Ko Teea Atua Taau Kia Akamori?

TE MEA mua, koai te Atua okotai, kia akamori uaia? Te pau papu ra te Puka Tapu. Te akakite ra te puka a Apokalupo: “E tau te kakā ia koe, e te Atu, e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.” (Apokalupo 4:11) Ae, ko Iehova ua te Atua, Tei Anga, tei tau kia akamoriia e tatou. Eaa ra? Ka oki atu tatou ki teia uianga akonei? Inara, te mea mua, ka tuatua ana tatou no runga i te au atua ke tei akamoriia e te tangata.

I Muri Ake i te au Atua Pikikaa Ravarai

Noatu e te tavini ra te tangata i te au atua e manganui, te tika e pouroa te akamori tei orongaia ki te au atua katoatoa i te au enua ravarai​—takake mei te akamori tei orongaia kia Iehova, Tei Anga ra—​te akono ra te reira i te akakoroanga no te atua okotai. Na roto i teea mataara? E tatau i te au tuatua a te apotetoro ko Paulo ki te au Kerititiano i Korinetia. I te reira oire e maata te au atua tei akamoriia, mei ia Aphrodite tei akatikatika ua e kia Aesculapius, to ratou atua ei akaora. Kua akaari ra a Paulo e te vaira okotai ririnui kino i muri ake i te reira au atua pouroa. Kua tata aia: “Ta te etene i akaatinga ra, i akaatinga ïa na te au demoni, kare na te Atua.” (1 Korinetia 10:20) Ae, kua akamori te au Kerititiano i te peu etene e te au temoni.

Akamata mai te au temoni mei te patoi anga. Te mea mua e te maata rava atu ia ratou ko te angera tei angaia ra tei akavare ia Eva kia aati i te ture a te Atua i te aua i Edene. (Genese 3:1-6; Ioane 8:44) Te raveanga i te reira, kua patoi teia mea i te tu ngateitei rava o Tei Anga ra. I muri mai, kua kapikiia aia e ko Satani, te aiteanga “Tei Patoi” ra. I muri mai, kua piri atu tetai au mea vaerua tei anga iaia no te patoi. Kua riro katoa mai ratou ei au temoni, e kua kiteaia a Satani ei “tutara o te au temoni.” (Mataio 12:24, 6, NW) I roto i te puka a Apokalupo, kua kapikiia teia au temoni e “au angela” na Satani. (Apokalupo 12:7) No reira e aiteite rai te akamori i te au temoni ki te akamori ia Satani.

E maata to Satani mana. Kua tuatua te apotetoro ko Ioane e te noo nei “to te ao ravarai” i raro ake i tona ririnui e kua kapiki a Paulo iaia e ko “te atua o teianei ao ra.” (1 Ioane 5:19; 2 Korinetia 4:4) No reira, te akamori i tetai ua atu atua takake mai ia Iehova e akamoriia ia Satani. Te tika anga tikai, te tavini ra i te au akakoroanga a Satani no te mea tana akakoroanga ko te akavare i te tamariki a Adamu e Eva kia patoi ia Iehova. Mei te mea ‘te pikikaa ra a Satani i to te ao katoatoa nei’ te papu ra e kua manuia aia i te maata anga o te au turanga. (Apokalupo 12:9) Inara kare i te katoa anga. Te vaira e mirioni ua atu te tauta ra i te akamori ia Iehova. No teaa ra?

Te au Ua o te Akamori Tarevake

I tetai tua, kua kite ratou e te pou ra e maata atu i ta ratou ka tutaki no te akamori i te au atua takake mai ia Iehova. Kua kitea mai e te au ko anga apinga taito o Carthage i taito ra i te tua Tokerau o Aperika tetai ngai tanumanga no te tamariki. Tei roto i reira te au ivi o te aronga rikiriki tei akaatingaia ki te atua o Phenia ko Baala. Te tutaki kino ta te aronga Carthage i rave no te akamori ia Baala ko te akaatinga i te tamariki. Kua rave katoa te au Katorika i taito i tetai tutaki anga e te akatupuanga i te tamamae anga ope kore ki te au Kurutate (Tamaki Tapu) no te akamaringi i te toto e te au Inikuiti (akavaanga o te Akonoanga Katorika o Roma). Kua o atu te akamori anga o te au atua Inca o Marike i Koromopia i mua ana ki te taanga i te akonoanga e tauatini ua atu.

I teia au tuatau nei, e tukeke te au tu akamori tei o atu ki roto i tetai ta anga maata i Initia, e kua akatupu atu te reira i te au manamanata no te poritiki e te kino maata i te tua Rotopu o te Itinga Ra e te tua Tokerau o Irerani. E tau kia papa katoaia rai te tu kopae, te mataku tau kore, e te mataku ei tuanga o te tutaki ta te tangata e rave ra no te akamori i tona au atua e manganui.

Eaa Koe Kia Tavini ei i te Atua ko Iehova?

I tetai tua, te apai maira te akamori ia Iehova i te au puapinga katoa. Ko tetai, koia “tei ora e tuatau, e tuatau ua atu, ko tei anga i te rangi, e te au mea katoa i roto ra, e te enua, e te apinga tini i roto ra, e te tai, e te au mea i roto ra.” (Apokalupo 10:6) No reira, kia akamori tatou iaia no te mea koia Tei Anga ia tatou.

Te maata atu, kia akamori tatou i te Atua ko Iehova no te mea te pati maira tona au tu e kia akamori tatou iaia. Kua tuatua te apotetoro ko Ioane “ko te Atua oki te aroa.” (1 Ioane 4:8) Kua tuatua te tangata akono meitaki ko Iobu e e Atua “pakari o te ngakau, e te mana o te ririnui.” (Iobu 9:4) Kua imene a Mose iaia: “Ko te mato aia ko tei tika rava tana angaanga ra; ko tei tau katoa tona au aerenga; e Atua tuatua-mou, e te kino kore ra, e tuatua-tika tana, e te tiratiratu.” (Deuteronomi 32:4) Koai te ka tapupu i te tavini i tetai Atua mei teia?

Te kapiti atu, kua tuatua te Puka Tapu e: “Te akono i te Atua ra, e puapinga to te reira i te au mea katoa nei, e meitaki tei akakiteia mai to te reira i teianei ao, e te ao a muri atu.” (1 Timoteo 4:8) Mei teaa te tika i teia! Te inangaro ra a Iehova i te meitaki no te tangata nei. Kua oronga mai aia i te enua ei kainga manea no tana au mea i anga, e e maata tana au mea i oronga mai e mataora ei te oraanga. Noatu te tu patoi o te tangata, kua tamou ua atu te Atua i te akameitaki i te oraanga i te enua nei, te oronga anga mai i te au anoano i te pae kopapa no te tangata iaia e “te akaiti nei aia i tona rā ki rungao i te kino e te meitaki, e te akatopa mai nei aia i te ua ki runga i te tangata tuatua-tika e te tangata tuatua-tika kore.”​—Mataio 5:45.

Inara te aere ua atura te “meitaki tei akakiteia mai to te reira i teianei ao. Ko teia tei akanooia no tatou i te rave. E te tauturu ra te Atua i te aronga te tavini tiratiratu ra iaia kia manuia to ratou oraanga. Na roto i te Puka Tapu, te oronga ra aia i te arataki anga ki te au peretana takaua, au tokorua akaipoipo, te tamariki​—te au tangata i te au tu oraanga ravarai. Te oronga ra aia i te pakari papu e te taangaangaia no te tauturu i te au tu o te oraanga ravarai kia rauka ia tatou i te rapakau i te au amanamanata i te nooanga ei au tangata apa ua i roto i tetai ao i raro i to Satani mana. Me akamori tatou i te Atua i te mataara te akamareka ra iaia, ka mataora tatou i “te au o te Atua, ko tei maata ua atu i te kite tangata.”​—Philipi 4:7.

Kia manakoia rai, te “meitaki tei akakiteia mai to te reira i teianei ao e te ao a muri atu.” Kua akakite a Iesu ki te Pharisea ko Niko­demo: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Oraanga mutu kore! I te pae ia Iehova teea ia atua te ka rauka i te taputou i tetai mea e oti kua akatupu i tana i taputou? Kua akatutuia ia Apokalupo te turanga openga no te aronga te ka rauka i te apinga aroa e te manea: “E [na te Atua] e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” (Apokalupo 21:4, 5) E tikai, te au manakonakoanga o te oraanga i mua ka akakeu ia tatou kia inangaro i te tavini ia Iehova!

Ko teea Atua i reira, ta tatou kia akamori? Ko Iehova anake ua, Tei Anga ra. I te au tu o te atua katoatoa, te aere ra teia au tuatua ki aia anake ua: “E angaanga maata e te taka ke taau, e te Atu ra, e te Atua mana katoatoa; e aerenga tika e te tuatua-mou taau, e te Ariki o te aronga tapu e! Koai oki te ka kore e mataku ia koe, e te Atu, e te akakakā i toou ingoa? ko koe anake oki Tei Tapu; e ope katoa te pa enua i te aere mai ki mua i toou aroaro e akamori ei; kua akakite uaia taau ra au tutaki anga tika.” (Apokalupo 15:3, 4) Mei teaa te pakari i te aronga te ariu atura ki te akamaroiroianga a te tata salamo: “E aere mai tatou, e akamori ma te tupou ki raro; e tuturi tatou ki mua i te aroaro o tei anga ia tatou nei ia Iehova”!​—Salamo 95:6.

[Tutu i te kapi 6]

Etai au atua ta Satani i akavare i te tangata kia akamori

[Tutu i te kapi 7]

Kia akakeu te au manakonakoanga o te oraanga i mua kia inangaro tatou i te tavini ia Iehova