Ka Tau Ainei Kia Pure Koe kia Iesu?

TE MANAKO ra etai au tangata e e mea tau kia pure kia Iesu. I Tiamani e manganui tei apiiia i te tamariki anga e i mua ake ta ratou au kaikai anga e mea tau kia aatu ratou i to ratou nga rima e akameitaki ia Iesu Karaiti.

Kia tau ki te Puka Tapu, e tika e te noo ra a Iesu ki tetai turanga teitei rava i te rangi. Inara, ko te aite anga ainei te reira e ka tau tatou kia pure kiaia? Penei ko koe tetai i rotopu ia ratou, no te aroa ia Iesu, ka arataki i te au pure kiaia, inara eaa to Iesu uaorai manako no runga i taua au pure ra?

Te mea mua, eaa ra teia au uianga i tupu mai ei? No te mea te karanga ra te Puka Tapu e ko te Atua ko Iehova “tei akarongo i te pure ra.” No reira, kare ia i te mea poitirere, te pure anga te au tavini o te Atua i te tuatau taito, mei te au Iseraela, ki te Atua anake ra kia Iehova, te Mana Katoatoa.​—Salamo 5:1, 2; 65:2.

Kua taui ainei te au mea i to Iesu, koia te Tamaiti a te Atua, te aere mai anga ki te enua kia akaora i te au tangata mei te ara e te mate? Kare, te aratakiia ra rai te au pure kia Iehova. I te enua nei kua pure putuputu a Iesu uaorai ki tona Metua i te rangi, e kua apii aia i etai ke kia rave katoa i te reira. E tamanako ana i te pure akara anga, tei kapikiia i etai taime e ko te Pure a te Atu me kore To Matou Metua, ko tetai ia au pure i kite meitakiia i te ao nei. Kare a Iesu i apii ana ia tatou kia pure kiaia; kua oronga mai aia i teia akara anga kia tatou: “E to matou Metua i te ao ra, Kia tapu toou ingoa.”​—Mataio 6:6, 9; 26:39, 42.

I teianei ka tau tatou kia akara i te tumu manako ma te mako tikai na te akara matatio anga e eaa tikai te pure.

Eaa Tikai te Pure?

Te au pure katoatoa e tu akamori anga ia. Kua akapapu mai The World Book Encyclopedia i teia, te akakite anga e: “Ko te pure e tu akamori anga ia ta tetai tangata i oronga no te tu akono, te akameitaki anga, aaki anga, me kare te pati anga ki te Atua.”

I tetai atianga kua karanga a Iesu e: “Kua tataia oki e, ‘Ko toou Atua ra ko Iehova taau e akamori, e koia anake rai taau e akarongo.’” Kua aru a Iesu i te tuatua mou puapinga maata e ko te akamori​—pera katoa oki te au pure—​kia oki anake ua ki tona Metua, te Atua ko Iehova ra.​—Luka 4:8; 6:12.

Akakiteanga ia Iesu i Roto i ta Tatou Au Pure

Kua mate a Iesu ei atinga oko no te au tangata, kua akatuia mai e te Atua, e kua akateiteiia ki tetai taoonga teitei atu. Mei taau e tamanako ra, pouroa teia kua apai mai i tetai taui anga no runga i te au pure arikiia. Na teea tu?

Te akatutu maira te apotetoro ko Paulo i te mana maata i to Iesu taoonga te tauta marie anga no runga i te pure mei tei aru mai: “I akateitei rava atu ei te Atua iaia, e kua oronga mai i te ingoa i maata ua atu i te teitei i te au ingoa ravarai nei nona: Kia tuku te au turi katoa ki raro, to te rangi, to runga i te enua, e to raro ake i te enua, i te ingoa o Iesu; E kia aaki te au vaa ravarai e, ko Iesu Mesia te Atu, kia kakā te Atua Metua ra.”​—Philipi 2:9-11.

Ko te aite anga ainei o te au tuatua ‘i te ingoa o Iesu kia tuku te au turi katoa ki raro’ e ka pure tatou kiaia? Kare. Te o maira te potonga tuatua Ereni i konei “te tuatua ra no runga i te ingoa e ko te aronga e tupou taokotai ra i te turi, te taokotai ra te katoatoa (πᾶν γόνυ) no te akamori anga. Te ingoa tei rauka mai ia Iesu te akakeu ra i te katoatoa kia akangateitei taokotai.” (A Grammar of the Idiom of the New Testament, na G. B. Winer) E tika tikai, kia arikiia te pure, ka tau kia orongaia na roto “i te ingoa o Iesu,” inara, kareka ra, kia aratakiia ki te Atua ko Iehova e ka raveia ki tona kaka ra. No teia tumu nei, kua karanga a Paulo e: “I te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki.”—​Philipi 4:6.

Mei tetai arataa e arataki ra ki tetai akakoroanga, ko Iesu i reira te “mataara” te arataki ra ki te Atua Mana Katoatoa. “Ko au te mataara, e te tuatua-mou e te ora; kare ua e tangata e tae ki te Metua ra, mari ra ei iaku,” kua apii a Iesu i te au apotetoro. (Ioane 14:6) No reira, ka tau tatou kia oronga i ta tatou au pure ki te Atua na roto ia Iesu e kare kia Iesu anake uaorai.a

‘Inara,’ penei ka ui etai e, ‘kare ainei te Puka Tapu i ripoti mai ana e i tuatua ana te pipi ko Setephano raua ko te apotetoro Ioane kia Iesu i te rangi ra?’ E tika te reira. Inara, kare teia au tupu anga i akao mai ana i te au pure, i te mea e kua kite tataki tai a Setephano raua ko Ioane ia Iesu i roto i te orama e kua tuatua tika atu kiaia. (Angaanga 7:56, 59; Apokalupo 1:17-19; 22:20) Ka tamanako i te tuatua ua anga ki te Atua kare uaorai te reira e akatupu i tetai pure. Kua tuatua a Adamu raua ko Eva ki te Atua, te orongaanga i te au kotoeanga no ta raua ara maata, i te akava anga Aia ia raua i to raua ara anga i Edene ra. To raua tuatua anga kiaia na te reira mataara kare ia i te pure. (Genese 3:8-19) No reira, e mea tarevake kia tuatua i ta Setephano me kare ta Ioane tuatuaanga kia Iesu ei akapapu anga e ka tau tikai tatou kia pure kiaia.

Akapeea i Reira te Ingoa o Iesu i te “Tautopa” Angaia?

Te ekoko tavarevare ra ainei koe, te tamanakoanga rai e e mea tau kia pure kia Iesu? Kua tata tetai vaine ki te opati manga o te Totaiete Punanga Tiaki e: “Ma te manuia kore, kare rai i papu iaku e kare te au Kerititiano mua i pure ana kia Iesu.” Kua tamanako aia i te au tuatua a Paulo ia 1 Korinetia 1:2, te taiku ra aia e e “tautopa atu i te ingoa o to tatou Atu ra o Iesu Mesia i te au ngai katoa ra.” Inara, kia akara tetai e, i roto i te reo mua, ko te tuatua “e tautopa atu” e au aiteanga ke atu tona i te pure ua.

Akapeea ra te ingoa o Karaiti i te ‘tautopa angaia’ i te au ngai katoa ra? Ko tetai mataara oki te akakite va ua anga te au pipi a Iesu no Nazareta iaia e ko te Mesia e te “Ora no to te ao,” te raveanga i te au angaanga temeio e manganui na roto i tona ingoa. (1 Ioane 4:14; Angaanga 3:6; 19:5) No reira, te akakite maira The Interpreter’s Bible e ko te potonga tuatua “te tautopa i te ingoa o to tatou Atu . . . te aite anga kia aaki i tona taoonga upoko kare ra kia pure kiaia.”

Te arikianga ia Karaiti e te taangaanga anga i te akarongo ki roto i tona toto tei akamaringiia ra, tei akariro ra kia rauka te akakore anga i te au ara, te akatupu katoa ra i te “tautopa atu i te ingoa o to Atu ra o Iesu Mesia.” (Akaaite ia Angaanga 10:43 ki te 22:16.) E te tuatua tikai ra tatou i te ingoa o Iesu me pure tatou ki te Atua na roto iaia. No reira, koi akaari ei e te kapiki ra tatou i te ingoa o Iesu, kare te Puka Tapu i akakite mai ana e ka pure tatou kiaia.​—Ephesia 5:20; Kolosa 3:17.

Eaa ta Iesu ka Rave no Tatou

Kua taputou marama mai a Iesu ki tana au pipi e: “Ko ta kotou e pati ma toku ingoa, ka tika ïa iaku.” Te umuumuia ra ainei kia pure kiaia? Kare. Te aratakiia ra te patianga ki te Atua ko Iehova​—inara na roto i te ingoa o Iesu. (Ioane 14:13, 14; 15:16) Ka pati tatou ki te Atua kia taangaanga Tana Tamaiti, ko Iesu, i tona mana maata e te mana taoonga no tatou nei.

Akapeea Iesu i te komunikeiti anga ki tana au pipi tika tikai i teia tuatau? Ta Paulo akataka anga i te putuputuanga o te au Kerititiano akatainuia penei ka oronga mai i te akatutu anga. Kua akaaite aia i te reira ki tetai kopapa e ko Iesu Karaiti ki te upoko. Na te “upoko” e oronga ki te au mema o te kopapa vaerua ma to ratou anoano na te mataara o te “au topirianga, e te au paunga anga,” me kore te au apinga e te au akapapaanga na te orongaanga ki tana putuputuanga te tu matutu e te arataki anga i te pae vaerua. (Kolosa 2:19) Na te reira mataara aiteite, te taangaanga ra a Iesu i teia tuatau i te “oronga ua maira te meitaki i te tangata nei,” me kare te au tangata tau i te pae vaerua ra, kia rave i te arataki anga i roto i te putuputuanga, e te orongaanga i te akatikatika me ka anoanoia. Kare ua e apinga no te au mema o te putuputuanga kia komunikeiti tika atu kia Iesu me kare kia pure kiaia, inara ka tau tika tikai ratou​—ae, e mea tau—​kia pure ki te Metua o Iesu, te Atua ko Iehova.​—Ephesia 4:8-12.

Akapeea Koe me Akangateitei ia Iesu?

Tamanakoanga i te ora o te au tangata, mei teaa te tuanga maata ta Iesu e mou ra! Kua tuatua mai te apotetoro Petero e: “Kare rava oki e ora i tetai ke: kare atu oki e ingoa i akakiteia mai ki te tangata i raro ake i teianei rangi, e oraʼi tatou nei.” (Angaanga 4:12) Te kite ra ainei koe i te puapinga maata o to Iesu ingoa?

Na te kore anga e arataki i te au pure kia Iesu uaorai, kare tatou e taakaaka ra i tona taoonga. Mari ra, te akangateiteiia ra a Iesu me pure tatou na roto i tona ingoa. Mei te au tamariki e akangateitei ra i to ratou au metua na te akarongo anga, te akangateitei ra tatou ia Iesu Karaiti na te akonoanga i tana au akauenga, koia oki tikai te akauenga ou kia aroa tetai i tetai.​—Ioane 5:23; 13:34.

Te Au Pure Tau

Te anoano ra ainei koe kia orongaia te au pure tau? No reira e arataki ia ratou ki te Atua ko Iehova, e rave i te reira na roto i te ingoa o tana Tamaiti, ko Iesu. Kia kite i to te Atua anoano, e tuku i taau au pure kia akaata i taua akamaramaanga. (1 Ioane 3:21, 22; 5:14) E mou mai i te maroiroi mei te au tuatua a Salamo 66:20 e: “Kia akameitakiia te Atua, koia kare i kopae i taku nei pure, e tona aroa iaku nei.”

Mei ta tatou i kite, ko te au pure e tu akamori anga na te Atua Mana Katoatoa anake uaia. Na te akaokianga i ta tatou au pure ki te Atua kia Iehova ra, te akakite ra tatou e te tamou ra tatou ki te ngakau i ta Iesu arataki anga i te pure: “E to matou Metua i te ao ra.”​—Mataio 6:9.

[Au Tataanga Rikiriki i Raro]