Au Uianga a te Aronga Tatau

Eaa te tumuanga i karangaia ai e ko te au takiota tuatua mei te “koia anake tei rauka te tu mate kore” e te “koia tei kore rava e tangata okotai i kite ana e kare katoa e rauka kia akara” te tou ra kia Iesu e kare ki te Atua ko Iehova?

Kua tata te apotetoro ko Paulo: “Teia mamaanga mai ka akaari mai tei mataora e Tei Mana anake ra i tona uaorai au tuatau i akatakaia, koia e Ariki no te aronga te tutara ra ei au ariki e te Atu no te aronga te tutara ra ei au atu, koia anake tei rauka te tu mate kore, ko tei noo i roto i te marama taea koreia, koia tei kore rava e tangata okotai i kite ana e kare katoa e rauka kia akara.”​—1 Timoteo 6:15, 16, NW.

E mea matau na te au tangata tuatua Pipiria i te uriuri e: ‘Akapeea ake te au takiota tuatua mei te “koia anake tei rauka te tu mate kore,” e “Tei Mana anake ra,” e “koia tei kore rava e tangata okotai i kite ana e kare katoa e rauka kia akara” i te tou anga ki tetai ke atu mari ra ki te Mana Katoatoa?’ Te tika ua ra, e ka rauka ua kia taangaangaia taua au tuatua ra ei akataka mai ia Iehova. Inara, te akaari maira te aerenga tuatua katoa e i roto ia 1 Timoteo 6:15,16 (NW), e te tou tika ra a Paulo kia Iesu.

I te openga o te irava 14, kua taiku a Paulo i “te mamaanga mai o to tatou Atu o Iesu Karaiti.” (1 Timoteo 6:14, NW) No reira, i te tata anga a Paulo i roto i te 1Ti 6 irava 15 e ko “teia mamaanga mai ka akaari mai tei mataora e Tei Mana anake ra i tona uaorai au tuatau i akatakaia,” te tou ra aia ki tetai mamaanga mai o Iesu, kare ko te Atua ko Iehova. Koai, i reira, “Tei Mana anake ra”? Te akara anga tau ua ra kia taopengaia e ko Iesu te Mana e tou ra a Paulo. No teaa ra? Te akapapu ua maira te aerenga tuatua katoa e te akaaite ra a Paulo ia Iesu ki te au tutara tangata. Ko Iesu tika tikai, mei ta Paulo i tata, te “Ariki no te [au tangata] te tutara ra ei au ariki e te Atu no te [au tangata] te tutara ra ei au atu.”a Ae, me akaaiteia atu kia ratou, ko Iesu oki “Tei Mana anake ra.” Kua orongaia kia Iesu te “mana, e te kakā, e te basileia nona, kia tavini atu te au tangata katoa, te pa enua, e te au reo, kiaia.” (Daniela 7:14) Kare roa e mana tangata e rauka kia apai i te reira!

Akapeea no runga i te takiota tuatua “koia anake tei rauka te tu mate kore”? Te rave akaouia ra tetai akaaiteanga i rotopu ia Iesu e te au ariki tangata. Kare rava e rauka i te au tutara tangata kia karanga e kua rauka te tu mate kore ia ratou ko Iesu ua rai tei rauka. Kua tata a Paulo: “Kua kite oki tatou e, ko te Mesia i akatuia mei te mate maira, kare ïa e mate akaou, kare oki e mana akaou te mate iaia.” (Roma 6:9) No reira, ko Iesu te tangata mua tei akatakaia mai i roto i te Pipiria e kua rauka te apinga aroa o te tu mate kore. E tika rava, ko Iesu anake rai te tangata tei rauka te oraanga pe kore, i te taime i tata ai a Paulo.

E mea tau katoa kia akamaara e e tarevake kia karanga a Paulo e ko te Atua ko Iehova anake ua tei rauka te tu mate kore, i na e tu mate kore katoa oki to Iesu i te taime i tata ai a Paulo i taua au tuatua ra. Inara ka rauka ia Paulo kia karanga e ko Iesu anake rai tei mate kore i te akaaite anga atu iaia ki te au tutara o te enua nei.

Pera katoa, e tika tikai e i muri ake i to Iesu tuakaouanga e te aereanga ki runga i te rangi, ka tau kia akatakaia aia e ko tetai “tei kore rava e tangata okotai i kite ana e kare katoa e rauka kia akara.” E tika e, ka kite tana au pipi akatainuia ia Iesu i muri ake i to ratou uaorai matenga aru mai te tuakaouanga ki te rangi ei au mea ora vaerua. (Ioane 17:24) Inara kare e tangata e kite ia Iesu i roto i tona turanga kaka. No reira, ka tau kia tuatua tika tikaiia e mei to Iesu tuakaouanga e te aereanga ki runga, “kore rava e tangata okotai” i kite ana tikai ia Iesu.

Tika, i te akara mua anga, penei mei te mea ra te akara anga e no runga i te Atua te au akatakaanga i roto ia 1 Timoteo 6:15, 16 (NW). Inara te akaari ua maira te aerenga tuatua katoa o te au tuatua a Paulo​—kapiti mai te turuanga a te au irava ke mai​—e te tou ra a Paulo kia Iesu.

[Tataanga Rikiriki i Raro]