Eaa te Ka Tauturu ia Tatou Kia Akono Meitaki i te Tuatua Mou?

KO TETAI tangata akaapa i te teata no tetai nutipepa kua aere atu i etai tuatau i te akarakara i tetai nuku teata. Kare aia e reka roa ana i te reira kua tata ra i muri mai: “Me ko te mea puapinga kore ua taau e inangaro ra, i na e aere ra e akara i teia nuku teata.” I muri mai, kua tata te aronga na ratou te nuku teata i tetai akakitekite anga i te akaarianga i tetai taiku anga no te manako o te tangata akaapa ra. Ko te taiku anga: “I na e aere ra e akara i teia nuku teata”! Kua taiku tika tikai mai te akakitekite anga i te au tuatua a te tangata akaapa, inara kua rave tarevakeia te aerenga tuatua e no reira kua akatarevake kinoia tona manako.

Kua akatutu mai taua akatauanga i te puapinga maata no te aerenga tuatua o tetai akakite anga. Te rave tarevake anga i te au tuatua mei te aerenga tuatua ka taui i to ratou aiteanga, mei ia Satani rai i te taui anga i te aiteanga o te Tuatua Tapu i tona tauta anga i te akavare ia Iesu. (Mataio 4:1-11) I tetai tua, na te akamanako anga i te aerenga tuatua o tetai akakite anga te tauturu ra ia tatou kia marama maata mai i tona aiteanga. No teia tumu, me apii tatou i tetai irava Pipiria, e mea meitaki kia akara i te aerenga tuatua kia kite meitaki atu e eaa ta te tangata tata e tuatua ra.

Kia Akono Meitakiia

Te akataka maira tetai tikitinari i te aerenga tuatua ei “au tuanga no tetai tata anga me kore e akakite anga tuatua i mua ake me kare tei aru mai i tetai tuatua tikai me kare ra te irava, tei matauia te akakeuanga i tona aiteanga me kore te tupu anga.” Ka riro katoa te aerenga tuatua ko “te akanoo anga i te au turanga me kore te au tika anga te piri atura ki tetai tupu anga, tetai tu, e te vai atura.” I roto i teia manako openga, te tuatua aiteite no te “aerenga tuatua” ko te “tumu anga.” Na te akamanakoanga i te aerenga tuatua o tetai tuatua tapu e mea puapinga maata i te akamanako e eaa ta te apotetoro ko Paulo i tata atu kia Timoteo: “E akamaroiroi kia vai meitaki rai koe ki mua i te aroaro o te Atua, ei rave angaanga kare e akama anga, e te tika oki i te tua i te tuatua-mou ra.” (2 Timoteo 2:15) E raukai i te akono meitaki tikai i te Tuatua a te Atua, te anoanoia ra tatou kia marama tikai i te reira e kia akataka tika tikai anga i te reira e te tau ki tetai ke. Te akangateitei anga ia Iehova, te Tata o te Pipiria, e akakeu ia tatou kia tauta i te rave i te reira, e te akamanakoanga i te aereanga tuatua e tauturu anga puapinga maataia.

Te Tumu Anga o Timoteo Rua

Ei akaraanga, ka akara matatio ana tatou i te puka Pipiria o Timoteo Rua.a Kia akamata i ta tatou akara matatio anga, ka tau tatou kia kimi i te tumu anga o te puka. Naai i tata ia Timoteo Rua? I naea? I raro ake i teea au turanga? No reira ka ui tatou, Eaa ra te tu o te “Timoteo” tei ira mai te ingoa i roto i te puka ra? Eaa ra aia i inangaro ei i te akakiteanga i roto i te puka? Te au pau anga ki teia au uianga ka akapuapinga maata i to tatou kite anga i te puapinga o te puka e te tauturu anga ia tatou kia kite e akapeea tatou i teia tuatau i te puapinga anga mei te reira.

Te akaari maira te akamataanga o te au irava o Timoteo Rua e ko te puka e reta ia tei tataia e te apotetoro ko Paulo kia Timoteo. Te akaari maira tetai au irava i te tata anga a Paulo i te reira, tei roto aia i te are tapeka anga no te tuatua meitaki. Kua akarukeia e te manganui, kua manako a Paulo e kua vaitata mai tona openga. (2 Timoteo 1:15, 16; 2:8-10; 4:6-8) No reira, penei kua tata aia i te puka i te tuatau o tona tapeka anga rua i Roma, penei i te 65 T.N. Kare i roa i muri mai, i te akara anga penei na Nero i akautunga iaia kia tamateia.

Ko te tumu angaia o Timoteo Rua. Inara, e mea tau kia manako e kare a Paulo i tata ana kia Timoteo kia kopekope atu no runga i tona uaorai au manamanata. Mari ra, kua akamatakite aia i te au tuatau ngata ki mua no Timoteo e kua akamaroiroi atu i tona oa kia kopae i te au arairai anga, “kia maroiroi,” e kia oronga i te au ikuiku anga a Paulo ki tetai ke. Aru mai, kua tau meitaki teia aronga nei i te tauturu atu i tetai ke. (2 Timoteo 2:1-7) Mei teaa te akatau anga meitaki i te manako karapii kore anga i tetai ra noatu i roto i te au tuatau ngata ra! E mei teaa te ako anga meitaki no tatou i teia tuatau nei!

Kua kapiki a Paulo ia Timoteo e e “tamaiti akaperepere.” (2 Timoteo 1:2) Kua taiku putuputuia mai te tangata mapu i roto i te au Tuatua Tapu Ereni Kerititiano ei oa tiratiratu no Paulo. (Angaanga 16:1-5; Roma 16:21; 1 Korinetia 4:17) I te tata anga a Paulo i teia reta kiaia, i te akaraanga tei roto a Timoteo i tona 30 mataiti​—te manako ua ia rai ei mapu ou. (1 Timoteo 4:12) Inara, tei iaia takere te rekoti meitaki rava atu no te tu tiratiratu, i te ‘angaangaanga ma Paulo’ penei e 14 mataiti. (Philipi 2:19-22) Noatu te tu mapu ou o Timoteo, kua iki a Paulo iaia kia ako i tetai aronga pakari e ‘auraka e tauetono i te tuatua’ inara kia manako pakari no runga i te au tumu puapinga maata ra, mei te akarongo e te akakoromaki anga. (2 Timoteo 2:14) Kua akamana katoaia a Timoteo kia akono i te ikianga i te aronga akaaere e te au tavini akono i roto i te putuputuanga. (1 Timoteo 5:22) Inara, penei te ngere ra iaia uaorai te tu papu anga no te taangaanga anga i tona mana taoonga.​—2 Timoteo 1:6, 7.

Kua aro atu te tangata pakari mapu ra i etai au akaaoanga pakari. Ko tetai tumu, ko te nga tangata tokorua ra, ko Humenaio raua ko Phileto, kua “akatatipoki i te akarongo o tetai papaki,” i te apiianga e “kua oti te tuakaouanga.” (2 Timoteo 2:17, 18) I te akara anga, kua irinaki raua e ko te tuakaou anga anake ra ko te mea i te pae vaerua ra e kua oti takere te reira no te au Kerititiano. Penei kua taiku tarevake raua i te aerenga tuatua o ta Paulo akakite anga e kua mate te au Kerititiano i roto i ta ratou au ara inara kua akaora akaouia mai na roto i te vaerua o te Atua. (Ephesia 2:1-6) Kua akamatakite atu a Paulo e ka maata mai te akamana anga a te apoteiti. Kua tata aia: “Te vai atura oki te tuatau e kore ei ratou e āriki i te tuatua-mou; . . . E ariu ke oki to ratou taringa i te tuatua-mou, e anga atu ei ki te tuatua taeke ua.” (2 Timoteo 4:3, 4) Kua akaari mai ta Paulo akamatakiteanga ki mua e e mea rapurapuia no Timoteo kia akarongo i te ako anga a te apotetoro.

Te Puapinga o te Puka i Teia Tuatau

Mei te akamata anga, kua kite tatou e kua tata a Paulo ia Timoteo Rua no te au tumu te aru maira: (1) Kua kite aia e te vaitata maira tona openga, e kua tauta aia i te akateateamamao ia Timoteo no te tuatau me kare aia i reira i te turu ia Timoteo. (2) Kua inangaro aia i te akapapa ia Timoteo kia paruru i te putuputuanga i raro ake i tana akaaere anga mei te tu apoteiti e tetai atu au akamana anga kino. (3) Kua inangaro aia i te akamaroiroi ia Timoteo kia angaanga ua atu i roto i te angaanga a Iehova e kia irinaki ki runga i te kite tikai o te Tuatua Tapu akauruia i tona vai ketaketa anga i te patoi i te au apiianga tarevake.

Te maramaanga i teia tumu anga te akariro ra ia Timoteo Rua ei mea puapinga maata roa atu kia tatou. I teia tuatau katoa, te vaira te aronga apoteiti mei ia Humenaio raua ko Phileto tei akamaroiroi ra i to ratou uaorai au manako e te inangaro anga i te tatipoki i to tatou akarongo. Pera katoa, te “kino maata” ta Paulo i totou mai ana tei konei ia. E manganui tei kite i te tuatua mou o ta Paulo akamatakiteanga: “E te aronga katoa e maara tikai e akono i te Atua, ei roto rai i te Mesia ra ia Iesu, e takinga-kino katoaia ïa.” (2 Timoteo 3:1, 12) Akapeea tatou i te vai ngaueue kore anga? Mei ia Timoteo rai, te anoanoia ra ratou kia akarongo i te ako anga a te aronga tei tavini ana ia Iehova no te au mataiti e manganui. E na roto i te apii uaorai, te pure, e te taokotai anga Kerititiano, ka rauka ia tatou “kia maroiroi” na roto i to Iehova takinga meitaki. Pera katoa, na te irinaki anga i te mana o te kite tikai, ka rauka ia tatou i te akarongo i ta Paulo akamaroiroi anga: “E tāpu meitaki i te akonoanga tuatua tikai.”​—2 Timoteo 1:13.

“Te Akonoanga Tuatua Tikai”

Eaa te “tuatua tikai” ta Paulo i tuatua ana? Kua taangaanga aia i taua tuatua i te taiku anga ki te apii anga Kerititiano tika tikai. I roto i tana reta mua kia Timoteo, kua akataka a Paulo i taua “tuatua tikai” ko te tumuanga ia o “to tatou Atu a Iesu Mesia.” (1 Timoteo 6:3) Te aruanga i te akonoanga i te au tuatua tikai te akatupu ra i te manako tau o tetai, te tu aroa, e te manakoanga i tetai ke. I te mea te rotai ra ta Iesu angaanga orometua ma tetai atu au apiianga katoatoa tei kiteaia i roto i te katoa anga o te Pipiria, te tuatua anga e “tuatua tikai” ka rauka i te taikuia na te kapiti atu anga ki te au apiianga katoatoa o te Pipiria.

No Timoteo, e no te aronga pakari Kerititiano katoatoa ra, te akonoanga i te au tuatua tikai e “tuatua meitaki” kia paruruia. (2 Timoteo 1:13, 14) “E akakite ua [a Timoteo] i te tuatua; kia tamou marie rai, i te atianga tau, e te atianga tau kore; e akakite ua i te apa, e ako atu, e akamaroiroi atu, ma te akakoromaki maata e te apii marie anga atu.” (2 Timoteo 4:2) I to tatou kite anga e kua akatotoaia te au apiianga apoteiti i to Timoteo tuatau, kua marama tatou e eaa a Paulo i akakite akaou ei i te rapurapu anga no te akonoanga i te au tuatua tikai. Kua kite katoa tatou, e ka paruru a Timoteo i te anana na te ‘akakiteanga, akoanga, akamaroiroianga,’ ma te akakoromaki anga maata, i te taangaangaanga i te tu kite i te apiianga meitaki ra.

Kua akakite atura a Timoteo i te tuatua kiaai ma? Te akakite maira te aerenga tuatua e ko Timoteo, ei tangata pakari ra, kia akakite atu i te tuatua i roto i te putuputuanga Kerititiano. I te akamanako anga i te au taomi anga tei akaketaketaia e te aronga patoi ra, ka vai tamou ua rai a Timoteo i tona parani i te pae vaerua e kia akakite ma te mataku kore i te tuatua a te Atua, kare i te au manako o te tangata, te au manako uaorai, me kore te au irinaki anga puapinga kore ra. E tika tikai, penei ka apai mai teia i te patoi anga mei etai ke ra tei manako tarevake ana. (2 Timoteo 1:6-8; 2:1-3, 23-26; 3:14, 15) Inara, na te aruanga i ta Paulo ako anga, ka vai tamou ua atu rai a Timoteo ei tangata arairai i te apoteiti, mei ta Paulo uaorai ra i rave ana.​—Angaanga 20:25-32.

Ko ta Paulo au tuatua no te tutuanga i te tuatua ra ka tau katoa ainei kia tutu aereia i vao ake i te putuputuanga ra? Ae, ka tau te reira, mei ta te aerenga tuatua e akaari maira. Te na ko maira a Paulo: “E akamaroiroi ra koe i te au mea katoa ra, e akakoromaki rai i te kino, e rave i te angaanga a te apii evangelia, e rave akaope takiri i to taoonga na.” (2 Timoteo 4:5) Te tutu evangeria​—te tutu aere anga i te tuatua meitaki no te ora ki te aronga kare e irinaki ana​—ko te mea puapinga maataia ki te angaanga orometua Kerititiano. (Mataio 24:14; 28:19, 20) E mei te tuatua a te Atua e tutu aereia ra i roto i te putuputuanga noatu te “atianga tau kore,” ka aruaru ua atu rai tatou i te tutuanga i te tuatua ki te aronga i vao ake i te putuputuanga noatu e tei raro ake i te au turanga ngata.​—1 Tesalonia 1:6.

Te tumu anga katoatoa no ta tatou tutu aere anga e te apiianga ra ko te Tuatua akauruia a te Atua. E irinaki anga ki katoa to tatou i roto i te Pipiria. Kua akakite atura a Paulo kia Timoteo: “Te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra.” (2 Timoteo 3:16) Kua taiku putuputu meitakiia taua au tuatua ra tei akaariia mai e ko te Pipiria ra e Tuatua akauruia na te Atua. Inara eaa ra to Paulo akakoroanga i te tataanga ia ratou?

Te tuatua ra a Paulo ki tetai tangata pakari, ko tetai ma te apainga kia ‘ako, akakite apa, akakite i te tuatua-tika,’ i roto i te putuputuanga. No reira, te akamaara ra aia ia Timoteo kia irinaki i te pakari o te Tuatua akauruia, tei apiiia a Timoteo mei te tamariki anga maira. Te aronga pakari, mei ia Timoteo rai, ka tika i tetai au taime i te ako atu i te aronga te rave ra i te tarevake. Te raveanga i te reira, ka tau kia irinaki rai ratou i te Pipiria. Pera katoa, i te mea e kua akauruia e te Atua te au Tuatua Tapu, te ako anga katoatoa tei akatumuia ki runga ia ratou e ako angaia no ko mai i te Atua. Ko tetai ua atu te kopae ra i te au akoanga tei akatumuia ki runga i te Pipiria te kopae ra, kare i te au manako no tetai tangata ra, mari ra i te ako akauruia tei aere maira no ko mai ia Iehova uaorai.

Mei teaa te puapinga i te puka o Timoteo Rua i roto i te tu pakari akono Atua! E mei teaa te puapinga o te reira i te akamanako anga tatou i tana ako anga i roto i te aerenga tuatua! I roto i teia atikara, kua orongaia mai kia tatou te akara anga poto ua o te akakite anga umere, akauruia te vaira i roto i teia puka, inara kua rava ua i te akaari mai anga mei teaa ra te tauturu anga a te reira kia akamanako i te aerenga tuatua ta tatou i tatau i roto i te Pipiria. Ka tauturu te reira i te akapapu mai tikai ia tatou i “te tika oki i te tua i te tuatua-mou ra.”

[Tataanga Rikiriki i Raro]

[Tutu i te kapi 27]

Kua inangaro a Paulo i te akapapa ia Timoteo kia paruru i te au putuputuanga

[Tutu i te kapi 30]

Kua akamaara atura a Paulo ia Timoteo kia irinaki i te pakari o te Tuatua akauruia