Au Uianga a te Aronga Tatau

Eaa ra a Paulo i tata ai no runga i tetai vaine Kerititiano: “E ora ra aia i te anau anga i te tamariki”?​—1 Timoteo 2:15.

Eaa ta te aerenga tuatua katoa o teia irava e akaari maira no runga i te aiteanga i ta Paulo tuatua? Raro ake i te akauruanga te oronga ra aia i te akoanga no runga i te tuanga angaanga a te vaine Kerititiano i roto i te putuputuanga. Kua tata aia: “E te au vaine ra oki, kia akamanea ia ratou uaorai i te kakau e tau ra, ma te akatietie kore, e te akono meitaki; auraka ma te rauru iri, e te auro, e te poe, e te kakau oko maata ra; Ma te tuatua meitaki ra, ko tei tau i te au vaine i mou i te akono i te Atua ra.” (1 Timoteo 2:9, 10) Te raurau ra a Paulo i tona au tuaine Kerititiano kia akatietie kore, kia tau te iki anga i te apinga akamanea uaorai, e kia ‘akamaneaia’ ki te au angaanga meitaki.

Aru mai, kua akamarama a Paulo i te akanoonooanga o te taoonga upoko i roto i te putuputuanga, te karanga anga e: “Kare ra e tika iaku kia apii te vaine, e kia akateitei ki runga i te tane ra, kia muteki ua ra.” (1 Timoteo 2:12; 1 Korinetia 11:3) Kua akamarama mai aia i te tumuanga no teia akanoonooanga na te akaari anga e noatu kare a Adamu i vare ana ia Satani, ko Eva ra “tei vavare, ko tei araia na ïa.” Akapeea e rauka ai i tetai vaine Kerititiano i te paruruia mei te tarevake o Eva? Te pau ra a Paulo: “E ora ra aia i te anau anga i te tamariki kia noo ratou ma te akarongo, e te aroa, e te tapu, ma te akono meitaki.” (1 Timoteo 2:14, 15) Eaa te aiteanga i teia au tuatua na Paulo?

I te akaraanga te karanga ra tetai aronga uri reo e tei runga te ora o te vaine i te anau anga aia i te tamariki. Ei akaraanga, te karanga ra te Today’s English Version: “Ka akaoraia te vaine na roto i te anau anga tamariki.” Inara, kare teia urianga i te au tuatua a Paulo i tika. Manganui te au irava e akaari maira e kia akaoraia, ka anoanoia te tangata kia kite ia Iehova, kia irinaki i roto ia Iesu, e kia akarongo, e kia akatutu mai i taua akarongo ra na roto i te au angaanga. (Ioane 17:3; Angaanga 16:30, 31; Roma 10:10; Iakobo 2:26) Kapiti mai, kare te aiteanga i te tuatua a Paulo e kua akapapuia e ka anau meitaki ua mai te au vaine irinaki i te tamariki. Kua na roto mai ana te au vaine i te tupuanga meitaki o te akaanau anga noatu e aronga irinaki ratou e me kare. E te mea mii ra, kua mate tetai papaki i te akaanau anga, noatu e aronga irinaki ratou e me kare.​—Genese 35:16-18.

Te akoanga a Paulo tei kapiti akaouia i muri mai no runga i te au vaine i roto i teia reta te tauturu maira ia tatou kia marama i tana aiteanga. Te akamatakite maira aia i tetai au vaine takaua ou ua “no te akatau, kua akamātau ratou i te koka aere ua i tera are i tera are; kare ra i te akatau anake, e apai tuatua oki ratou, e te akara matariki i ta tetai ke ra akonoanga, i te tuatua anga oki i te au mea tika kore ra.” Eaa ta Paulo ako? Kua tuatua atu rai aia: “E teianei, teia taku tuatua i te au vaine ou ra, ka akaipoipo ratou, ka anau tama, e akono meitaki i te ngutuare, eiaa to te enemi ei akakinoanga.”​—1 Timoteo 5:13, 14.

Te akakite maira a Paulo i te tuanga angaanga tau a te au vaine i roto i te akanoonooanga pamiri. Te akono ra i taua au angaanga mei ‘te anau anga i te tamariki e te akono meitaki anga i te ngutuare,’ kare tetai vaine e noo ra “ma te akarongo, e te aroa, e te tapu, ma te akono meitaki” e piri atu ki te tu kare e akamaroiroi ana. Ka akaoraia tona turanga pae vaerua, me kore e “ora ra” ia. (1 Timoteo 2:15) Ka tauturu te aru anga i taua arataa ra i te au vaine e manganui i te kopae i te au ereere a Satani.

Te au tuatua a Paulo kia Timoteo te akamaara maira ia tatou katoatoa, te au tane e te au vaine, kia akapou i te tuatau na te arataa puapinga. Te ako maira te Tuatua a te Atua i te au Kerititiano katoatoa: “Kia matakite i to kotou aerenga, eiaa mei ta te kite kore, mei ta te aronga pakari ra.”​—Ephesia 5:15.