‘Ka Akakakau ia Kotou Uaorai ma te Akakoromakianga Roa’

“Ka akakakau ia kotou uaorai ma te ngakau aroa ua . . . e te akakoromakianga roa.”​—KOLOSA 3:12, NW.

1. E akakite mai i tetai akatauanga meitaki no te akakoromakianga roa.

KO RÉGIS, tei noo ra i te pae tonga o te opunga ra i Varani, kua riro ei Kite papetitoia no Iehova i te 1952. No etai mataiti kua rave tana vaine i tei rauka iaia kia arai i tana au tauta anga i te tavini ia Iehova ra. Kua tauta aia kia akaputa i te au kiri o tona motoka kia kore e rauka iaia te aere ki te au uipaanga, e i tetai atianga kua aru aere atu aia iaia i tana tutu aere anga i te tuatua o te Pipiria mei tera ngutupa ki tera ngutupa, i te avirianga iaia i tana tuatua anga ki te au tangata ngutuare ra no te evangeria o te Patireia. Noatu teianei patoianga tamouia ra, kua akono ua atura a Régis i te akakoromakianga roa. No reira, e akatauanga meitaki a Régis no te au Kerititiano katoatoa, i te mea te umuumu ra a Iehova kia akakoromakianga roa tona aronga akamori katoa i ta ratou akonoanga ia etai ke ra.

2. Eaa te aiteanga tikai no te tuatua Ereni no te “akakoromakianga roa,” e eaa te akakiteia maira e taua tuatua ra?

² Te aiteanga tikai o te tuatua Ereni no te “akakoromakianga roa” e “roa anga no te vaerua.” I te New World Translation Papaa ra kua uriia teia tuatua e tai ngauru taime e “akakoromakianga roa,” e toru taime e “akakoromaki maata” e okotai taime e “akonoanga akakoromaki maata.” Nga tuatua anga Epera e te Ereni kua uri i te “akakoromakianga roa” kia akakite i te manako o te akakoromaki maata, te akakoromaki akono tau, e te kore e riri vave.

3. Eaa te tuke anga o te manako Kerititiano no te akakoromakianga roa mei to te au Ereni o te anere mataiti mua ra?

³ Kare te akakoromakianga roa i manakoia e to Ereni ra ei turanga meitaki i te anere mataiti mua ra. Kare taua tuatua ra i taiku ia e te aronga apii anga Stoic. Kia tau ki ta William Barclay apiipiiia ra i te Pipiria, te akakoromakianga roa “ko te tua patoi ia no te turanga meitaki a te Ereni ra,” tei akaparau ra i roto i etai atu apinga “i te akakore anga i te akakoromaki i tetai ua atu akakino anga me kare mamae anga.” Kua tuatua aia: “Ki te Ereni ko te tangata maata ko te tangata ia tei rave maata katoa ra i te tutakianga i te kino. Ki te Kerititiano te tangata maata ko te tangata tei kore e rave i te reira, noatu ra e ka rauka iaia.” Penei kua akamanako te au Ereni i te akakoromakianga roa ei akairo no te tu paruparu, inara i konei, mei etai atu au tu ra, “e pakari maata to te mea neneva a te Atua nei i to te tangata nei pakari: e maroiroi maata to te apikepike o te Atua i to te tangata nei maroiroi.”​—1 Korinetia 1:25.

Ta Karaiti Akatauanga no te Akakoromakianga Roa

4, 5. Eaa te akatauanga meitaki no te akakoromakianga roa ta Iesu i oronga maira?

⁴ Ei turanga rua anake ra kia Iehova, kua akanoo a Iesu Karaiti i tetai akatauanga meitaki no te akakoromakianga roa. Iaia i raro ake i te taomianga maata, kua akaari maira Iesu i te kopaeanga umere. Kua totouia nona ra: “Kua takinga-kinoia oki aia, e kua tinai-mateia aia, kare ra tona vaa i ki atu: i aratakiia aia mei te punua-mamoe ki te tainga, e mei te mamoe e muteki ki mua i te aroaro o tei pakoti i tona uru ra, kare katoa oki tona vaa i tuatua mai.”​—Isaia 53:7.

⁵ Mei teaa ra te akakoromaki roa ta Iesu i akaari i tana angaanga orometua katoa i runga i te enua nei! Kua akakoromaki aia i te au uiuianga pikikaa a tona au enemi e te au tuatua akakino anga a te aronga patoi ra. (Mataio 22:​15-46; 1 Petero 2:23) E akakoromaki maata tona i tana au pipi, noatu ia ratou e taumaro maata ra e koai tei maata atu ia ratou ra. (Mareko 9:​33-37; 10:​35-45; Luka 22:​24-27) E mei teaa ra te akakoromaki anga meitaki ta Iesu i akaari i te po o tona pikikaa angaia i te topa anga a Petero raua ko Ioane i te moe i muri ake i te tuatua anga kia raua “e ara”!​—Mataio 26:​36-41.

6. Akapeea a Paulo i puapingaiai mei to Iesu ra akakoromakianga roa, e eaa ta tatou ka kite mai i teianei?

⁶ I muri ake i tona matenga e te tuakaouanga, kua akono ua atura Iesu i te akakoromakianga roa. Kua kite tikai te apotetoro ko Paulo i teia tu, i te mea koia tetai tei takinga kino i te au Kerititiano i mua ana. Kua tata a Paulo: “E tuatua-mou teia, e te tau oki kia ārikiia e te tangata ravarai, e i aere mai te Mesia ra ko Iesu i te ao nei, e akaora i te aronga ara: ko au oki to ratou i maata. Teia ra te mea i aroaia mai ei au, kia kitea te akakoromaki maata rava o Iesu Mesia iaku, i tei maata i te ara nei, ei akaraanga na te aronga e akarongo iaia a muri atu, e rauka atu te ora mutu kore.” (1 Timoteo 1:​15, 16) Noatu eaa to tatou tu i mua ana, me ka tuku tatou i to tatou akarongo ki runga ia Iesu, ka akakoromakianga roa aia ia tatou​—inara, iaia ka tapapa maira ia tatou kia akatupu i “te au angaanga e tau ei i te tataraara ra.” (Angaanga 26:20, NW; Roma 2:4) Te au tuatua ta Karaiti i tuku atura ki te au putuputuanga i Asia Minora te akaari ra e noatu tona akakoromakianga roa, kua manako mai aia i te tere anga ki mua.​—Apokalupo, pene 2 e te 3.

E Ua no te Vaerua

7. Eaa te pirianga i rotopu i te akakoromakianga roa e te vaerua tapu?

⁷ I roto i te pene 5 o tana reta ki to Galatia, kua akatuke atura Paulo i te au angaanga a te kopapa ma te au ua o te vaerua ra. (Galatia 5:​19-23) I te mea ko te akakoromakianga roa tetai o te au tu o Iehova ra, te akamata maira teianei tu mei iaia ra e e ua ia no tona vaerua. (Exodo 34:​6, 7) E tikai, kua akapapaia mai te akakoromakianga roa e ko te a i roto i ta Paulo akataka anga mai i te au ua o te vaerua, kapiti atu ma “te inangaro, te rekareka, te au, . . . te takinga-meitaki, te meitaki, te akarongo, te maru, te akono meitaki.” (Galatia 5:​22, 23) No reira, me akakite to te Atua au tavini i te akakoromaki maata, me kare te akakoromakianga roa, te rave ra ratou i te reira i raro ake i te mana o te vaerua tapu.

8. Eaa te ka tauturu ia tatou kia tatanu i te au ua o te vaerua, kapiti katoa i te akakoromakianga roa?

⁸ Inara, kare te aiteanga o teia, e te opara maira Iehova i tona vaerua ki runga i te tangata. Ka tika tatou kia ariki puareinga ua i te mana o te reira. (2 Korinetia 3:17; Ephesia 4:30) Ka tuku tatou i te vaerua kia angaanga ki roto i to tatou au oraanga na te tatanuanga i tona au ua ki roto i ta tatou angaanga katoatoa ka rave. I muri ake i te akapapaanga i te au angaanga a te kopapa e te au ua o te vaerua ra, kua tuatua katoa a Paulo: “E te ora nei tatou i te Vaerua ra, e aru tatou i ta te Vaerua ra. Auraka e vavare; kare ua te Atua e vare: ko ta te tangata e ruru ra, ko tana ra ïa e kokoti. Ko tei ruru i ta tona uaorai kopapa, ka rauka iaia te kino i taua kopapa ra; kareka te ruru i ta te Vaerua, ko te ora mutu kore tana e rauka i te Vaerua ra.” (Galatia 5:25; 6:​7, 8) Me kia autu tatou i te tatanuanga i te akakoromakianga roa, ka tika katoa tatou kia tatanu i te toenga atu o te au ua tei akatupuia mai ki roto i te au Kerititiano na te vaerua tapu ra.

“E Akakoromaki Anga Roa to te Aroa”

9. Penei ake, eaa a Paulo i akakite atu ei i to Korinetia e “e akakoromakianga roa te aroa”?

⁹ Kua akaari a Paulo e e pirianga takake tetai tei vaira i rotopu i te aroa e te akakoromakianga roa i tana tuatua anga: “E akakoromaki anga roa to te aroa.” (1 Korinetia 13:4) Kua akakite mai tetai tangata apiipii i te Pipiria, ko Albert Barnes e kua akaketaketa maira Paulo i teia i te manako anga i te tauetono e te pekapeka tei vaira i roto i te putuputuanga Kerititiano i Korinetia. (1 Korinetia 1:​11, 12) Kua tou maira a Barnes: “Te tuatua taikuia ra i konei [no te akakoromakianga roa] te patoi ra i te tu rapurapu: kia aroa ua te au tuatua anga e te au manako, e ki te tu riri ua. Te akakite maira te reira i te tu manako te ka AKAKOROMAKI ROA me ka takinga kinoia, e ka akaririia.” Ka tauturu maata ra te aroa e te akakoromakianga roa i te au no te putuputuanga Kerititiano ra.

10. (a) Na roto i teea tu ta te aroa ra tauturu anga ia tatou no te akakoromakianga roa, e eaa te akoanga ta Paulo i oronga i teianei turanga? (e) Eaa te akakite anga ta tetai tangata apiipii i te Pipiria i oronga mai no to te Atua ra akakoromakianga roa e te takinga meitaki? (Akara i te tataanga i raro ake.)

¹⁰ “E akakoromaki anga roa to te aroa, e te takinga-meitaki; kare te aroa . . . e kimi i te meitaki nona uaorai, kare e riri vave.” No reira i te au aerenga e manganui, ka tauturu te aroa ia tatou kia akakoromakianga roa.a (1 Korinetia 13:​4, 5) Na te aroa e raukai ia tatou kia akakoromaki maata atu tetai i tetai e kia maara e e apa ua anake tatou katoatoa e te rave ra i te au tarevake. Te tauturu maira te reira ia tatou kia akamanako atu e kia akakore atu i te ara a etai ke ra. Te akamaroiroi maira te apotetoro ko Paulo ia tatou kia aaere “ma te ngakau akaaka roa, e te maru, ma te akakoromaki, i te tauturu anga atu tetai i tetai ma te aroa; Ma te matakite tikai oki kia vai rai te taokotai anga a te Vaerua ra i te ruru o te au.”​—Ephesia 4:​1-3.

11. Eaa ra i puapinga maatai no te akakoromakianga roa i roto i te au pupu Kerititiano ra?

¹¹ Te akakoromakianga roa i te tuanga a to ratou au mema te tauturu maira i te au e te mataora o te au pupu Kerititiano me e au putuputuanga, e au ngutuare Betela, e au kainga mitinari, e au pupu rave patuanga, me kare e au ngai apii. No te au tuke anga i te au tu tangata, te tongi anga, te tu akono anga, te au turanga mako, noatu ko te tu ma, ka tu maira te au turanga ke ke i etai taime. Te tika katoa ra teianei no te au pamiri. E puapinga maata te kore e riri vave. (Maseli 14:29; 15:18; 19:11) Te akakoromakianga roa​—te akakoromaki anga maata, i te manakonako anga no tetai tauianga no te meitaki​—te umuumuia ra i te tuanga a te katoatoa ra.—Roma 15:​1-6.

Ka Tauturu te Akakoromakianga Roa ia Tatou kia Tamou Marie

12. Eaa ra te akakoromakianga roa i puapinga maatai i te tuatau o te au turanga timataanga ra?

¹² Ka tauturu te akakoromakianga roa kia tamou marie tatou i te au turanga timataanga tei akaraanga mutu kore ra me kare ra e kore ua atu tetai akaoti anga viviki. Ko teia te tika no Régis, tei taikuia i te akamataanga maira. No etai mataiti, kua patoi tana vaine i tana au tautaanga kia tavini ia Iehova. Inara, i tetai ra kua aere mai kiaia ma te roimata e tae ua ra e kua tuatua: “Kua kite au e ko te tuatua mou. E tauturu mai iaku. Te anoano nei au i tetai apii Pipiria.” Kua papetitoia aia i muri akera ei Kite. Kua tuatua a Régis: “Te akapapu ra teia e kua akameitaki mai a Iehova i taua au mataiti no te tauta anga, te akakoromaki maata, e te akakoromaki anga.” Kua tutakiia tona akakoromakianga roa.

13. Eaa tei akariro ia Paulo kia akakoromaki marie, e akapeea e raukai i tana akatauanga kia tauturu mai ia tatou kia akakoromaki marie?

¹³ I te anere mataiti mua T.N., ko te apotetoro ko Paulo tetai akatauanga meitaki no te akakoromakianga roa. (2 Korinetia 6:​3-10; 1 Timoteo 1:16) I te vaitata anga ki te openga o tona oraanga iaia e ako atura i tona oa ou ra ia Timoteo, kua akamatakite atura Paulo iaia e ka aro atu te au Kerititiano katoatoa i te au timataanga. Kua akakite atura Paulo i tona uaorai akatauanga e kua akakite atu i te au tu tumuanga no te au Kerititiano te umuumuia ra no te akakoromaki anga. Kua tata aia: “Kua kite ua ra koe i taku i apii ra, taku aerenga, taku e umuumu, te akarongo tikai, te maru, te aroa, te akakoromaki, Te au takinga-kino angaia mai, e te au mate, ka rokoia mai ei au i Anetioka, i Ikonio, e i Lusetera; i te tu o taua au takinga-kino i akakoromakiia e au ra: i akaoraia ra au e te Atu i taua au mate ravarai ra. E te aronga katoa e maara tikai e akono i te Atua, ei roto rai i te Mesia ra ia Iesu e takinga-kino katoaia ïa.” (2 Timoteo 3:​10-12; Angaanga 13:​49-51; 14:​19-22) E raukai kia akakoromaki, ka umuumu katoa tatou i te akarongo, te aroa, e te akakoromakianga roa.

Akakakauia ma te Akakoromakianga Roa

14. Eaa ta Paulo i akaaite atu i taua au tu tau i te Atua mei te akakoromakianga roa ra, e eaa te akoanga tana i oronga ki te au Kerititiano i Kolosa ra?

¹⁴ Kua akaaite atura te apotetoro ko Paulo i te akakoromakianga roa e etai atu au tu tau i te Atua ki te kakau ta te Kerititiano ka tau kia aoao i muri ake i te kiritianga i te au ravenga matauia no “te tangata taito ra.” (Kolosa 3:​5-10, NW) Kua tata aia: “Ei aronga ikiia e te Atua, tei tapu e te akaperepereia, ka akakakau ia kotou uaorai ma te ngakau aroa ua, te takinga meitaki, te manako akaaka, te tu maru, e te akakoromakianga roa. E tamou rai i te akakoromaki anga tetai e tetai e te akakore ua anga i te ara tetai e tetai me e tumu ta tetai no te tapepeanga ki tetai. Mei ia Iehova i akakore ua maira i ta kotou ara, kia pera katoa oki kotou. Inara i te pae i teia au mea nei, e akakakau ia kotou uaorai ki te aroa, no te mea e tapeka anga tiama te reira o te taokotai anga.”​—Kolosa 3:​12-14, NW.

15. Eaa te ka tupu me ‘akakakau te au Kerititiano ia ratou uaorai’ ma te akakoromakianga roa e etai atu au tu tau i te Atua ra?

¹⁵ Me ‘akakakau te au mema o tetai putuputuanga ia ratou uaorai’ ma te ngakau aroa ua, te takinga meitaki, te manako akaaka, te tu maru, e te akakoromakianga roa e te aroa, ka rauka ia ratou te akakore atu i te au manamanata e ka aere taokotai atu ki mua i te tavini anga ia Iehova. Te umuumu maataia ra te au akaaere Kerititiano no te akakoromakianga roa. Penei e au tuatau etai ka tau ratou kia ako atu i tetai Kerititiano, inara e tuke tuke te au raveanga i teia. Kua akataka maira Paulo i te tu akono meitaki i tana tataanga kia Timoteo: “E akakite ua i te apa, e ako atu, e akamaroiroi atu, ma te akakoromaki maata e te apii marie anga atu.” (2 Timoteo 4:2) Ae, ka tau ua rai te au mamoe a Iehova kia akono tamouia ma te akakoromaki roa, te tapunui, e te maru oki.​—Mataio 7:12; 11:28; Angaanga 20:​28, 29; Roma 12:10.

‘Akakoromakianga Roa i te Katoatoa’

16. Penei eaa te ka tupu me ka rave tatou “kia roa te akakoromakianga i te katoatoa”?

¹⁶ Te akakoromakianga roa o Iehova i te au tangata te tuku ra ia tatou ki raro i tetai apainga tau “kia roa te akakoromakianga i te katoatoa.” (1 Tesalonia 5:14, NW) Te aiteanga o teia kia akakoromaki maata i te au mema o te pamiri kare i te Kite, te aronga i te pae mai, te au oa angaanga, te au oa apii. E manganui te au tapepeanga kua akakoreia e te Au Kite tei akakoromaki ra i etai taime no etai mataiti e manganui, i te au tuatua akakino me kare patoianga a te au tangata ta ratou e angaanga kapiti ra me kare i te apii. (Kolosa 4:​5, 6) Kua tata te apotetoro ko Petero: “Kia meitaki ta kotou tuatua i rotopu i te au etene: ta ratou oki i akakino mai ia kotou, mei te mea e aronga rave tuatua kino, kia akara ra ratou i ta kotou tuatua meitaki, kia akameitaki ratou i te Atua i te rā e rokoia mai ei ra.”​—1 Petero 2:12.

17. Akapeea e raukai ia tatou kia aru i to Iehova aroa e te akakoromakianga roa, e eaa tatou i tau ei kia rave i te reira?

¹⁷ Ka riro te akakoromakianga roa o Iehova ei ora no te au mirioni ua atu. (2 Petero 3:​9, 15) Me ka aru tatou i to Iehova aroa e te akakoromakianga roa, ka akakoromaki maata ua atu tatou i te tutuanga i te evangeria o te Patireia e te apiianga ia etai ke ra kia kauraro i to Karaiti tutara anga Patireia. (Mataio 28:​18-20; Mareko 13:10) Me ka akamutu tatou i te tutuanga, ka riro mei te mea rai e te anoano ra tatou kia kotingaia to Iehova ra akakoromakianga roa e kua kore i te kite i tana akakoro anga, koia oki kia apai mai i te au tangata kia tataraara.​—Roma 2:4.

18. Eaa ta Paulo i pure no to Kolosa ra?

¹⁸ I roto i tana reta ki te au Kerititiano i Kolosa, i Asia Minora ra, kua tata a Paulo: “I kore katoaʼi matou i tivata i te pure ia kotou, mei te rā mairai i kite ei matou, e te pati akatenga anga atu kia akakiia mai kotou i te kite i tona anoano, i te pakari i te au mea ravarai e te kite i te vaerua; Kia tau to kotou aerenga i te Atu i te au mea katoa e mareka mai ei ra, e kia tupu te au angaanga meitaki katoa ia kotou, e kia maata oki to kotou kite i te Atua; Ma te akamaroiroiia mai i te au maroiroi katoa, kia tau i tona mana kakā kia maata atu te akakoromaki, e te maru anga kia roa ma te rekareka.”​—Kolosa 1:​9-11.

19, 20. (a) Akapeea e raukai ia tatou kia kopae ke i te manakoanga i ta Iehova ra rave tamouanga i te akakoromakianga roa ei timataanga? (e) Eaa te au puapinga ka rauka mai i to tatou akakoromakianga roa?

¹⁹ To Iehova ra akakoromakianga roa ua atu, me kare tona akakoromaki maata, kare e riro ei timataanga kia tatou me ‘akakiia i te kite i tona anoano,’ koia oki “te tangata katoatoa kia ora, e kia rauka te kite i te tuatua-mou.” (1 Timoteo 2:4) Ko tatou, “kia tupu te au angaanga meitaki katoa,” e maata oki i te tutuanga i “te evangelia o te basileia nei.” (Mataio 24:14) Me ka rave tiratiratu ua atu tatou i teia, ka akariro a Iehova ia tatou kia “akamaroiroiia mai i te au maroiroi katoa,” te akariro anga ia tatou kia “akakoromaki, e te maru anga kia roa, ma te rekareka.” Na te raveanga i te reira, ‘ka tau to tatou aerenga ia Iehova,’ e ka rauka ia tatou te au te aere maira no te kiteanga e ‘te akamareka ra iaia.’

²⁰ Kia irinaki tikai tatou i te pakari o to Iehova ra akakoromakianga roa. Te angaanga ra te reira no to tatou ora e no te ora oki o te aronga te ka akarongo ki ta tatou tutuanga e te apiianga. (1 Timoteo 4:16) Te tatanuanga i te au ua o te vaerua​—te aroa, te takinga meitaki, te meitaki, te maru, e te akono meitaki​—ka akariro ia tatou kia rekareka i te akakoromakianga roa. Ka meitaki atu to tatou nooanga i te au ma te au mema o to tatou pamiri pera katoa oki ma to tatou au taeake e te au tuaine i roto i te putuputuanga. Ka rauka katoa i te akakoromakianga roa te tauturu ia tatou kia akakoromaki maata i to tatou au oa angaanga me kare te au oa apii. E ka rauka tetai akakoro anga i to tatou akakoromakianga roa, koia oki te akaoraanga i te aronga rave tarevake e te akakakaanga i te Atua o te akakoromakianga roa, koia a Iehova.

[Tataanga Rikiriki i Raro]

Ka Rauka Ainei ia Koe te Akataka?

• I roto i teea au tu i riro ei a Karaiti ei akatauanga meitaki no te akakoromakianga roa?

• Na teaa e tauturu ia tatou kia tatanu i te akakoromakianga roa?

• Akapeea ta te akakoromakianga roa i te tauturu anga te au pamiri, te au pupu Kerititiano, e te aronga pakari ra?

• Ka akapeea to tatou akakoromakianga roa i te apai mai anga i te au puapinga kia tatou uaorai e kia etai ke atu oki?

[Tutu i te kapi 15]

Noatu rai i raro ake i te taomianga maata, kua akakoromaki maata atura Iesu i tana au pipi

[Tutu i te kapi 16]

Te raurauia ra te au akaaere Kerititiano kia akanoo i te akatauanga meitaki no te akakoromakianga roa i te akonoanga i to ratou au taeake

[Tutu i te kapi 17]

Me ka aru tatou i to Iehova aroa e te akakoromakianga roa, ka rave ua atu tatou i te tutuanga i te evangeria

[Tutu i te kapi 18]

Kua pure a Paulo kia akono te au Kerititiano i “te akakoromakianga roa ma te rekareka”