Teea Atua Taau e Akamori Ana?

TAKAPINI i teianei ao, ka pau te tangata i te reira uianga i te au mataara tukeke e manganui. Kua akara te apotetoro a Paulo: “E manganui oki te atua, e manganui oki te atu, mei te reira te tu.” (1 Korinetia 8:5) Kua kite ainei koe e e maata te tangata te akamori ra i tetai atua ke mai i ta ratou i manako e te akamori ra? Kua kite ainei koe e e aronga akono maata ake te au ateiti (aronga kare irinaki e Atua tetai) i te aronga te irinaki ra ki roto i tetai atua? Na roto i teea tu?

Tetai aiteanga o te akamori “kia manako ma te maata, kauraro maata, ngateitei, me kore akono.” I roto i te au reo mua o te Puka Tapu, te apai ra te au tuatua no te akamori i te manako angaanga me kore te pikoanga ki mua i tetai ke. Ma teia manako, ka akara ana tatou e akapeea te tangata e tarevake ei e koai me kore eaa ta ratou e akamori tikai ra.

Akamori Kapipiti Anga

Akara ana i te akaraanga o to Samaria i taito. I te taime mua te maata anga ia ratou e aronga ke tei apainaia mai e te au Asuria ki roto ia Paretaina no te komono i te kopu tino ngauru tei akatuikaaia o Iseraela i te tua tokerau. I mua atu, kua aru ana ratou i te au atua e te peu etene, inara kua tauta ratou i teianei no te apii i te Atua o Iseraela ko Iehova. I reira, kua akaruke ainei ratou i ta ratou akonoanga taito? Kare. Kua ripoti te Puka Tapu: “Rave atura ratou i ta ratou au peu taito ra. Kua mataku to teianei pa enua ia Iehova, e kua akamori oki i to ratou uaorai au idolo akatikitikiia.” (2 Ariki 17:40, 41) No reira te au Samaria, koi kite akatutu ua ra ia Iehova, kua tavini rai ratou i to ratou au atua taito, te raveanga i tetai tu akonoanga no te kapipiti anga.

Kua tupu tetai mea aiteite i te apai anga mai te aronga evangeria i te Katorika o Roma ki roto i te tua Tonga o Marike. Kua taui ratou i te maata anga o te au tangata, inara mei te au Samaria rai, kare te au tangata i akangaropoina i to ratou au atua taito. I Paratiri te raveia rai te au akono anga o te peu etene vootoo (angaanga purepure) e te au “Kerititiano,” mei te au tamataora ei akangateitei anga i te au atua taito, mei te atua vaine ko Iemanjá. Te tupu ra rai te au mea mei teia i te au enua i te tua Tonga o Marike.

Te au akonoanga tei apaiia e te aronga evangeria ki roto i te tua Tonga o Marike e akonoanga kapipiti anga te reira. E manganui tana au apiianga, mei te Toru Tai, te ai hell, e te mate kore o te meta, kua aere mai te reira mei te au akonoanga e te au kite o te peu etene i taito ra. Kare rava te reira i kiteia i roto i te Puka Tapu. Aiteite rai tana au kaikai maata​—kapiti atu te Keritimeti e te Eatera (ra tuakaou anga o Iesu)—​kare ia i te akamataanga o te Kerititiano.a Te rauka ra ainei i te aru i teia au oroa o te peu etene e te irinaki i teia au apiianga Kerititiano kore e te akamori katoa i te Atua o te Puka Tapu i tei tuatua e: “Auraka rava toou ei atua ke atu iaku nei”? (Exodo 20:3) Papu e kare!

“Matakite ia Kotou i te au Idolo”

E tamanako ana i tetai akaou mataara te akavareia nei te au tangata i roto i te tu o te akamori. Kua tata te apotetoro ko Ioane: “E aku au tamariki ra, e matakite ia kotou i te au idolo ra.” (1 Ioane 5:21) Mei te tai tauatini mirioni tangata tei papaia e tei ia Kerititome, e tei tuatua e te akamori ra rai ratou i te Atua ta Ioane i akamori. Inara, te tupou ra e anere ua atu mirioni ia ratou i te au itoro akatikitikiia o te au “atu” o Iesu, e te paretenia ko Maria.

E maata tetai au tu kikite o te akamori itoro. I te mataiti 44 T.N., kua oronga te Ariki ko Heroda Ageripa i tetai korero, kua maitiiti te iti tangata no reira kua ava ratou: “E reo ïa no te Atua, kare ïa i to te tangata.” (Angaanga 12:21, 22) Ae, kua akamori ratou ia Heroda, te maanianga iaia ei atua. Te tupu ra rai te au mea mei teia i teia tuatau. I te au tuatau kino te kakeanga mai te ravenga Nazi ei mana ririnui i Europa, kua riro te kapiki anga “Heil Hitler!” ei ava anga no te akamori. Kua anoano te manganui i te ta e te mate no te Führer mei te mea ra e atua aia, te akaora o te enua. Inara, te maata anga o te aronga e oronga ra i te akangateitei anga e au mema ratou no te ekaretia o Kerititome!

I mua ake e i muri ake ia Hitler, kua akamaata rai tetai au arataki o te poritiki ia ratou uaorai ei au tangata akaora e kua maro i te tu akono no ratou ua. Te aronga tei aru kua akariro ratou i teia au tangata ei au atua, noatu eaa te tu o te akonoanga ta te “aronga akamori” i o atu e noatu kua karanga e e aronga irinaki kore ratou e atua tetai. Te akangateitei anga te rauka ra i te au tangata tei akakeuia e te rongonui i te pae o te tamataora, akatutu teata, e tetai au tangata tarekareka mei te aronga matakitaki ia ratou, e ravenga akamori te reira.

Akamori i te Moni

Te maata atu, e tamanako ana i te raveanga o ta Iesu au tuatua te tuatua anga aia: “Kare e tika i te tangata kia akono i nga pu e toko rua: ka riro aia i te riri atu ki tetai; e te anoano atu ki tetai e kare ra, ka riro i te tau atu ki tetai, e te akaviivii atu ki tetai. Ko kotou nei oki, kare e tika kia akono atu i te Atua e te Mamona.” (Mataio 6:24) Kua kite ainei koe i tetai tei roto i tetai akonoanga e ko tona inangaro puapinga rava atu i te oraanga ko te kimi moni? Koai i reira, te reira te tavini tikai ra i te Atua me kore te apinganui? Eia aronga irinaki kore taau i kite tei opuia e te akavareia ki te aruaru anga i te moni? Papu e, e aronga akamori ratou i te moni, penei e maroiroi atu i te aronga tei irinaki e manganui.

Kua akamarama te apotetoro ko Paulo i tetai kaveinga mei teia i te tata anga aia: “E tenana ka tamate i to kotou au melo i te au mea o teia nei ao; te akaturi, te tuatua viivii, te anoano viivii ra, te inangaro tika kore, e te noinoi apinga, e akamori idolo oki te reira.” (Kolosa 3:5) Me noinoi pakari tatou i tetai apinga i te mea ra ka akapou i to tatou taime kia rauka mai te reira, penei te aati anga atu i te ture no te reira, kua riro i reira teia mea ei itoro, e ei atua no tatou. (Ephesia 5:5) I tetai akaou reta, kua tata a Paulo no tetai aronga rave ara: “Te kopu oki to ratou atua.” (Philipi 3:19) Me ko te katoaanga o to tatou akakoroanga i te oraanga e ko te akamarekaanga ia tatou uaorai, mei te mea atura te akakianga i to tatou kopu, kua riro mai ia tatou ei atua no tatou uaorai. Eia taau i kite e akamori ana i teia tu atua?

Ae, mei ta te apotetoro ko Paulo i tata: “E manganui oki te atua, e manganui oki te atu.” I te au turanga e manganui, mei te au Samaria i taito ra i to ratou aronga akamori, te tavinianga i tetai atua na roto i ta ratou au tuatua e tetai na roto i ta ratou au ravenga. Te tika, te vaira e tai rai Atua te tau ra kia akamori tatou. Kua kite ainei koe e koai aia? Te maata atu, te vaira e tai mea te taokotai ra i te akamori i te au atua ke ravarai tei takake mei iaia. Eaa te reira? Ka kite tatou i te atikara ka aru mai.

[Au Tataanga Rikiriki i Raro]