“Kia Rave i te au Mea Ravarai no te Akakaka i te Atua”
Te au Akataka Anga a Korinetia Tai
TE KAKA o te Atua ko Iehova e mea puapinga te reira ki te katoatoa rava tei akamori iaia “ma te vaerua e te tuatua-mou.” (Ioane 4:23, 24) No reira, kua akakite atu te apotetoro ko Paulo ki te au taeake Kerititiano i roto ia Korinetia taito: “Noatu e te kaikai ra me kore te inu ra me kore te rave ra i tetai ua atu au mea ke, kia rave i te au mea ravarai no te akakaka i te Atua.” (1 Korinetia 10:31, NW) Te rave i te reira ka anoanoia tatou kia ariki i ta Iehova mataara no te akakoreanga i to tatou au manamanata i roto i teia ao apinganui, te akaturi tei oonu ki roto i te akonoanga atua tarevake.
Kua anoano oki te au Kerititiano Korinetia i tetai tauturu no te Atua mai ei akakore atu i te au manamanata i te mea e te noo nei ratou ki roto i te oire tupu puapinga, oire akaturi tei ki i te akonoanga tarevake. Ka kitea aia i runga i te isthmus (e potonga enua oiti, pauanga i nga enua e rua) i rotopu i te enua maata ia Ereni e te Peloponnisos, e ko Korinetia oki te oire maata o te tuanga enua o te Roma ko Achaia e kua tamanakoia e 400,000 tangata i reira. Na Paulo oki i akamata i te putuputuanga i reira i te mataiti 50 T.N.—Angaanga 18:1-11.
Kua tata atu oki te au Korinetia kia Paulo i te uianga atu no runga i te akaipoipo e te kai anga i te kiko tei orongaia atu ki te au itoro. (7:1) Kua taitaia aia no te mea te vaira te ke e tetai manata akaturi maata i rotopu ia ratou. Te anoano nei oki ratou i te tauturu tei tau koia oki te mataara no te akamaara i te Kaikai Aiai a te Atu. Te vai katoa ra oki te manata o te akarukeanga i te akarongo, e kua anoano te putuputuanga i te ako no runga i te aroa. No te reira au tumu, kua tata a Paulo i tana reta mua tei akauruia e te vaerua ki te au Korinetia mei Ephesia mai i te mataiti 55 T.N. Ka puapinga katoa ra tatou mei te reira.
Taokotaianga e te tu Akono Ma e Puapinga Ia
Ia tatou “kia rave i te au mea ravarai no te akakaka i te Atua,” kare ia tatou e aru i tetai ua atu tei kimi i te akatakake anga i roto i te putuputuanga—tetai oki ia i te au manamanata tei taii te au Korinetia. (1:1–4:21) Kua akamaroiroi atu a Paulo ia ratou kia ‘tuatua okotai e kia taokotaiia i te manako aiteite e te aerenga manako aiteite.’ (NW) Ka tupu te taokotai me ka aru tatou i teia ako e te tatanu i te au tu pae vaerua. Auraka oki tatou e akateitei i roto i tetai tangata ara, kia maara tatou e noatu e na tatou i ‘tanu e te tamauu ki te vai, na te Atua i akatupu’ i te pae vaerua. Te aronga akateitei i Korinetia kare oki a ratou i rauka e kare i te me oronga; no reira auraka oki tatou e manako ia tatou uaorai e e meitaki atu i te au taeake akarongo. Ko te reira tu vaerua akaaka ka tauturu te reira ia tatou kia akamaata i te taokotai anga.
E autu ei te taokotai anga, kia tauta tikai te aronga pakari akataoongaia ra kia tauta kia vai ma ua i te pae vaerua o te putuputuanga. (5:1–6:20) I te mea ei “e opue te putunga katoa i te akaopue meangiti ra,” te au akaturi tataraara kore, te aronga noinoi, te aronga morimori, te au akakino, te au kona kava, me kore te aru, e tau kia akaateaia. Te ma kore i te tu akono, te ka akaviivii i to te Atua iero, auraka rava te reira e arikiia i rotopu i to Iehova iti tangata. Mari ra, kia rave ratou i te au mea te ka akakaka i te Atua.
Kia Manako Rai i Etai Ke
“Kia rave i te au mea ravarai no te akakaka i te Atua,” e tau tatou kia taangaanga i ta Paulo ako no runga i te akaipoipo e te noo takaua ra. (7:1-40) Te aronga tei taokotaiia i roto i te akaipoipo anga kia oronga rai i te pirianga ainga ma te manako tau. Auraka rava e Kerititiano tei akaipoipo e takake atu mei te tokorua kare i roto i te akarongo, penei na te noo kapiti anga ka tauturu te reira iaia kia rauka te ora. I te mea e ka apai mai te akaipoipo kia maata te manata, te noo takaua ka puapinga te tangata tei anoano i te tauturu i etai atu i te pae vaerua na roto i te tavini anga i te Atu ma te tamanamanata kore.
Te akaari anga i te manako tau no te pae vaerua o etai ke e apainga anake ia na te au Kerititiano ravarai, tei noo takaua me kore te akaipoipo. (8:1–10:33) No reira, kua akoia te au Korinetia kia kore e tatipake i etai ke na te kai anga i te au kai tei oronga ia ki te au itoro. Kia rauka kia kore e kopae i tetai ua atu kia ariki i te tuatua meitaki, kare rava oki a Paulo i taangaanga i tona tika kia rauka mai tetai tauturu i tana i anoano. Kua ‘papa aia i tona kopapa e i muri ake iaia tuatua ai ki etai ke, kia kore oki aia e kopae ia.’ Te manako ngakau anga i te au aerenga metepara o Iseraela akarongo kore ka tauturu te reira ia tatou kia kopae i te akamori itoro e te rave tarevake. Tetai katoa, te rave i te au mea ravarai no te akakaka i te Atua ka tauturu te reira ia tatou kia kopae i te tatipake i tetai ua atu.
Akaari i te Akangateitei e Tamou i te tu Mako
Te ‘raveanga i te au mea ravarai no te akakaka i te Atua’ ka anoano te reira e kia akaari tatou i te tu akangateitei. (11:1-34) Tetai vaine Kerititiano o te anere mataiti mua kua akaari aia i te ngateitei no te taooanga upoko na roto i te aao anga i te tapoki katu iaia e pure ra me kare i te totouanga i roto i te putuputuanga. Mei te reira rai te ngateitei e oronga ana te au vaine akono atua i teia tuatau. Tetai katoa, kia kore oki e riro atu mei te au Korinetia tei anoano i tetai akatikatika anga, kia akaari tatou katoatoa i te ngateitei no te Kaikai Aiai a te Atu.
“Kia rave i te au mea ravarai no te akakaka i te Atua,” kia raveia te uipaanga i te mataara mako. (12:1–14:40) Me putuputu mai te au Kerititiano mua, te au mea aroa o te vaerua koia te tuatua i te au reo keke kua raveia te reira ma te ngateitei e te ariki e noea mai te reira e te akakoroanga. Noatu oki e kare ia tatou teia au mea aroa i teianei, ka apai mai tatou i te kaka ki te Atua na te akaari anga i te aroa, tei runga rava atu ia ratou. Ka akakaka katoa ia Iehova no te mea ta tatou au uipaanga kua mako te akapapa anga, e te tamou marie nei tatou i te rave i te ako a Paulo: “E rave ra te au mea ravarai ma te tika e te manea.”
Te ‘raveanga i te au mea ravarai no te akakaka i te Atua’ ka anoanoia tatou kia akono i te apiianga Puka Tapu e kia tu tinamou i te pae vaerua. (15:1–16:24) Tetai papaki i roto i te putuputuanga Korinetia, kua akakeuia e te apiianga tangata a to Ereni e: “Kare e tuakaouanga to tei mate ra.” (Akaaiteia atu kia Angaanga 17:18, 32) Penei kua mou rai ratou ki te manako akaruke e kare e tuakaouanga no te tuatau ki mua mari ua te au Kerititiano e ora ra kua kite i tetai mea akatutu ua, i te pae vaerua. (2 Timoteo 2:16-18) Kua turu ra a Paulo i te manakonako anga tika i te akara anga atu i to Iesu uaorai tuakaouanga e kua akaari katoa atu e ko te au Kerititiano akatainuia kia mate roa ratou e raukai i te akatuia mai ei ki te oraanga mate kore i te rangi. I tetai au tu, kua riro tana au tuatua i te tauturu ia tatou kia kopae i te akarukeanga e “kia tu tinamou ki roto i te akarongo.”—NW.
Rave Ua Atu Rai i te au Mea i te Akakaka i te Atua
Te ako a Paulo i roto ia Korinetia Tai e mea puapinga te reira no teia tuatau mei tei tupu i te anere mataiti mua T.N. Ka akakeu te reira i te au Kite o Iehova o teia ra, kia tavini i te Atua te taokotai anga ei iti tangata ma. Ka riro te au tuatua a te apotetoro i te opara ia tatou kia manako rai i etai ke atu e kia akaari i te ngateitei tau. Ka riro katoa ta Paulo i tuatua i te akamaroiroi ia tatou kia kopae i te akarukeanga e kia tu tinamou no te akarongo mou.
E tika oki e, te anoano ngakau o te au tavini akono o Iehova e kia akameitaki iaia, kia akakite i tona Patireia, e te akakaka i tona ingoa tapu. (Salamo 145:1, 2, 10-13) Te tika oki, ta Paulo reta mua ki te au Korinetia ka tauturu te reira ia tatou “kia rave i te au mea ravarai no te akakaka i te Atua.”
[Pia/Tutu i te kapi 24, 25]
PAPU KA MATE: Maata atu i te taime okotai i roto i tana au reta ki te au Korinetia, kua taiku a Paulo i te mate i roto i te aua tamataora. Ei akaraanga, kua tata aia e: “Te manako nei au kua akataka te Atua ia matou i te au aposetolo nei ei openga, mei te aronga i akonoia no te mate ra, kua akariroia oki matou ei akaraanga na to te ao, na te au angela, e na te tangata.” (1 Korinetia 4:9) Penei te manako ra a Paulo i te au mea akaariari anga bestiarii (te au tangata tei akataia atu ki te au manu taae) e te au tumutoa (te au tangata tei ta i te tangata). Tetai papaki kua ta kia tutakiia, kareka ra te au mouauri kua oparaia ratou kia ta. Te mea mua kua tika ia ratou kia rave na ratou tetai taoonga tamaki, i muri ake kua apaiia mai teia au mouauri ki vao ma te apinga tamaki kore te paruru kore, e te papu e ka mate.
Te “au angela” e te “au tangata” (auraka e ko te tangata ua o “te ao nei”) te aronga akarakara, kua riro te au apotetoro mei te aronga rai ka mate i te tu mate akamaringi toto. Kua tuatua a Paulo e: “I kukumi na au i te au puaka taae i Ephesia,” inara kua ekoko tetai papaki i te mea kare te tangata Roma e o ana ki teia e kia tuatua e kua riro atu ana aia ki te aronga patoi tu manu taae. (1 Korinetia 15:32) Inara, ta Paulo akakite anga e kua akaora mai te Atua iaia “i taua mate maata” i roto i te tapere ko Atia (te ngai tei reira a Ephesia) kua tano tei tupu ki te au puaka taae tika tikai i roto i te ngai tamataora kua tau atu teia ki te patoianga tangata.—2 Korinetia 1:8-10; 11:23; Angaanga 19:23-41.
[Pia/Tutu i te kapi 25]
E TUKU I TE TUTAKI KIA KITEA ATU: Kua rave mai a Paulo i te au akaraanga o te au tarekareka o Ereni taito ei akatutu atu i te au tumu puapinga. (1 Korinetia 9:24-27) I roto i teia au tamataora anga mei te Tarekareka Isthmus e raveia ana i te rua o te au mataiti ravarai i te pae ia Korinetia, kua akanooia te porokarama no te oro anga, te moto, e etai atu au tarere. Me akateateamamao no teia au tarekareka, te aronga oro, e te moto, kia tapupu ratou uaorai, e kia kai i te kai vaito akamaroiroi, e auraka oki e inu i te uaina e tai ngaru marama. Kare oki e ko te ei paina me kare te aivi (ivy) pe ua te ka orongaia ki te aronga tei re i te Tarekareka Isthmus, inara, te au Kerititiano akatainuia ka tauta ratou no te korona pe kore o te oraanga mate kore. E raukai te reira tutaki, e tau aia kia akamou i tona nga mata ki runga i te reira e kia akono meitaki. Ka tau katoa oki te reira kaveinga ki te au Kite o Iehova tei a ratou te manako oraanga e tuatau ua atu i te enua nei.