Te Inangaro Maata ra Ainei Koe i ta Iehova Au Tuatua Akakite?

“Te akono nei toku vaerua i taau au tuatua-akakite: inangaro maata toku i te reira.” ​—SALAMO 119:​167.

1. Tei ea te ngai e kite maataiai e tatou te taiku taokioki anga i ta Iehova ra au tuatua akakite?

TE ANOANO ra Iehova kia mataora tona au tangata. Inara, e rekarekai i te mataora mou, ka tika tatou kia aaere i roto i te ture a te Atua e kia akono oki i tana au ikuiku. E raukai te reira, te oronga maira aia kia tatou i te au tuatua akakite. Te taiku ripiti uaia ra teia i roto i te au Tuatua Tapu, i roto tikai ia Salamo 119, penei na te Tamaiti Ariki ou ko Hezekia o Iuda. Te akamata ra teia imene manea ma te au tuatua: “E ao to te aronga apa kore i te arataa, ko tei aaere na te ture a Iehova. E ao to tei akono i tana au tuatua-akakite, ko tei kimi iaia ma te ngakau katoa.”​—Salamo 119:​1, 2.

2. Akapeea te pirianga o ta te Atua ra au tuatua akakite ki te mataoraanga?

² Ka ‘aaere tatou na te ture a Iehova’ na te tauruanga i te kite tika o tana Tuatua e na te akonoanga i te reira i te oraanga. Inara, i te mea e apa ua tatou ka tau te au tuatua akakite no tatou. Te tuatua Epera tei uriia ra ei “au tuatua-akakite” te akakite ra e te akaoki maira te Atua i tana ture, te au ikuiku, te au arataki anga, te au akauenga, e te au tika ki to tatou au manako. (Mataio 10:​18-20) Ka vai mataora anake tatou me ka akono tamou marie tatou i tana au tuatua akakite ra, no te mea na ratou e tauturu ia tatou kia kopae ke i te au vaerua topaanga i te pae vaerua te ka akatupu i te tumatetenga e te mii oki.

E Mou i te Au Tuatua Akakite a Iehova

3. I runga i te akatumu anga ia Salamo 119:​60, 61, eaa te irinaki anga tei ia tatou?

³ E akaperepere anga te au tuatua akakite a te Atua ki te tata taramo tei imene ra: “Te ngakoikoi nei, kare i tavare, i te akono anga i taau ra au akauenga. Kua akapiniia au e te ereere a te aronga kino kare rai i ngaropoina taau ture iaku nei.” (Salamo 119:​60, 61) Kua tauturu mai te au tuatua akakite a Iehova kia tatou kia akakoromaki i te takinga kino no te mea te irinaki nei tatou e ka rauka i to tatou Metua i te rangi ra i te tipu i te au ereere a te au enemi i akapini ia tatou nei. I te tuatau tau, ka akamatara mai aia ia tatou mei taua au arairai anga, e raukai ia tatou te rave i te angaanga tutuanga Patireia ra.​—Mareko 13:10.

4. Akapeea te akono tau na tatou ki ta te Atua au tuatua akakite ra?

⁴ I tetai au tuatau, te akatikatikaia ra tatou e ta Iehova au tuatua akakite. Kia ariki tamou marie ua tatou i taua akatikatika anga, mei ta te tata taramo rai i rave ra. Kua tuatua aia ki te Atua na te pure anga: “Ko taau au tuatua-akakite, ko taku ïa e mataora . . . i inangaro atu ei au i taau ra au tuatua-akakite.” (Salamo 119:​24, 119) E maata atu ta tatou au tuatua akakite na te Atua i ta te tata taramo i rauka ra. Te au anere ua atu tei taikuia maira no te au Tuatua Tapu Epera te mama maira i te au Tuatua Tapu Ereni te akamaara maira ia tatou kare i te au apiianga anake a Iehova ki tona au tangata i raro ake i te Ture ra mari ra i tana au akakoro anga katoa oki no te putuputuanga Kerititiano ra. Me kite mai te Atua e te tau ra kia akamaara mai ia tatou no te au apinga te piri atura ma tana au ture, te mareka ra tatou no taua arataki anga ra. E na te ‘mouanga ki ta Iehova ra au tuatua-akakite’ ka kopae ke tatou i te au akavare anga ara te akamareka kore ra i tei anga mai ia tatou e ka akangere ia tatou i te mataora anga.​—Salamo 119:31.

5. Akapeea ka raukai kia inangaro maata tatou i ta Iehova au tuatua akakite ra?

⁵ Eaa te maata tau no to tatou inangaro i ta Iehova ra au tuatua akakite? “Te akono nei toku vaerua i taau au tuatua-akakite: mangaro maata toku i te reira,” ta te tata taramo imene ra. (Salamo 119:​167) Ka riro tatou kia inangaro maata roa i ta Iehova au tuatua akakite me ka manako tatou e ka ariki oki i te reira ei apii akamatakite anga na tetai Metua tei tiaki tika maira ia tatou. (1 Petero 5:​6, 7) Ka anoano tatou i tana au tuatua akakite, e ka tupu oki to tatou inangaro no ratou ia tatou ka kite ra i akapeea to tatou puapinga anga ia ratou ra.

Eaa Tatou i Umuumu ei i te Au Tuatua Akakite a te Atua

6. Eaa tetai tumu i umuumu maatai tatou i ta Iehova au tuatua akakite, e na teaa e tauturu ia tatou kia maara ia ratou?

⁶ Tetai tumu i umuumu ei tatou i te au tuatua akakite a Iehova no to tatou tu ngaropoina ua. I akakite ei The World Book Encyclopedia: “Te mea matauia, ka tere atu te ngaropoina anga o te au tangata me topa aere te tuatau. . . . Penei kua rokoia kia koe tetai kore anga e maara i tetai ingoa me kare tetai atu potonga akakiteanga i te tapa mua o to arero ra. . . . Ko taua ngaro poto anga o te maara, tei roko putuputuia ra, kua tapaia e maara koreanga. Kua akaaite atu te au taineti i te reira ki te tautaanga kia kitea tetai apinga tei akaruke tau koreia ki roto i tetai pia mako kore. . . . Ko tetai tu meitaki no te akamaaraanga i tetai potonga akakiteanga na te apii anga i te reira i muri roa mai i toou manako anga e kua kite meitaki koe i te reira.” Na te apii anga marie e te taokioki akaouanga ka tauturu ia tatou kia maara i ta te Atua ra au tuatua akakite e kia akono oki ia ratou no to tatou uaorai meitaki.

7. Eaa ra te au tuatua akakite a te Atua ra i umuumu maataiai i teia tuatau i to mua ana ra?

⁷ Te umuumu nei tatou i ta Iehova au tuatua akakite i teia tuatau e maata atu i to mua ana no te mea kua itae te rave kino ki te au tuanga maata roa i te tuatua enua o te tangata nei. Me ka akamanako tatou i ta te Atua au tuatua akakite, ka rauka ia tatou te kite oonu te umuumuia ra kia kopae atu i te akavare anga ki roto i te au aerenga kikino o teianei ao. “E kite maata toku i to taku au orometua katoa ra,” ta te tata taramo i tuatua, “no te mea te akaeatu nei au i taau au tuatua-akakite. E kite maata toku i to te aronga taito ra; no te mea te akono nei au i taau ra au ikuiku anga. Ta tapu nei au i oku puke vaevae i te au arataa kikino ravarai, kia akono au i taau tuatua.” (Salamo 119:​99-101) Na te akonoanga i ta te Atua au tuatua akakite, ka akakoreia tatou i te aere i te “au arataa kikino ravarai” e ka kopae ke i te riroanga kia aite ki te au tangata tini, tei vaira “ma te manako akapoiriia, e te taka ke i te ora a te atua ra.”​—Ephesia 4:​17-19.

8. Akapeea tatou e papa meitaki ei no te akono autu i te au timataanga o te akarongo?

⁸ Te umuumu katoaia ra ta te Atua au tuatua akakite no te mea ka akamaroiroi mai te reira ia tatou kia akakoromaki i to tatou au timataanga e manganui i teianei “tuatau openga.” (Daniela 12:4) Me kare e au tuatua akakite ka riro tatou ei au ‘tangata akangaropoina ua i te tuatua.’ (Iakobo 1:25) Inara ka tauturu taau uaorai apii e ta te putuputuanga i te au Tuatua Tapu ma te au puka no ko mai i te “tavini akono meitaki e te pakari” ia tatou kia akakoromaki autu i te au timataanga o te akarongo. (Mataio 24:​45-47) Na taua au apinga vaerua ra e raukai ia tatou kia kite eaa ta tatou ka tika kia rave ei akamareka ia Iehova me kite tatou ia tatou uaorai i roto i te au turanga timata anga.

Te Tuanga Puapinga no ta Tatou Au Uipaanga

9. Koai ma ‘tei oronga uaia maira ei meitaki i te tangata nei,’ e akapeea ratou i te tauturu anga i te au oa akarongo?

⁹ Te rauka maira tetai tuanga no ta tatou umuumuanga no ta te Atua au tuatua akakite i te au uipaanga putuputuanga, te orongaia maira te apiianga e te au taeake akataoongaia ra. Kua tata te apotetoro ko Paulo e i to Iesu ‘kake anga ki runga, e aronga tuikaa e manganui tana i arataki, e kua oronga ua maira te meitaki i te tangata nei.’ Kua tuatua katoa Paulo: “Kua akono [a Karaiti] i tetai pae, ei aposetolo; tetai pae, ei peroveta; tetai pae, ei apii evangelia; e tetai pae, ei tiaki, e ei orometua; Ei akatau i te aronga tapu, no te angaanga orometua; kia meitaki oki te kopapa o te Mesia ra.” (Ephesia 4:​8, 11, 12) Mei teaa ra ta tatou akameitakianga i ‘te meitaki i te tangata nei’​—te aronga pakari akataoongaia​—te arataki anga i to tatou manako ki ta Iehova au tuatua akakite me uipa tatou no te akamori anga!

10. Eaa te tumu manako maata ia Ebera 10:​24, 25 ra?

¹⁰ Na te akameitaki anga no te au apinga tu-Atua e akakeu ia tatou kia aere ki nga uipaanga putuputuanga e rima na tatou i te au epetoma taki tai katoa. Kua akaketaketaia e Paulo te umuumuanga kia uipa putuputu. Kua tata aia: “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara na kotou i taua rā ra i te vaitata anga mai.”​—Ebera 10:​24, 25.

11. Akapeea tatou e puapingaiai mei te au uipaanga taki tai i te epetoma?

¹¹ Te ariki ra ainei kotou i ta tatou au uipaanga e rave ra no tatou? Te akamaroiroi ra te apii epetoma no te Punanga Tiaki i to tatou akarongo, te tauturu ra ia tatou kia akono i ta Iehova au tuatua akakite, e ka akaketaketa ia tatou kia patoi atu “i te vaerua o teianei ao.” (1 Korinetia 2:12; Angaanga 15:31) I te Uipaanga ki te Katoatoa, ka oronga te au vaa tuatua i te apiianga mei te Tuatua a te Atua ra, kapiti katoa ta Iehova ra au tuatua akakite e ta Iesu “au tuatuaanga meitaki no te oraanga mutu kore.” (Ioane 6:68; 7:46; Mataio 5:​1–​7:29) Te akakokoiia ra ta tatou au apiianga karape i te Apii Orometua Teokaratiki. Te Uipaanga Tavini Anga e mea puapinga maata i te tauturuanga ia tatou kia meitaki mai ta tatou orongaanga i te tuatua meitaki mei tera are ki tera are, te oki akaou anga, i te au apii Pipiria i te ngutuare, e i etai atu ngai oki o ta tatou angaanga orometua ra. Ko tetai pupu meangiti mai i te Apii Puka a te Putuputuanga te oronga maira i te tuatau maata atu kia tatou kia taiku i ta te Atua au tuatua akakite te putuputu ra te o mai.

12, 13. Akapeea te au tangata o te Atua i tetai enua Asia ra i te akaari ariki anga i te au uipaanga Kerititiano?

¹² Na te aere putuputu anga ki te au uipaanga putuputuanga ka akamaaraara ia tatou i te au akauenga a te Atua e ka tauturu ia tatou kia maroiroi i te pae vaerua i te aro atuanga i au tamakianga, te tu ngata i te pae puapinga, e etai atu au timataanga i to tatou akarongo. Kua kiteia te puapinga maata o te au uipaanga e etai 70 Kerititiano i tetai enua Asia tei akakoreia atura i to ratou au kainga e kua aere atu ki rotopu i te vaorakau. No te tamanako papu anga kia rave ua atu i te uipaanga kapiti anga putuputu, kua oki atu ki to ratou oire akakinoia ra e te tamaki anga, kua rave atu i te toenga o te Are Uipaanga Patireia, e kua patu akaou atura i te reira ki roto i te vaorakau.

¹³ I muri ake i te akakoromakianga i etai au mataiti o te tamakianga i tetai atu tuanga o taua enua rai, te vai tavini totomapu ra te au tangata o Iehova. Kua uiia atu ki tetai o te aronga pakari i taua ngai ra: “Eaa tei tauturu maata i te taokotaianga i te au taeake ra?” Ko tana pauanga? “I taua 19 mataiti ra, kare matou i akakore i tetai uipaanga okotai. I etai tuatau no te pomuanga me kare no etai atu au tu ngata, kare i rauka i etai taeake te aere atu ki te ngai uipaanga, inara kare rava matou i akakore i tetai uipaanga.” Ko teianei au taeake e te au tuaine akaperepere kua ariki tikai i te puapinga no te ‘kore e akaruke i to ratou akaputuputu anga.’

14. Eaa ta tatou i kite mei te peu a Ana ruaine ra?

¹⁴ Ko tetai vaine takaua ko Ana e 84 ona mataiti “kare rava aia i akaruke i te iero.” Ei tetai tupu anga, i reira aia i te apai mai anga te tamaiti varevare ko Iesu ra ki reira i muri poto ake i tona anau anga. (Luka 2:​36-38) Te tamanako papu ra ainei koe kia kore e akaruke i te au uipaanga? Te tauta ra ainei koe i toou meitaki tikai kia tae atu no te au tuanga katoa o ta tatou au akaputuputu anga e te au uruoaanga? Te au apiianga puapinga i te pae vaerua te rauka maira i taua au akaputuputu anga ra te oronga maira, i te akapapu anga taka meitaki e te utuutu maira to tatou Metua i te rangi ra i tona au tangata. (Isaia 40:11) Te akatupu katoa maira taua au atianga ra i te rekareka, e te akakite maira to tatou aereanga ki reira i to tatou ariki anga no ta Iehova au tuatua akakite anga. ​—Nehemia 8:​5-8, 12.

Akatakaia e ta Iehova Au Tuatua Akakite

15, 16. Akapeea te akatupu anga o te akonoanga i te au tuatua akakite a Iehova ra i to tatou tu akono?

¹⁵ Na te akonoanga i ta te Atua au tuatua akakite ka tauturu kia akataka ke ia tatou i teianei ao kino. Ei akatauanga, na te raveanga i ta te Atua au tuatua akakite e arai mai ia tatou i te raveanga ainga tau kore. (Deuteronomi 5:18; Maseli 6:​29-35; Ebera 13:4) Te timataanga kia pikikaa, kia tiratiratu kore, me kare kia keia ka rauka kia akakoreia na te raveanga i te au tuatua akakite tu Atua ra. (Exodo 20:​15, 16; Levitiku 19:11; Maseli 30:​7-9; Ephesia 4:​25, 28; Ebera 13:18) Na te akonoanga i ta Iehova au tuatua akakite ka arai mai oki ia tatou mei te tutakianga i te kino, te akamoupuku, me kare te tuatua akakino i tetai ke atu.​—Levitiku 19:​16, 18; Salamo 15:​1, 3.

¹⁶ Na te raveanga i ta te Atua au tuatua akakite, ka vai akatapuia tatou, me kare ka akatakaia, no tana angaanga. Mei teaa ra te puapinga maata kia taka ke mai i to teianei ao! Na roto i te pure kia Iehova i te po openga o tona oraanga i te enua nei, kua rave a Iesu i teianei patianga no tana au pipi: “Kua tuku atu au i taau tuatua kia ratou; e te riri nei to te ao nei ia ratou, no te mea kare ratou no teianei ao, mei iaku nei rai oki kare i to teianei ao. Kare au i pure ia koe e, ka apai ke atu koe ia ratou i teianei ao, kia tiaki maira koe ia ratou, auraka ei kino. Kare ratou i to teianei ao, mei iaku nei rai oki, kare i to teianei ao. Ka akatapu koe ia ratou i te tuatua-mou naau, ko te tuatua aau na te tuatua-mou.” (Ioane 17:​14-17) Kia akaperepere ua atu tatou i te Tuatua a te Atua, tei akataka ke ra ia tatou no tana angaanga tapu.

17. Penei eaa te ka tupu me ka manako kore ua tatou i ta te Atua au tuatua akakite, no reira eaa ta tatou ka tau kia rave?

¹⁷ Ei au tavini no Iehova, ka anoano ia tatou kia vai arikiia mai no tana angaanga. Inara, me ka manako kore atu tatou i ta te Atua au tuatua akakite, ka rauka ua tatou kia riro ke atu i te vaerua o teianei ao, tei akakeu maataia maira i tana tuatua, au puka, tamataora anga, e te tu akono oki. Kare tikai tatou e anoano kia riro ei noinoi, ei viivii, ei aroa kore, ei mako kore, ei rotoriri, ei maro, ei ngakau akateitei, ei anoano i te au mea e navenave ei ra, kare i anoano i te Atua​—kia taiku e tokoiti ua o te au tu akakiteia maira e te aronga taka ke mai i te Atua ra. (2 Timoteo 3:​1-5) I te mea te noo nei tatou i te oonu anga o te tuatau openga o teianei akatereanga no te tauturu tu-Atua kia raukai ia tatou te akono ua atu i ta Iehova au tuatua akakite e ‘te akono marie anga oki kia tau ki tana tuatua.’​—Salamo 119:9.

18. Na te akonoanga i ta te Atua au tuatua akakite ka akariro ia tatou kia rave i teea au takainga papu ra?

¹⁸ E maata atu ta te au tuatua akakite a Iehova ka rave i te akamatakite anake ia tatou i te au apinga ka tika tatou kia rave. Na te akonoanga i tana au tuatua akakite ka akariro ia tatou kia rave angaanga papu, ma te akakeuanga ia tatou kia irinaki papu ia Iehova e kia anoano iaia ma to tatou ngakau katoa, e ma to tatou vaerua katoa, e ma to tatou manako katoa, e te ririnui katoa oki. (Deuteronomi 6:5; Salamo 4:5; Maseli 3:​5, 6; Mataio 22:37; Mareko 12:30) Te akakeu katoa ra ta te Atua au tuatua akakite kia aroa tatou i to tatou tangata tupu. (Levitiku 19:18; Mataio 22:39) Kia maata oki ta tatou akakite i te aroa i te Atua e te tangata tupu na te raveanga i te anoano tu-Atua e te tuaanga kia etai atura i te “kite o te Atua ra.” ​—Maseli 2:​1-5.

E Ora Anga te Akono i ta Iehova Au Tuatua Akakite!

19. Akapeea tatou me akaari atu kia etai ke e e mea tau e te puapinga oki kia akono i te au tuatua akakite a Iehova ra?

¹⁹ Me akono tatou i ta Iehova au tuatua akakite e ka tauturu atu ia etai ke ra kia rave pera, ka akaora tatou ia tatou uaorai e i te aronga te ka akarongo mai ia tatou nei. (1 Timoteo 4:16) Akapeea e raukai ia tatou te akaari kia etai ke e ko te akarongoanga i ta Iehova au tuatua akakite e tau tikai e te puapinga oki? Na te akonoanga i te au kaveinga Pipiria i to tatou uaorai oraanga. Te aronga “i akonoia no te ora mutu kore” ka papu e ko te aerenga tei akanooia ki roto i te tuatua a te Atua ra ko te aerenga meitaki tikai ia no te aru atu. (Angaanga 13:48) Ka kite katoa oki ratou e ‘tei roto tikai te Atua ia tatou’ e ka akakeuia ratou kia kapiti mai kia tatou i te akamori anga i te Atu Ngateitei ia Iehova.​—1 Korinetia 14:​24, 25.

20, 21. Na te au tuatua akakite a te Atua e tona vaerua oki ka raukai ia tatou kia rave i teaa?

²⁰ Na te apii tamou marieanga i te au Tuatua Tapu, te akonoanga i ta tatou i apii, e te rave katoaanga i te au apinga vaerua na Iehova ra, ka riro tatou kia inangaro maata tikai i tana au tuatua akakite. Me ka akarongoia, ka tauturu teianei au tuatua akakite ia tatou “kia akatangata ou oki ko tei angaia kia tau i te Atua ra, i te tuatua-tika e te tapu mou.” (Ephesia 4:​20-24) Ka akariro ta Iehova au tuatua akakite e tona vaerua tapu oki kia akakite i te inangaro, te rekareka, te au, te akakoromaki, te takinga meitaki, te meitaki te pikikaa kore, te maru, te akono meitaki​—te au tu ia te aite kore ra ki te au tu o te ao nei te vaira i te mana o Satani! (Galatia 5:​22, 23; 1 Ioane 5:19) No reira, ka rauka ia tatou kia akameitaki ua me akamaaraaraia mai tatou i te au umuumuanga a Iehova i to tatou tuatau apiianga Pipiria, e te aronga pakari akataoongaia, e i ta tatou au uipaanga, i te au akaputuputu anga, e i te au uruoaanga oki.

²¹ No ta tatou akono i te au tuatua akakite a Iehova, ka rauka ia tatou kia rekareka noatu rai me te mamae ra no te akono tuatua tika. (Luka 6:​22, 23) Te akara atura tatou ki te Atua kia akaora ia tatou i te au turanga akakokoanga maata. E puapinga maata tikai te reira i teianei i te mea te akaputuia ra to te au pa enua katoatoa no “te tamaki i taua rā maata o te Atua mana katoatoa ra” ia Aramagido.​—Apokalupo 16:​14-16.

22. Eaa te tamanako anga tau na tatou kia rave no runga i te au tuatua akakite a Iehova ra?

²² Me ka rauka mai ia tatou te apinga oronga uaia mai no te ora mutu kore, ka tika tatou kia inangaro maata roa i ta Iehova au tuatua akakite e kia akono oki ia ratou ma te ngakau katoa. No reira kia rauka ia tatou te vaerua o te tata taramo tei imene ra: “Te tikaanga o taau ra au tuatua-akakite, e mea mutu kore ïa; e apii mai iaku i te reira kia ora au.” (Salamo 119:​144) E kia akakite tatou i te tu aruaru tikai te kitea ra i roto i te au tuatua a te tata taramo: “Te kapiki nei au ia koe [e Iehova]: e akaora koe iaku, e e akono ïa au i taau ra au tuatua-akakite.” (Salamo 119:​146) Ae, na te tuatua e te angaanga, ka akapapu ia tatou e te inangaro tika ra tatou i ta Iehova au tuatua akakite ma te tu maata roa.

Akapeea Koe me Pau?

• Akapeea ta te tata taramo manako anga no ta Iehova au tuatua akakite?

• Eaa tatou i umuumu ei i ta te Atua ra au tuatua akakite?

• Eaa te tuanga a ta tatou au uipaanga ma te au tuatua akakite tu-Atua ra?

• Akapeea ta Iehova au tuatua akakite te akatakake anga ia tatou mei to teianei ao?

[Tutu i te kapi 15]

Kua inangaro maata ra te tata taramo i ta Iehova au tuatua akakite

[Au Tutu i te kapi 16, 17]

I te aruanga i ta Ana akatauanga, te rave ra ainei koe ei akakoroanga kia kore e topa i te uipaanga?

[Tutu i te kapi 18]

Na te akonoanga i ta Iehova au tuatua akakite te akataka ra ia tatou e kia viivii kore e kia arikiia no tana angaanga