau kore ua. (1 Korinetia 1:10-31; 3:2-9) Ko tetai manamanata maata no te mea te tuatua ra tetai papaki i o ratou e: “Kare e tuakaouanga to tei mate ra.” (1 Korinetia 15:12; 2 Timoteo 2:16-18) Me eaa to ratou akarongo (me kare akarongo tarevake), kua rave a Paulo i te akatikatika i to ratou manako ma te akataka anga meitaki e “kua tu akaou tikai ra te Mesia mei te mate maira.” E na reira, kua rauka i te au Kerititiano te irinaki e ka oronga mai te Atua ra i te “re no tatou, no to tatou Atu ra, no Iesu Mesia.” (1 Korinetia 15:20, 51-57) Me ko koe tetai i reira, ka riro ainei toou manako i te mana o taua vaerua akatataka ke ra?

6. Te tau tikai ra ta Paulo ako ia 1 Korinetia 15:33 noai ma?

⁶ I te oronga anga i te akakite anga ngaueue kore e ka akatuakaouia mai tei mate ra, kua tuatua atura Paulo kia ratou: “Auraka e vavare; e kino te tuatua meitaki i te kapiti anga kikino ra.” Ko te tumu maata o teia ako anga no te aronga tei kapitiia maira ki te putuputuanga tei kore ra i akatika i te apiianga no te tuakaouanga. E papu kore ua ainei to ratou no runga i tetai tumu kare ra ratou i kite tikai? (Akaaite Luka 24:38.) Kare. Kua tata a Paulo e “eaa i tuatuaʼi tetai aronga o kotou e, Kare e tuakaouanga,” e no reira ko te aronga i tuatuaia ra te akakite ra i te kore anga e akatika, te akono ra i te patoi i te akonoanga mou. Kua kite tikai a Paulo e ka akakino ratou i te akono tuatua tika e te manakoanga o etai ke ra.​—Angaanga 20:30; 2 Petero 2:1.

7. Eaa tetai turanga te ka rauka ia tatou te akapiri atu ia 1 Korinetia 15:33?

⁷ Akapeea tatou me akono i ta Paulo akamatakiteanga no runga i te kapiti anga ra? Kare te aite anga o tana tuatua e kia akakore tatou i te tauturu i tetai i roto i te putuputuanga tei ngata ra i te kite marama i tetai irava Puka Tapu me kare tetai apiianga. E tika oki, kua raurau maira a Iuda 22, 23 ia tatou kia tauturu aroa atu i te aronga ngakau tae e au ekoko anga to ratou mei te reira ra. (Iakobo 5:19, 20) Inara, ko ta Paulo akoanga mei te metua rai, ka tau ia kia akonoia me ka rave ua atu tetai i te akaapa i ta tatou i kite ra e e tuatua mou ia no te Puka Tapu me kare ka tuatua ua i te au manako ekoko e te tu kore e akatika ra. Ka tau tatou kia matakite i te kapiti anga ma te reira tu tangata. Inara, me ka riro tetai ei patoi tikai i te akonoanga mou, ka anoanoia te au tiaki i te pae vaerua kia paruru i te anana.​—2 Timoteo 2:16-18; Tito 3:10, 11.

8. Penei e akapeea tatou i te rave anga ma te kite me ka kore tetai tangata e akatika i tetai apiianga no te Puka Tapu?

⁸ Ka rauka katoa ia tatou te akono i te au tuatua a Paulo mei ta te metua rai ia 1 Korinetia 15:33 i te aronga o vao i te putuputuanga tei turu ra i te au apiianga pikikaa. Ka akapeea tatou i te kapiti angaia ma ratou katoa ra? Penei ka tupu te reira me kare e rauka ia tatou i te akataka i rotopu i te aronga te ka rauka kia tauturuia kia kite i te tuatua mou e te aronga oki te akatu ua maira i tetai akaaoanga ei akatupu anga i tetai apiianga pikikaa ra. Ei akatauanga, i ta tatou angaanga akakitekite aere anga, penei ka aravei atu tatou i tetai tangata kare ra e akatika i tetai tumu tuatua inara te anoano ra kia uriuri manako akaou i te reira. (Angaanga 17:32-34) Kare te reira uaorai e oronga mai i tetai manamanata, no te mea ka mataora ua tatou i te akataka anga i te tuatua mou o te Puka Tapu ki tetai ua atu tei anoano tika ra kia kite i te reira, ma te oki akaou anga i te oronga akaou i te akakite anga ei akapapu. (1 Petero 3:15) Inara, penei kare tetai papaki e manako tika ana kia kitea te tuatua mou o te Puka Tapu ra.

9. Eaa te rave anga tau na tatou me ka akatupuia mai te au akaaoanga ki to tatou au akarongo?

⁹ E manganui te au tangata te ka taumaro no etai ora, i tetai epetoma e tetai epetoma, kare ra no to ratou kimi anga i te tuatua mou. Te anoano ua ra ratou kia akakino i to tetai atu akarongo ia ratou e akaariari ua ra i to ratou uaorai tu akara anga e e kite i te reo Epera e te Ereni, me kare te taineti tupu ua mai. I te araveianga ia ratou, kua manako etai Au Kite e te akaaoia maira ratou e kua riro te tupu anga ei kapiti anga akatotoaia ki runga i te akarongo akonoanga pikikaa, te apiianga, me kare e tarevake i te pae taineti. E mea meitaki kia kite e kare a Iesu i tuku kia tupu te reira kiaia, noatu rai e rauka ua iaia kia re i te taumaro anga ma te au arataki akonoanga tei apiiia ra i te reo Epera me kare i te Ereni. I te akaaoangaia, kua pau poto ua atura Iesu e kua akaariu akaou atu tona manako ki te aronga akaaka, ki te au mamoe tikai ra.​—Mataio 22:41-46; 1 Korinetia 1:23–​2:2.

10. Eaa te matakite anga tau no te au Kerititiano e komopiuta ta ratou e e kapiti atu anga to ratou ki te papa akakite anga ereketoroniki ra?

¹⁰ Kua akatuera mai te au komopiuta o teia tuatau nei i etai atu mataara ki te kapiti anga kino. Na roto i etai pitiniti okooko kua rauka i te aronga te tutaki ra i te taangaanga komopiuta e tetai tereponi, i te tuku atu i tetai tuatua ki te au papa akakite anga ereketoroniki; ka rauka i tetai tangata i te tuku ki runga i te papa akakite anga tetai tuatua te tuera ua ra ki te katoatoa o te aronga kopenga. Kua taki atu te reira ki te ravenga te karangaia ra e taumaro anga ereketoroniki i te au tumu tuatua akonoanga ra. Penei ka kikaia atu tetai Kerititiano ki roto i te reira au taumaro anga e ka akapou e manganui te au ora i te tuatua anga ki tetai tangata tei akaruke ra i te akonoanga mou tei akaateaia ra i te putuputuanga. Te akaketaketa maira te arataki anga ia 2 Ioane 9-11 i ta Paulo ako mei te metua rai no te kopae ke anga i te kapiti anga kino ra.a

E Kopae Ke i te Akavare Angaia

11. Eaa te tu tei orongaia maira i Korinetia no te turanga okooko anga?

¹¹ Mei tei akakiteia ra, ko Korinetia e ngai okooko anga ia, e manganui te au toa e te au pitiniti i reira. (1 Korinetia 10:25) E manganui tei aere mai no te Tarekareka Anga Itimia kua noo puakapa ua, e i te tuatau o taua tarekareka ra kua oko atu te aronga okooko ra i te au are apaipai me kare te au ngai okookoanga tei tapokiia ra. (Akaaite Angaanga 18:1-3.) Na te reira i raukai ia Paulo te angaanga i reira i te maanianga puakapa. E kua rauka iaia te rave i tana ngai angaanga i te akatere atu i te tuatua meitaki ra. Kua tata te Poropeta ko J. Murphy-O’Connor e: “Mei tetai toa i tetai makete maata ra te okooko anga . . . aere atu ki tetai arataa e maata ra te tangata kua aere ua a Paulo na reira, kare e ki te au taeake angaanga anake e te aronga oko, mari ra ki te aronga tini katoa i vao ra. I te au tuatau kare e maata te angaanga pitiniti kua rauka iaia i te tu i te ngutupa e kua tuatua atu ki te aronga tana i manako e ka akarongo mai . . . E mea ngata ra kia manakoia e ko tona tu oraora e te tuatua papu tikai kare i akariro viviki iaia ei ‘tetai tangata maata’ no tera ngai, e na te reira e akavaitata atu i te aronga kimi manako ra, kare i te aronga ori aere ua mari ra i te aronga kimi katoa i te tuatua anga akakite anga. . . . Te au vaine akaipoipo ma to ratou au tauturu, ko ratou tei akarongo atura iaia, kua aere atu ki reira ma te manakoia e ko te oko apinga. I te au tuatau o te manamanata, i te akakoko angaia e te takinga kino me kare te pekapeka ua ra, kua aere atu te aronga akarongo kiaia mei te mea rai e aronga oko apinga. Kua aravei katoa te aronga mana o te oire iaia no tana ngai angaanga oki.”

12, 13. Eaa te akono anga tau tikai ia 1 Korinetia 15:33 i te ngai angaanga ra?

¹² Inara, kua kite ua a Paulo i te tu me ka rauka kia tupu te “pirianga kikino” i te ngai angaanga ra. E mea tau katoa oki e ka pera tatou. E mea puapinga oki, kua taiku maira Paulo i tetai tu manako tei tupu i roto i tetai papaki ra: “E kai tatou, e e inu oki; apopo oki tatou e mate ei.” (1 Korinetia 15:32) Kua viviki ua aia i te aru atu i te reira ma tana ako anga mei ta te metua rai: “Auraka e vavare; e kino te tuatua meitaki i te kapiti anga kikino ra.” Akapeea te ngai angaanga e te kimianga i te rekareka anga i te kapiti anga i te akatupu anga i tetai tu te ka riro ei kino?

¹³ Te anoano ra te au Kerititiano kia oaoa ua ma te au oa angaanga ra, e e manganui te au tupuanga te akakite maira e i akapeea te meitaki o te reira no te akatuera anga i te mataara no te orongaanga i tetai akakitekite anga. Inara, ka rauka rai i te oa angaanga te manako tarevake no te tu oaoa, mei te patianga i te kapiti anga ra kia riro ei tuatau tamataora anga. Penei ka pati ua mai aia kia aere atu i te kaikai, e penei ki tetai tapae anga poto ua i muri ake i te angaanga no tetai inuanga kava, me kare ki tetai tamataora anga i te openga epetoma ra. Penei ka akara anga takinga meitaki ua teia tangata e te mako te tu, e penei ka akara anga kino kore ua teia patianga. Inara, te ako maira Paulo ia tatou: “Auraka e vavare.”

14. I akapeea etai au Kerititiano i te akavare angaia na roto i te kapiti anga oa ra?

¹⁴ Kua vavareia tetai papaki Kerititiano ra. Kua akatupu marie ratou i tetai tu manako maru ua no te kapiti anga ma te au oa angaanga. Penei kua tupu mai te reira no te aiteite te manako no tetai tarekareka me kare tetai ravenga. E penei ko tetai kare i te Kerititiano i te angaanga ra e tu takinga meitaki tikai tona e te manako meitaki, tei taki atu ra kia maata te akapou taime ma taua taeake ra, e kua rekareka atu aia i te reira pirianga oa i to etai no roto i te putuputuanga ra. E i muri akera kua taki atu taua kapiti anga ra kia kore e tae ki e okotai ua uipaanga. E penei kua noo roa atu i te po e kua akakore i te rave anga matauia i te rave kapiti anga i tutu aere anga i te popongi akera. E penei kua akarakara teata me kare vitio i te tu kare ra te Kerititiano e akatika ana kia akara. ‘A, kare te reira e tupu mai kiaku’ penei ta tatou ia ka manako. Inara ko te maata anga o te aronga tei vavareia penei i te akamata anga kua manako katoa na te reira mataara. Ka tau tatou kia ui kia tatou uaorai, ‘Eaa tikai toku manako papu kia akono au i ta Paulo i ako maira?’

15. Eaa te tu manako tau no tatou ki te aronga i te pae mai ia tatou ra?

¹⁵ Ko ta tatou i akamanako ua akenei no te ngai angaanga te piri katoa ra ia ki to tatou kapiti anga ma te aronga i te pae mai ia tatou nei. E tika oki, e aronga tangata to te pae mai i te au Kerititiano i Korinetia i taito ra. I etai au ngai tangata e mea matauia kia pirianga oa tikai e kia tauturu oki i te aronga i te pae mai ra. I te au ngai kare i maata te tangata penei ka irinaki tetai i tetai o te aronga o te pae mai no te takitai ua o te tangata. Te pirianga ngutuare tangata e mea maroiroi tikai i etai au tu akono anga, te akatupu ra i te au patianga e manganui no te kaikaianga. E mea tika, ka puapinga kia tau te manako, mei ta Iesu i akakite maira. (Luka 8:20, 21; Ioane 2:12) I ta tatou akono kapiti anga ma te aronga i te pae mai ia tatou e te au kopu tangata, te rave ra ainei tatou mei ta tatou i rave ana i mua ake ka riro ei tatou ei Kerititiano? Kareka ra, kare ainei e tau tatou i teianei kia akara akaou i te reira au tu akono anga e ka akamanako papu ei e eaa te au kotinga te tau ra kia akonoia?

16. Eaa te aite anga tika no ta Iesu au tuatua ia Mataio 13:3, 4 ra?

¹⁶ Kua akaaite a Iesu i te tuatua o te Patireia ki etai ua tei “topa iora tetai pae ki te pae arataa, rere maira te manu, kai iora.” (Mataio 13:3, 4, 19) I te reira tuatau, kua marokiakia te one i te pae arataa no te manganui te vaevae tei aere mai e tei aere atu na rungao. Mei te reira katoa oki te tu i te au tangata e manganui ra. Kua ki to ratou oraanga i te aronga no te pae mai, te au kopu tangata, e etai ke atura i te aerenga mai e te aere atu anga, te akatupu ra kia maata ta ratou angaanga. Kua riro te reira, mei te mea rai, te takatakaiia ra te one o to ratou ngakau, kua akariro i te reira kia marokiakia no te au ua o te tuatua mou kia akaia. Mei te reira katoa te tu ariu kore te ka tupu ma tetai kua riro ke ra ei Kerititiano ia.

17. Akapeea e raukai i te kapiti anga ma te aronga i te pae mai, e etai ke katoa ra, te akatupu anga kia tatou nei?

¹⁷ Tetai papaki o te aronga tangata i te pae mai e te au kopu tangata penei te oaoa maira e te tauturu maira, noatu rai e kare ratou e akakite mai ana i te manako no te au apinga i te pae vaerua kare katoa oki i te inangaro no te tuatua tika ra. (Mareko 10:21, 22; 2 Korinetia 6:14) Kare te aite anga o to tatou riroanga ei Kerititiano e kua kore tatou e oaoa atu, e kua kore e akono ei tangata no te pae maira. Kua ako maira Iesu ia tatou kia akakite i te manako i etai ke ra. (Luka 10:29-37) Inara e aiteite katoa oki te akauruia e te umuumuia ta Paulo ako anga kia matakite i to tatou au kapiti anga. Ia tatou e akono ra i te ako mua ra, ka tau katoa oki tatou kia kore e akangaropoina i te mea openga ra. Me ka kore tatou e tamou i nga kaveinga e rua ra i roto i te manako, ka rauka kia akatukeia ta tatou au ravenga. Eaa te aiteite anga taau au ravenga ma to te aronga i te pae mai ia koe ra me kare i toou kopu tangata i te pae o te tu tiratiratu me kare te akarongo anga i te ture a Kaisara ra? Ei akatauanga, penei ka manako ua ratou e i te tuatau tutaki tero ra, te tika ua ra te tata ki raro ake taau moni i koi ei me kare te moni no te pitiniti, e tau oki no te ora anga. Penei ka tuatua akakeu ratou i to ratou au manako i te tuatau inu anga kapu kaope ra e i tetai aravei anga poto ua ra. Eaa ta te reira ka akatupu ki toou manakoanga e taau au ravenga tiratiratu ra? (Mareko 12:17; Roma 12:2) “Auraka e vavare; e kino te tuatua meitaki i te kapiti anga kikino ra.”

Au Ravenga Mapu Katoa Oki

18. Eaa i piri katoaʼi a 1 Korinetia 15:33 ki te aronga mapu ra?

¹⁸ E maata atu te tupu anga kino ki te aronga ou ra no ta ratou apinga e akarakara e e akarongorongo ra. Kare ainei koe i kite ana i te au tamariki tei aite atura ta ratou au ravenga e te au tu akono ki ta to ratou nga metua me kare tungane e te tuaine? Kare tatou e tau kia poitirere, i reira, e ka maata te mana o te au oa kangakanga me kare te au oa apii o ta tatou tamariki. (Akaaite Mataio 11:16, 17.) Me te kapiti atura taau tamaroa me kare tamaine i te au mapu tuatua akangateitei kore atu i to ratou nga metua, eaa koe ka manako ei e kare te reira e akatupu i te kino no taau tamariki? Akapeea me ka putuputu ratou i te akarongo anga i etai atu mapu i te tuatua anga i te reo viivii? Akapeea me ka inangaro to ratou au oa i te apii me kare i te pae mai i etai tamaka e tu ou ra e etai poe e tuke ra? Ka tau ainei tatou kia manako e kare e riro ke te au Kerititiano ou i te mana o te reira? I tuatua ainei a Paulo e e kotinga to te mataiti te ka tau no ratou te tuatua ia 1 Korinetia 15:33 ra?

19. Eaa te manako tau na te au metua kia tauta i te akatupu ki roto i te ngakau o ta ratou tamariki?

¹⁹ Me ko koe tetai e metua, te akamanako ra ainei koe i taua ako ra ia koe e uriuri manako ra e te tuku tika ra no taau tamariki? Penei ka riro ei tauturu me ka akatika koe e kare te aite anga o teia e pouroa te aronga mapu te takapini ra i taau tamariki i te pae mai me kare i te apii e kare anake e meitaki. Penei ko tetai papaki i o ratou ra e meitaki e te mako, mei etai o te aronga i te pae mai ia koe ra, te au kopu tangata, e te au oa angaanga katoa oki. E tauta kia tauturu i toou uanga kia kite i teia e kia kite te tau ra taau akono anga i te ako pakari a Paulo, mei ta te metua rai ki to Korinetia ra. Me kite ratou i te tu tau o taau rave anga, ka rauka i te reira i te tauturu ia ratou kia aru ia koe.​—Luka 6:40; 2 Timoteo 2:22.

20. Te au mapu, eaa te akaaoanga ta kotou e aro atu nei?

²⁰ Ko kotou te aronga e ou ra, e tauta kia kite e akapeea te akono anga i te ako a Paulo ra, ma te kiteanga e e puapinga maata ia no te au Kerititiano ravarai, te aronga ou e te ruaine katoa oki. E akaaoanga tikai teia, inara eaa ka kore ei e aravei atu i te reira akaaoanga? E manako oki e no te mea kua kite ke ana koe i tetai papaki o taua aronga mapu ra mei te tamariki anga mairai kare e riro tona aite anga e kare ratou e akakino i taau au ravenga, kare e kino toou tu akono anga e akatupu ra ei mapu Kerititiano.​—Maseli 2:1, 10-15.

Au Takainga Papu kia Paruru i ta Tatou Au Ravenga

21. (a) Eaa te anoanoia ra no tatou no runga i te kapiti anga oa? (e) Eaa ka papu ei ia tatou e e kino etai au kapiti anga oa ra?

²¹ Pouroa tatou te anoano ra i te kapiti anga oa. Inara, ka tau tatou kia matakite, i te tika e ka riro to tatou kapiti anga oa ei akatupu i te meitaki, me kare i te kino no tatou. Kua tupu te reira kia Adamu e ki te aronga katoa oki i te au anere mataiti mei reira mairai. Ei akatauanga, ko Iehosaphata, e ariki meitaki ia no Iuda, e kua rekareka aia i ta Iehova ra akaperepere anga e tana akameitaki anga. Inara i muri ake i tana akatika anga i tana tamaiti kia akaipoipo i te tamaine a te Ariki ko Ahaba no Iseraela, kua akamata a Iehosaphata i te kapiti atu anga kia Ahaba. Na te reira kapiti anga kino vaitata te taka ke atu to Iehosaphata ora anga. (2 Ariki 8:16-18; 2 Paraleipomeno 18:1-3, 29-31) Me ka rave tatou i te ikianga pakari kore i te kapiti anga oa no tatou, ka riro te reira mei te reira rai te tu kino.

22. Eaa tatou ka mou manako ngakau ei e no teaa ra?

²² E mou tatou, i reira, i te ako aroa ki to tatou ngakau ta Paulo e oronga maira kia tatou ia 1 Korinetia 15:33. Kare te reira i te au tuatua ua penei te akarongo putuputuia ra e tatou te ka rauka ua ia tatou i te taiku akaou mei to tatou manako. Te akaata maira ratou i te aroa metua o Paulo no tona au tungane e te au tuaine i Korinetia ra, e, kua akatotoaia mai oki kia tatou nei. E kare e ekoko anga te vaira i reira te ako ta to tatou Metua i te rangi e oronga maira no te mea te anoano ra aia kia puapingaia ta tatou au tautaanga.​—1 Korinetia 15:58.

[Au Tataanga Rikiriki i Raro]

Maara Ainei Ia Koe?

◻ Eaa tikai te tumu i tataʼi a Paulo ia 1 Korinetia 15:33?

◻ Akapeea tatou me akapiri atu i ta Paulo ako anga i te ngai angaanga ra?

◻ Eaa te manako tau no tatou i te aronga i te pae mai ia tatou ra?

◻ Eaa a 1 Korinetia 15:33 i tau tikai ei ako anga i te au mapu ra?

[Tutu i te kapi 17]

Kua akono a Paulo i tona ngai angaanga ei akatere atu anga i te tuatua meitaki

[Tutu i te kapi 18]

Ka rauka i etai mapu ke atura i te akakino i taau au ravenga Kerititiano ra