Te Mana o te Pure

Te opu ra te ra ki rungao i te oire o Nahora i te Itinga Rotopu. Kua tae mai tetai tangata Suria ko Eliezera tona ingoa ma te au pupu kamera e tai ngauru i ko i tetai ruavai i vao ake i te oire. Kare e ekoko anga e kua roiroi e te kaki ra i te vai, kua manako maata a Eliezera i te au anoano o tetai ke. Kua aere mai aia mei tetai enua ke i te kimi i tetai vaine na te tamaiti a tona pu. Pera katoa, kia kimi aia i teia vaine i roto i te au kopu tangata o tona pu. Akapeea aia me akatupu i teia angaanga ngata?

TE IRINAKI ra a Eliezera i roto i te mana o te pure. Ma te akarongo umere, mei to tetai tamaiti rai, kua pati akaaka atu aia: “E Iehova e, e te Atua no toku pu no Aberahama e, te pure nei au ia koe, e akamanuia mai koe iaku i teianei rā, e takinga-meitaki mai koe i toku pu ia Aberahama. I na, te tu ua nei au i te ruavai nei; e te aere mai nei te au tamaine a te au tangata o te oire nei e uti i te vai: E teianei, ko te vaine taku e karanga atu e, Ka tuku mai ana taau āriki vai kia inu au; e kia tuatua mai aia e, Ka inu, e ka akainu katoa au i te au kamela naau, kia riro aia i te vaine tikai i akonoia e koe na to tavini na Isaaka; ka kite oki au i reira e, kua takinga-meitaki mai koe i taku pu.”​—Genese 24:12-14.

Kare i puapinga kore to Eliezera irinaki papu i te mana o te pure. Eaa ra, ko te vaine mua tei aere mai ki te ruavai ko te mokopuna ia na te teina o Aberahama! Ko Rebeka tona ingoa, e vaine takaua aia, e tu akono meitaki, e te manea. Ma te poitirere, kare anake aia i oronga i te vai kia inu a Eliezera mari ra kua rave takinga meitaki i te akapangia i te kaki o tana au kamera. I muri mai, i muri ake i tetai uriuri anga kopu tangata, kua akatika puareinga ua a Rebeka i te aru ia Eliezera ki tetai enua mamao kia riro mai ei vaine na te tamaiti a Aberahama ko Isaaka. Mei teaa te pau anga tika ua e te taka meitaki ki ta Eliezera pure i te tuatau e akao temeio mai ana te Atua i roto i te au tupu anga!

E maata te ka rauka ia tatou i te apii mai mei ta Eliezera au pure. Kua akaari mai te reira i tona akarongo meitaki, te tu akaaka, e kare i manako iaia uaorai mari ra i te au anoano o tetai ke. Kua akaari katoa mai ta Eliezera pure i tona tu kauraro ki ta Iehova tu akonoanga i te tangata. Kare e ekoko anga kua kite aia i to te Atua piri anga takake ma Aberahama e pera katoa i Tana taputou e ka aere mai te au akameitaki anga a te tuatau ki mua ki te au tangata ravarai na roto ia Aberahama. (Genese 12:3) No reira, kua akamata a Eliezera i tana pure ma teia au tuatua: “E Iehova e, e te Atua no toku pu no Aberahama.”

E uanga a Iesu Karaiti no Aberahama e na roto iaia e raukai te akameitaki anga no te au tangata akarongo ravarai. (Genese 22:18) Me te inangaro ra tatou i ta tatou au pure kia pauia mai i teia tuatau, ka anoanoia tatou kia akaari i te akakite anga akaaka no ta te Atua tu akonoanga i te au tangata ravarai na roto i tana Tamaiti. Kua tuatua a Iesu Karaiti: “I topiri mai kotou kiaku ra, e kia noo marie taku tuatua ki roto ia kotou na, e pati ua kotou i ta kotou e anoano ra, e e orongaia mai ïa kia kotou.”​—Ioane 15:7.

Ko tetai tei aru ia Karaiti tei kite i te tika anga tikai o teia au tuatua na Iesu ko te apotetoro ko Paulo. Ko tona irinaki i roto i te mana o te pure papu tikai kare i puapinga kore. Kua akamaroiroi aia i te au taeake Kerititiano kia apai pouroa i to ratou au taitaia ki te Atua na roto i te pure e kia akakite: “E tika iaku te au mea ravarai nei i te Mesia, ko tei akamaroiroi mai iaku nei.” (Philipi 4:6, 7, 13) Ko te aite anga ainei i teia e kua pau pouroaia ta Paulo au pure e te Atua? Ka akara ana tatou.

Kare te Au Pati Anga Katoatoa i Pauia Mai

I roto i tana angaanga orometua noinoi kore, kua mamae a Paulo mei tana i akataka e ko ‘tetai tara i roto i te kopapa.’ (2 Korinetia 12:7) Penei e taitaia teia i te pae ngakau e te manako tei akatupuia e te aronga patoi e te “au taeake pikikaa ra.” (2 Korinetia 11:26; Galatia 2:4) Penei ko te tu mareka kore i te pae kopapa o tetai mata mamae. (Galatia 4:15) Noatu e eaa te tu, kua akatupu teia ‘tara i roto i te kopapa’ i te tu paruparu ki runga ia Paulo. “E e toru oki aku pati anga atu i te Atu i taua mea ra, kia akataka keia iaku,” i tata ei aia. Inara, kare ta Paulo pati anga i pauia mai ana. Kua akamaramaia kia Paulo e ko te au puapinga i te pae vaerua tei rauka ke iaia mei te Atua, mei te mana kia akakoromaki i te au timata anga, kua rava ua. Pera katoa, kua tuatua te Atua: “Ei te apikepike e taka meitaki ravaʼi toku maroiroi.”​—2 Korinetia 12:8, 9.

Eaa te ka rauka ia tatou i te apii mai mei nga akaraanga o Eliezera raua ko Paulo? E tikai te akarongo maira te Atua ko Iehova i te au pure a te aronga te kimi akaaka ra i te tavini iaia. Inara kare te aite anga o teia e ka pau ua mai aia i ta ratou au pati anga no te mea te kite mamao ra te Atua i te au mea. Kua kite atu aia ia tatou e te meitaki no tatou. Tei puapinga roa atu, te angaanga ra aia ma te rotai ma tana akakoroanga i tuatuaia mei tei rekotiia i roto i te Pipiria.

E Tuatau Rapakauanga i te Pae Vaerua

Te taputou maira te Atua no te rapakau i te tangata ravarai i te au manamanata i te pae kopapa, manako, e te ngakau i te tuatau o te Tutara Anga Tauatini Mataiti o tana Tamaiti i te enua nei. (Apokalupo 20:1-3; 21:3-5) Te tatari nei te au Kerititiano ngakau tae i teia taputou a te tuatau ki mua, ma te akarongo tikai i roto i to te Atua mana kia akariro i te reira e kia tika tikai. Koi kore ei e tapapa atu e kia tupu taua rapakauanga temeio i teianei, te pure ra ratou ki te Atua no tona pumaana e te maroiroi kia autu i te au timata anga. (Salamo 55:22) Me maki ratou, penei ka pure katoa ratou i te Atua no tana arataki anga i te kimianga i te rapakau anga meitaki i te pae vai rakau i roto ua i te ka rauka ia ratou i te pae moni.

Te akamaroiroi ra etai au akonoanga i te aronga maki kia pure e kia rapakauia i teianei, te tou anga ki te au rapakau anga temeio tei raveia e Iesu e tana au apotetoro. Inara kua raveia te reira au temeio no tetai akakoroanga takake. Kua tupu te reira ei akapapu e ko Iesu Karaiti te Mesia mou tikai e kia akaari e kua tauiia to te Atua tu mareka anga mei te iti tangata ngati Iuda ki te putuputuanga Kerititiano ou. I te reira taime, kua anoanoia te au apinga aroa temeio kia akaketaketa i te akarongo o te putuputuanga Kerititiano akanoo ouia. I te tinamou anga mai te putuputuanga ou, mei tera te tu, e kua pakari mai, kua “tuku ke atura” i te au apinga aroa temeio.​—1 Korinetia 13:8, 11.

I teia tuatau puapinga, te arataki nei te Atua ko Iehova i tana aronga akamori i roto i tetai angaanga puapinga roa atu te rapakauanga i te pae vaerua. Koi raukai ia ratou te tuatau, te anoanoia nei te tangata kia ariu mai ki teia pati anga: “E kimi kotou ia Iehova, koi kitea ake aia, e kapiti kotou iaia, koi vaitata mai aia. Kia akaruke te tangata kino i tona aerenga, e te tangata tuatua-tika kore i tona manako: ka oki ei aia kia Iehova, e nana aia e aroa mai; e ki to tatou Atua, te maata ra oki iaia te akakore i te ara.”​—Isaia 55:6, 7.

Te akatupuia nei teia rapakauanga i te pae vaerua o te aronga ara tataraara na roto i te angaanga tutuanga i te tuatua meitaki o te Patireia o te Atua. (Mataio 24:14) Na te akamanaanga i tona au tavini kia rave i teia angaanga akaora anga, te tauturu ra te Atua ko Iehova i te au tangata e mirioni ua atu mei te au enua ravarai kia tataraara i to ratou au tu ara e kia aere mai ki roto i tetai pirianga meitaki ma ia i mua ake ka ope ei teia akatereanga kino. Ko te katoatoa te pure ngakau tae ra no taua rapakauanga i te pae vaerua e ko te katoatoa te pure ra i te tauturu kia rave i teia angaanga rapakauanga e tikai te pauia maira ta ratou au pure.

[Akameitakianga no te Tataanga i te kapi 3]

Eliezer and Rebekah/The Doré Bible Illustrations/Dover Publications