E Arataki Anga Irinakiia Ainei Toou Akava Ngakau?

1, 2. Naai i oronga mai i to tatou akava ngakau, e eaa ra tatou ka mareka ai e kua rauka ia tatou te reira?

KUA anga mai te Atua ko Iehova i te tangata ma te tu rangatira, ma te tikaanga kia rave i te au ikianga. Ei tauturu ia tatou kia rave i te au ikianga tau, kua oronga mai a Iehova i tetai arataki anga. Teia arataki anga ko te akava ngakau, ko te kite anga i roto ia tatou i te mea tika e te mea tarevake. Me taangaanga meitakiia to tatou akava ngakau, ka tauturu te reira ia tatou kia rave i te mea tika e kia kopae i te mea kino. Te riro ra to tatou akava ngakau ei akapapuanga e te aroa maira a Iehova ia tatou e te inangaro ra kia puapingaia tatou.

² Tetai papaki tangata i teia tuatau, te rave ra i te mea meitaki e te rikarika ra i te mea kino noatu e kare ratou i kite ana i te au turanga o te Pipiria. (E tatau ia Roma 2:14, 15) Eaa i akapera ai? No te mea e akava ngakau to ratou. Te paruru ra te reira i te manganui o te tangata kia kore e rave i te au mea kino. Akamanako ana e mei teaa atura te kino i teianei ao me kare o te tangata akava ngakau! Papu e ka maata roa atu ta tatou au mea kino ka rongo. Kia akameitaki tatou ia Iehova no tei oronga mai i tetai akava ngakau no te tangata nei!

3. Akapeea to tatou akava ngakau i te tauturu anga ia tatou i roto i te putuputuanga?

³ Kare te maataanga o te tangata e manako ana i te tereni i to ratou akava ngakau. Inara, ka inangaro te iti tangata o Iehova kia angaanga meitaki to ratou akava ngakau no te mea ka riro te reira ei tauturu ririnui i te akatupu i te tu taokotai i roto i te putuputuanga. Ka inangaroia to tatou akava ngakau kia akamaara mai ia tatou i te au turanga o te Pipiria no te tika e te tarevake, te meitaki e te kino. Inara, ei tereni kia taangaanga i to tatou akava ngakau, ka anoanoia kia rave maata atu i te apii ua i ta te Pipiria e akakite maira. Ka anoanoia tatou kia inangaro i te au turanga o te Atua e kia rauka te akarongo ei meitaki te reira no tatou. Kua tata a Paulo: “E te openga o te akauenga nei, ko te aroa ïa no roto i te ngakau mā, e te akava-ngakau meitaki, e te akarongo pikikaa kore.” (1 Timoteo 1:5) Me tereni tatou i to tatou akava ngakau kia aru i te reira, ka tupu to tatou inangaro no Iehova e to tatou akarongo ki roto iaia. Te akapapu maira te taangaanga anga i to tatou akava ngakau mei teaa tikai te vaitata i to tatou pirianga kia Iehova e mei teaa te maata to tatou inangaro kia akamareka iaia. Ka akaari katoa mai to tatou akava ngakau mei teaa tikai to tatou tu.

4. Akapeea tatou te tereni anga i to tatou akava ngakau?

⁴ Inara akapeea tatou te tereni anga i to tatou akava ngakau? Ka anoanoia tatou kia apii putuputu i te Pipiria, kia manakonako i ta tatou e tatau ra, e kia pati i ta Iehova tauturu na te taangaanga i ta tatou i mou mai. Tera te aiteanga, kia maata atu ta tatou ka rave i te apii ua i te au tika e te au arairaianga. To tatou akakoroanga me apii i te Pipiria, koia kia kite meitaki atu tatou ia Iehova. Ka kite mai tatou e mei teaa tikai Tona tu e eaa tana e reka ana e kare e reka ana. Ia tatou e apii maata atura no runga ia Iehova, i te openga ka viviki ua to tatou akava ngakau i te kite i tana e manako ra e ko te mea tika e te tarevake. Ko te maata atu i to tatou tereni anga i to tatou akava ngakau, ko te maata atu to tatou akamata anga i te manako mei ia Iehova rai.

5. Eaa ta tatou ka uriuri i roto i teia atikara?

⁵ Inara penei ka ui tatou: Akapeea tetai akava ngakau tereni meitakiia i te tauturu anga ia tatou me anoanoia kia rave i te au tukuanga manako? Akapeea tatou te akangateitei anga i te akava ngakau o tetai taeake Kerititiano? Akapeea to tatou akava ngakau te akakeu anga ia tatou kia rave i te mea meitaki? Ka akamanako ana tatou e toru tuanga ka anoanoia tetai akava ngakau tereni meitakiia: (1) te rapakau anga maki, (2) te tarekareka anga, e te (3) ta tatou angaanga tutu aere.

KIA MARU MA TE TAU

6. Eaa te au tukuanga ka anoanoia tatou kia rave no te rapakau anga maki?

⁶ Te akakite maira te Pipiria kia kopae i te au mea te ka tamamae ia tatou e kia tau ua to tatou au tu mei te kaikai anga e te inu anga. (Maseli 23:20; 2 Korinetia 7:1) Me akarongo tatou ki te akoanga a te Pipiria, ka tauturu te reira kia paruru i to tatou oraanga kopapa. Inara ka rokoia rai tatou e te maki e te ruaine. Eaa te au tukuanga ka anoanoia tatou kia rave? I tetai au enua, te vaira te rapakau anga matauia e te rapakau anga ke atu. E tae putuputu ana te au reta ki te au opati manga no ko mai i te au taeake e te au tuaine i te uiui anga i te au rapakau anga tukeke. E manganui tei ui e: “Ka āriki ainei te au tavini o Iehova i teia au rapakauanga?”

7. Akapeea tatou i te rave anga i te au tukuanga manako no te toto?

⁷ Kare o te opati manga e te aronga pakari i roto i te putuputuanga mana kia tuku i te au manako rapakau anga no tetai Kerititiano, noatu e ka pati mai aia eaa tana ka rave. (Galatia 6:5) Inara, ka rauka i te aronga pakari i te oronga i ta Iehova e tuatua ra ei tauturu i tetai Kerititiano kia rave i te tukuanga pakari. Ei akaraanga, kua akaue te Atua ia tatou auraka e kai i te toto. (Angaanga 15:29) Te riro ra teia akauenga taka meitaki ei tauturu i tetai Kerititiano kia mārama kare aia e āriki i tetai rapakau anga maki te o maira te pamu i te toto katoa me kore tetai o te au tuanga maata e a o te toto. Ka riro teia au akakiteanga ei akakeu i te akava ngakau o tetai Kerititiano me manako aia e me ka āriki i te au tuanga rikiriki, koia oki te tuanga meangiti ua o te au tuanga maata e a o te toto.a (Akara i te tataanga rikiriki i raro.) Eaa atu tetai akoanga Pipiria te ka tauturu ia tatou kia rave i te au tukuanga pakari no te rapakau anga maki?

8. Akapeea a Philipi 4:5 i te tauturu anga ia tatou kia rave i te au ikianga pakari no te rapakau anga maki?

⁸ Te na ko ra a Maseli 14:15 e: “Te akarongo ra te kite kore i te au tuatua katoa ra: te akara meitaki ra te tangata akono ra i tona takainga.” I teia tuatau, penei kare e rapakau anga no tetai au maki. No reira ka anoanoia tatou kia matakite i te au rapakau anga maki tei karangaia e ka akaora i te maki, inara kare e akapapuanga e ka angaanga te reira. Kua tata a Paulo e: “Kia kitea meitakiia oki to kotou maru i te tangata katoa.” (Philipi 4:5) Ka tauturu te tu maru ma te tau ia tatou kia akamou i te manako ki runga i te akamorianga ia Iehova kare ki runga i to tatou turanga i te pae kopapa. Me riro te rapakau anga maki ei mea puapinga rava atu i to tatou oraanga, ka manako ua tatou ia tatou uaorai. (Philipi 2:4) Kua kite tatou kare e rauka tetai oraanga kopapa apa kore i roto i teia akatereanga. No reira, e akapapu e ko te tavini anga ia Iehova te mea puapinga rava atu i toou oraanga.​—E tatau ia Philipi 1:10.

9. Akapeea a Roma 14:13, 19 te tauturu anga i to tatou tukuanga manako no te oraanga kopapa, e akapeea to tatou tu taokotai i te takinoia anga?

⁹ Kare tetai Kerititiano maru ma te tau e taumāro i tetai kia rave i tana i manako e ko te mea meitaki rava. I tetai enua, kua akamaroiroi tetai tokorua akaipoipo i tetai pae kia kai i te au kai akamatutu kopapa e kia aru i tetai akapapaanga kai. Kua akaariu raua i tetai au taeake kia rave i te reira, inara kare tetai pae i rave ana. Te kore anga te au kai akamatutu kopapa e te akapapaanga kai i akatupu i te meitaki, kua taitaia te maataanga o te au taeake e te au tuaine. E tikaanga to te nga tokorua i te iki no raua uaorai kia tamata i te au kai akamatutu kopapa e te akapapaanga kai. Inara, e mea tau ainei kia takino i te tu taokotai o te putuputuanga no te rapakau anga maki ua nei? I Roma i taito ra, e tukeke te manako o tetai au Kerititiano no runga i tetai au kai e te au tamataora anga. Eaa te akoanga ta Paulo i oronga kia ratou? Karanga aia e: “Te manako nei tetai e, e tu ke to tetai rā i tetai rā; te manako nei oki tetai okotai rai tu to nga rā katoatoa: kia papu ra te tangata ravarai i tona uaorai ngakau.” Kia matakite ua rai tatou kia kopae i te akaturori atu i tetai ke.​—E tatau ia Roma 14:5, 13, 15, 19, 20

10. Eaa ra tatou ka akangateitei ei i te au tukuanga manako o tetai ke? (Akara i te tutu mua o teia atikara.)

¹⁰ I tetai taime, penei kare tatou e mārama ana eaa ra tetai tangata i roto i te putuputuanga i tuku ei i tona manako no runga i tetai apinga nona uaorai. Eaa ta tatou ka rave? Eiaa tatou e viviki i te akava iaia me kore e māro iaia kia taui i tona manako. Penei ka anoanoia aia kia tereni maata atu i tona akava ngakau, me kore penei e viviki te reira i te kinokino. (1 Korinetia 8:11, 12) Penei kare to tatou akava ngakau i tereni meitakiia. No runga i te rapakau anga maki e tetai au mea ke, ka anoanoia tatou tataki tai kia rave i to tatou uaorai tukuanga manako e kia āriki i te apainga no te reira.

E MATAORA I TE TAREKAREKA ANGA

11, 12 Akapeea te Pipiria te tauturu anga ia tatou kia iki i ta tatou tarekareka anga?

¹¹ Kua anga a Iehova ia tatou kia mataora i te tarekareka anga e kia puapingaia mei te reira. Kua tata a Solomona e “e tuatau to te kata” e “e tuatau to te ura.” (Koheleta 3:4) Inara kare te katoaanga o te tarekareka anga i te mea puapinga, te maru e te oraora. Ka anoano katoaia tatou kia kopae i te akapou maata i te taime ki roto i te tarekareka anga. Akapeea to tatou akava ngakau i te tauturu anga ia tatou kia mataora e kia puapinga mei te tarekareka anga ta Iehova e mareka ra?

¹² Te akamatakite maira te Pipiria i “te au angaanga a te kopapa.” Te kapiti maira i roto i teia au angaanga ko “te moeaana, te akaturi, te tuatua viivii ra, e te kanga, te akamori idolo, te purepure, te makitakita, te tamaki, te akarere, te riri, te karo, te pae ke, te tuatua tarevake, te vareae, te ta tangata, te konā kava, te kariei, e mei te reira te tu.” Kua tata a Paulo e “ko te aronga e rave i te reira au peu, kare ratou e noo i te basileia o te Atua.” (Galatia 5:19-21) No reira ka ui tatou kia tatou uaorai: ‘Te tauturu ra ainei toku akava ngakau iaku kia kopae i te au tarekareka anga kino, te akarere, te akapaapaa enua, me kore te tā ua? Ka akamatakite ainei toku akava ngakau iaku me timataia au i te akara i te au teata ainga viivii me kore te tu tau kore, te konā kava, me kore te au mea purepure?’

13. Akapeea te akoanga ia 1 Timoteo 4:8 e Maseli 13:20 te tauturu anga ia tatou no runga i te tarekareka anga?

¹³ Ka tauturu te au kaveinga Pipiria i te tereni i to tatou akava ngakau no runga i te tarekareka anga. Ei akaraanga, te karanga ra te Pipiria e “ko te akamātau i te kopapa nei, e puapinga mea ngiti ua to reira.” (1 Timoteo 4:8) E manganui tei kite mai e me putuputu ratou i te akaetaeta uaua, e mea oraora ïa e te meitaki no te oraanga kopapa. Inara, akapeea me ka inangaro tatou i te akaetaeta uaua ma tetai pupu tangata? Ka kino ainei e koai ma ta tatou ka kapiti atu me akaetaeta uaua? Te akakite maira a Maseli 13:20 kia tatou e: “Ko tei kapiti katoa i tona aerenga ki to te aronga pakari ra, ka pakari katoa ïa: ko tei kapiti ra ki te aronga neneva ra, e mate ïa.” Te taka ua ra e e mea puapinga kia taangaanga i to tatou akava ngakau tei tereniia e te Pipiria me iki i te tarekareka anga.

14. Akapeea tetai ngutuare tangata i te taangaanga anga ia Roma 14:2-4?

¹⁴ E nga tamaine mapu ta Christian raua ko Daniela. Kua karanga a Christian e: I ta matou Akamorianga a te Ngutuare i te aiai, kua uriuri matou i te tarekareka anga. Kua akatika matou e te meitaki ua ra tetai au ravenga tarekareka, inara tetai pae kare e tau ana. Koai ma te ka tau ei kapiti anga meitaki? Kua kopekope tetai o ta maua tamaine e i te tuatau kaikaianga i te apii kua rave tetai Au Kite mapu i te au mea kare e tau ana. Manako aia e kua māroia aia kia rave i te reira. Kua uriuri manako matou e e akava ngakau to tatou tataki tai, e ka tau kia aratakiia e te reira na te iki anga i ta tatou ka rave e kiaai.”​—E tatau ia Roma 14:2-4.

15. Akapeea a Mataio 6:33 te tauturu anga ia tatou me parani i te tarekareka anga?

¹⁵ Eaa te maata i toou taime e akapou ana i roto i te tarekareka anga? Te tuku ra ainei koe i te au angaanga mei te au uipaanga, te tutu aere, e te apii Pipiria ei mea mua i roto i toou oraanga, me kore ko te tarekareka anga ainei te mea mua? Eaa te mea puapinga roa atu kia koe? Karanga a Iesu e: “E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.” (Mataio 6:33) Me iki koe akapeea me akapou i toou taime, te akamaara ra ainei toou akava ngakau ia koe i ta Iesu akoanga?

AKAKEUIA TATOU KIA TUTU AERE

16. Akapeea to tatou akava ngakau te akamaroiroi anga ia tatou kia tutu aere?

¹⁶ Kare tetai akava ngakau tereniia e akamatakite anake ua ia tatou kia kore e rave i te au mea tarevake, mari ra ka akakeu katoa ia tatou kia rave i te au mea meitaki. Tetai o teia, ko te tutu anga mei tera are ki tera are e ki te aronga ta tatou ka aravei. Ta Paulo te reira i rave. Kua tata aia e: “Kare oki au e tika kia kore: e ae oki toku kia kore au e tutu i te evangelia!” (1 Korinetia 9:16) Ia tatou e aru ra ia Paulo, ka rauka te akava ngakau meitaki, te kite anga e te rave ra tatou i te mea tika. E me tutu aere tatou i te tuatua meitaki ki tetai ke, ka akakeu tatou i to ratou akava ngakau. Karanga a Paulo e: “Te akameitaki nei ra matou ia matou uaorai i te akava-ngakau o te tangata ravarai, i te akakite anga atu i te tuatua-mou i mua i te aroaro o te Atua.”​—2 Korinetia 4:2.

17. Akapeea tetai tuaine mapu i te aru anga i tona akava ngakau tereniia e te Pipiria?

¹⁷ I to Jacqueline 16 anga mataiti, kua apii aia i te au mea ora i te apii. Inara, te apii ra te pupu apii no runga i te au mea tupu ua. “Kare toku akava ngakau i akatika iaku kia piri maata atu ki roto i te au pupu uriurianga mei taku i matau. Kare e rauka iaku i te turuturu i te manako o te au mea tupu ua. Kua aere atu au ki te puapii i te akamārama i toku turanga. I toku poitirere, e oaoa tikai aia e kua oronga mai i te tuatau noku kia tuatua ki mua i te pupu apii no runga i te tumu manako o te au mea angaia.” Kua merengo tikai a Jacqueline i te kite anga e kua akarongo aia e kua aru i tona akava ngakau tereniia e te Pipiria. Te akakeu ra ainei toou akava ngakau ia koe kia rave i te mea tika?

18. No teaa ra tatou ka inangaro ei i tetai akava ngakau meitaki e te irinakiia?

¹⁸ To tatou akakoroanga koia oki ko te noo anga kia tau ki te au kaveinga e te au turanga o Iehova. E ka tauturu to tatou akava ngakau ia tatou kia taea te reira akakoroanga. Me apii putuputu tatou i te Tuatua na te Atua, e te manakonako i te reira, ma te taangaanga i ta tatou e apii ra, te tereniia ra to tatou akava ngakau. I reira ka riro teia apinga aroa umere ei arataki anga irinakiia i roto i to tatou oraanga Kerititiano!