Epaphera—“E Orometua Tuatua-Mou na te Mesia”

NAAI i akamata i te au putuputuanga Kerititiano i Korinetia, Ephesia, e Philipi? Penei kare koe e tapupu i te pau: ‘E na Paulo, “te aposetolo a te etene.”’ (Roma 11:13) Te tika ra taau.

Inara, naai i akanoo i te au putuputuanga i Kolosa, Ierapoli, e Laodikea? Noatu kare tatou i papu, penei na tetai tangata ko Epaphera tona ingoa. Tera ua, penei ka inangaro koe i te kite i teia tangata evangeria, i te mea kua kapikiia aia “e orometua tuatua-mou na te Mesia.”​—Kolosa 1:7.

Te Tangata Evangeria o te O o Lycus

E ingoa poto ua te ingoa Epaphera no te ingoa Epaperodito. Inara auraka e akatarevake ia Epaphera kia Epaperodito no Philipi mai. No Kolosa mai a Epaphera, e ngai o te au putuputuanga Kerititiano e toru i te o o te Kauvai Lycus, i Asia Minora. E 18 kiromita te mamao ia Kolosa mei Laodikea e 19 kiromita mei Ierapoli, i te ngai taito o Pherigia.

Kare te Pipiria i akakite tikai mai e akapeea te au tuatua meitaki o te Patireia o te Atua i tae ei ki Pherigia. Inara, tei Ierusalema te au tangata Pherigia i te ra o te Penetekote i te 33 T.N., penei etai pae ia ratou no Kolosa mai. (Angaanga 2:1, 5, 10) I te tuatau o ta Paulo angaanga orometua i Ephesia (mei te 52-55 T.N.), no te oraora e te meitaki o te akakite anga tei orongaia i te reira ngai kare anake ko te au tangata Ephesia mari katoa ra “kite akera to Asia ravarai, te ngati Iuda, e te Eleni, i te tuatua a te Atu a Iesu.” (Angaanga 19:10) Te akara anga kare a Paulo i tutu aere ana i te tuatua meitaki i roto i te O o Lycus, i te mea e manganui tei riro mai ei au Kerititiano i te reira ngai kare i kite iaia.​—Kolosa 2:1.

Kia tau ki ta Paulo, te tangata nana i apii i te au Kolosa no runga i “te aroa ua o te Atua ra” ko Epaphera. Te tika e kapiki ana a Paulo i tona tokorua angaanga “e orometua tuatua-mou na te Mesia” te akaari maira e e tangata evangeria maroiroi a Epaphera i te reira ngai.​—Kolosa 1:6, 7.

Kua manata maata te apotetoro ko Paulo raua ko te tangata evangeria ko Epaphera i te turanga pae vaerua o to raua au taeake irinaki i roto i te O o Lycus. Ei “aposetolo a te etene,” kua rekareka rai a Paulo i te rongo anga i te au nuti no runga i to ratou tere anga ki mua. Na roto mai oki ia Epaphera i rongo ei a Paulo i te turanga pae vaerua o te au tangata Kolosa.​—Kolosa 1:4, 8.

Ta Epaphera Akakite Anga

Kua aro atu te au tangata Kolosa i te au manamanata pakari tikai i akakeuiaʼi a Epaphera kia teretere roa ki Roma no te akakoro anga tikai o te uriurianga i te au mea kia Paulo. Na te akakite anga tata meitakiia ta Epaphera i tata i akakeu tikai ia Paulo kia tata e rua nga reta ki taua au taeake kare aia i kite ra. Okotai e reta ki te au tangata Kolosa. Tetai atu reta, kare i akonoia, kua tukuia ki te au tangata Laodikea. (Kolosa 4:16) E mea tau i te akamanako i te au tuatua o taua nga reta kua akakoroia kia ariu atu ki te au anoano o taua au Kerititiano tei kiteia e Epaphera. Eaa te au mea tei anoanoia tana i kite? E eaa ta teia e akakite maira kia tatou no runga i tona tu?

Te akara anga e te akakite maira te reta ki te au tangata Kolosa e kua manata a Epaphera e te takinoia ra te au Kerititiano i Kolosa e te au apiianga peikani tei o mai te apiianga arairai, te purepure, e te mataku tau kore akamori itoro. Pera katoa, penei kua riro te apiianga ngati Iuda o te akakore takiri anga kai e te akono anga i tetai au ra ei akakeu i etai au mema o te putuputuanga.​—Kolosa 2:4, 8, 16, 20-23.

Te tika e kua tata a Paulo i teia au tumu manako te akaari maira kia tatou e kua matakite e kua kite a Epaphera i te au anoano o tona au taeake Kerititiano. Kua manako aroa aia i to ratou turanga pae vaerua, te matakite anga i te au kino i to ratou ngai e noo ra. Kua kimi a Epaphera i te ako anga a Paulo, e te akaari maira teia e e tu akaaka tona. Penei kua manako aia i te anoano kia kimi i te ako anga mei te tangata e maata atu tona pakari. Mei tera te tu, kua rave aia ma te tu pakari.​—Maseli 15:22.

I te mea kua kapikiia a Epaphera ei “taeake tavini akaperepere,” kare e ekoko anga e kua akapiri vaitata aia iaia uaorai ki te au taeake Kerititiano. (Kolosa 1:7) Me ka rauka, ka tau te au mema katoatoa o te putuputuanga kia oronga ua ia ratou uaorai ma te maana e te aroa. Ei akaraanga, ka tau kia tauturuia te aronga maki, te aronga pakarikari, me kore tetai atu ma te au anoano takake. Penei te vaira tetai atu au apainga ke ke no te akono i roto i te putuputuanga, me kore ra penei ka rauka i te tauturu atu i te au angaanga akatu anga teokaratiki.