“E Pure Oki Tetai i Tetai”

KO IEHOVA “tei akarongo i te pure.” (Salamo 65:2) E akarongo ua ana aia i te au pure a te aronga te akono ra iaia ma te ngakau katoa, e kia papu ia tatou e te akarongo ra aia me pure ratou no tetai i tetai.

Inara eaa ka pure ei no tetai i tetai? No runga i teaa te reira au pure kia orongaia? E eaa te au tu o te atua te akaariia ra me pure tatou no tetai i tetai?

Eaa ka Pure ei Tetai i Tetai?

Te akamaroiroi maira te au Tuatua Tapu i to Iehova iti tangata kia pure tetai i tetai. I roto i ta te apotetoro ko Paulo patianga ki te Atua ko te au pure no tetai ke atu. (Kolosa 1:3; 2 Tesalonia 1:11) Te maata atu, kua tata te pipi ko Iakobo: “E pure oki tetai i tetai.”​—Iakobo 5:16.

Te tau meitaki ra te au pure no tetai atu au tavini o te Atua. Te akaariia ra teia ia Iakobo 5:13-18, te ngai e raurauia ra tetai Kerititiano maki i te pae vaerua kia akatika i te aronga pakari kia “pure iaia ma te akatainu iaia i te manongi i te ingoa o te Atu.” Te akarongo anga i ta ratou pure penei ka akamaroiroi te reira i te peretana tei taitaia i te akakeu iaia e ka pau mai te Atua i tana uaorai au pure. (Salamo 23:5; 34:18) Tapiri atu ki te pureanga ma te reira tangata, kia tauta te aronga pakari i te akaoki mai i tona oraanga i te pae vaerua na te tuatua anga i te au manako Tuatua Tapu mei te manongi rai te maru.

Kua tuatua akaou a Iakobo: “E e ora taua maki ra i te pure akarongo, e na te Atu aia e akatu ki runga.” Ae, te akaraanga ka tauturuia te peretana tei maki ra i te pae vaerua e te au “pure akarongo” a te aronga pakari. Te maata atu, na te Atua aia e “akatu ki runga” ki tona oraanga i te pae vaerua me te inangaro ra aia kia tauturuia e te au Tuatua Tapu. Inara akapeea me tupu te au maki i te pae vaerua mei te ara pakari? Me e tu tataraara to te reira tangata, ka akakore a Iehova iaia?

No reira i na Iakobo ei, “e aaki i ta kotou au apa tetai ki tetai, e pure oki tetai i tetai, kia akaoraia kotou. Te pure a te tangata tuatua-tika i akatupu mouia ki roto ra, e mea manuia maata ïa. E tangata oki a Elia . . . e i pure viviki atura aia e, auraka ei ua: kare atura e ua i topa mai ki runga i te enua e e toru akera mataiti e e ono akera oki marama. Pure akaou atura oki aia, e kua oronga maira te rangi i te ua, kua tupu akera te kai o te enua nei.” (1 Ariki 17:1-7; 18:1, 42-45) Te vaira te mana ririnu i roto i te pure a tetai peretana tuatua tika ra tei rotai ki to te Atua anoano.​—1 Ioane 5:14, 15.

Pure no Teaa?

Ka riro tetai ua atu mea ei tumu tuatua no ta tatou au pure no tetai taeake tei irinaki. Ei akaraanga, kua ui a Paulo ki tetai pae kia pure e kia rauka iaia te kite no te tuatua i te nuti meitaki. (Ephesia 6:17-20) Akapeea me kua kite tatou e kua timataia tetai atu? Ka rauka ia tatou i te pure e kia ‘kore aia e rave i tetai mea tarevake’ kia kore te Atua e akaruke iaia kia timataia mari ra kia akaora iaia mei tei kino ra, ko te Tiaporo ko Satani. (2 Korinetia 13:7; Mataio 6:13) E me e maki tikai tetai atu, ka rauka ia tatou kia pati kia Iehova kia oronga kiaia te paruru anga tei anoanoia no te akakoromaki i tona maki.​—Salamo 41:1-3.

E mea tau ua rai kia pure no te au taeake akamori o Iehova tei takinga kinoia. Kua mamae a Paulo e tona au taeake i te takinga kino anga pakari e kua akakite ki te au Kerititiano i Korinetia: “Ko kotou oki i te angaanga katoa anga i te pure ia matou, kia akameitaki te tangata ravarai e manganui i te Atua ia matou, i te meitaki i rauka ia matou i te tangata katoa e manganui ra.” (2 Korinetia 1:8-11; 11:23-27) Noatu e ka tapekaia tatou, ka rauka ia tatou i te pure no te au taeake tei takinga kinoia, te akamaara ua anga e te akarongo ra a Iehova “i te pure a te aronga tautua-tika.”​—Maseli 15:29.

Kia pure tikai tatou no to tatou au taeake te apai ra i te au apainga maata i roto i te akaaerenga a Iehova. Ka kapiti atu te aronga e akatere ra i te akaaerenga e te akateateamamao anga i te au kai i te pae vaerua tei orongaia e te “tavini akono meitaki e te pakari.” (Mataio 24:45-47) Ei akaraanga, te tau ra te Pupu Akaaere o te au Kite o Iehova i ta tatou au pure, e ka rauka ia tatou i te pure e kia oronga te Atua kia ratou “te Vaerua nona te pakari.”​—Ephesia 1:16, 17.

Akamaataia te au tu Kerititiano

Na te pureanga no te au taeake tei irinaki, te akaari ra tatou i to tatou tu manako atu, tu karapii kore, e te aroa. Te karapii kore, e te manako anga aroa no to tatou au taeake tane e te vaine te rotai ra ki ta Paulo tuatua e ko te aroa “kare e kimi i te meitaki nona uaorai.” (1 Korinetia 13:4, 5) Te pureanga no tetai pae ko tetai mataara ia e “auraka . . . e akono i tona anake uaorai au mea, e akono katoa ra i to etai ke ra au mea.” (Philipi 2:4) Me rave tatou i te au anoano i te pae vaerua o tetai ke atu ei manako anga na tatou i ta tatou pure, ka kite katoa tatou ia tatou uaorai i te piri vaitata anga kia ratou na te tu aroa i te taeake te kiteaia ra e te au pipi a Iesu.​—Ioane 13:34, 35.

Ka akatupuia te tu manako i te taeake ki te aronga ta tatou e pure ra. (1 Petero 3:8) E tangi to tatou ia ratou, i te pirianga ki to ratou au anoano e te au taitaia. I roto i te kopapa tangata, me kino tetai rima, ka akono tetai i te reira e ka tauta i te akameangiti mai i te mamae tei akatupuia e te reira motu. (Akaaiteia atu kia 1 Korinetia 12:12, 26.) Aiteite rai, te pure no te au taeake tane e te vaine tei mamae, ka akatupu te reira i to tatou tangi no ratou e ka tauturu te reira ia tatou kia manako ua rai ia ratou. No tatou ia ngere me akangaropoina tatou i te au taeake Kerititiano akono meitaki i ta tatou au pure, no te mea kare te Atua e te Mesia e akaruke ana ia ratou.​—1 Petero 5:6, 7.

Ka akamaataia te au tu o te atua tukeke me pure tatou no tetai ke. Ka maata mai to tatou marama meitaki anga e te akakoromaki anga no ratou. Ka rauka te au tu rikarika i te kiriti tumuia, i te tukuanga i tetai ngai no te au manako akamaroiroi te ka maani ia tatou kia aroa e te rekareka. Te pureanga no tetai ke ka akamaata katoa te reira i te au e te taokotaianga i roto i to Iehova iti tangata.​—2 Korinetia 9:13, 14.

E Tamou i te Pure Tetai i Tetai

Mei ia Paulo rai, ka rauka ia tatou i te pati ki tetai pae kia pure no tatou. I te pae i te pureanga kia tatou, penei ka pure to tatou au taeake ki te Atua no tatou i te ngai muna, te tuatua anga i to tatou ingoa, te taikuanga i to tatou manamanata, e te patianga e kia tauturu mai aia ia tatou. E ka aere mai rai te tauturu, “kua kite mari te Atu i te akaora i te aronga akono i te Atua i roto i te timataanga ra.”​—2 Petero 2:9.

E timataanga rai to te au Kite o Iehova te ka taiku ia tatou i ta ratou au pure​—penei e taitaia rava atu i to tatou uaorai. Inara, te apai ra ratou i to tatou au manako anga ki mua i te Ariki Mutu Kore, penei te aue anga no tatou. (Akaaiteia atu kia 2 Korinetia 2:4; 2 Timoteo 1:3, 4.) Mei teaa to tatou rekareka no teia! No to tatou tu ariki e no tetai atu au tumu tei uriuriia, kia pure ua rai tatou tetai i tetai.