Kapiti Katoa to Kotou Akakoromaki ki te Akono i te Atua

“Kapiti katoa to kotou akarongo ki te . . . akakoromaki; te akakoromaki oki, ki te akono i te Atua.”—2 PETERO 1:5, 6.

1, 2. (a) Akamata mai i te au mataiti o te 1930, eaa tei tupu ki te Au Kite o Iehova i te au enua i raro ake i te akatereanga Nati ra, e no teaa ra? (e) I akapeea te au tangata o Iehova i raro ake i te reira akono anga kino ra?

E TUATAU poiri tikai i te tuatua enua o te 20 anere mataiti. Akamata [i te 1934], e au tauatini ua atu Au Kite o Iehova i te au enua i raro ake i te akatereanga a te Nati kua tapeka tau koreia e kua maka atu ki roto i te au puakapa mou auri. No teaa ra? No to ratou vai kore anga e o atu ki te vaeau e te kore katoa oki e taki i te rima akateitei atu ia Hitler. Akapeea te akono anga ia ratou? “Kare tetai atu pupu mou auri . . . i o atu ki te takinga kinoanga a te SS-vaeau na roto i tetai tu mei te Aronga Apiiia i te Puka Tapu [Au Kite o Iehova]. E takinga kinoanga tei akairoia na tetai raveanga tamamae tamouia i te pae kopapa e te pae o te manako katoa oki, ko te tu ia kare e reo tuatua o teianei ao e tau kia akataka mai.”​—Karl Wittig, e opita no te kavamani mua o Tiamani.

² I akapeea te Au Kite i reira? I roto i tana puka The Nazi State and the New Religions: Five Case Studies in Non-Conformity, kua akakite mai te Taote ko Christine E. King e: “Ko te patoi anake i te Au Kite ra [e tuke i etai atu au pupu akonoanga] kare te kavamani i autu.” Ae, kua mou te turanga o te Au Kite o Iehova ra ei katoaanga, noatu rai e e au anere ua atu i o ratou ra, kua riro teia ei akakoromakianga e tae roa ki te matenga.

3. Na teaa i raukaʼi i te Au Kite o Iehova ra kia akakoromaki i te au timataanga kikino ra?

³ Na teaa i raukai i te Au Kite o Iehova te akakoromaki i taua au timataanga ra kare i Nati Tiamani anake ua mari ra takapini i te ao katoa nei? Na to ratou Metua i te rangi i tauturu ia ratou kia akakoromaki no to ratou tu akono i te Atua ra. “Kua kite mari [a Iehova] i te akaora i te aronga akono i te Atua i roto i te timataanga ra,” ta te apotetoro ko Petero i akataka maira. (2 Petero 2:9) I mua ake i roto i taua reta nei rai, kua apii mai a Petero i te au Kerititiano: “Kapiti katoa to kotou akarongo ki te . . . akakoromaki; te akakoromaki oki, ki te akono i te Atua.” (2 Petero 1:5, 6) E no reira te kapiti piri vaitataia ra te akakoromaki ma te akono i te Atua. Ko te tika ra, kia akakoromaki kia tae ki te openga, ka tau tatou kia ‘aruaru i te akono i te Atua’ ma te akakite i te reira. (1 Timoteo 6:11) Inara eaa tikai te akono i te Atua?

Eaa te Akono i te Atua

4, 5. Eaa te akono i te Atua ra?

⁴ Te nauna Ereni no “te akono i te Atua” (eu·seʹbei·a) ka tau ua te uri anga tikai e ei “tu manako akangateitei oonu tika rava.”a (2 Petero 1:6, Kingdom Interlinear) Te akataka maira i tetai manako ngakau pumaana i te Atua ra. Kia tau ki ta W. E. Vine, ko te aiteanga tikai o te atikitivi eu·se·besʹ, e “akangateitei anga tika meitaki,” te akataka maira i “te ririnui ko tei, aratakiia e te mataku tapu i te Atua, te kiteia ra te akakite anga i roto i te angaanga akonoia kiaia.”​—2 Petero 2:9, Int.

⁵ E no reira ko te tuatua “tu akono i te Atua” te taiku ra i te akangateitei anga tika meitaki me kare akono ia Iehova te akakeu ra ia tatou kia rave i tei akamareka iaia ra. Te raveia ra teia noatu rai te au timataanga ngata no te mea te inangaro ra tatou i te Atua mei to tatou ngakau maira. E pirianga tiratiratu no tatou tataki tai ma Iehova te kiteia ra i to tatou mataara akono i to tatou oraanga. Te raurauia maira te au Kerititiano mou kia pure “kia noo kanga koreia mai [ratou], ma te au, ma te akono i te Atua.” (1 Timoteo 2:1, 2) Kia tau ki te nga tangata tata tikitinari ko J. P. Louw raua ko E. A. Nida, “i roto i etai au reo ko [eu·seʹbei·a] ia 1 Tim 2:2 ka tau ua kia uriia e ‘kia akono mei ta te Atua i anoano ra ia tatou kia akono’ me kare ‘kia akono mei ta te Atua i akaue maira ia tatou kia akono.’”

6. Eaa te pirianga i rotopu i te akakoromaki e te akono i te Atua ra?

⁶ Ka rauka ia tatou i teianei te ariki meitaki i te pirianga i rotopu i te akakoromaki e te akono i te Atua ra. No te mea te akono ra tatou mei ta te Atua i anoano ra ia tatou kia akono​—ma te akono i te Atua—​kua rokoia tatou e te makitakita a teianei ao, tei apai maira i te au timataanga i te akarongo. (2 Timoteo 3:12) Inara kare e mataara ei akakeu ia tatou kia akakoromaki i taua au timataanga ra me kare to tatou uaorai pirianga ki to tatou Metua i te rangi ra. Pera katoa oki, te ariki ra a Iehova i te reira tu akono mei te ngakau maira. E tamanako ana e akapeea tona manako ngakau i te akara mai ki raro nei mei te au rangi maira e te kite anga i te aronga tei riro ra na to ratou tu akono kiaia, te tauta ra kia akamareka iaia noatu rai e eaa te au tu patoi anga. No reira rai kua papa aia “i te akaora i te aronga akono i te Atua i roto i te timataanga ra”!

7. Eaa i tau ei kia tatanuia te tu akono i te Atua ra?

⁷ Inara, kare tatou i anauia mai ma te tu akono i te Atua ra, e kare katoa oki e rauka ua mai mei to tatou nga metua akono i te Atua ra. (Genese 8:21) Kareka ra, ka tau kia tatanuia te reira. (1 Timoteo 4:7, 10) Ka tau tatou kia rave i te kapiti atu i te akono i te Atua ki to tatou akakoromaki e ki to tatou akarongo oki. Ko teia, kua tuatua mai a Petero e, ka “akamaroiroi ua tatou” i te rave. (2 Petero 1:5) Ka akapeea, i reira, e raukai ia tatou te akono i te Atua ra?

Akapeea e Raukai ia Tatou Kia Akono i te Atua?

8. Kia tau ki ta te apotetoro ko Petero, eaa te taviri no te rauka anga te akono i te Atua ra?

⁸ Kua akataka maira te apotetoro ko Petero i te taviri e raukai te akono i te Atua ra. Kua tuatua aia: “Kia akamaataia mai te aroa ua e te au ia kotou i te kite i te Atua, e to tatou Atu ia Iesu ra. Na te mana Atua nona i oronga mai i te au mea katoa ia tatou, i te tau, i te ora, e te akono i te Atua, no te kite iaia ko tei kapiki mai ia tatou no te kakā e te [tu tika meitaki, NW].” (2 Petero 1:2, 3) E no reira kia kapiti atu i te akono i te Atua ki to tatou akarongo e te akakoromaki, ka tau tatou kia akatupu i te kite tika, tei ki ra, me kare tei oti meitaki ra, i te Atua ia Iehova e Iesu Karaiti oki.

9. Akapeea te akatutu anga e e maata atu te o maira ki te kite tika i te Atua e Karaiti i te kite ua anga e koai raua ra?

⁹ Eaa te aite anga e kia kite tika i te Atua e Karaiti? Te taka meitaki ra e maata atu te umuumuia ra i te kite ua anga e koai raua. Ei akatutu anga: Penei kua kite koe i te tangata i te pae mai i toou ngutuare ra e penei katoa oki te aravei ra koe iaia ma te taiku anga i tona ingoa. Inara ka oronga atu ainei koe i tetai moni maata kiaia no tetai tuatau? Kare me kare koe i kite tikai e eaa tona tu ei peretana. (Akaaite Maseli 11:15.) Mei te reira katoa, te kiteanga tika ia Iehova raua ko Iesu ra, me kare kite ki katoa, e maata atu ia i te irinaki ua anga e te vaira raua e te kite anga oki i to raua nga ingoa. E rekarekaʼi i te akakoromaki i te au timataanga no raua ra e tae roa ki te mate, ka tau tikai tatou kia kite piri vaitata ia raua. (Ioane 17:3) Eaa te o atura ki teia?

10. Eaa nga mea e rua te o atura ki te kite tika anga ia Iehova raua ko Iesu ra, e no teaa ra?

¹⁰ Te raukaanga te kite tika, me kare te kite oti meitaki ia Iehova raua ko Iesu te kapiti ra i nga mea e rua: (1) te kite anga ia raua ei peretana​—to raua au tu, to raua manako ngakau, e te au mataara—​e (2) te aruanga i ta raua akaraanga. Ko te akono i te Atua te kapiti ra i te pirianga ngakau, ei pirianga peretana kia Iehova e ka kiteia te reira na te mataara ta tatou ka akono i to tatou oraanga. E no reira, e raukai te reira ka tau tatou kia kite tikai ia Iehova ei peretana e kia kite tikai i tona anoano e i tona au mataara i te tu maata katoa te ka rauka i te tangata nei. E tika tikai e ko te kite ia Iehova, nona ra te tu i angaia mai ei tatou nei, ka tau tatou kia taangaanga i te reira kite e kia tauta kia aite atu kiaia ra. (Genese 1:26-28; Kolosa 3:10) Ei te mea i aru apa kore ua a Iesu ia Iehova i tana tuatua e i tana i rave ra, ko te kite tika anga ia Iesu e tauturu puapinga ia no te akatupuanga i te akono i te Atua ra.​—Ebera 1:3.

11. (a) Akapeea e raukai ia tatou te kite tika i te Atua raua ko Karaiti? (e) Eaa i puapinga maataʼi kia tamanako oonu i ta tatou e tatau ra?

¹¹ Inara, akapeea e raukai ia tatou taua kite tika ra i te Atua raua ko Karaiti? Na te apiianga tamou marie i te Puka Tapu e te au puka akatumuia ra ki runga i te Puka Tapu.b Inara, e raukai kia tupu ta tatou tauta anga i te akono i te Atua i ta tatou apiianga tataki tai i te Puka Tapu ra, e mea puapinga maata kia akataka tatou i te tuatau no te tamanako oonu anga, koia te manako akaata anga, me kare akamanako marie anga, i ta tatou ka tatau. (Akaaite Iosua 1:8.) Eaa i puapingaʼi te reira? Kia maara e ko te akono i te Atua e manako anga ngakau pumaana i te Atua ra. I roto i te au Tuatua Tapu, e putuputu te tamanako oonu anga i te kapitiia atu ma te ngakau akatutuia ra​—koia te peretana i roto roa. (Salamo 19:14; 49:3; Maseli 15:28) Me ka tamanako ariki marie tatou i ta tatou apinga e tatau ana, ka tomo atu te reira ki raro ki te peretana i roto roa, e na te reira e akakeu i to tatou manako ngakau, e ka riro ei mana ki runga i to tatou manakoanga. Na te reira anake ka raukai i te apii i te akamaroiroi i to tatou pirianga peretana kia Iehova e ka akakeu ia tatou kia akono i te tu te ka akamareka i te Atua noatu me tei roto i te au turanga akaaoanga me kare te au timataanga ngata roa.

Raveanga Akono i te Atua i te Ngutuare

12. (a) Kia tau ki ta Paulo ra, akapeea te Kerititiano me rave i te akono i te Atua i te ngutuare ra? (e) Eaa ra te au Kerititiano mou ka utuutu ei i nga metua kua ruaine?

¹² E mea tau kia raveia te akono i te Atua i te ngutuare na mua. Kua tuatua te apotetoro ko Paulo: “Me e vaine takaua tetai e tamariki tana me kare e mokopuna, e apii ratou i te rave i te akono i te Atua na mua i to ratou uaorai ngutuare e te tutakianga i te paieti tau ki to ratou nga metua e nga tupuna, no te mea e mea arikiia ia i te aroaro o te Atua.” (1 Timoteo 5:4, NW) Ko te utuutu anga i nga metua kua ruaine, mei ta Paulo i akakite maira, e rave anga ia i te akono i te Atua ra. Te oronga ra te au Kerititiano mou i te reira utuutu kare e ei apainga ua mari ra no te aroa i to ratou nga metua. Inara, e tere atu oki i te reira, te kite ra ratou i te puapinga maata ta Iehova e tuku ra ki runga i te utuutu anga i te ngutuare tangata o tetai ra. Kua kite meitaki ratou e me ka kore ratou e tauturu i to ratou nga metua i te tuatau te anoanoia ra, ka riro te aite anga e ‘kua akaruke ïa aia i te akarongo Kerititiano ra.’—1 Timoteo 5:8.

13. Eaa ka riro ei te rave i te akono i te Atua ra i te ngutuare ei akaaoanga tikai, inara eaa te merengo anga te ka tupu mai mei te utuutuanga tetai i tona nga metua ra?

¹³ E tika rai, kare i te mea ngoie ua i te au taime ravarai kia rave i te akono i te Atua ra i te ngutuare. Penei e mamao ke atu etai mema o te ngutuare tangata ia etai. Te akono ra etai tamariki kua mamaata maira i ta ratou uaorai anau, e penei e te kite ra i te tu ngata i te pae o te moni. Ko te tu e te maata o te utuutu anga te anoanoia ra e te metua ka riro ei akaroi i te kopapa, te manako, e te manako ngakau o te aronga te rave ra i te utuutu anga. Inara, ka riro ei merengo anga tikai te reira i te kiteanga e ko te utuutuanga i nga metua kare i “te paieti tau” anake, mari ra te akamareka katoa ra iaia Nona oki “te ingoa i tapaia i te kopu-tangata ravarai, to runga i te rangi, e to te ao katoa nei.”—Ephesia 3:14, 15.

14, 15. E akakite mai i tetai akaraanga i te utuutu anga tau i te Atua ra i te tuanga a nga tamariki no tetai metua.

¹⁴ E akamanako ana i tetai akaraanga akatuki ngakau. Kua aro atu, a Ellis ratou ko tona nga taeake e nga tuaine e toko rima, i tetai akaaoanga tikai i te utuutuanga i to ratou metua i te ngutuare. “I te 1986 kua rokoia taku metua e te maki akamate, tei akariro iaia kia akamate takiri te kopapa,” ta Ellis ia i akataka mai. Kua rave kapiti nga tamariki toko ono katoa i te tiaki anga i to ratou metua, te paianga iaia e kia papu i te uri putuputuanga iaia i runga i tona roi kia kore e tupu etai maki no te takoto anga. “Kua tatau atu matou kiaia, kua tuatua atu kiaia, kua akatangi imene nana. Kare ra i papu ia matou me te kite maira aia e eaa te raveia ra takapini iaia, inara kua akono matou iaia e mei te mea rai e te kite ra aia i te au mea ravarai.”

¹⁵ Eaa ra teia nga tamariki i utuutu ei i to ratou metua mei ta ratou i rave ra? Kua akakite akaou maira Ellis: “I muri ake i te matenga to matou metua vaine i te 1964, na Papa uaorai i akono ia matou. I tera taime, e 5 mataiti ki te 14 to matou pakari. I reira aia ei tauturu ia matou i taua tuatau ra; tei konei ra matou i teianei nona.” Te kitea meitaki ra, kare i te mea ngoie ua i te oronga anga i taua tu utuutu ra, e ka maromaroa ra te tamariki i etai tuatau. “Inara kua kite matou e ko te reira tu o to matou metua e manamanata poto ua,” ta Ellis i karanga. “Te akara atu nei matou ki te tuatau e akaoraiaʼi to matou metua ki te erata meitaki e ka taokotaiia atu matou katoa ki to matou metua vaine.” (Isaia 33:24; Ioane 5:28, 29) E tika tikai, ko tera tu utuutu no te metua ka tau kia akapumaana i te ngakau o Tei akaue maira i te tamariki kia akangateitei i to ratou nga metua ra!c​—Ephesia 6:1, 2.

Akono i te Atua e te Angaanga Orometua

16. Eaa te tumu tau maata no ta tatou ka rave i te angaanga orometua ra?

¹⁶ Me ariki tatou i ta Iesu patianga ‘kia aru tamou iaia,’ ka riro mai tatou ki raro ake i tetai akauenga no ko mai i te Atua ra kia tutu aere i te tuatua meitaki o te Patireia e kia akariro i te au tangata ei pipi. (Mataio 16:24; 24:14; 28:19, 20) Te taka meitaki ra, ko te rave anga i te angaanga ei orometua e apainga Kerititiano ia i teia “tuatau openga” nei. (2 Timoteo 3:1) Inara, ka tau to tatou akakeu anga no te tutu aere anga e te apiianga kia tere atu i to te tu manako angaanga ua me kare i to te apainga ua. Ka tau ko te inangaro oonu ia Iehova ra ei tumu maata no ta tatou ka rave e te maata katoa oki o ta tatou ka rave i te angaanga orometua ra. “No te ki oki o te ngakau ra e tuatuaʼi te vaa,” ta Iesu i tuatua ra. (Mataio 12:34) Ae, me ki maringiringi to tatou ngakau i te inangaro ia Iehova ra, ka oparaia to tatou manako ngakau kia akakitekite atu iaia ki etai ke ra. Me ka riro ko te inangaro i te Atua ei akakeu ia tatou, ka pera katoa ta tatou angaanga orometua i te riro anga ei akakitekite anga tau i to tatou akono i te Atua ra.

17. Akapeea tatou me tatanu i te akakeu anga tika no te angaanga orometua ra?

¹⁷ Akapeea tatou me tatanu i te akakeu anga tika no te angaanga ei orometua? E akamanako ariki ana no runga i nga tumu e toru ta Iehova i oronga mai kia tatou no te inangaroanga iaia. (1) Te inangaro ra tatou ia Iehova no tana au mea kua oti iaia te rave mai no tatou. Kare e maata atu te aroa e rauka iaia i te akaari mai i tana orongaanga mai i te oko ra. (Mataio 20:28; Ioane 15:13) (2) Te inangaro ra tatou ia Iehova no tana au mea e rave nei i teianei no tatou. E mataku kore to tatou i te tuatua kia Iehova, ko tei pau maira i ta tatou au pure. (Salamo 65:2; Ebera 4:14-16) Ia tatou e tuku ra i te au apinga no te Patireia na mua, te rekareka ra tatou i te au mea umuumuia no te oraanga. (Mataio 6:25-33) Te rauka tamou marie maira ia tatou te kaikai vaerua ei tauturu ia tatou kia akono i te au manamanata ta tatou e aro atura. (Mataio 24:45) E tei ia tatou katoa oki te akameitakianga i te riroanga ei tuanga no te taeakeanga Kerititiano te akataka ke ra ia tatou mei to teianei ao nei. (1 Petero 2:17) (3) Te inangaro katoa ra tatou ia Iehova no tana au mea ka rave a muri akenei no tatou. No tona aroa ia tatou, i raukaʼi “kia rave [tatou] i te ora mutu kore [tikai, NW]”—koia te oraanga mutu kore tau ua atu i te tuatau ki mua. (1 Timoteo 6:12, 19) Me akamanako anake tatou i to Iehova ra aroa ia tatou nei, e mea tika rava kia akakeu to tatou ngakau ia tatou kia rave maroiroi i te tuatuaanga ki etai atu nona ra e tana au akakoroanga oko maata! Kare e riro na etai ke e tuatua mai e eaa ta tatou ka rave me kare eaa te maata te ka rave i te angaanga orometua ra. Ka akakeu to tatou ngakau ia tatou kia rave i te ka rauka ia tatou.

18, 19. Eaa te tu ngata ta tetai tuaine i akakore atu kia raukaʼi iaia i te rave i te angaanga ei orometua?

¹⁸ Noatu rai i mua i te au turanga akaaoanga, ka akakeu te ngakau oparaia e te tu akono i te Atua ra kia tuatua. (Akaaite Ieremia 20:9.) Kua akaariia ana teia na to Stella tu, e vaine Kerititiano maata tona akama. I tona akamata anga mua i te apii i te Puka Tapu, kua manako aia, ‘Kare roa e rauka iaku i te aere mei tera are ki tera are!’ Kua akakite aia: “E tu muteki ua toku. Kare e rauka iaku i te aravei ia etai ke ra ma te akamata anga i tetai tuatua kapitianga.” I tona rave tamou anga i te apii, kua tupu tona inangaro no Iehova, e kua akatupu aia i te anoano mura tikai kia tuatua kia etai ke nona ra. “Te maara nei iaku te akakiteanga ki toku puapii Puka Tapu, ‘E inangaro tikai toku i te tuatua, inara kare e rauka iaku, e e manata tikai toku i te reira.’ Kare rava e ngaropoina iaku tana i tuatua mai kiaku: ‘E Stella, kia akameitaki koe e te inangaro ra koe i te tuatua.’”

¹⁹ Kare i roa, kua kite a Stella iaia uaorai te tuatua akakitekite ra ki te vaine i te are i te pae mai i tona ra. I reira kua rave aia i tetai takainga akamaaraanga nona ra​—kua rave aia i te angaanga orometua i tera are i tera are no te taime mua ra. (Angaanga 20:20, 21) E te maara nei iaia e: “Kua tataia taku ka tuatua. Inara e mataku tikai toku noatu rai i mua iaku taku ka tuatua, e maata roa toku mataku i te akara i taku au tataanga!” I teianei, e tere atu i te 35 mataiti i muri iora, te vaira to Stella tu akama. Inara, te inangaro ra aia i te angaanga orometua tutu aere e te tamou marie ra i te rave i tetai tuanga o te reira.

20. Eaa te akaraanga tei akaari maira e kare e rauka noatu i te takinga kinoanga me kare te tapekaanga oki kia topiri i te au vaa tiratiratu o te Au Kite o Iehova ra?

²⁰ Kare e rauka i te takinga kino me kare te tapekaanga i te topiri i te au vaa o te Au Kite tiratiratu o Iehova ra. E akamanako ana ia Ernst raua ko Hildegard Seliger o Tiamani. No to raua akarongo, i rotopu ia raua kua pou ia raua e maata atu i te 40 mataiti ki roto i te puakapa tapekaanga a te Nati e te au tapekaanga Komuniti. Noatu rai i roto i te tapekaanga, kua rave tamou marie raua i te akakitekiteanga ki etai atu o te aronga tapekaia ra. Kua akamaaraara ra a Hildegard: “Kua manako akataka te au tiaki mouauri iaku e e kino, no te mea, mei ta tetai vaine tiaki i tuatua ra e, i tuatua ana au i te Puka Tapu no te ra roa katoa. E no reira kua tukuia au ki roto i tetai pia i raro roa.” I muri ake i to raua tuku opengaia ki vao kia aaere ua, kua rave te Taeake e te Tuaine Seliger i te angaanga i te au tuatau ravarai i te angaanga orometua ei Kerititiano. Kua rave tiratiratu raua i te tavini anga tae roa ki to raua matenga, ko te Taeake Seliger i te 1985 e ko tana vaine i te 1992.

21. Eaa ta tatou ka tau kia rave ei kapiti atu i te tu akono i te Atua ki to tatou akakoromaki anga?

²¹ Na te apiianga pakari i te Tuatua a te Atua e te akataka anga i te tuatau no te akamanako oonu ma te ariki anga i ta tatou i kite, ka tupu to tatou kite tika i te Atua ko Iehova e e Iesu Karaiti. Na teia, e akatupu kia kimi ua atu tatou i taua tu meitaki ra​—koia te akono i te Atua ra. Me kore anake te akono i te Atua ra kare ua atu e mataara no te akakoromaki i te au timataanga tuke tuke te ka rokoia mai kia tatou ei au Kerititiano. E no reira e aru tatou i te apii a te apotetoro ko Petero ra, kia tamou marie i te ‘kapiti katoa i to tatou akarongo ki te akakoromaki, te akakoromaki oki, ki te akono i te Atua.’​—2 Petero 1:5, 6.

[Au Tataanga Rikiriki i Raro]

Eaa Taau Pauanga?

◻ Eaa te akono i te Atua ra?

◻ Eaa te pirianga i rotopu i te akakoromaki anga e te akono i te Atua ra?

◻ Eaa te taviri ki te raukaanga te akono i te Atua?

◻ Akapeea te Kerititiano i te rave anga i te akono i te Atua i te ngutuare ra?

◻ Eaa te tumu maata tau no ta tatou ka rave i te angaanga ei orometua ra?

[Tutu i te kapi 18]

Kua akaari te Au Kite o Iehova tei tapekaia ra i te au puakapa tapekanga a te Nati i Ravensbrück i te akakoromaki e te akono i te Atua