Eaa ka Ripoti ei i te Rave Anga Kino?

“KO TEI apai mai i tetai tumu ki te atea ka riro ia ei enemi no te au tangata ra,” ta tetai papaki i tuatua i Aperika Opunga. Ko te reira tei tupu kia Olu i tana akaapa anga i tona tuakana no te ainga tau kore i tona tuaine ra. “E pikikaa koe!” kua aoa atu te tuakana. I reira kua papa kino atura aia ia Olu, e kua tuaru atu iaia mei te ngutuare o te pamiri, e kua tutungi i te au kakau katoatoa o Olu. Kua turu te aronga o te vira ra i te tuakana. Kua kore aia i inangaroia i taua vira ra, kua aere ke atu a Olu i reira. No muri mai anake i te kitea anga e kua nui taua tamaine ra i kite ei te au tangata ra e kua tuatua a Olu i te tuatua mou. Kua aaki te tuakana i te tika, e kua akaoraia a Olu kia akaperepereia. E riro ua te au apinga kia tuke roa. Penei ka taiaia a Olu.

Te taka meitaki ra, ko te aronga kare o ratou inangaro no Iehova penei kare e ariki kia akakite maramaia ta ratou apa i rave. Te tu manako o te tangata rave ara kia akakore i te akoanga e ka riri oki i tei oronga i te reira. (Akaaite ia Ioane 7:7.) No reira rai i riro ei e manganui te ka muteki ua mei te au toka ra me ka tae ki te akakiteanga i te au tarevake o etai ke ra ki te aronga mana taoonga kia akatikatika ia ratou.

Arikianga i te Puapinga no te Akoanga

Inara, i roto i te au tangata o Iehova, te vaira tetai tu manako tuke no te akoanga. Te au tane e te au vaine tau i te Atua te ariki oonu ra i ta Iehova akanoonoo anga ei tauturu i te aronga apa i roto i te putuputuanga Kerititiano. Te kite ra ratou i taua akoanga ei tetai akakite anga i tona aroa takinga meitaki.​—Ebera 12:6-11.

Penei ka tau teianei kia akatutuia ma tetai tupu anga i te oraanga o te Ariki ko Davida ra. Noatu rai e e tangata tuatua tika aia mei tona mapu anga maira, te vaira tetai tuatau i topaʼi aia ki roto i te raveanga tarevake kino roa. Te mea mua, kua akaturi aia. I muri akera, i te tauta anga kia tapoki atu i tana tarevake, kua akapapa aia kia tamateia te tane a taua vaine ra. Inara, kua akakiteia e Iehova ta Davida ara kia Natana peroveta ra, ko tei aravei mataku kore atura ia Davida no taua tumu ra. Na te taangaangaanga i tetai akatutu anga ririnui, kua ui atura Natana kia Davida e eaa te ka tau kia raveia ki tetai tangata apinganui e manganui ra tana au mamoe inara kua rave atu e kua ta i te punua mamoe okotai, tei akaperepereia, na tetai tangata putaua ei angai atu i tona oa. Ko Davida, e tiaki mamoe i mua ana, kua tupu tona riri e te riri otooto. Kua tuatua maira aia: “Ko te tangata i pera ra, e tau tikai iaia te mate!” I reira kua akapiri atura Natana i taua akatutu anga ra kia Davida, i te na ko anga: “Ko koe rai taua tangata ra!”​—2 Samuela 12:1-7.

Kare a Davida i riri ia Natana; kare katoa aia i tauta kia paruru iaia uaorai e kare oki aia i riri atu i tei akaapa maira iaia. Mari ra, kua akakeu oonu ta Natana akaapa anga i tona akava ngakau. Puta atura tona ngakau, kua aaki a Davida e: “Kua ara au ia Iehova.”​—2 Samuela 12:13.

Kua akatupu i te au ua meitaki ta Natana akakite atea anga i te ara a Davida, tei aruia atu e tetai akoanga tau i te Atua ra. Noatu rai kare a Davida i paruruia i te au tupu anga no tana rave tarevake, kua tataraara aia e kua riro kia akaongiia kia Iehova ra. Eaa to Davida manako anga no taua akoanga ra? Kua tata aia: “Ka pāpā mai te tangata tuatua-tika ra iaku, e mea takinga-meitaki ra ïa; ka akamura mai oki aia iaku ra, ka riro ïa mei te manongi meitaki ra, kare toku mimiti e paruparu i te reira.”​—Salamo 141:5.

I to tatou tuatau katoa oki, ka rauka ua te au tavini o Iehova kia o atu ki roto i te raveanga tarevake kino, pera te aronga kua tiratiratu no te au mataiti e manganui. I te kiteanga e ka rauka i te aronga pakari te tauturu mai, ka tamata te maataanga io ratou ra kia aravei atu ia ratou no te tauturu. (Iakobo 5:13-16) Inara i etai taime penei ka tauta tei rave ra i te tarevake kia tapoki atu i tana ara mei ta te Ariki ko Davida ra. Eaa ta tatou ka rave me ka kite tatou i tetai raveanga tarevake kino i roto i te putuputuanga ra?

Naai te Reira Apainga?

Me kite te aronga pakari ra i tetai raveanga tarevake kino, ka aravei atu ratou i tei rave tarevake ra kia oronga atu i te tauturu umuumuia ra e te akatikatika anga. Na te aronga pakari taua apainga ra kia rave i te akava anga i taua aronga rave kino i roto i te putuputuanga Kerititiano ra. Na te tiaki anga piri vaitata i te turanga pae vaerua o te reira, ka tauturu ratou e ka akamaroiroi i tetai ua atu tei rave ra i tetai takainga pakari kore me kare tarevake.​—1 Korinetia 5:12, 13; 2 Timoteo 4:2; 1 Petero 5:1, 2.

Inara ka peea me kare ko koe tetai o te aronga pakari ra e ka kite koe i tetai raveanga tarevake kino na tetai o te aronga e Kerititiano ra? Ka kitea te au kaveinga i roto i te Ture ta Iehova i oronga ki te iti tangata o Iseraela ra. Kua akakite mai te Ture e me e kite tetai tangata i te au angaanga apoteiti, akatakake anga, ta anga, me kare etai atu au rave anga kikino, nana te apainga kia ripoti i te reira e kia akakite i tana i kite ra. Te tuatua ra a Levitiku 5:1: “Kua kite te tangata i te tuatua taputou ra, e kua riro aia ei kite, e kare aia e akakite i tana i akara e tana oki i kite ra, kua ara ïa aia, kua apai i te ara ki runga iaia uaorai.”​—Akaaite ia Deuteronomi 13:6-8; Esetera 6:2; Maseli 29:24.

Noatu rai kare i raro ake i te Ture a Mose, ka rauka kia aratakiia te au Kerititiano o teianei tuatau na te au kaveinga turu i te reira ra. (Salamo 19:7, 8) No reira me ka kite koe i tetai raveanga tarevake kino a tetai taeake Kerititiano ra, eaa taau ka tau kia rave?

Akonoanga i Taua Tumu Ra

Te mea mua, e puapinga maata kia kite e e tumu tikai tetai kia irinaki e kua raveia tetai raveanga tarevake kino. “Auraka koe kia riro ei kite taeke ua i to tangata tupu ra,” ta te tangata pakari ra i tuatua. “Auraka to vaa kia pikikaa i tetai ke.”​—Maseli 24:28.

Penei ka iki koe kia aere tika atu ki te aronga pakari ra. Kare i te tarevake kia rave i te reira. Inara, te mea matauia, ko te ravenga aroa maata kia aravei atu i tei rave i te tarevake ra. Penei kare te au tika i tei manakoia ra. Me kare penei kua akono keia taua turanga ra e te aronga pakari ra. E uriuri manako maru ua i taua tumu ra ma taua tangata ra. Me te vaira tetai tumu kia irinakiia e kua raveia tetai tarevake kino, e akamaroiroi atu iaia kia aravei i te aronga pakari no te tauturu, e ka akataka atu i te pakari no te raveanga i te reira. Auraka e tuatua kia etai ke ra no taua tumu ra, no te mea ka riro te reira ei urutoe.

Me ka kore taua tangata ra e ripoti atu ki te aronga pakari ra i tetai tuatau tau, ei reira ka tika naau ia e rave. Ka riro na tetai me kare e rua o te aronga pakari i reira e uriuri manako i taua tumu ra ma tei akaapaia ra. Ka umuumuia te aronga pakari ra kia “ui [ratou] i reira, e makitoro marie, e e ui maei oki” kia kite me kua raveia tetai tarevake. Me kua raveia te reira, ka akono ratou i taua tumu ra kia tau ki te au kaveinga Tuatua Tapu.​—Deuteronomi 13:12-14.

E rua nga kite te umuumuia ra ei akapapu anga i tetai akaapa anga no te raveanga tarevake ra. (Ioane 8:17; Ebera 10:28) Me ka akakore taua tangata ra i te akaapa anga e ko taau anake ua te akakite anga, ka akaruke uaia taua tumu ra ki roto i to Iehova ra rima. (1 Timoteo 5:19, 24, 25) Ka raveia teia i te kite anga e “te maeu rava” nei kia Iehova e me kua apa taua tangata ra, i te openga “ka rokoia” aia e tana ara.​—Ebera 4:13; Numero 32:23.

Inara ka peea me ka kore taua tangata ra e akatika i te akaapa anga e ko koe anake te kite tei akakite ra iaia. Ka riro ainei koe i teianei kia tau kia akaapaia no te tuatua akakino? Kare, mari ra kia rave anake koe i te urutoe atu kia etai ke ra kare i o atu ki taua tumu ra. Kare ia i te tuatua akakino anga kia ripoti ki te aronga mana taoonga i te au turanga te akatupu kino ra ki te putuputuanga, e na ratou te apainga kia akaaere e kia akatikatika i te au tarevake. Ko te tika ra, te tau ra ia ma to tatou anoano kia rave marie i te mea tika e te tiratiratu oki.​—Akaaite ia Luka 1:74, 75.

Tamou Marieanga i te Tu Tapu i te Putuputuanga

Ko tetai tumu no te ripotianga i te raveanga tarevake koia oki ka akono te reira i te tu ma o te putuputuanga. E Atua ma a Iehova, e Atua tapu. Te umuumu ra aia i te aronga katoatoa te akamori ra iaia kia ma i te pae vaerua e te akono tau oki. Te akamaroiroi maira te Tuatua akauruia: “Mei te tamariki akarongo ra, auraka e akaarite ia kotou uaorai i te au inangaro taito i to kotou kamakura anga ra; Mei iaia i kapiki mai ia kotou e tapu ra, kia tapu katoa kotou i ta kotou tuatua ravarai ra; Kua oti oki i te tataia e, ‘Kia tapu kotou; te tapu nei oki au.’” (1 Petero 1:14-16) Ka rauka i te aronga tataki tai te rave ra i te tu viivii me kare ravenga tarevake kia apai mai i te tu viivii e te mareka kore anga a Iehova ki runga i tetai putuputuanga katoa ra me ka kore e raveia te akatikatika anga me kare kia akaateaia atu ratou ra.​—Akaaite ia Iosua, pene 7.

Te akaari maira te au reta a te apotetoro ko Paulo ki te putuputuanga Kerititiano i Korinetia i akapeea te ripotianga i te raveanga tarevake i te akatupu anga i te tamaanga i to te Atua ra au tangata i reira. I roto i tana reta, kua tata a Paulo: “I karangaia oki e kanga tei o kotou na, e kanga oki kare rava i kitea ki o te etene katoa ra, tei tetai tangata te vaine a tona uaorai metua tane.”​—1 Korinetia 5:1.

Kare te Pipiria i akakite mai kia tatou e no ea mai teia ripoti i raukaʼi i te apotetoro ra. Penei kua akakiteia taua turanga kia Paulo mei ia Setephana mai, ia Foratunato, e ia Akaiko, tei aere maira mei Korinetia ki Ephesia te ngai i noo ei a Paulo. Kua rauka katoa oki ia Paulo tetai reta ma te au uiui anga mei ko mai i te putuputuanga Kerititiano i Korinetia ra. Me no ea mai te tumu, i te ripoti angaia taua turanga ra kia Paulo e te au kite irinakiia ra, kua rauka iaia i reira i te oronga te arataki anga no runga i taua tumu ra. “E akataka ke atu kotou i taua tangata tuatua kino i roto ia kotou na,” i tata ei aia. Kua akaateaia te reira tangata ki vao i te putuputuanga.​—1 Korinetia 5:13; 16:17, 18.

I apai mai ainei ta Paulo apiianga i te au tupu anga meitaki? E tikai! I te akara anga, kua rako tangata maira aia. I te rua o tana reta ki to Korinetia ra, kua raurau atura Paulo i te putuputuanga “e akakore atu kotou i tana ara, e e akapumaana atu” i taua tangata tataraara ra. (2 Korinetia 2:6-8) E no reira kua taki atu te ripotianga i te raveanga tarevake ra i te akatupu anga i te tamaanga i te putuputuanga e te akaora anga i tetai tangata tei akakino ra i tona pirianga ma te Atua kia akaperepere akaouia e te Atua ra.

Ka kitea e tatou tetai atu akatauanga i roto i ta Paulo reta mua ra ki te putuputuanga Kerititiano i Korinetia ra. I teia taime kua taiku mai te apotetoro ra i te au ingoa o te au kite tei ripoti mai i taua tumu ra. Kua tata aia: “Kua akakiteia mai au ia kotou, e aku au taeake, e to te ngutuare o Keloe, e e taumāro anga tei rotopu ia kotou na.” (1 Korinetia 1:11) Kua kite a Paulo e ko teia pekapeka, kapiti katoa ma te orongaanga akangateitei tau kore ki te au tangata, kua akatupu i tetai tu manako akonoanga tei akakoko ra kia akapou i te taokotai anga o te putuputuanga. E no reira, no te manako anga oonu no te meitaki o tona au taeake akarongo i reira ra i te pae vaerua, kua rave viviki a Paulo e kua tata i te akoanga akatikatika ki te putuputuanga ra.

I teia tuatau te rave pakari ra te au taeake e te au tuaine i te au putuputuanga takapini te enua katoa kia akatinamou i te tu ma i te pae vaerua o te putuputuanga na te tamou marieanga te aronga tataki tai i tetai turanga marekaia ki mua i te Atua ra. Kua tamamaeia tetai papaki i te rave anga i te reira; kua mate etai i te vai tiratiratu anga. E tika tikai ko te tuku ua anga me kare te tapoki anga i te raveanga tarevake ka akaari i te ngere i te ariki anga no teianei au tauta anga.

Tauturu no te Aronga Rave Tarevake

Eaa ra tetai papaki tei topa ra ki roto i te rave anga ara kino i kore ei e aravei atu i te aronga pakari ra? E putuputu oki no to ratou kore i kite i te puapinga no te aereanga ki te aronga pakari ra. Ko tetai papaki kua irinaki tika kore ua e me ka aaki ratou, ka akakiteia ta ratou ara ki te putuputuanga katoa ra. Ko etai ka akavare i to ratou uaorai manako no te tu kino o ta ratou i rave ra. Te vaira etai atu te ka manako e ka rauka ia ratou kia akatikatika ia ratou uaorai ma te kore ua e tauturu anga na te aronga pakari ra.

Inara te umuumuia ra te tauturuanga aroa e taua aronga rave tarevake mei ko mai i te aronga pakari o te putuputuanga ra. Kua tata a Iakobo: “Te mate ra aina tetai o kotou i te maki? e tiki aia i te aronga pakari o te ekalesia ra; e na ratou e pure iaia ma te akatainu iaia i te manongi i te ingoa o te Atu ra: E e ora taua maki ra i te pure akarongo, e na te Atu aia e akatu ki runga; e i rave na aia i te ara ra, e akakoreia tana ara.”​—Iakobo 5:14, 15.

Mei teaa ra tetai oronga anga meitaki kia tauturu i te aronga tei apa ra kia akaoraia ratou i te pae vaerua! Na te orongaanga i te akoanga maru mei te Tuatua a te Atua e na te pureanga no ratou, ka rauka i te aronga pakari i te tauturu i te aronga te maki ra i te pae vaerua kia ora mai i to ratou au aerenga tarevake ra. No reira, kare e manako ngakau akaapa uaia, e putuputu te aronga tataraara i te akapumaanaia e kia akaoraia me aravei atu ratou ma te aronga pakari aroa ra. Kua rave akaturi tetai tangata ou no Aperika Opunga ra e kua tapoki atu i tana ara no etai marama. I muri ake i te kitea anga tana ara, kua tuatua aia ki te aronga pakari ra: “Mei teaa ra toku inangaro kia ui mai tetai kiaku no runga i toku pirianga ma taua tamaine ra! E matara anga meitaki tikai kia apai mai i teianei apinga ki te atea.”​—Akaaite ia Salamo 32:3-5.

E Raveanga Aroa Tei Tau te Kaveinga

Kua kite te au tavini papetitoia o te Atua e “mei te mate mai [ratou], e tei te ora mai nei.” (1 Ioane 3:14) Inara me ka rave ratou i te ara kino, kua oki akaou ratou ki te aerenga no te mate. Me kare ratou e tauturuia, penei ka akaketaketaia ratou i te raveanga tarevake, ma te kore e anoano kia tataraara e kia oki akaou ki te akamori anga i te Atua mou ra.​—Ebera 10:26-29.

Ko te ripotianga i te raveanga tarevake e angaanga ia no te manako anga tikai no tei rave tarevake ra. Kua tata a Iakobo: “E aku au taeake ra, kia tatipake tetai o kotou i te tuatua-mou nei, e na tetai aia i akaoki mai; Kia kite mai oki taua tangata ra e, ko tei akaoki mai i te tangata ara i taua apa nana ra, e vaerua tei ora iaia i te mate, e e manganui te ara te ngaro iaia.”​—Iakobo 5:19, 20.

E no reira, eaa ka ripoti ei i tei kino ra? No te mea te akatupu ra te reira i te meitaki. E tika tikai, kia ripoti i tetai raveanga tarevake e raveanga aroa ia tei tau te kaveinga Kerititiano tei akaariia ki te Atua ra, ki te putuputuanga, e ki tei rave i te tarevake ra. Me mou tiratiratu te au mema tataki tai o te putuputuanga ra i ta te Atua au turanga tuatua tika ra, ka akameitaki tikai a Iehova i te putuputuanga katoa ra. Kua tata te apotetoro ko Paulo e: “Nana [na Iehova] e akatinamou ia kotou e tae ua atu ki te openga, auraka ei akakinoanga i te rā o to tatou Atu ra o Iesu Mesia.”​—1 Korinetia 1:8.

[Tutu i te kapi 26]

E tu aroa te akamaroiroi anga i tetai Kite rave tarevake kia tuatua ki te aronga pakari

[Tutu i te kapi 28]

Ka tauturu te aronga pakari kia akaora i te aronga rave tarevake kia marekaia e te Atua