Pene 23

E Akapiri Vaitata ki te Manako i Taua Ra o Iehova Ra

1. (a) I toou kite mua anga e te vaitata maira te akaoraanga mei te mamae ngakau o teia akatereanga taito, i akapeea toou manako? (e) Eaa te au uianga no runga i teia te ka tau tatou kia akamanako pakari?

KARE e ekoko anga e ko tetai o te au mea mua tei kiteia e koe no taau apii Puka Tapu ko te akaora anga mei te au mamae ngakau o te oraanga i roto i teianei akatereanga o te au mea, e vaitata mai nei. (Luka 21:28) I reira koe i kite ei e ko to te Atua akakoroanga koia kia akariro i te enua katoa ei Parataito. Te rave kino, te tamaki, te maki e te mate ka kore atu, e pera katoa tei akaperepereia i mate ra ka ora akaou mai. Mei teaa ra te pumaana o te ngakau i te reira akakoroanga! Kua akaketaketaia te vaitata mai anga o te reira i te papu anga e kua akamata to Karaiti tutaraanga ei Ariki akara koreia i te 1914 T.N. e mei reira mai kua o tatou ki roto i te au ra openga o teianei ao kino. Kua akatupu ainei te reira kite i te au taui anga ki toou oraanga? Te akakite papu maira ainei toou tu oraanga i te irinaki anga e te vaitata maira “taua ra o Iehova ra”?

2. (a) Aea e tae mai ei “taua ra o Iehova ra”? (e) Akapeea i puapingaʼi te kore anga a Iehova i akakite mai i te “rā e te reira ora”?

² Te akaari marama maira te Tuatua Tapu e ko te “uki” tei kite i te akamataanga i to Karaiti ra taenga mai ka kite katoa ia i “taua ra maata o Iehova ra” e rave ei aia i te akava anga i te aronga katoatoa te rave ra i te tuatua tika kore. (Mata. 24:34; Zepha. 1:​14–2:3) E roa te au mataiti o te reira “uki” i teianei. Inara kare te Puka Tapu i tou tika mai i te ra e tae mai ei a Iesu Karaiti ei rima rave na Iehova i te akapou anga i ta Satani akatereanga no te au mea i te enua nei. “Kareka te reira rā e te reira ora, kare rava tetai e kite, kare oki te au angela o te rangi, kare katoa oki te Tamaiti, ko te Metua anake ra,” i na Iesu ei. (Mareko 13:32) Kua kitea e e mea puapinga rava teia. Na teea mataara? Kua tauturu te reira i te akakite e eaa to roto i te au ngakau o te au tangata. Me kare etai e inangaro tikai ia Iehova, ka akamanako ratou i te tuku i tona “ra” kia mamao atu i to ratou manako e ka ariu ke ki te aruaru apinga kopapa te takiia atura e to ratou ngakau kia inangaro. Ko te aronga anake ua ta Iehova ka mareka ei tavini nana ko tei inangaro tika ra iaia e tei akaari mai i te reira na te tavinianga iaia ma te ngakau katoa, noatu rai e aea e tupu ei te openga o te akatereanga kino nei. Kare te mareka anga o te Atua e tana Tamaiti e no te aronga e maanaana ua me kare e manako rua.​—Apokalupo 3:16; Sa. 37:4; 1 Ioane 5:⁠3.

3. Eaa ta Iesu i tuatua ei akamatakite ia tatou no runga i te reira tumu?

³ I roto i te tuatua akamatakite ki te aronga inangaro ia Iehova, kua karanga a Iesu: “E matakite oki ia kotou, e akamaroiroi, e e pure; kare oki taua tuatau ra i kitea e kotou.” (Mareko 13:​33-37) Kua raurau mai aia ia tatou e auraka e tuku i te kai e te kona me kare “te au pekapeka o te oraanga” kia akapou maata i to tatou manako kia kore ei tatou e kite i te tu rapurapu o te tuatau.​—Luka 21:​34-36, NW; Mata. 24:​37-42.

4. Mei ta Petero i akataka maira, eaa ta “taua ra o Iehova ra” ka apai mai?

⁴ I muri akera, kua ako mai te apotetoro ko Petero i te aronga katoatoa e akarongo mou to ratou kia ‘tatari e kia akapiri vaitata ki te manako i te taenga mai o taua ra o Iehova ra, e ngaro ei te au rangi i te tutungiia i te ai e e taravai ei te au tumu i te veravera maata.’ Ko te vaitata anga mai o “taua ra o Iehova ra” e tika ia kare e tau kia akamea ngitiia e tetai o tatou nei. Ko te au rangi kavamani akara mataia ra e te totaiete o te au tangata kino ra kare e roa atu ka tauiia ki te “rangi ou e te enua ou” ta te Atua e maani maira, e te “au tumu” ravarai te o atura ki teianei akatereanga o te ao​—tona tu manako takake ra, tona tu akaturi e te noinoi apinga no te oraanga⁠—​ka akaopeia ratou ki roto i te akapou anga veravera o “taua ra o Iehova ra.” (2 Pe. 3:​10-13, NW) Ka tau rai tatou kia araara, e kia matakite e ko teia au apinga akangaangaa o te ao, ka tupu i tetai ua atu atianga i teianei.​—Mata. 24:44.

E Matakite i te au Apinga no te Akatupuanga i te Akairo

5. (a) Eaa te maata o ta Iesu pau anga i te uianga tei tataia ra ia Mataio 24:3 i piri atura ki te openga o te akatereanga ngati Iuda ra? (e) Ko teea au tuanga o tana pau anga te tou maira i te manako ki te au tupuanga mei te 1914 mai o te T.N.?

⁵ I te manako anga atu i te tuatau tikai e ora nei tatou, ka tau kia kite meitaki tatou i te au tuanga o te akairo no te akatakaanga i te “tuatau openga,” me kare te “openga o te akatereanga o te au mea nei.” E tano ei te tatau anga i te akairo, ka tau tatou kia tamou ki roto i te manako e ia Iesu i pau ei i te uianga a tana au pipi tei tataia ra ia Mataio 24:3 (NW), ko tetai tuanga o tana i tuatua ra te piri atura ki te openga o te akatereanga ngati Iuda o te anere mataiti mua ra, kareka ra ko te maata anga te taikuia maira no muri mai i te reira. Tana i akataka mai i te au Mataio 24 irava 4 ki te 22 e tupu anga mea ngiti ua mei rotopu i te 33 e te 70 T.N. Inara ko te tupu anga maata o te totou no to tatou tuatau ia e te akataka maira i te tuatau mei te 1914 mai o te T.N. e ko te tuatau te reira o to Karaiti ra “taenga mai e te openga o te akatereanga o te au mea nei.” (Pera katoa a Mareko 13:​5-20 e Luka 21:​8-24) Te akakite maira a Mataio 24:​23-28 eaa tei tupu mei te 70 T.N. aere mai ki te tuatau i tae mai ei a Karaiti. (Pera katoa a Mareko 13:​21-23) Ko te au tupu anga tei akatakaia mai ia Mataio 24:29 ki te openga o te Mataio pene 25, te tou maira ki te tuatau mei te 1914 mai o te T.N.​—Pera katoa a Mareko 13:​24-37 e Luka 21:​25-36.

6. (a) Eaa i tau ei tatou tatakitai kia matakite e akapeea te akatupuanga a te au mea o teia tuatau nei i “te akairo”? (e) E pau mai i te au uianga i te openga o teia parakarapa ei akaari e akapeea te tupu anga o “te akairo” mei te 1914 mai.

⁶ E mea tau no tatou tatakitai kia matakite i te au mea te akatupu nei i “te akairo” i teianei. Na to tatou akapiri atu i teia au mea ki te totou o te Puka Tapu e tauturu ia tatou kia tamou i taua ra o Iehova ra kia “akapiri vaitata ki te manako.” Na te reira katoa e tauturu ia tatou kia tuatua akarekareka i te akamatakiteanga ia etai ke i te vaitata mai anga o “te rā akaoko anga na to tatou Atua.” (Isaia 61:1, 2) Ma teia au akakoro anga i roto i to tatou manako, e akara akaou tatou i te au tuanga o “te akairo.”

Na teea mataara tuke roa te tupuanga o te totou e ‘e tu mai tetai enua e tamaki ki tetai enua, e tetai basileia e tamaki ki tetai basileia’ i akatupuiaʼi tei akamata i te 1914 T.N.? Eaa tei tupu i teia au marama ua akenei te kapiti maira ki te reira tupu anga?

Peea te maata o te totoa o te onge kai i te enua nei noatu te kite o te aronga kite o te 20 anere mataiti nei?

E tuke anga ainei tetai i te tupu putuputu o te au ngaruerue enua i tera ngai, i tera ngai mei te 1914 mai o te T.N.?

I te 1918 eaa te maki mate tei takore atu i te au oraanga tei tere atu i ta te tamaki o te ao ra? Noatu rai te kite o te aronga rapakau, eaa te au maki e tupu nei ki te maata rava?

Eaa te akapapu anga taau e kite nei i te taravai anga o te ngakau tangata i te mataku, mei tei totouia maira ia Luka 21:⁠26?

Eaa te akapapu maira i toou manako e ko te au tu akatakaia ra ia 2 Timoteo 3:​1-5 kare ia i te tu oraanga i mua ana mari ra te kino aere ua atura ki te maataanga poitirere roa ia tatou e aere atu nei ki te taopenga anga o te tuatau openga nei?

Te Akatakakeanga i te au Tangata

7. (a) Eaa tetai atu apinga, tei akatakaia mai ia Mataio 13:​36-43, tei akapiriia atu e Iesu ki te openga o te akatereanga o te au mea nei? (e) Eaa te aite anga o te reira parapore?

⁷ Te vaira etai atu au apinga puapinga maata tei akapiri papuia atu e Iesu ki te openga o te akatereanga o te au mea nei. Ko tetai o te reira ko te akatakake anga i te “tamariki o te basileia” mei te “tamariki a te vaerua kino.” Kua tuatua mai a Iesu i teia i roto i tana parapore no te kainga titona tei ruruia e te enemi te titania ki roto ra. Ko te “sitona” o tana parapore ra ko te au Kerititiano mou tei akatainuia ra. Te “zizania” ko te au Kerititiano akatutu ua. I te openga o te akatereanga o te au mea nei ko te “zizania”⁠—​koia te aronga te karanga ra e e Kerititiano ratou kareka ra te akataka maira ia ratou uaorai ei “tamariki a te vaerua kino” ra no te mea te mou ra ratou ki teianei ao ko Satani tona tutara​—ka akataka keia mei te “tamariki o te basileia [o te Atua]” e ka akairoia no te akapou anga. (Mata. 13:​36-43) Kua tupu ainei teia?

8. (a) I muri ake i te Tamaki Mua o te Ao, eaa te akatakake anga i te aronga katoatoa tei karanga e e Kerititiano ratou tei raveia? (e) Akapeea te akapapu anga a te au Kerititiano mou tei akatainuia ra e ko ratou, e “tamariki o te basileia”?

⁸ I muri ake i te Tamaki Mua o te Ao kua tupu tikai, te akatakakeanga maata o te au tangata ravarai tei karanga e e Kerititiano ratou ki roto i nga pupu e rua: (1) Te au orometua o Kerititome e te aronga i aru ia ratou, kua turu pakari ratou i te Kapitianga Enua (i teianei ko te Taokotaianga Enua), ia ratou e mou piri ra i ta ratou akapaapaa iti tangata. (2) Te pupu Kerititiano mou tokoiti ua tei akatainuia i te reira tuatau i muri ake i te tamaki, ko ratou tei oronga i ta ratou turu anga katoa i te Patireia o te Atua i raro ake i te Mesia. Na te turu anga atea i te au kavamani o teianei ao ei tumuanga e tupu ei te au e te tinamou, kua akataka te pupu mua ra e kare ratou i te au Kerititiano mou. (Ioane 17:16) Ei tuke anga, kua akataka papu mai te au tavini o Iehova e ko te Kapitianga Enua ko “te mea rikarika e taneaʼi ra,” tei taikuia ra ia Mataio 24:15. I te akaarianga ia ratou uaorai ei “tamariki o te basileia [o te Atua],” kua rave ratou i te tutu aere i “te evangelia o te basileia . . . e kako rava ake te ao katoa nei.” (Mata. 24:14) Eaa tei tupu?

9. Eaa tei tupu mua i teia angaanga tutu aere anga i te Patireia?

⁹ Te mea mua, ko te akaputuanga i te toenga o te “aronga ikiia ra,” koia te au Kerititiano akatainuia i te vaerua. Noatu rai e kua totoa aere ki roto i te au enua ke ke, mei te mea rai e i te “matangi e a,” kua apaiia mai ratou ki roto i te akaaerenga taokotaiia i raro ake i te arataki anga a te au angera.​—Mata. 24:31.

10. (a) Akapeea te rave anga i tetai atu angaanga akatakakeanga, e kia rotai ki teea totou? (e) Eaa te akakiteia maira e te tupu anga o teia au totou nei?

¹⁰ I reira, mei ta Iesu i totou ra, kua akamata aia i te akataka i to te pa enua ravarai, “mei te tiaki mamoe e akataka i te mamoe e te puaka-nio ra.” Te raveia ra teia angaanga, tei aratakiia e Karaiti mei tona terono i te rangi e tae roa mai ki teianei, e ko koe tetai te o atura ki te reira. Te kopae ke ra te maataanga o te au tangata i te Patireia o te Atua e tana “au tamariki” akatainuia i te vaerua e no reira ka tukuia atu ki roto i “te mate mutu kore” i te matenga. Inara, ki etai ke atu te oora atura te Atu i te pati anga kia noo ratou i te tuanga o tona Patireia i te enua nei, ma te ora mutu kore ei manakonakoanga. Kua akapiri atu teia aronga tu mamoe ia ratou uaorai ki te “tamariki o te basileia” tei akatainuia ra, noatu rai e e aronga takinokinoia ratou. (Mata. 25:​31-46) Te tauturu tiratiratu ra ratou i te akakitekite aere i te tuatua puapinga maata o te Patireia. E urupu maata te tareia atura ki te au mirioni te rave ra i teia angaanga. Te akarongorongoia nei te tuatua no te Patireia e tae roa atu ki te openga o te enua. Eaa ta teia au tupu anga e akakite maira? Te vaitata rava atu ra tatou ki te openga o te “tuatau openga” e kua vaitata roa “taua ra o Iehova ra.”

Eaa te Vai Maira ki Mua?

11. E tere atu ainei te angaanga tutu aere no te raveia i mua ake i te taenga mai o “taua ra o Iehova ra”?

¹¹ E au totou ainei etai te vaira kia akatupuia i mua ake i te akamata anga te ra akamataku a Iehova? Ae! Kare i oti ake te akatakakeanga i te au tangata no runga i te maroanga no te Patireia. I etai ngai tei tupu ana te patoi anga pakari no etai mataiti e manganui, te tupu maata mai nei te au pipi ou i reira i teianei. E noatu i te au ngai te kopae ke ra te au tangata i te tuatua meitaki, te mouia ra te tika o Iehova e tona aroa ua na to tatou akakitekite aere anga. No reira, e rave ua atu i te angaanga! Te akapapu maira a Iesu kia tatou e, me oti te reira, “ko te openga iora ïa i reira ra.”​—Mata. 24:14.

12. (a) Mei tei akaariia maira ia 1 Tesalonia 5:2, 3, eaa te apinga maata te vaira no te tupu mai? (e) Eaa tona aite anga kia tatou?

¹² Te akakite maira tetai atu totou maata te puapinga no te Puka Tapu e: “E tuatua oki te tangata e, e au, e kare e kino; ei reira ratou e rokoia uaia mai ei e te mate viviki, mei te vaine nui kia rokoia e te mamae ra; e kare rava ratou e ora.” (1 Tesa. 5:2, 3) Me eaa te tu o te reira akakite anga e “e au, e kare e kino” ka tatari roa tatou kia kite. Inara kare tona aite anga e kua rauka tikai i te au arataki o teianei ao te akakore atu i te au manamanata o te au tangata katoatoa. Kare te aronga tei “akapiri vaitata i te manako” i taua ra o Iehova ra e vavareia i te reira akakite anga. Kua kite pu ua ratou e, i muri ua ake i te reira e rokoia uaia mai ei e te “mate viviki.”

13. Eaa te au apinga te ka aru mai i muri ua ake i te tuatua anga e “e au, kare e kino,” e akapeea te papa anga no te tupu anga?

¹³ Te mea mua, te akaari maira te au Tuatua Tapu, ko te au tutara poritiki, o te ao katoatoa, ka ariu atu ki te patireia akonoanga pikikaa, koia a Babulonia Maata e ka akapou iaia. (Apokalupo 17:​15, 16) E mea tau tikai kia kite e te au tu manako makitakita te maata atura te tupu anga ki runga i te au akonoanga o Kerititome, te akakite maira ia ratou uaorai i teianei. Te akono ra te au kavamani e ketaketa ta ratou au ture patoi i te au akonoanga i to ratou mana ririnui i roto i te Taokotaianga Enua, e pera katoa te au tangata uaorai i te au enua tei matauia e e akonoanga ta ratou, te akaruke nei e urupu maata o ratou i te au akonoanga a to ratou ai metua. Eaa te aite anga o te reira? Kua vaitata te akatanea angaia o te au akonoanga pikikaa. I muri ake i te reira, e ariu atu to te pa enua e tamaki atu, ma te ririnui katoa, i te aronga mou i to Iehova ngateitei, ei reira te riri otooto o te Atua e tukunaiaʼi ki runga i te au kavamani e te aronga turu ia ratou, e tupu mai ei te akapou anga takiri ia ratou ravarai. I te openga akera, ka uriia atu a Satani uaorai e tana au temoni ki roto i te vaarua, ka arai takiriia kia kore e mana ki rungao i te au tangata ravarai. Ko te reira tikai “taua ra o Iehova ra,” te ra e akateiteiiaʼi tona ingoa.​—Ezeki. 38:​18, 22, 23; Apokalupo 19:​11–20:3.

14. Eaa ra i pakari kore ei kia manako e te mamao atura taua ra o Iehova ra?

¹⁴ Ka tae mai te reira i tona tuatau tikai, kia tau ki ta te Atua ra akapapaanga. Kare ia e tavarevare. (Haba. 2:⁠3) Kia maara, i te akapou anga o Ierusalema i te 70 T.N. i tae viviki ia, i te taime kare te au ngati Iuda i manako, ia ratou tikai i manako ra e kua kore te kino. E i peea a Babulonia i taito ra? E mana ririnui aia, e te papu te irinaki anga, e ketaketa tona au patu. Inara okotai ua te po i ingaʼi te reira. Pera katoa oki, teia akatereanga kino nei ka rokoia mai e te “mate viviki.” Me tupu mai te reira, kia rokoia mai tatou i reira te taokotaiia ra i te akamori mou, no tei “akapiri vaitata ki te manako” i taua ra o Iehova ra.

Uriuri Akaou Anga

● Eaa ra i puapinga maataʼi kia “akapiri vaitata ki te manako” i taua ra o Iehova ra? Akapeea e raukaʼi ia tatou i te rave i te reira?

● Eaa ta te akatakake anga i te au tangata e raveia ra i teianei ka akatupu kia tatou tatakitai?

● Eaa te vai maira i mua ake i te akamata anga taua ra o Iehova ra? No reira eaa ta tatou tatakitai ka tau kia rave?