Noea Mai to Ratou Maroiroi?

ME AKARA meitaki koe i te pepe i roto i teia tutu, ka kite koe e e puapinga kore tikai okotai ona nga peau e a. Noatu ra, ka rave ua atu te pepe i te kaikai e te rere aere. Kare teia i tetai akara anga tuke takiri. Kua kiteia ana te au pepe i te rave anga i ta ratou angaanga i te au ra ma te 70 patene te ngai i runga i to ratou peau kare i reira.

Ma te aiteite rai, e manganui te au tangata te akaari ra i tetai vaerua ngaueue kore tikai. Noatu te mamaeanga i te au manamanata pae kopapa me kore manako ngakau, kare ratou e tuku i te au.​—Akaaite ia 2 Korinetia 4:16.

Kua akakoromaki tikai te apotetoro Paulo i te au tu ngata maata i te tuatau o tona au tere mitinari. Kua papaia aia, kua rutuia, kua peia i te toka, e kua tapekaia. Pera katoa, kua mamae aia i tetai manamanata anga, penei ko tona nga mata, tei riro ra ei ‘tara i tona kopapa.’​—2 Korinetia 12:7-9; Galatia 4:15.

Tetai tangata pakari Kerititiano ko David, tei putoto ra ma te au tamaki anga pakari o te taitaia no tetai au mataiti roa, te irinaki ra aia kua riro to Iehova maroiroi ei mea puapinga tikai ki tona meitaki anga mai. “E maata te au taime, kua riro te tere anga ki mua tei rauka ei mea te ngaro atura,” i nana ei. “I roto i taua akamaroiroi kore anga, kua titiri au iaku uaorai kia Iehova, e kua akamatutu tikai aia iaku. Kua vai te au ati anga i pou ei iaku te au ora i toku pure anga. I toku tuatua anga kia Iehova, kua ngaro toku au manako ngakau maromaroa e te manako puapinga kore. Kua putoto ana au ma te au tuatau paruparu maata, inara ma te akameitaki kia Iehova, mei toku paruparu ra kua tupu mai te maroiroi​—pera katoa te maroiroi no te tauturu i tetai atu.”

Kua akamaroiroi te Atua ko Iehova ia Paulo. No reira, i raukaʼi iaia i te tuatua: “Kia paruparu oki au ra, te maroiroi ra au i reira.” (2 Korinetia 12:10) Ae, kua riro to Paulo au tu paruparu ei apii iaia kia irinaki ki runga i to te Atua maroiroi. “E tika iaku te au mea ravarai nei i te Mesia, ko tei akamaroiroi mai iaku nei,” i karangaʼi te apotetoro. (Philipi 4:13) E tikai na Iehova e akamaroiroi ana i tona au tavini.