Tiratiratu kia Karaiti e Tona Tavini Akono Meitaki

‘E akariro tona pu iaia ei akaaere i te au apinga ravarai nana ra.’​—MATAIO 24:45-47.

1, 2. (a) Koai ta te Tuatua Tapu e akakite maira e ko to tatou Arataki? (e) Eaa te akaari maira e na Karaiti e arataki maroiroi nei i te putuputuanga Kerititiano?

“AURAKA kotou kia tapaia i te arataki; okotai o kotou Arataki, ko te Mesia.” (Mataio 23:10) Na roto i teia au tuatua kua akakite meitaki a Iesu ki tana au pipi e kare tetai tangata i runga i te enua nei e riro mai ei arataki no ratou. Tei te rangi to ratou Arataki okotai​—ko Iesu Karaiti uaorai. Te mou nei a Iesu i teia taoonga na te akataoonga anga tu-Atua. Kua “akatu mai [a Iehova] iaia i te matenga ra . . . e kua akono oki iaia ei upoko i rungao i te au mea katoa i te ekalesia. Ko tona ïa kopapa.”​—Ephesia 1:20-23.

² Mei te mea e ko Karaiti te “upoko i rungao i te au mea katoa” no te putuputuanga Kerititiano, te taangaanga ra aia i tona mana i rungao i te au mea ravarai e raveia ra i roto i te putuputuanga. Te kite ra aia i te au mea ravarai e tupu ra i roto i te putuputuanga. Te akara tikai ra aia i te turanga i te pae vaerua o te au pupu Kerititiano tataki tai, me kore i te putuputuanga. Kua kitea puia teia i roto i te akakiteanga tei orongaia ki te apotetoro ko Ioane i te openga o te anere mataiti mua T.N. E rima taime i te akakite anga a Iesu ki te putuputuanga e itu e kua kite aia i ta ratou au angaanga, to ratou au tu ketaketa e to ratou tu paruparu, e kua oronga aia i te akoanga e te akamaroiroianga kia tau ki te reira. (Apokalupo 2:2, 9, 13, 19; 3:1, 8, 15) Te irinaki tikai nei tatou e kua kite katoa a Karaiti i te turanga pae vaerua o tetai au putuputuanga ke atu i Asia Minora, Paretaina, Suria, Babulonia, Ereni, Itaria, e tetai atu au ngai ke. (Angaanga 1:8) Akapeea ra i teia tuatau?

Tetai Tavini Akono Meitaki

3. Eaa ra i tau ei e kia akaaiteia a Karaiti ki tetai upoko e tana putuputuanga ki tetai kopapa?

³ I muri ake i tona akatuia anga mai e i mua ua ake ka kake atu ei aia ki tona Metua i te rangi, kua akakite a Iesu ki tana au pipi e: “Ko te mana katoa o to te rangi e te ao katoa nei, kua tukuia mai, tei iaku anake.” Kua karanga katoa aia e: “I na, tei vaitata ua ra au ia kotou, e tae ua atu ki te openga o teianei ao.” (Mataio 28:18-20) Ka noo vaitata ua rai aia i te pae ia ratou ei Upoko maroiroi no ratou. I roto i nga reta ki te au Kerititiano i Ephesia e to Kolosa, kua akaaite te apotetoro ko Paulo i te putuputuanga Kerititiano ki te “kopapa,” e ko Karaiti oki te Upoko. (Ephesia 1:22, 23; Kolosa 1:18) Te akakite ra The Cambridge Bible for Schools and Colleges e ko teia tuatua akaaiteanga “kare e te akakite ua maira i te pirianga puapinga maata ki te Upoko, inara kua taangaangaia te anoano o te Upoko na roto i te au mema. E au mea angaanga ratou Nana.” Koai ma ta Karaiti i taangaanga ana ei pupu angaanga nana i te akataoongaia anga ki te mana Patireia i te mataiti 1914?​—Daniela 7:13, 14.

4. Mei tei akakiteia mai i roto i te totou a Malaki, eaa ta Iehova raua ko Iesu Karaiti i kite mai i te aere anga raua i te tutaka i te nao i te pae vaerua?

⁴ Kua akakite mai te totou a Malaki e te aere maira a Iehova, “te Atu” mou, e tana “karere a te koreromotu,” tana tamaiti tei akataoonga ou uaia, ko Iesu Karaiti, i te akava e te tutaka i Tona “nao,” me kore te are akamorianga i te pae vaerua. Papu tikai e kua akamata te tae anga mai “te tuatau e tupu ei” te ‘akavaanga i te ngutuare o te Atua’ i te mataiti 1918.a (Malaki 3:1; 1 Petero 4:17) Kua akarakara meitakiia te aronga te karanga ra e te komono ra i te Atua e tana akamorianga mou i runga i te enua nei. Kua kopaeia te au akonoanga a Kerititome, tei apii i te au apiianga akangateitei kore i te Atua no te au anere mataiti e tei o pakari ana ki roto i te tamate anga i te Tamaki I o te Ao. Kua timataia tetai toenga akono meitaki o te au Kerititiano tei akatainuia e te vaerua, e kua tamaia mei te mea e ki te ai, e kua akaperepereia, i te riro anga mai na te ‘apai anga ratou i te atinga tuatua-tika’ kia Iehova.​—Malaki 3:3.

5. Kia rotai ki ta Iesu totou no runga i tona “parutia,” koai ma i reira te “tavini” akono meitaki?

⁵ Kia tau ki te totou a Malaki, te akairo tukeke e manganui ta Iesu i oronga ki tana au pipi te tauturu ra ia ratou kia kite i te tuatau o tona “[“parutia,” NW], e te openga o teianei ao” i te kapiti anga mai i te akatakaanga i tetai pupu “tavini.” Kua tuatua a Iesu e: “Koai te tavini akono meitaki e te pakari, i ta tona pu i akaaere i tona ngutuare, ei tua i te kai na ratou i te ora mou ra? E ao to te reira tavini, to tei rokoia mai e tona pu, te pera ra. Tikai taku e karanga atu kia kotou nei, e akariro aia iaia ei akaaere i te au apinga ravarai nana ra.” (Mataio 24:3, 45-47) E “rokoia mai” i te tutaka anga i te “tavini” i te mataiti 1918, kua kitea mai e Karaiti tetai toenga o te aronga akatainuia e te vaerua o te au pipi akono meitaki tei taangaanga ana i teia tianara mei te mataiti 1879 e tetai atu au puka tei akatumuia ki runga i te Pipiria kia oronga i te ‘kai i te pae vaerua i te ora mou.’ Kua ariki aia ia ratou ei pupu angaanga nana, me kore e “tavini,” e i te mataiti 1919 kua oronga atu kia ratou i te akaaere anga i tana au apinga tini ravarai i te enua nei.

Akaaere Anga i ta Karaiti Au Apinga i te Enua Nei

6, 7. (a) Eaa tetai atu au tuatua ta Iesu i tuatua ana no tona “tavini” akono meitaki? (e) Eaa te aiteanga o ta Iesu tuatua anga i te tuatua te “akaaere”?

⁶ I nga mea marama i mua ake ka oronga ai a Iesu i tana totou no runga i te akairo o tona parutia, kapiti mai i te vai anga o te “tavini” te komono ra iaia i te enua nei, kua tuatua aia no runga i teia “tavini” na roto i tetai tuatua tuke ua ake te akaari maira i te au apainga a te tavini. Kua akakite a Iesu e: “Koai te akaaere pikikaa kore e te pakari, i ta te pu e tuku i rungao i tona katoa au tavini, ei tua i ta ratou tuanga kai i te ora mou ra? Koia mou taku e karanga atu kia kotou nei, e akariroia aia e ia ei tiaki i te apinga tini ravarai nona.”​—Luka 12:42, 44.

⁷ I konei kua tapaia te tavini e ko te akaaere, e tuatua tei uriia mei tetai tuatua Ereni te karanga ra e “e manitia no tetai ngutuare me kore no te are e te enua.” Kare te pupu akaaere e e pupu ua no te aronga kite karape tei akamarama mai i te au tumu meitaki tikai mei te Pipiria. Kapiti atu ki te oronga anga i te kai meitaki i te pae vaerua “i te ora mou,” ka ikiia “te akaaere pikikaa kore” ki rungao i te katoaanga o te pupu o to Karaiti au tavini e ka tukunaia atu kia akono i te au mea ravarai a Karaiti i te enua nei, te “apinga tini ravarai nona” ra. Eaa ra ta teia e kapiti maira?

8, 9. Eaa te ‘au apinga’ ta te tavini tei ikiia ka akaaere?

⁸ Te kapitiia maira ki te au apainga a te tavini te akatere anga i te au ngai te taangaangaia ra e te au pipi a Karaiti kia rave ua atu i ta ratou au angaanga Kerititiano, mei te opati maata e te au opati manga o te Au Kite o Iehova, e pera katoa to ratou au ngai akamorianga​—te au Are Uipaanga Patireia e te au Are Uipaanga Akaputuputuanga​—takapini i te ao katoa. Te mea puapinga maata roa atu, te akaaere katoa ra te tavini i te au porokaramu akamaroiroi anga i te pae vaerua no te apii Pipiria i ko i te au uipaanga i te au epetoma e te au akaputuputuanga e te au uruoaanga i etai au tuatau. I ko i teia au akaputuputu anga, e orongaia mai ana te akakiteanga no runga i te akatupu anga i te au totou Pipiria, e te arataki anga tau e akapeea te taangaanga anga i te au kaveinga Pipiria i roto i te oraanga i te au ra ravarai.

⁹ I roto i te au apainga a te akaaere te kapiti katoa maira te akatere anga i te angaanga puapinga maata rava no te tutu aere anga i “te evangelia o te basileia” e te akariro anga “i to te pa enua katoa ei pipi.” Te kapiti maira teia i te apiianga i te au tangata kia akono i te au mea ravarai ta Karaiti, te Upoko o te putuputuanga, i akaue mai kia raveia i teia tuatau openga. (Mataio 24:14; 28:19, 20; Apokalupo 12:17) Kua rauka mai i te angaanga tutu anga e te apiianga “te aronga maata rava” e au oa tiratiratu no te toenga o te aronga akatainuia. Kare e ekokoanga e kua riro “tei inangaroia e te au enua katoa ra” ei tuanga no te ‘au apinga’ akaperepereia e Karaiti tei akaaereia e te tavini akono meitaki.​—Apokalupo 7:9; Hagai 2:7.

E Pupu Akaaere Komono

10. Eaa te pupu tei akatakaia kia rave i te ikianga i te anere mataiti mua, e eaa te taui anga tei tupu ki te au putuputuanga?

¹⁰ Te au apainga teiaa a te tavini akono meitaki ra te taka ua ra e e maata te au ikianga ka raveia. I roto i te putuputuanga Kerititiano mua, kua komono te au apotetoro e te aronga pakari i Ierusalema i te pupu tavini, i te rave anga i te au ikianga no te katoaanga o te putuputuanga Kerititiano. (Angaanga 15:1, 2) Kua tukunaia atu te au ikianga a teia pupu akaaere o te anere mataiti mua ki te au putuputuanga na roto i te au reta e te au komono tutaka. Kua mataora te au Kerititiano mua i te rauka anga mai teia arataki anga taka meitaki, e kua akatupu ta ratou taokotaianga puareinga ua ma te pupu akaaere i te au e te tu taokotai.​—Angaanga 15:22-31; 16:4, 5; Philipi 2:2.

11. Koai ma ta Karaiti e taangaanga ra i teia tuatau kia arataki i tana putuputuanga, e akapeea tatou i te akara anga i teia pupu o te au Kerititiano tei akatainuia?

¹¹ Mei te tuatau i akamata mai ei te Kerititiano mua, kua riro mai tetai pupu meangiti e au akaaere tei akatainuia ki te vaerua ei Pupu Akaaere no te au pipi a Karaiti i runga i te enua nei i teia tuatau. Na roto i tona “rima katau” no te mana taangaangaia ra, na Karaiti, te Upoko o te putuputuanga, e arataki i teia au tane akono meitaki ia ratou e akatere ra i te angaanga Patireia. (Apokalupo 1:16, 20) I roto i tona tua no te oraanga, kua tata a Albert Schroeder, e mema no te Pupu Akaaere kua roa te tuatau i tona tavini anga tei akamutu atu tona oraanga i te enua nei, e: “E uipa ana te Pupu Akaaere i te au Ruitoru katoatoa, e akamata ana te uipaanga ki te pure e te pati atu i te arataki anga a to Iehova vaerua. Kua raveia tetai tauta anga tikai kia akara e kua akono pouroaia te au mea ravarai e kua raveia te au ikianga ravarai kia rotai ki te Tuatua a te Atua, te Pipiria.”b Ka rauka ia tatou i te irinaki i taua au Kerititiano akono meitaki tei akatainuia ra. No runga tikai ia ratou, e akarongo tatou ki te akaue anga a te apotetoro ko Paulo: “E akarongo i to kotou au arataki, e kauraro atu kotou: te tiaki ra ratou i to kotou au vaerua.”​—Ebera 13:17.

Akaari i te Akangateitei Anga Tau no te Tavini Akono Meitaki

12, 13. Eaa ra te au tumu Tuatua Tapu no te akaari anga i te akangateitei ki te pupu tavini?

¹² Ko tetai tumu puapinga maata no te akaari i te akangateitei anga tau ki te pupu tavini akono meitaki ko tera oki e na te rave anga i teia, te akaari tikai ra tatou i te ngateitei ki te Pu, kia Iesu Karaiti. Kua tata a Paulo no te aronga akatainuia e: “Ko to te Atu ïa tangata rangatira i kapikiia ra, ko te tavini ïa no te Mesia. Kua okoia kotou i te oko.” (1 Korinetia 7:22, 23; Ephesia 6:6) No reira, me kauraro tiratiratu tatou ki te arataki anga a te tavini akono meitaki e tona Pupu Akaaere, te kauraro ra tatou kia Karaiti, te Pu o taua tavini ra. I to tatou akaari anga i te akangateitei anga tau no te apinga ta Karaiti e taangaanga ra kia akaaere i tana au apinga i te enua nei ko tetai mataara te reira e rauka ai ia tatou i te “aaki te au vaa ravarai e, ko Iesu Mesia te Atu, kia kakā te Atua Metua ra.”​—Philipi 2:11.

¹³ Ko tetai tumu Tuatua Tapu ke no te akaari anga i te akangateitei anga no te tavini akono meitaki koia oki te akataka akatutuia maira taua au Kerititiano akatainuia i te enua nei e ei “nao” ta Iehova e noo ra i te ‘vaerua.’ No te reira, e mea “tapu” oki ratou. (1 Korinetia 3:16, 17; Ephesia 2:19-22) Ki teia pupu tei akatutuia mai ei nao tapu, i oronga ai a Iesu i tana au apinga i te enua nei, te aiteanga oki kua peke ki teia pupu tavini anake ua te au tikaanga tikai e te au apainga i roto i te putuputuanga Kerititiano. No teia tumu nei, pouroa i roto i te putuputuanga te akara ra i te reira ei angaanga tapu na ratou kia aru e kia turu i te aratakianga tei aere mai no ko mai i te tavini akono meitaki e tona Pupu Akaaere. E tika rai, te akamanako nei te “mamoe ke atu” e e akangateitei anga tikai i te tauturu anga i te pupu tavini i te akono anga i te au apinga a te Pu.​—Ioane 10:16.

Oronga Anga i te Turuanga Tiratiratu

14. Mei tei totouia e Isaia, akapeea te mamoe ke atu i te aru anga i te pupu tavini akatainuia e te tavini anga ei “aronga angaanga tutaki koreia”?

¹⁴ Kua akakiteia mai to te mamoe ke atu kauraroanga akaaka ki te au mema akatainuia o Iseraela vaerua i roto i te totou a Isaia e: “Te na ko mairā Iehova, Te [“aronga angaanga tutaki koreia,” NW] no Aiphiti, e te oko na Kusa, e to Seba tangata teitei ra, te ka aere mai kia koe ra, ei tangata noou: e aru ratou ia koe; ma te pirianganaoa katoa i te aru anga: e tupou ratou ki raro i mua ia koe; e pati akatenga atu ratou ia koe, i te na ko anga atu e, Tei ia koe tika rai te Atua, e kare atu; kare atu Atua.” (Isaia 45:14) Ei akatutu anga, te aru ra te mamoe ke atu i te pupu tavini akatainuia e tona Pupu Akaaere i teia tuatau, i te aru anga i ta ratou arataki anga. Ei “aronga angaanga tutaki koreia,” te oronga puareinga ra te mamoe ke atu i to ratou maroiroi e ta ratou au apinga i te turu anga i te angaanga tutu anga takapini i te ao katoa ta Karaiti i oronga mai ki tana au pipi akatainuia i te enua nei.​—Angaanga 1:8; Apokalupo 12:17.

15. Akapeea te totou a Isaia 61:5, 6 i te akakite anga mai i te pirianga te tupu ra i rotopu i te mamoe ke atu e te Iseraela vaerua?

¹⁵ Te mataora nei e te mareka nei te mamoe ke atu i te tavini ia Iehova i raro ake i te akaaere anga a te pupu tavini e tona Pupu Akaaere. Kua kite ratou i te aronga tei akatainuia e e au mema no “Iseraela o te Atua.” (Galatia 6:16) Ei “au tangata ke ke” e te “tangata ke” akatutuia mai tei kapiti atu ki te Iseraela vaerua, te rekareka ra ratou i te tavini anga ei “tanu-kai” e te “tope vine” i raro ake i te aratakianga a te ‘kau taunga akatainuia na Iehova’ e te ‘au tavini o te Atua.’ (Isaia 61:5, 6) Te rave maroiroi ra ratou i te tutu aere anga i teia tuatua meitaki o te Patireia e te akariro anga i to te pa enua katoa ra ei pipi. Te oronga ngakau tae ra ratou i te tauturu i te pupu tavini i te tiaki anga e te akono anga i te aronga ou mei te mamoe rai tei kiteaia mai.

16. Eaa te akakeu ra i te mamoe ke atu kia oronga i te turu anga tiratiratu ki te tavini akono meitaki e te pakari?

¹⁶ Te kite ra te mamoe ke atu e kua puapinga maataia ratou mei te au tauta anga pakari a te tavini akono meitaki i te oronga anga mai kia ratou i te kai i te pae vaerua i te ora mou. Te ariki akaaka ra ratou e naringa kare te tavini akono meitaki e te pakari, e meangiti ua me kore kare a ratou apinga e kite mai no runga i te au tuatua mou Pipiria akaperepereia, mei to Iehova tu ngateitei, te akatapuanga i tona ingoa, te Patireia, te rangi ou e te enua ou, te meta, te turanga o te mate, e te tu tikai o Iehova, o tana Tamaiti, e te vaerua tapu. Ma te akameitakianga e te tu tiratiratu tikai, te turu aroa nei te mamoe ke atu i te “au taeake” akatainuia o Karaiti i runga i te enua i teia tuatau openga.​—Mataio 25:40.

17. Eaa ta te Pupu Akaaere i akamanako ana e e mea tau kia raveia, e eaa te ka akamanakoia i roto i te atikara e aru maira?

¹⁷ I te akamanako anga e te iti ua atura to ratou pupu, ko te aronga akatainuia ra kare ratou i roto i te au putuputuanga katoatoa i te akapapu mai e te akaaereia ra te au apinga a Karaiti. No reira rai, te Pupu Akaaere i iki ei i te au tane mei roto mai i te mamoe ke atu ki te au taoonga no te akaaere anga i roto i te au opati manga, te au tapere, te au kotinga, e te au putuputuanga o te Au Kite o Iehova. Te riro ra ainei to tatou tu ki teia au tiaki nei ei akakeu anga i to tatou tu tiratiratu kia Karaiti e tana tavini akono meitaki? Ka akamanakoia teia i roto i te atikara e aru mai nei.

[Au Tataanga Rikiriki i Raro]

Na te Akamanako Akaou Anga

• Koai to tatou Arataki, e eaa te akaari maira e te kite maira aia i te au turanga i roto i te au putuputuanga?

• I te tutaka anga i te “nao,” koai ma tei kiteaia mai e te angaanga ra ei tavini akono meitaki, e eaa te au apinga tei orongaia kia ratou?

• Eaa ra te au tumu Tuatua Tapu no te turuturu tiratiratu anga i te tavini akono meitaki?

[Au Tutu i te kapi 23]

Te ‘au apinga’ te akonoia ra e te “akaaere” te kapiti maira i te au apinga materia, te au porokaramu i te pae vaerua, e te angaanga tutu anga

[Tutu i te kapi 25]

Te turu ra te au mema o te mamoe ke atu i te tavini akono meitaki na roto i ta ratou tutu anga maroiroi