‘Opuia no te Aravei i te Atu’​—Akapeea?

TE AERE ua atura te tare anga ki te openga o te akatereanga kino i teianei ma te taui koreia. I te ora ravarai, te miniti ravarai, te tekoni ravarai, e pati ra, te atoro atura tatou i te au rave anga kaka tei totouia i tetai tuatau i topa ra. Ko te raputia ainei tetai ia ratou? Me koia ia, aea e akapeea e tupu ei?

Te tuatua “raputia” kare te reira i roto i te Puka Tapu. Inara ko te aronga tei irinaki ra i te reira te taiku ra ratou i te au tuatua a te apotetoro ko Paulo i roto ia 1 Tesalonia 4:17 ei tumu no ta ratou irinaki anga. Ka akara matatio ana tatou i teia irava i tona akapapa anga. Kua tata a Paulo:

“E te au taeake, kare matou e inangaro ia kotou kia manako kore i te aronga e moe ra i te mate; kia kore kotou e maromaroa mei ta tetai papaki e rave ra kare o ratou manakonakoanga. I te mea e ko to tatou akarongo e kua mate a Iesu e kua tu akaou mai, pera katoa rai, te aronga tei moe ra i te mate na roto ia Iesu ra ka apai mai te Atua ma ia ra. Ko teia oki ta matou e akakite kia kotou i ta Iehova tuatua, e ko tatou te ora ra te ka ora atu i te parutia o te Atu ra kare e rokoia e te aronga tei moe ra i te mate; no te mea e ka eke mai te Atu uaorai mei te rangi mai ma tetai kapikianga akauenga, ma te reo o tetai angera maata rava atu e ma te pu a te Atua, e te aronga tei mate ra ma te taokotai atura kia Karaiti ka tu mai ratou na mua. I muri akera ko tatou te aronga ora tei ora ra, kapipiti ma ratou ra, ka opuia ki te au tiaorangi no te aravei i te Atu i roto i te mareva; i reira tatou e vai ua rai ma te Atu ra. No reira e tamou ua rai i te akapumaana i tetai e tetai ma teia au tuatua.”​—1 Tesalonia 4:13-18, NW.

Te ou ra rai te putuputuanga i Tesalonia i to Paulo tuatua anga i tana reta mua ki te au Kerititiano i reira i te 50 T.N. Kua taitaia te au mema o te putuputuanga i te mea e ko etai o to ratou numero ‘te moe ra i te mate.’ Inara, ko ta Paulo i tata ra kua akapumaana te reira i te au Tesalonia ma te manakonakoanga o te tuakaou anga.

To Karaiti “Parutia”

Koi akapapu ei e ka akatuia mai te au Kerititiano akarongo tei mate ra, kua karanga katoa a Paulo e ko: “Te ora ra te ka ora atu i te parutia o te Atu ra kare e rokoia e te aronga tei moe ra i te mate.” (Irava 15) Ma te kiteaia, e tikai, ko te tuatua a te apotetoro no runga i te “parutia” o te Atu ra. I konei te taangaanga ra te akapapaanga reo mua i te tuatua Ereni pa·rou·siʹan, koia te aite anga tikai “i konei i te pae tikai.”

Me atoro tetai upoko ke o te Teite i tetai enua, te maata anga o te taime ka akakite uaia te ra o tona parutia. Kua tika teia i te parutia o te Atu ko Iesu Karaiti. Kua oronga putuputu ana Te Punanga Tiaki i te kite anga tika ki te aronga apiipii ma te ngakau tika no te totou Puka Tapu e kua akamata to Iesu parutia ma te mana Patireia i te rangi i te 1914. Te akatika ra te au rave anga mei te reira mataiti mai i to Iesu parutia kitea koreia. (Mataio 24:3-14) No reira na te karangaanga e ko tetai au Kerititiano te noo ra i te tuatau o te parutia o te Atu ra e “ka opuia ki te au tiaorangi no te aravei i te Atu i roto i te mareva,” te aite anga tikai o ta Paulo tuatua, ko taua aronga tei ora ra ka aravei ratou ia Karaiti, kare i roto i te mareva o te enua nei, mari ra i roto i te vananga rangi kitea koreia te ngai te noo ra a Iesu i te tua katau o te Atua. (Ebera 1:1-3) Inara koai ratou?

“Te Iseraela o te Atua”

E maata ta te au Tuatua Tapu e karanga ra no runga i te au Iseraela kopapa e pera katoa te tuatua ra no runga i te “Iseraela o te Atua” i te pae vaerua. Ko te au ngati Iuda e te au Kenitara irinaki ra tei akaki i te numero katoa o teia pupu akatainuia e te vaerua tapu o te Atua, me kore te ririnui maroiroi. (Galatia 6:16; Roma 11:25, 26; 1 Ioane 2:20, 27) Te akaari maira te puka o Apokalupo e te numero katoa o Iseraela vaerua e 144,000, tei akatutu katoatoaia ma te Punua Mamoe ra, ko Iesu Karaiti, i te Maunga Ziona i te rangi ra. I te pae ia Karaiti, ka riro ratou ei au ariki e te kautaunga i te rangi. (Apokalupo 7:1-8; 14:1-4; 20:6) Kapitiia mai ki roto ia ratou ko te aronga tei piri atura ki te putuputuanga i Tesalonia e tetai atu au ngai, noatu to ratou kara me kore enua i aere mai ei.​—Angaanga 10:34, 35.

I mua ake ka raukaʼi i tetai ua atu au mema akarongo o te Iseraela vaerua tetai tutaki i te rangi, e tau ratou kia piri ki roto i tetai kite anga. Mei to Iesu matenga i runga i te rakau tamamae i mua ake i tona tuakaou anga ki te ora i te au rangi ra, pera katoa rai te au Kerititiano e manakonakoanga to ratou no te rangi kia mate i mua ake ka raukaʼi ta ratou tutaki. (1 Korinetia 15:35, 36) Te tika ra te reira i te au mema o te Iseraela vaerua tei noo i te anere mataiti mua T.N. e taua au tu tangata rai te ora ra i teia tuatau.

I muri ake i te taikuanga i “te parutia o te Atu,” kua tou a Paulo ki te taime e raukaʼi i te au Iseraela vaerua akarongo ra tei mate ra i ta ratou tutaki i te rangi. Kua tata aia: “Ka eke mai te Atu uaorai mei te rangi mai ma tetai kapikianga akauenga, ma te reo o tetai angera maata rava atu e ma te pu a te Atua, e te aronga tei mate ra ma te taokotai atura kia Karaiti ka tu mai ratou na mua.” (1 Tesalonia 4 Irava 16) No reira, te akamata mua anga to Iesu parutia ei Ariki, ka tapapa i reira tatou kia akamata i te tuakaouanga i te rangi, te akamataanga ki te aronga o te Iseraela vaerua tei mate takere ei aronga akono tika. (1 Korinetia 15:23) Te tavini ra ratou i teianei i te pae ia Iesu i te rangi. Inara akapeea te au Kerititiano iti ua tei akatainuia te ora nei rai i te enua nei? Ka tapapa ainei ratou i te raputia?

“Opuia”​—Akapeea?

I muri ake i te tuatuaanga ki te au Kerititiano akatainuia tei mate ra, kua tuatua a Paulo e: “I muri akera ko tatou te aronga ora tei ora ra ka, kapipiti ma ratou ra, ka opuia ki te au tiaorangi no te aravei i te Atu i roto i te mareva; i reira tatou e vai ua rai ma te Atu ra.” (Irava 17) “Te aronga ora” ko ratou te aronga te ora ra i te tuatau o to Karaiti parutia. Ka “opuia” ratou no te aravei i te Atu ra ko Iesu. Mei te tu ra o te au Kerititiano akarongo mua ra, ka anoanoia te mate no ratou ei tangata ra e taokotai atu ei ma Karaiti ra i te rangi.​—Roma 8:17, 35-39.

Te tataanga ki te au Kerititiano i Korinetia, kua akakite a Paulo e: “Teia ra taku tuatua, e te au taeake, kare te kopapa toto nei e te kiko e noo ki te basileia o te Atua; kare oki te mea pe ua ra e noo ki te ngai pe kore. Ina, e akakite atu au kia kotou i te tuatua ngaro; Kare tatou e ope i te moe, e ope ra tatou i te akatu keia, Kare e mamia, mei te kamo anga mata nei, kia tae ki te pu openga ra: e tangi tikai oki te pu, e e akatuia tei mate ma te pe kore, e e akatu keia tatou.” (1 Korinetia 15:50-52) I te mate anga ma te akarongo i te tuatau o to Karaiti parutia, ka rauka viviki i te toenga takitai o Iseraela vaerua tana tutaki i te rangi. “Mei te kamo anga mata nei,” kua akatuia aia ei mea vaerua e te “opuia” no te aravei ia Iesu e te tavini ei tutara tauturu i roto i te Patireia o te au rangi ra. Inara akapeea tetai atu aronga te akamori ra ia Iehova? I te openga o teia akatereanga kino e vaitata maira, ka opu katoaia ainei ratou ki te rangi?

Ora Anga Atu​—Inara Kare na te Raputia Anga

I te mea e kua akamata to Iesu parutia puapinga i te 1914, te oonu ra tatou i teianei ki roto i “te tuatau openga ra” o teianei ao. (Daniela 12:4) Kua akamatakite a Paulo e: “I te au atianga e te au tuatau ra, e aku au taeake, kare e anoanoia no te tata atu kia kotou. Kua kite pu oki kotou e te aere maira te ra o Iehova mei te keia tikai i te po ra. Te taime e tuatua ei ratou: ‘E au e te tinamou!’ e rokoia mai ei ratou e te akapou anga viviki mei te mamae taitaia ra o tetai vaine nui; e kare rava ratou e ora atu.” (1 Tesalonia 5:1-3, NW) Inara ka ora atu te au Kerititiano tei matakite ra. Akapeea?

Te aue anga “E au e te tinamou!” e akakite anga te reira i te tuatau tei kapikiia e Iesu e ko te “tumatetenga maata.” Te akatutuanga i tetai “urupu maata” o te aronga akarongo ra tei rauka te manakonakoanga o te oraanga atu ma te mutu kore ki roto i tetai enua parataito, te karanga ra te puka a Apokalupo e: “Ko teia te aronga tei aere mai mei roto mai i te tumatetenga maata, kua orei i to ratou kakau e kua akateatea i te toto o te Punua Mamoe.” (Apokalupo 7:9, 14, NW; Luka 23:43) Kare, e kare to ratou i te manakonakoanga raputia. Mari ra, tei ia ratou te manakonakoanga o te ora anga atu ki runga tikai i te enua nei. Ei akapapa no te reira, kia vai araara ua rai ratou i te pae vaerua. Akapeea e raukaʼi ia koe te rave i teia e te ora atu i te openga o teia akatereanga?

Te anoanoia ra koe ‘kia tamou i toou tu matakite e kia aao i te tapoki umauma o te akarongo e te aroa e ei pare i te manakonakoanga o te ora.’ (1 Tesalonia 5:6-8, NW) Ko teianei te taime no te akarongo i te Tuatua totou a te Atua, koia te Puka Tapu. I te au tekoni e pati ra e tae ua atu ki te openga o teia akatereanga, e aru i ta Paulo ako anga: “Auraka e akono i te au totouanga ma te kino ra. E akapapu i te au mea ravarai; e mou pakari i tei meitaki ra.” (1 Tesalonia 5:20, 21, NW) No reira ka turou mai te Au Kite o Iehova ia koe ki to ratou au Are Uipaanga Patireia, te ngai e raukaʼi ia koe i te piri atu kia ratou i roto i te apii anga i te au totou Puka Tapu e tetai atu au mea o te Tuatua akauruia a te Atua.

Ia koe e tupu ra ma te kite tika tikai e te akarongo, ka kite koe i te angaanga anga o ta te Atua ko Iehova akakoroanga no te akaatea takiri i tona au enemi mei teianei ao e pini ua ake e te akaoki i te enua ei parataito. Na te taangaanga anga i te akarongo, penei ko koe katoa tetai i rotopu i te aronga te ka ora atu i te tumatetenga maata, tei akameitakiia no te turou mai i te mirioni ua atu te ka akatuia mai ki te ora i te enua nei. E mei teaa te rekareka i reira no te noo i raro ake i te Patireia o te Atua i te rima o Iesu Karaiti e tona au tutara tauturu, tei ‘opuia no te aravei i te Atu’ na te akatu angaia mai ki te ora i roto i te vananga o te rangi!

No te au tangata akarongo noa nei, eaa te manakonakoanga Tuatua Tapu tikai? Kare e ko tetai raputia anga. Mari ra, ko te oraanga mutu kore i te enua nei i raro ake i te tutara anga o te Patireia o te Atua.

[Tutu i te kapi 7]

Na te aronga te ka ora mai i te tumatetenga maata e turou mai i te aronga tei akatuia ki te ora i runga i tetai enua parataito i raro ake i te tutara anga a Iesu e te aronga tei “opuia” ki te rangi