Akapeea Tatou me Vai Mā Ua ki Mua i te Atua?

Akamanako ana i tetai metua vaine e akapapa ra i tana tamaiti no te aere ki te apii. Kua paʼi aia ma te aao i te kakau mā e te mako. E ka kite mai te katoatoa e te akono ra tona nga metua iaia. Te inangaro maira to tatou Metua aroa, ko Iehova, kia mā tatou​—i te pae kopapa, te manako, te tuatua e ta tatou ka rave.

1. Akapeea tatou me vai mā ua i te pae kopapa?

Akakite maira a Iehova: “Kia tapu kotou.” (1 Petero 1:16) Kia tapu i te pae kopapa e te pae o te tu akono. Ka mā tatou i te pae kopapa me pai putuputu e kia mako to tatou kakau, kainga, e te apinga akaoro. Ka tauturu katoa tatou i te tamā i to tatou Are Uipaanga Patireia. Me mā tatou i te pae kopapa, ka akangateitei tatou ia Iehova.​—2 Korinetia 6:3, 4.

2. Kia vai mā ua, eaa te au tu ka kopae tatou?

Te raurau maira te Pipiria kia “tamā ua tatou ia tatou uaorai i te au viivii katoa o te kopapa e te vaerua.” (2 Korinetia 7:1) No reira, ka kopae tatou i tetai ua atu apinga te ka takino i te kopapa e te manako. Ka mareka a Iehova i ta tatou e manako ra, me kopae takiri tatou i te au manako tau kore. (Salamo 104:34) E ka tuatua katoa tatou i te au tuatua mā.​—E tatau ia Kolosa 3:8.

Eaa atu te ka akaviivii ia tatou i te pae kopapa e te pae o te tu akono? Te vaira te au apinga akakona te ka takino i to tatou kopapa. No reira e akaruke tatou i te kai avaava, te betel nut, te rau coca, te au apinga akakona e te kai puapinga kore i te au vairakau. Na te kopae anga i teia, ka meitaki atu to tatou oraanga kopapa e ka akangateitei tatou i te oraanga tei oronga aroaia mai. Kia mā katoa tatou na te kopae anga i te au peu amirimiri i te mero āinga e te akarakara i te au tutu āinga viivii. (Salamo 119:37; Ephesia 5:5) Ka ngata rai i te akamutu i teia au tu, inara ka tauturu a Iehova ia tatou.​—E tatau ia Isaia 41:13.

KIMI OONU

3. Me mā i te pae kopapa ka akangateitei te reira ia Iehova

Ka kite tatou i to Iehova manako no te tu mā me akara matatio tatou i tana akaue anga kia Iseraela i taito. E tatau ia Exodo 19:10 e 30:​17-19, e oti uriuri i teia au uianga:

• Eaa ta teia au irava e akakite maira no to Iehova manako kia mā tatou i te pae kopapa?

• Eaa te au tu meitaki te ka tauturu ia tatou kia vai mā ua i te pae kopapa?

Ka pou te tuatau e te maroiroi kia vai mā ua i te pae kopapa. Inara ka rauka ia tatou noatu te putaua e me kua puapingaia. Akatangi i te VITIO, e oti uriuri i te uianga ka aru mai.

VITIO: Inangaro te Atua i te Aronga Mā (4:10)

• Akapeea ta tatou au apinga mā e te mako te akangateitei anga i te angaanga tutu aere?

4. Akamutu i te au peu tau kore

Me te kai ra koe i te avaava e te apinga akakona, penei te ngata ra ia koe te akamutu i teia peu tau kore. Eaa te ka tauturu? Akamanako akapeea teia peu i te takino anga ia koe. E tatau ia Mataio 22:​37-39, e oti uriuri akapeea te avaava e te apinga akakona me takino . . .

• i te pirianga oa o tetai kia Iehova.

• i te pamiri o tetai e tetai ke.

E parani kia akamutu i teia peu tau kore.a Akatangi i te VITIO.

VITIO: Taangaanga i te Tu Akatere-Uaorai (2:47)

E tatau ia Philipi 4:13, e oti uriuri i teia uianga:

• Akapeea te pure putuputu, te apii Pipiria, e te aere putuputu ki te uipaanga me tauturu i tetai kia akamutu i te peu tau kore?

5. E kopae i te au manako e te au peu viivii

E tatau ia Kolosa 3:5, e oti uriuri i teia au uianga:

• Akapeea tatou e kite ei e peu viivii, te au tutu āinga viivii, te tuku karere āinga e te amirimiri mero āinga, i roto i te mata o Iehova?

• I toou manako e tau ainei ia Iehova kia anoano mai ia tatou kia vai mā ua i te pae o te tu akono? No teaa ra?

Apii kia kite akapeea me kopae i te au manako viivii. Akatangi i te VITIO.

VITIO: Rave Viviki Kia Vai Mā Ua (1:51)

Taangaanga a Iesu i tetai akatutu anga kia vai mā ua i te pae o te tu akono. E tatau ia Mataio 5:​29, 30, e oti uriuri i te uianga:

• Kare a Iesu i tuatua ana kia takinokino tatou i to tatou kopapa, kua akakite ra aia kia viviki tatou i te akatikatika ia tatou uaorai. Eaa ta tetai ka rave viviki kia kopae i te au manako viivii?b

Me te tauta ra koe i te kopae i te au manako viivii, ka akaperepere a Iehova i taau tauta anga. E tatau ia Salamo 103:​13, 14, e oti uriuri i teia uianga:

• Me te ngata ra ia koe te akakore i tetai peu viivii, akapeea teia irava me akamaroiroi ia koe auraka e tuku i te au?

Auraka e tuku i te au!

Māmā ua i te manako, ‘Kare e puapinga, ngari ake au kia tuku i te au.’ Akamanako i teia: Me topa tetai tangata oro ki raro, kare te aiteanga e kua ruti aia i tana oroanga, e kare katoa aia e anoanoia kia akamata akaou i te oroanga. Pera rai, me rave akaou koe i te tarevake, kare te aiteanga e kua ruti koe i te akakore i te reira peu viivii. E kare katoa te reira e takino i taau tauta anga i mua atu ana. Ka tupu rai te tarevake​—ka na reira rai e meitaki ua atu ei. Auraka e tuku i te au! Ka rauka ia koe i te akamutu i te peu viivii ma te tauturu a Iehova.

APIIANGA

Ka akamareka tatou ia Iehova me akono tatou ma te mā i to tatou kopapa, te manako, e te tu akono.

Uriurianga

• Eaa i puapinga ai kia vai mā ua?

• Akapeea koe e mā ei i te pae kopapa?

• Akapeea koe e mā ei i te pae o te manako e te tu akono?

KIMI KIMI

Eaa te au mea māmā ka rave koe kia vai mā ua i te pae kopapa noatu te putaua?

Oraanga Pae Kopapa e te Tu Mā​—Orei i te Rima (3:01)

Akara kia kite koe i te au takainga tau kia akamutu i te kai avaava.

“Akamutu i te Kai Avaava” (E Ara!, Tiurai-Tepetema 2010)

Akara eaa te au kino ka tupu me akarakara i te au tutu āinga viivii.

“Peu Ainga Viivii​—Kanga Ua me e Kino?” (Te Punanga Tiaki, Aukute 1, 2013)

Akara akapeea tetai tangata te akamutu anga i tana peu akarakara i te tutu āinga viivii.

“Maata te Taime Kua Inga Au i Mua Ake ka Autu Ei” (Te Punanga Tiaki Nu. 4 2016)

6. Tauturu a Iehova kia vai tiratiratu koe

VITIO: Akamaroiroi te Atua ko Iehova Iaku (3:40)

• I roto i te vitio, eaa tei tauturu i teia Au Kite kia vai tiratiratu?

E tatau ia Roma 8:​35, 37-39 e Philipi 4:13. Me tatau i teia nga irava, uriuri i teia uianga:

• Akapeea teia irava te akapapu anga e ka rauka ia koe kia vai tiratiratu noatu te timata anga?

E tatau ia Mataio 5:​10-12, e oti uriuri i teia uianga:

• Eaa koe ka mataora ai noatu te takinokino anga?