Auraka Tatou e Roiroi!

“Auraka tatou e roiroi i te takinga-meitaki, ei te tuatau tikai oki tatou e kokoti ei, kia kore tatou e akaparuparu.”​—GALATIA 6:9.

1, 2. (a) Eaa te au mataara kimi kai a te riona ra? (e) Koai ma ta te Tiaporo e manako maata nei kia akapou atu?

TE KIMI ra te riona i te kai na roto i te au mataara tuke tuke. I etai taime ka pipini atu te reira i tana ka opu i te au rua vai ra me kare i te au arataa putuputu te aereia. Inara i etai taime, i karangaʼi te puka Portraits in the Wild, “ka akono ua tetai riona i tetai turanga​—ei akatauanga, te aere atu anga ki tetai punua atini momoavao te moe ra.”

² Te akataka maira te apotetoro ko Petero i to tatou ‘enemi ko te diabolo, te aaere nei oki mei te liona ngunguru ra, i te kimi anga i te tangata e pou iaia.’ (1 Petero 5:8) I te kiteanga e kua poto ua tona tuatau e toe nei, kua tauta pakari a Satani kia maata atu te taomi anga ki runga i te au tangata ei arai ia ratou kia kore e tavini atu ia Iehova. Inara, ko teia “liona ngunguru” nei e maata tona manako i te akapou atu i te au tavini o Iehova ra. (Apokalupo 12:12, 17) Te aiteite ra tana au ravenga kimianga ki ta tei aite ra kiaia i roto i te patireia manu rerevao. Te akapeea ra ia?

3, 4. (a) Eaa te au ravenga ta Satani e taangaanga nei i te akapouanga i te au tavini o Iehova? (e) I te mea e tuatau “kino maata” teia, eaa nga uianga te akatuia maira?

³ I etai tuatau te tamata ra a Satani i tetai pipini anga​—takinga kinoanga me kare patoi anga tei akakoroia ei akakore i to tatou tiratiratu kia akamutu i ta tatou tavini anga ia Iehova. (2 Timoteo 3:12) Inara, mei te riona rai, i etai tuatau ka akono ua te Tiaporo ra i tetai turanga. Ka tapapa ua aia kia maroiroi kore tatou me kare kia roiroi, ei reira aia ka tamataʼi i te akatere atu i to tatou tu manako ngakau paruparu kia roiroi ei tatou. Auraka ra tatou e akariro kia ngoie ua te akapouia!

⁴ Inara, te noo nei tatou i te tuatau maata rava te tu ngata i roto i te tuatua enua o te tangata nei. I teia tuatau “kino maata,” e manganui i o tatou nei te manako ngakau maroiroi kore ra me kare te akateiaaia ra i tetai taime. (2 Timoteo 3:1) Akapeea, i reira, e raukaʼi ia tatou te kopae ke i te tupuanga kia maromaroa e kia riro tatou ei apinga akapou ngoie ua na te Tiaporo? Ae, akapeea e raukaʼi ia tatou te akono i te ako anga akauruia a te apotetoro ko Paulo ra e: “Auraka tatou e roiroi i te takinga-meitaki, ei te tuatau tikai oki tatou e kokoti ei, kia kore tatou e akaparuparu”?​—Galatia 6:9.

Me Akareka Koreia Mai Tatou e Etai Ke Ra

5. Na teaa i akararangaoa ia Davida ra, inara eaa tana kare i rave?

⁵ I te au tuatau Puka Tapu ra, noatu rai ko te au tavini tiratiratu maata o Iehova kua manako ngakau akateiaaia i etai taime. “Kua rarang[a]oa au i toku nei ngengeti ua anga,” ta te tata taramo ia ko Davida i tata. “Te mauu nei toku roi i te au po katoa nei; toku roi-mata te akamauu i toku nei roi; Kua naonao toku mata i te aue.” No teaa ra a Davida i manako ngakau ei mei te reira te tu? “Kua rarang[a]oa au i rotopu i toku au enemi katoa,” tana i akataka mai. Na te au ravenga tamamae a etai ke ra i akatupu i taua mamae ngakau ra kia Davida e kua tae ua tona roi mata ra. Inara, kare a Davida i akataka ke atu iaia mei ia Iehova ra no te rave anga a te au tangata tupu i te kino kiaia.​—Salamo 6:6-9.

6. (a) Penei eaa te ka akatupuia kia tatou e te au tuatua me kare te au angaanga a etai ke ra? (e) Akapeea tetai papaki i te akariro anga ia ratou uaorai kia peke ngoie ua i te Tiaporo ra?

⁶ Mei te reira katoa oki, penei ka akatupu te au tuatua me kare au ravenga a etai ke ra ia tatou kia maromaroa ma te mamae ngakau maata. “Te tangata vaa karea ua ra, e tau ïa ki te koputaputa koke ra,” ta Maseli 12:18 i tuatua. Me e Kerititiano taua taeake me kare tuaine i manako kore ra, ka oonu atu te ‘koputaputa anga’ ra. Penei ka akatupu te reira i te riri ki taua tangata ra, penei paa ka akamoupuku aia. E mea matauia teia me ka manako ngakau tatou e kua akono takinga kinoia tatou me kare e tau kore ua. Penei ka kite tatou i te tu ngata kia tuatua atu ki tei akariri maira; e penei ka akakoro tatou kia kopae ke atu iaia. I te akateiaa anga ma te akamoupuku, kua roiroi tetai papaki e kua akamutu i te aere mai ki te au uipaanga Kerititiano. E mea mii ra, e kua “tuku [ratou] i ta te diabolo ngai kia o mai” kia autu ki rungao ia ratou ei etai tei peke ngoie ua iaia.​—Ephesia 4:27.

7. (a) Akapeea e raukaʼi ia tatou te kopae ke kia kore e riro ki roto i nga rima o te Tiaporo me ka akareka kore mai etai ke e me ka akamamae ngakau ia tatou? (e) Eaa tatou ka tau ei kia kore e akamoupuku?

⁷ Akapeea e raukaʼi ia tatou te kopae ke kia kore e riro ki roto i nga rima o te Tiaporo me ka akareka kore mai etai ke e me ka akamamae ngakau ia tatou? Ka tau tatou kia tauta kia kore e akamoupuku. Kareka ra, kia tamata i te akatupu i te au me kare kia akakore takiri viviki atu i te au tumu pekapeka. (Ephesia 4:26) Te raurau maira a Kolosa 3:13 ia tatou: “E akakore tetai i ta tetai ara, e tapepeanga ta tetai ki tetai ra.” E mea tau meitaki tikai te akakoreanga ara me ka akatika tei rave ra i te ara e kua apa aia e te mii tikai ra aia. (Akaaite ia Salamo 32:3-5 e Maseli 28:13.) Inara, ka tauturu ia tatou, me ka tamou tatou ki to tatou manako e ko te akakore i te ara kare e kia akatika ua me kare kia akameangiti ua i te au tarevake a etai ke i rave ra. Te akakore i te ara te o atura te akakore takirianga i te akamoupuku. E apainga teiaa te akamoupuku no te apai aere. Ka akapou te reira i to tatou au manako, e ka keia i to tatou tu mataora. E ka rauka katoa kia akakino i to tatou ora anga kopapa. Ei tuke anga, ko te akakoreanga ara, me te tau ra, ka akatupu i te meitaki no tatou uaorai. Kia riro tatou, mei ia Davida rai, auraka e akaroiroi e ka akataka ke atu ei mei ia Iehova no te au tuatua a etai ke ra me kare no ta ratou i rave kia tatou!

Me Topa Anake Tatou

8. (a) Eaa ra etai ka manako ngakau akaapaʼi i etai tuatau? (e) Eaa te tu kino te vaira i te riroanga kia apukuia e te akaapa anga e kia roiroi tatou uaorai?

⁸ “Te apa anake nei tatou,” ta Iakobo 3:2 i tuatua mai. Me ka akapera tatou, e mea matauia e ka manako ngakau akaapa tatou. (Salamo 38:3-8) Ka riro te au manako ngakau akaapa kia ririnui tikai me te tauta pakari ra tatou i tetai tu paruparu i te pae kopapa e te kite ra i te topa anga i etai tuatau.a Kua akataka mai tetai Kerititiano tei aro atura i taua tu kukumi anga ra: “Kare au i anoano kia ora ua atu au, i te kite koreanga me kua rave au i te ara kare e akakoreia e me kare ainei. Kua manako au e angari ake au i te kore e tauta pakari iaku uaorai i te tavini atu ia Iehova no te mea penei kua reiti roa noku i te rave.” Me ka apukuia tatou e te akaapa anga e ka roiroi tatou uaorai, te oronga ra tatou i tetai tuatau va mai no te Tiaporo​—e penei ka rave viviki aia i te reira! (2 Korinetia 2:5-7, 11) Ko tei umuumuia ra penei ko tetai manako tau atu no te akaapa.

9. Eaa tatou i tau ei kia irinaki i to te Atua ra aroa ua?

⁹ Me ara anake tatou e mea tau ra e ka manako ngakau ua tatou i tetai tu akaapa anga. Inara, i etai taime, ka vai tamou rai te au manako ngakau akaapa anga no te mea te manako ra te Kerititiano e kare aia e tau akaou no to te Atua ra aroa ua. Inara, te akapapu pumaana maira te Puka Tapu kia tatou e: “Kia aaki tatou i ta tatou ara, e tuatua-mou tana e te tika i te akakore anga mai i ta tatou ara, e te tamā anga ia tatou i te au tuatua-tika kore ravarai.” (1 Ioane 1:9) E tumu tau ainei tetai kia irinaki e kare te Atua e rave i te reira i to tatou turanga? Kia maara, i roto i tana Tuatua, te karanga ra a Iehova “e kua tika [iaia] i te akakore mai i te ara nei.” (Salamo 86:5; 130:3, 4) I te mea kare aia e pikikaa, ka rave ra aia i tei taputouia i tana Tuatua, me ka aere atu tatou kiaia ma te ngakau tataraara.​—Tito 1:2.

10. Eaa te akapapu akaou anga akapumaana ngakau tei neneiia i tetai Punanga Tiaki i mua ana no te akakore anga i tetai tu apikepike i te pae kopapa?

¹⁰ Eaa taau ka tau kia rave me te tauta pakari ra koe kia akakore i tetai tu apikepike e ka topa akaou ei? Auraka e roiroi! Kare mei te mea e ka takoreia toou aerenga ki mua no te topa akaou anga ra. Kua oronga maira te itiu o Peperuare 15, 1954, o teia tianara i teia akapapu akaou anga akapumaana ngakau: “Penei ka kite tatou ia tatou uaorai i te turorianga e te topaanga e manganui te au taime i tetai ravenga kino tei kakati kia oonu atu ki roto i to tatou tu akaraanga mua o te oraanga i ta tatou i kite ana. . . . Auraka e akakore i te manakonako anga. Auraka e manako e kua rave koe i te ara kare e rauka kia akakoreia. Ko ta Satani tikai ia e anoano ra ia koe kia manako. Ko te tika e te manako mii ra koe e te taitaia ra ia koe uaorai e akapapu anga te reira e kare i mamao roa toou aerenga. Auraka e manako kore i te ariu taakaaka e te akatenga ki te Atua, ma te kimianga i tana akakore anga ara e te tamaanga e te tauturu oki. E aere atu kiaia mei tetai tamaiti e aere atura ki tona metua me tei roto aia i te taitaia, noatu rai eaa te putuputu no taua tu paruparu ra, e ka oronga aroa ua mai a Iehova i te tauturu kia koe no tona tu takinga meitaki e, me e ngakau tae toou, ka oronga atu aia kia koe i te kite anga i te akava ngakau tamaia ra.”

Me Manako Tatou e Kare i Rava ta Tatou Angaanga

11. (a) Eaa te manako ngakau tau no tatou no te raveanga i te angaanga tutuanga Patireia? (e) Eaa te au manako ngakau no te raveanga i te angaanga orometua te tauta pakari ra tetai papaki Kerititiano?

¹¹ Te akatupu ra te angaanga tutuanga Patireia i tetai tuanga puapinga maata i te oraanga o te Kerititiano, e na te raveanga i te reira e apai mai i te rekareka. (Salamo 40:8) Inara, ko tetai papaki o te au Kerititiano, te manako akaapa ra no te kore e rauka iaia i te rave kia maata atu te angaanga orometua. Penei ka akakino te reira akaapa anga i to tatou rekareka e ka akariro ia tatou kia roiroi, ma te manakoanga e te manako maira a Iehova kare e rava ana ta tatou angaanga. E akamanako ana i te au manako ngakau te tupu ra ki etai.

“Te kite ra ainei koe e akapeea te kaimoumou taime no te putaua?” ta tetai tuaine Kerititiano i tata te akono ra raua ko tana tane i nga tamariki e toru ra. “Ka kimi au kia kore e maata taku akapou anga moni i tetai ua atu ngai e rauka iaku. Kua riro teia ei akapou anga taime i te kimikimianga na roto i te au toa oko mama, te au ngai oko apinga akaatea anga, me kare te tuituianga kakau. Te akapou katoa ra au i tetai ora me kare e rua ora i te epetoma i te kimianga i te au kuponi [no te kai mama ua]​—pakotianga, akapapaanga, e te okoanga ia ratou. I etai taime te manako ngakau akaapa ua ra au i te raveanga i teia au apinga, i te manakoanga e e mea tau noku kia akapou i taua taime ra ki te angaanga tutu aere.”

“Kua manako au penei kare e rava ana toku inangaro ia Iehova,” ta tetai tuaine e a ana tamariki e tetai tane akarongo kore ra i akataka mai. “No reira kua angaanga ngata au i taku tavinianga ia Iehova. Kua tauta pakari au, inara kare roa au i manako e kua rava te reira. E kite koe, kare oku manakoanga ngakau e puapinga toku, no reira kare i rauka iaku kia manako e akapeea e raukaʼi ia Iehova te ariki i taku tavini anga kiaia.”

Kua tuatua tetai Kerititiano tei kite ra e kua tau aia kia akaruke i te angaanga orometua i te au tuatau ravarai: “Kare i rauka iaku i te akakoromaki i te manako e te akakore ra au i taku apainga kia tavini ia Iehova i te au tuatau ravarai. Kare e rauka ia koe i te tamanako e akapeea toku tu reka kore! Te aue nei au i teianei i te maaraaraanga i teia.”

12. Eaa ra etai au Kerititiano i manako akaapa uaʼi no te rava kore o ta ratou e rave ra i te angaanga orometua ra?

¹² E mea matauia ra te anoano kia tavini ia Iehova i te maata te ka rauka. (Salamo 86:12) Inara, eaa tetai papaki i manako ngakau akaapaʼi no te kore e rauka te rave kia maata atu? No etai, i te akara anga te piri atura ki tetai manakoanga no te tu puapinga kore ua, penei e tupuanga mai no etai au tu mareka koreia i te oraanga. I etai atu au tu, penei ka tupu mai te akaapa tau kore no tetai manako tika kore i ta Iehova e manakonako maira ia tatou. “Kua manako ngakau au e me kare i mamae i te reira, kare i rava taau angaanga,” ta tetai Kerititiano ia i akakite mai. Ei tupuanga, kua akanoo aia kia teitei rava te au turanga nona uaorai​—e i reira kua maata atu tona akaapa anga i te kore anga i rauka iaia kia itae atu i te reira.

13. Eaa ra ta Iehova e manakonako maira ia tatou?

¹³ Eaa ta Iehova e manakonako maira ia tatou? Te akataka anga mama ua, te manakonako maira a Iehova ia tatou kia tavini atu iaia ma te meta katoa, i te raveanga i tei tika i to tatou au turanga. (Kolosa 3:23) Inara, penei, e tuke anga maata i rotopu i ta tatou ka anoano kia rave e ta tatou ka rauka tikai kia rave. Penei te kotingaia ra tatou e te au tu mei te ruaine ra, te ora kopapa, te ririnui kopapa, me kare te apainga i te ngutuare tangata. Inara, me ka rave tatou i te ka rauka ia tatou, ka manako ngakau papu tatou e i tavini tatou ia Iehova ma te meta katoa ra​—kare i tere atu e kare i meangiti mai te tu meta katoa i ta tetai te ora meitaki ra e te tika ra i tona au turanga kia rave i te angaanga orometua i te au tuatau ravarai.​—Mataio 13:18-23.

14. Eaa taau ka tau kia rave me te anoano ra koe i te tauturu kia kite eaa tikai taau uaorai e manakonako kia rave?

¹⁴ Akapeea, i reira, e raukaʼi ia koe te akapapu eaa tikai taau ka tau kia manakonako noou uaorai? Penei ka anoano koe kia tuatua kapiti i teia tumu ma tetai oa Kerititiano pakari, tei irinakiia, penei ei tetai o te aronga pakari me kare tetai tuaine kite, te kite ra i toou karape, toou au kotinga, e taau au apainga i te ngutuare tangata. (Maseli 15:22) Kia maara e i to te Atua nga mata ra ko toou puapinga ei peretana kare e vaitoia na te maata o taau angaanga tutu aere ei orometua. Pouroa to Iehova ra au tavini e oko maata kiaia. (Hagai 2:7; Malaki 3:16, 17) Ko taau ka rave i te angaanga tutu aere penei e maata atu me kare e meangiti mai i ta etai ke i rave ana, inara me ko te meitaki ia e rauka ia koe na, te mareka ra a Iehova, e kare e tumu noou kia manako ngakau akaapa ua.​—Galatia 6:4.

Me e Maata te Umuumuia ra Ia Tatou

15. I teea au tu i maataʼi te umuumuia maira i te aronga pakari o te putuputuanga ra?

¹⁵ “Ko te tukuia atu te mea maata ra,” e na Iesu ei, “e mea maata katoa te umuumuia atu.” (Luka 12:48) E mea tika ra ‘e maata te umuumuia ra’ i te aronga te tavini ra ei aronga pakari i te putuputuanga. Mei ia Paulo ra ka taangaanga ratou ia ratou uaorai i te tauturu i te putuputuanga ra. (2 Korinetia 12:15) E au tuatua ta ratou no te teateamamao, te au aravei anga ei tiaki, te au uriuri akavaanga​—te reira katoatoa ma te kore e akono kore i to ratou uaorai au ngutuare tangata. (1 Timoteo 3:4, 5) Ko etai aronga pakari te maata ra te angaanga tauturu i te akatu au Are Uipaanga Patireia, te tavinianga i te au Kumiti Aravei Anga Are Maki, e te au akaputuputu anga e te au uruoaanga. Akapeea teia aronga rave angaanga maata, koia te au tangata tiratiratu e kore ei e roiroi i raro ake i te teiaa o taua au apainga ra?

16. (a) Eaa te ravenga tau ta Ietero i akakite kia Mose ra? (e) Eaa te tu te ka akariro i tetai o te aronga pakari ra kia oronga i etai apainga tau ma etai ke atura?

¹⁶ I to Mose, tangata mako e te taakaaka ra roiroianga i te akonoanga i te au manamanata o etai ke ra, kua tuatua atura a Ietero koia to Mose metua ongai ra i tetai manako tau ei tauturu: koia oki kia oronga i etai apainga ma etai atu au tangata pakari tau ra. (Exodo 18:17-26; Numero 12:3) “Tei te aronga akaaka ra te pakari,” ta Maseli 11:2 i tuatua mai ra. Ko te tu akaaka tona aite anga kia kite e kia ariki i toou au kotinga. Kare te tangata akaaka e reka kore kia oronga i tetai tuanga o tana apainga ki etai ke ra, kare katoa aia e mataku e penei ka ngere aia i te akatere anga na te orongaanga i te au apainga ma etai atu tangata tau ra.b (Numero 11:16, 17, 26-29) Mari ra, ka mareka aia kia tauturu ia ratou kia tere ki mua.​—1 Timoteo 4:15.

17. (a) Akapeea te au mema o te putuputuanga i te akamama mai anga i te apainga a te aronga pakari ra? (e) Eaa te au atinga ta te au vaine a te aronga pakari e oronga ra, e akapeea tatou me akaari kia ratou e kare tatou e manako kore ana no te reira?

¹⁷ E maata te ka rauka i te au mema o te putuputuanga te rave kia mama mai te apainga a te aronga pakari ra. I te kiteanga e e au ngutuare tangata ta te aronga pakari uaorai no te akono, kare etai ke ra e akapou tau kore ua i te taime e te manako anga o te aronga pakari. Kare katoa oki ratou e manako kore ua i te au atinga puareinga ta te au vaine a te aronga pakari e oronga karapii kore ra i ta ratou tane ki te putuputuanga. Kua akataka mai tetai metua vaine e toru ana tamariki te tavini ra tana tane ei tetai o te aronga pakari: “Tetai apinga kare au e akaapa ko te apainga maata atu taku e rave ua ana i te ngutuare kia raukaʼi i taku tane i te tavini ei tetai o te aronga pakari. Kua kite au e e puapinga maata ta Iehova ra akameitakianga ki runga i to matou ngutuare tangata no tana tavinianga, e kare oku pekapeka no tana e oronga ra. Inara, ko te tika, e putuputu au i te paraku e maata atu te au rau teita e te rave kia maata atu te akoanga i ta maua tamariki no te angaanga maata o taku tane.” E mea mii ra, kua kite teia tuaine e ko tetai papaki, kare i ariki i te maata atu o tana apainga, kua tuatua manako kore ua mei tera e, “Eaa koe ka kore ei e painia?” (Maseli 12:18) Mei teaa ra te meitaki atu kia akapaapaa i etai ke ra no ta ratou e rave ra eiaa e akaapa ia ratou no te apinga kare i rauka ia ratou kia rave!​—Maseli 16:24; 25:11.

No te Mea Kare te Openga i Tae Mai Ake

18, 19. (a) Eaa ra i kore ei teia e tau ei tuatau kia akamutu te oro i te oroanga no te ora mutu kore? (e) Eaa te ako anga tau ta te apotetoro ko Paulo i oronga ki te au Kerititiano i Ierusalema ra?

¹⁸ Me kite tetai tangata oro e te vaitata ra aia ki te openga o tetai oroanga roa, kare aia e akaroiroi. Penei kua tae tona kopapa ki te kotinga o tona akakoromaki anga​—kua roiroi, kua vera roa, e kua maro—​inara kua vaitata roa ki te openga kare ia i te tuatau no te akamutu i te oroanga. Mei te reira katoa, ei au Kerititiano tei roto tatou i te oro anga no te tutaki o te oraanga, e te vaitata rava nei tatou ki te ngai re anga. Kare teianei i te tuatau no tatou kia akamutu te oroanga!​—Akaaite ia 1 Korinetia 9:24; Philipi 2:16; 3:13, 14.

¹⁹ Kua aro atu te au Kerititiano i te anere mataiti mua ra i tetai turanga mei te reira te tu. Vaitata i te 61 T.N., kua tata te apotetoro ko Paulo ki te au Kerititiano i Ierusalema. Te poto aere ra te tuatau​—kua vaitata i te “ope” te “uki” rave kino ra, koia te akatereanga ngati Iuda o te au mea tei akaruke ra i te akonoanga mou. Te mea maata no te au Kerititiano i Ierusalema ra kia matakite e kia tiratiratu; kua tau ratou kia rere ke atu mei te oire ra me kite ratou i te koropini angaia te reira e te au vaeau. (Luka 21:20-24, 32) E mea tau, i reira, ta Paulo ako anga akauruia ra: ‘Kia kore e akaroiroi e kia kore e taitaia to kotou ngakau.’ (Ebera 12:3) Kua taiku te apotetoro ko Paulo i konei e rua nga verepa ketaketa: “akaroiroi” (kaʹmno) e te “taitaia” (e·klyʹo·mai). Kia tau ki ta tetai tangata apiiia i te Puka Tapu, ko teia nga tuatua Ereni kua “taikuia e Aristotle no te aronga oro tei akaangaroi e tei topa ua i muri ake i to ratou pati anga i te poupou openga. Ko te aronga tatau [i te reta a Paulo ra] te vaira i reira i te oro anga. Kare ratou e tau kia taitaia kia akamutu vave. Kare ratou e tau kia taravai te ngakau e kia topa ua no te roiroi anga. No reira te vaira te umuumu anga kia akakoromaki i te aro atu anga i te tu ngata.”

20. Eaa ra ta Paulo ako anga i tau ei no tatou i teia tuatau nei?

²⁰ Mei teaa ra te tau ta Paulo apiianga ia tatou i teia tuatau nei! I te aro atu anga i te au taomianga te tupu nei, penei te vaira te au tuatau e manako ngakau ei tatou mei tetai tangata oro kua roiroi ra kua vaitata tona nga vaevae i te topa ua. Inara no te vaitata roa ki te ngai openga, ka tau tatou kia kore e akamutu vave ua! (2 Paraleipomeno 29:11) Ko te reira tikai ta to tatou Enemi, koia te “liona ngunguru,” e anoano ra ia tatou kia rave. E mea meitaki ra, kua oronga mai a Iehova i te au apinga ei oronga “i te maroiroi no tei paruparu.” (Isaia 40:29) Eaa ra teia au apinga e akapeea tatou ka puapingaiaʼi ia ratou ka uriuri manakoia i te atikara te aru mai nei.

[Au Tataanga Rikiriki i Raro]

Eaa Taau Pauanga?

◻ Akapeea tatou i te kopae ke anga i te roiroi me ka akareka kore mai etai ke ra e me ka akamamae ngakau ia tatou?

◻ Eaa te manako tau no te akaapa e kore ei tatou e roiroi?

◻ Eaa ta Iehova e manakonako maira ia tatou?

◻ Akapeea te tu mako i te tauturu anga i te aronga pakari o te putuputuanga kia kopae ke i te akaparuparu anga?

◻ Eaa ra ta Paulo ako anga ia Ebera 12:3 i tau ei no tatou i teia tuatau nei?