‘E Rave Anake i te au Mea Ravarai ma te Akakakā i te Atua’

EI AU tavini akatapuia, e apainga na tatou kia akakakā ia Iehova i te au mea ravarai ta tatou ka tuatua, e ka rave. Kua oronga mai te apotetoro a Paulo i tetai kaveinga ei arataki ia tatou i te na ko anga e: “Te kai ra e te inu ra oki, e te au mea ravarai ta kotou e rave na, e rave anake ïa ma te akakakā i te Atua.” (1 Kori. 10:31) Te ō maira te tamou marie anga ki to Iehova au turanga tuatua tika, no te mea e akaataanga te reira no tona uaorai tu apa kore. (Kolo. 3:10) E iti tangata tapu tatou, no reira kia aru tatou i to Iehova tu tapu.—Ephe. 5:1, 2.

² Kua akakite te apotetoro a Petero i teia ki te au Kerititiano i tona tata anga e: “Mei te tamariki akarongo ra, auraka e akaarite ia kotou uaorai i te au inangaro taito i to kotou kamakura anga ra; Mei iaia i kapiki mai ia kotou e tapu ra, kia tapu katoa kotou i ta kotou tuatua ravarai ra; Kua oti oki i te tataia e, ‘Kia tapu kotou; te tapu nei oki au.’” (1 Pete. 1:14-16) Mei to Iseraela i taito, te anoanoia nei rai te au taeake pouroa i roto i te putuputuanga Kerititiano kia tapu. Tera te aiteanga kia vai tiama ua tatou, eiaa kia viivii i te au tu o teianei ao. Na teia mataara kua akatapuia tatou no te akamorianga a Iehova.—Exo. 20:5.

³ Na te akono anga i ta Iehova au ture tei akataka meitakiia i roto i tana Tuatua Tapu, ka vai ua rai to tatou tu tapu. (2 Timo. 3:16) I te apii anga i te Pipiria, kua kite tatou no runga ia Iehova e tona au aerenga, e kua akavaitataia atu tatou kiaia. Kua papu ia tatou e, ka anoanoia tatou kia tuku na mua i te Patireia o te Atua e kia akariro i te rave anga i tona anoano ei mea puapinga i roto i to tatou oraanga. (Mata. 6:33; Roma 12:2) Tera te aiteanga ka anoanoia tatou kia akatangata ou ia tatou.—Ephe. 4:22-24.

EI TU TAPU E TE TIAMĀ

⁴ Kare i te mea māmā kia vai tiratiratu ki to Iehova au turanga tuatua tika. Te umuumu maira to tatou enemi, te Tiaporo ko Satani kia akaanga ke ia tatou mei te tuatua mou. Ka riro te au akakeuanga kino o teianei ao e to tatou uaorai au tu ara, ei akangatā roa atu i teia no tatou. E rauka ai kia vai tiratiratu ua, ka anoanoia tatou kia patoi pakari i te au timataanga. Te akakite maira te Tuatua a te Atua, eiaa tatou e poitirere me aro atu i te patoianga e te au tu ngatā. Ka takinokinoia rai tatou no te tuatua tika. (2 Timo. 3:12) Me rokoia tatou e te au turanga ngatā, kia mataora ua tatou, e akapapuanga tera e te rave nei tatou i to Iehova anoano.—1 Pete. 3:14-16; 4:12, 14-16.

⁵ Noatu e tu apa kore to Iesu, kua kite aia i te puapinga o te akarongo i te aro atu anga i te au tu timataanga. Kare aia i vare i ta Satani timataanga e kare rava i anoano atu i to teianei ao. (Mata. 4:1-11; Ioa. 6:15) Kare rava a Iesu i kaimoumou ana i tona taime i te akamanako atu i te reira au mea. Noatu kua makitakitaia mai aia e to teianei ao, kua vai tiratiratu aia ki to Iehova au turanga tuatua tika. I mua poto ake i tona matenga, kua akamatakite a Iesu i tana au pipi e ka makitakita katoaia ratou e to teianei ao. Mei tera taime e aere ua atu, kua tupu te au turanga kino ki tana au pipi, inara kua rauka ia ratou te ngakau toa no te mea kua kite ratou e kua vi teianei ao i te Tamaiti a te Atua.—Ioa. 15:19; 16:33; 17:16.

⁶ Kia kore tatou e riro no teianei ao, ka anoanoia tatou kia vai tiratiratu ki to Iehova au turanga tuatua tika, mei to tatou Arataki rai. I te akapapuanga eiaa kia piri ki te manamanata poritiki e to te tangata, ka anoanoia tatou kia patoi pakari i te au peu viivii o teianei ao. E mea puapinga tikai kia tatou te ako i roto ia Iakobo 1:21 e na ko ra e: “E tuku ke atu i te au mea viivii ra, e te au mea kino maata ravarai, ka āriki marie ei ma te maru i te tuatua tanumia mai ki roto ra, e oraʼi oki to kotou vaerua.” Na roto i te apii e te aere anga ki te uipaanga, ka kite tatou i reira i te tuatua mou tei ‘tanumia ki roto’ i to tatou manako e to tatou ngakau, e kare rava tatou e anoano atu i ta to teianei ao e oronga maira. Kua tata te pipi a Iakobo e: ‘Kare kotou i kite e ko te anoano i teianei ao, e enemi ïa i te Atua ra? E teianei ko tei anoano ei oa aia no teianei ao, e enemi ïa no te Atua.’ (Iako. 4:4) Teia te tumu i ako pakari mai ei te Pipiria kia vai tiratiratu ua tatou ki to Iehova turanga tuatua tika, e kia akatakake takiri mai mei teianei ao.

⁷ Te akamatakite maira te Tuatua a te Atua e auraka tatou kia piri ki te au peu viivii e te tau kore. Te akakite maira te reira e: “Kareka te akaturi [moeaana], e te au tuatua viivii ravarai, e te noinoi apinga, auraka rava e akaikiia ki o kotou na, ko tei tau ïa i te aronga tapu.” (Ephe. 5:3) No reira auraka tatou e akamou i to tatou manako ki runga i te au mea viivii, e auraka roa tatou kia taiku i teia au mea. Te akaari ra tatou i reira e te inangaro nei tatou kia vai tiratiratu ua ki to Iehova au turanga tuatua tika e te viivii kore.

TU MĀ I TE PAE KOPAPA

⁸ Kua kite te au Kerititiano i te puapinga o te tu tapu e te tiamā, pera katoa te tu mā i te pae kopapa. I te tuatau o Iseraela i taito, kua akaue a Iehova ia ratou kia tamā ua rai i to ratou puakapa. Kia mā katoa to tatou oraanga kia kore a Iehova e ‘akara i tetai mea viivii’ i roto ia tatou.—Deu. 23:14.

⁹ I roto i te Pipiria, e pirianga vaitata to rotopu i te tu tapu e te tu mā i te pae kopapa. Ei akaraanga, kua tata a Paulo e: ‘E teianei, e aku au akaperepere e, e tamā ua tatou ia tatou uaorai i te au viivii katoa o te kopapa e te vaerua, ma te akaope marie i te akonoanga tapu i te mataku anga atu i te Atua.’ (2 Kori. 7:1) No reira, e tauta te au tane e te au vaine Kerititiano kia vai mā ua to ratou kopapa, kia paʼi e kia pua putuputu i to ratou kakau. Noatu e tuke ke te au turanga mei tera enua ki tera enua, ka rauka ua te pua e te vai ei tamā ia tatou, e ei tamā i ta tatou tamariki kia vai mā ua.

¹⁰ No ta tatou angaanga tutu evangeria, kua kite matauia tatou i te au ngai e noo ra tatou. Me mako, me mā, e me akono meitakiia a roto e a vao i to tatou kainga, e akaraanga meitaki tera ki to tatou au tangata tupu. Ka rauka i te ngutuare tangata kia akapera. Kia tamā e kia akono te au taeake i to ratou kainga e te aua, e mea mareka roa teia na te tangata kia akara mai. Ka akaari mai teia, pera katoa ta ratou akaraanga meitaki i roto i te akamorianga e, e au tangata mako ratou i te arataki i to ratou uaorai ngutuare. (1 Timo. 3:4, 12) E apainga katoa ta te au tuaine kia akono i te au mea ravarai i roto i to ratou ngutuare. (Tito 2:4, 5) Te tamariki kua tereni meitakiia, e apainga katoa ta ratou kia akono i to ratou au pia moe kia mako e kia mā ua. Te taokotai ra i reira te ngutuare tangata i te tuku i te akaraanga meitaki no te mā, tei tau no te ao ou i raro i te akatereanga a te Patireia o te Atua.

¹¹ Manganui to Iehova iti tangata e apinga akaoro to ratou e na runga ana ki te au uipaanga. I tetai au ngai, e mea anoano maataia te motoka no te angaanga orometua. Kia vai mā ua te reira, e kia ripea meitakiia. Kia riro to tatou kainga e to tatou au apinga akaoro ei akaari mai e e iti tangata mā tatou e te tapu no Iehova. Te kapiti katoa maira teia kaveinga i te turanga mā e te mako o ta tatou kiri e te Pipiria.

¹² Kia aru to tatou kakau e te akamanea i ta Iehova au kaveinga. Kare roa tatou e inangaro kia tu ki mua i te aroaro o tetai tangata pāpānunui i roto i te kakau paaruā e te mako kore. Ka tanga atu ei me aere tatou ki te angaanga orometua ei mata no Iehova, e me tu i mua i te paata i te rave i tetai tuanga i roto i te uipaanga! Kare tatou e inangaro i to tatou akamanea e te tu o te kakau kia akaturori i etai ke no runga i te akamorianga a Iehova. Kare te tu marikonga kore e te manako kore i etai ke i te mea tau. (Mika 6:8; 1 Kori. 10:31-33; 1 Timo. 2:9, 10) No reira me akapapa tatou no te angaanga tutu e me aere ki te au uipaanga putuputuanga, au akaputuputuanga kotinga e te au uruoaanga, kia akamaara tatou i te Tuatua a te Atua no runga i te tu mā e te tu mako i te pae kopapa. Ka inangaro tatou kia akangateitei e kia akakakā ua rai ia Iehova.

¹³ Mei tera katoa te tu me aere tatou ki te opati maata o te Au Kite o Iehova me kore ki tetai opati Betela. E akamaara e ko te aiteanga o te tuatua Betela koia oki ko te “Are o te Atua.” No reira kia akamanea tatou e kia akamako, mei te tu rai e aere ana tatou ki te au uipaanga i ko i te Are Uipaanga Patireia.

¹⁴ Me piri katoa ki te au angaanga tarekareka, kia akamako meitaki tatou i to tatou kakau e te akamanea. E ui kia tatou uaorai e, ‘Ka emiemi ainei au i te tuatua i te karere o te Patireia no te mea e marikonga kore toku kakau?’

TAREKAREKA E TE TAMATAORA TAU

¹⁵ E mea puapinga te akangaroi e te tarekareka, kia meitaki ua tatou e kia matutu. Kua pati ana a Iesu i tana au pipi kia aru iaia ki tetai ngai kia ‘noonoo ua na’ ko ratou anake ua. (Mare. 6:31) E mea meitaki kia akangaroi e kia rave i tetai manga tarekareka me kore tamataora. Ka akaoraora te reira ia tatou kia maroiroi i te rave i ta tatou angaanga i te au rā.

¹⁶ E maata te au tu tarekareka i teia tuatau, ka anoanoia te au Kerititiano kia iki meitaki, e kia taangaanga i te pakari o te Atua no ta ratou ka rave. E tika ka anoanoia te tarekareka, inara kare ko tera te mea puapinga i roto i te oraanga. Kua akamatakiteia mai tatou e, i te “tuatau openga” ka riro te tangata “ei anoano i te au mea e navenave ei ra, kare i anoano i te Atua.” (2 Timo. 3:1, 4) Maataanga o te au mea e karangaia ra e tarekareka e te tamataora, e mea viivii te reira ki te aronga tei inangaro kia vai tiratiratu ki to Iehova au turanga tuatua tika.

¹⁷ Kua patoi pakari te au Kerititiano o mua ana i te au peu tau kore anake i rotopu i te aronga tei anoano i te au mea e navenave ei. I ko i te au ngai tarekareka i Roma, e mea navenave na te aronga matakitaki i te akarakara i te au tangata e takinokinoia ra. E akaariia ana te ta tangata, te akamaringi toto e te au peu viivii anake o te ainga ei tamataora i te tangata, kareka te au Kerititiano, e akaatea takiri mai ana ratou mei taua au peu ra. I teia tuatau mei tera rai te au tu tamataora ta teia ao e akaari ana ei akamerengo i te au anoano tika kore o te tangata. Ka anoanoia tatou kia ‘matakite i to tatou aerenga’ e kia uri ke takiri mei te tamataoraanga viivii. (Ephe. 5:15, 16; Sala. 11:5) Noatu kare te tu o te tamataora i te mea viivii, penei ko te ngai e raveia ra, kare te reira e tau no te Kerititiano.—1 Pete. 4:1-4.

¹⁸ Te vai nei tetai au tu tarekareka e te tamataora ka tau kia rave te au Kerititiano. Manganui tei puapingaia no te aru i te ako i roto i te Tuatua a te Atua, e te au apiianga i roto i ta tatou au puka.

¹⁹ Tetai taime penei ka patiia mai tetai au taeake ki ko i tetai kainga, kia noonoo kapiti e te au oa Kerititiano. Me kore penei ka patiia mai te au taeake pera te au tuaine ki tetai akaipoipo me kore ki tetai akakoroanga mei te reira te tu. (Ioa. 2:2) E mea tau no te pu ngutuare kia kite e tei runga iaia te apainga no te au mea ka tupu i reira. Me maata te tangata ka putuputu ki te ngai okotai, ka anoanoia kia akamako meitakiia te reira. No te mea kare e akaaere meitakiia ana tetai au angaanga tamataora, kua riro te reira ei akatupu i tetai au peu kare e tau no te au Kerititiano, mei te kai tuauau e te kona kava, e etai atu au angaanga kino. No teia tu, kua akapapu meitaki te au Kerititiano, kia akaiti ua i te maata o te tangata e te roa o te taime no ta ratou tamataora. Mei te mea e te ō maira te kava, kia tau ua te ka inuia. (Phili. 4:5) Me tauta pakari tatou i te akapapu e kia riro teia au tamataoraanga ei mea tau, e ka akamatutu i to tatou akarongo, kare i reira te kai e te kava, e riro ko te mea puapinga rava atu.

²⁰ E mea meitaki te tu maoraora ki te au taeake. (1 Pete. 4:9) Me pati i te au taeake Kerititiano ki to tatou kainga kia kaikai, kia inu vai, kia akangaroi, e kia akamaroiroi i tetai e tetai, e akamaara eiaa tatou e akaturori ia ratou. (Luka 14:12-14) Me e manuiri tatou i ko i teia au akakoroanga, kia akaāu tatou i to tatou tu ki te ako i roto ia Mareko 12:31. E mea meitaki kia akaari ua rai to tatou rekareka no te tu takinga meitaki o etai ke.

²¹ E rekareka ana te au Kerititiano i te au mea ravarai ta Iehova e oronga ua maira, e te rauka nei ia ratou kia ‘kai e kia inu, e kia rave i te meitaki no tana katoa ra au angaanga.’ (Kohe. 3:12, 13) Me “rave anake ïa” tatou i te au mea ravarai “ma te akakakā i te Atua,” ka mareka tatou i reira me akamaara e kua riro teia au tamataoraanga ei akamatutu i to tatou akarongo.

AU ANGAANGA A TE APII

²² Te puapingaia nei te tamariki a te Au Kite o Iehova no te apii e rauka maira ia ratou. Ia ratou e aere ra ki te apii ka inangaro ratou kia kite i te tatau e te tata. Tetai au apii e apiiia ra ratou, ka riro ei mea puapinga kia ratou e akapapa ra no te tavini ia Iehova. Te au mataiti ia ratou i te apii, e tauta pakari kia ‘akamanako i Tei anga ia ratou’ na te tuku anga na mua i te au mea e ō maira te akamorianga ia Iehova.—Kohe. 12:1.

²³ Me e mapu Kerititiano koe e aere ra ki te apii, kia matakite eiaa e piri ua atu ki te au mapu o teianei ao me kare e tumuanga tau noou kia piri kia ratou. (2 Timo. 3:1, 2) Kua oronga mai a Iehova i te paruruanga tei anoanoia, no reira e maata te ka rauka ia koe i te rave kia kopae i te au akakeuanga o teianei ao. (Sala. 23:4; 91:1, 2) No reira ei paruru ia koe, e taangaanga i te au ravenga ta Iehova e oronga maira.—Sala. 23:5.

²⁴ Kia akatakake ia ratou mei te akakeuanga o teianei ao i te apii, e iki ana te maataanga o te au mapu Kite kia kore e piri ki tetai au angaanga a te apii i muri ake i te ora apii. Penei ka ngatā i te au oa apii e te au puapii kia mārama i teia. Inara ko te akamareka ia Iehova te mea puapinga rava atu. Tera i reira, ka taangaanga koe i toou akava ngakau tei tereniia e te Pipiria, e kia akakoro i roto i toou ngakau, eiaa kia piri ki te au peu akarērē e te akaepaepa enua. (Gala. 5:19, 26) Na te akono anga i te ako a Iehova na roto i toou nga metua, e te piri ki te au taeake i roto i te putuputuanga, ka rauka i te au mapu kia vai tiratiratu ki to Iehova au turanga tuatua tika.

ANGAANGA MONI E TE AU OA

²⁵ I roto i te Pipiria, e apainga na te upoko o te ngutuare i te akono i tona ngutuare tangata. (1 Timo. 5:8) Ei au tavini no Iehova, kua kite ratou e ko te aruaru i te au anoano o te Patireia tei maata atu i ta ratou ngai angaanga moni. (Mata. 6:33; Roma 11:13) Me akono i to Iehova anoano e me mareka ua i te kai e te kakau, ka kopae ratou i te apiapi o te oraanga e te ereere o te noinoi apinga.—1 Timo. 6:6-10.

²⁶ Pouroa te au Kerititiano akatapuia e angaanga moni ra, kia akamaara i te au kaveinga Pipiria. Me angaanga tatou kia rauka te au mea no te oraanga, ka patoi tatou i te piri atu ki roto i te au peu te ka aati i ta Iehova au ture me kore i te ture a te enua. (Roma 13:1, 2; 1 Kori. 6:9, 10) Kia akamaara ua rai tatou i te ereere o te kapitianga kino. Ei au mata no te Mesia, kare tatou e piri ki roto i te au akakoroanga kimi moni e aati ra i to Iehova au turanga, e te ka akaoko i to tatou tu tiratiratu me kore te ka takino i to tatou akarongo. (Isa. 2:4; 2 Timo. 2:4) E kare tatou e piri ki to Iehova enemi, kia “Babulonia maata.”—Apo. 18:2, 4; 2 Kori. 6:14-17.

²⁷ Me vai tiratiratu tatou ki to Iehova turanga tuatua tika, ka tauturu te reira ia tatou kia kore e akariro i to tatou taokotaianga Kerititiano ei maani pitiniti me kore i tetai ua atu mea te ka akapuapinga ia tatou uaorai. E tai rai o tatou akakoroanga me taokotai e te au taeake Kerititiano i ko i te au uipaanga, au akaputuputuanga, e te au uruoaanga, koia oki kia akamori ia Iehova. Te akamatutu ra tatou i to tatou akarongo e te “akamaroiroi ra, e kia maata atu rai te maroiroi.” (Roma 1:11, 12; Ebe. 10:24, 25) Kia riro teia au atianga ei tuatau no te akamatutu i to tatou pirianga kia Iehova.

KIA NOO MA TE ROTAI

²⁸ Te anoanoia nei to Iehova iti tangata kia akono i tona au turanga tuatua tika, ‘kia vai rai te taokotaianga a te vaerua i te ruru o te au.’ (Ephe. 4:1-3) Eiaa kia rave i to tatou uaorai anoano, kia rave ra i te meitaki no etai ke. (1 Tesa. 5:15) Kare e ekoko e ko te tu teia e kite ra koe i roto i toou putuputuanga. Noatu eaa to tatou iti tangata, to tatou enua, to tatou pirianga tangata, pae puapinga e te turanga o te apii, e tai rai kaveinga tuatua tika no tatou pouroa. Kua kite ua te tangata i teia au tu memeitaki o to Iehova iti tangata.—1 Pete. 2:12.

²⁹ I te akamārama akaou anga i te tumu no teia tu rotai, kua tata te apotetoro a Paulo e: ‘Okotai rai kopapa, okotai oki vaerua, mei ia kotou i kapikiia i te tapapaanga okotai o to kotou kapikianga; Okotai Atu, okotai akarongo, okotai bapetizo, Okotai Atua, ko te Metua ïa no te tangata katoatoa, tei rungao i te tangata ravarai, e tei vaitata i te tangata katoatoa, e tei roto oki ia kotou ravarai.’ (Ephe. 4:4-6) Tera te aiteanga, kia rotai to tatou mārama no runga i te au apiianga tumu, e pera katoa te mārama ou tei rauka no runga i te Pipiria tei ō mai ta Iehova tutaraanga ngateitei. E tika rava e kua oronga mai Iehova i te tuatua mou ei tauturu ia tatou kia tavini iaia ma te manako okotai.—Zepha. 3:9.

³⁰ Riro te tu au e te rotai o te putuputuanga Kerititiano ei akamaroiroianga mou no to Iehova aronga akamori. Kua kite tikai tatou i te akatupuanga o ta Iehova taputou: “E kave au ia ratou ki te ngai okotai mei te au mamoe i Bozara,” koia oki i roto i te aua. (Mika 2:12) Ka inangaro tatou kia vai rai taua tu au e te rotai e kia vai tiratiratu ki to Iehova au turanga tuatua tika.

³¹ Kia rauka te mataora i te aronga tei ārikiia ki roto i to Iehova putuputuanga mā! Pauna meitakiia ta tatou akaatingaanga, kia kapikiia i to Iehova ingoa. Ia tatou e akaperepere ra i to tatou pirianga kia Iehova, ka tauta pakari tatou kia vai tiratiratu ua rai ki tona turanga tuatua tika e kia akakite i te reira ki etai ke.—2 Kori. 3:18.