Koai Ma te Au Orometua o te Atua i Teia Tuatau?

“No ko maira i te Atua ra to matou tika; ko tei akatau katoa ia matou ei [orometua] i te koreromotu ou nei.”​—2 KORINETIA 3:​5, 6, akaaite ia NW.

1, 2. Eaa te apainga ta te au Kerititiano katoa o te anere mataiti mua ra i rave, inara akapeea te taui anga o te au apinga ra?

I TE anere mataiti mua o to tatou Tuatau Noa, kua rave kapiti katoa te au Kerititiano katoatoa i tetai apinga​—te angaanga tutu aere i te evangeria. Pouroa ratou kua akatainuia e e au orometua no te koreromotu ou. Ko tetai papaki e au apainga kapitiia mai ta ratou, mei te apiianga i te putuputuanga ra. (1 Korinetia 12:​27-29; Ephesia 4:11) E au apainga teiaa ta te au metua i roto i te ngutuare tangata. (Kolosa 3:​18-21) Inara kua rave kapiti katoa ratou i te angaanga tumuanga e te puapinga oki no te tutuanga. I roto i te reo Ereni mua o te au Tuatua Tapu Kerititiano ra, teianei apainga ko tetai di·a·ko·niʹa​—e tavinianga, me kare angaanga orometua.​—Kolosa 4:17.

² I te topa anga te tuatau, kua tauiia te au apinga. Kua tupu mai tetai pupu tei kiteia, e ko te orometua akonoanga, tei akanoo i te tika anga o te tutuanga no ratou uaorai. (Angaanga 20:30) Te au orometua akonoanga e tokoiti ua ratou no te aronga te karanga ra ia ratou uaorai e au Kerititiano. Te maataanga ia ratou kua kiteia mai e ko te aronga irinaki. Noatu kua apiiia te aronga irinaki e e au apainga akanooia ta ratou, kapiti katoa i te orongaanga moni tauturu no te turu anga i te au orometua akonoanga, kua riro te maataanga o ratou ei aronga akarongorongo ua i te tumu tuatua tutuanga.

3, 4. (a) Akapeea te aronga tataki tai o Kerititome i riro ei ei au orometua? (e) Koai tei manakoia e e orometua i roto ia Kerititome, e eaa te au apinga i tuke ei i roto i te Au Kite o Iehova ra?

³ Kua karanga te au orometua akonoanga e e au orometua ratou (mei te tuatua minister, ko tetai urianga Ratino no te di·aʹko·nos, “tavini” me kare “orometua”).a No teianei, kua karatuati mai ratou mei te au apii teitei me kare i te au apii Pipiria e kua akataoongaia. Te tuatua ra The International Standard Bible Encyclopedia: “Te ‘akataoonga’ e te ‘akataoonga anga’ te taiku ua ra i te turanga takake tei orongaia ra ki te au orometua me kare au taunga na roto i te au peu akatapu anga, ma te akaketaketa anga ki runga i te mana kia akakite i te Tuatua me kare kia akono i te au oroa, me kare kia rave i aua apinga ra.” Naai e akataoonga i taua au orometua ra? Te tuatua ra The New Encyclopædia Britannica: “I roto i te au ekaretia tei mou ra i te tuatua enua no te epitekopo, ko te minita akataoonga ra ko tetai epitekopo ia. I te au ekaretia Porotetani ko te akataoonga anga na te pupu orometua akaaere.”

⁴ No reira, i roto i te au ekaretia o Kerititome, ko te tika kia riro ei orometua kua akariroia kia ketaketa roa te akatikaia. Inara, kare teianei i te tu i roto i te Au Kite o Iehova. Eaa ra i kore ei? No te mea kare te reira i te tu i te anere mataiti mua o te putuputuanga Kerititiano ra.

Koai Tikai te Au Orometua o te Atua?

5. Kia tau ki ta te Pipiria, te aronga te tavini ra ei au orometua te kapiti ra kiaai ma?

⁵ Kia tau ki ta te Pipiria, te aronga akamori katoatoa ia Iehova​—to te rangi e to te enua​—e au orometua. Kua tavini atu te au angera ia Iesu. (Mataio 4:11; 26:53; Luka 22:43) Te au angera oki kua “matuapuru i te aronga tuanga i te ora ra.” (Ebera 1:14; Mataio 18:10) E orometua katoa oki a Iesu. Kua tuatua aia: “Kare oki te Tamaiti a te tangata i aere mai kia taviniia tona, ei tavini ra.” (Mataio 20:28; Roma 15:8) No reira, i te mea ‘kia aru ta Iesu au pipi i tona takainga vaevae,’ kare i te mea poitirere e ka tika ratou kia riro ei au orometua.​—1 Petero 2:21.

6. Akapeea ta Iesu ra akakite anga e ko tana au pipi ka tau ei au orometua?

⁶ I mua poto ake i tona aere anga ki te rangi, kua tuatua atura Iesu ki tana au pipi: “Ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; Ma te apii atu ia ratou, kia akono i te au mea katoa taku i akaue atu kia kotou.” (Mataio 28:​19, 20) Kua tau te au pipi a Iesu kia akariro au tangata ei pipi​—ei au orometua. Te au tangata ta ratou i akariro ei au pipi ou ka apii kia akono i te au mea katoa ta Iesu i akaue atu ra, kapiti katoa i te akauenga kia aere e akariro tangata ei pipi. Te tane me kare vaine te aronga kua pakari me kare tamariki, ei pipi mou na Iesu Karaiti ka riro ei orometua.​—Ioela 2:​28, 29.

7, 8. (a)  Eaa te au tuatua tapu te akaari maira e e au orometua te au Kerititiano mou katoa ra? (e) Eaa te au uianga te akatuia maira no te akataoonga anga?

⁷ Kia rotai ma teianei, i te ra o Penetekote 33 T.N., pouroa te au pipi a Iesu i reira, te au tane e te au vaine, kua kapiti i te tuatua anga mai i “te peu taka ke a te Atua.” (Angaanga 2:​1-11) Pera katoa, kua tata te apotetoro ko Paulo: “Ko te ngakau oki to te tangata nei e akarongo, e kia rauka atu te tuatua-tika: ko te vaa oki tei aaki te tuatua e kia rauka atu te ora.” (Roma 10:10) Kua akakite atura Paulo i taua au tuatua ra, kare ki tetai pupu orometua anake, mari ra ki “te aronga katoa, i akaperepereia mai e te Atua, i Roma.” (Roma 1:​1, 7) Aiteite katoa oki “te aronga tapu i akarongo i te Mesia ia Iesu” kia “akatamakaia to [ratou] vaevae i te teateamamao o te evangelia o te au ra.” (Ephesia 1:1; 6:15) E ko te aronga katoa tei akarongo atu i te reta tei tataia ki te au Epera ra ‘kia piri tikai to ratou mou ranga i ta ratou tuatua ma te ngaueue kore.’​—Ebera 10:23.

⁸ Inara, aea tetai tangata e riro ei ei orometua? I etai atu tu, aea aia e akataoongaiai? E naai e akataoonga iaia ra?

Akataoonga Anga e ko Tetai Orometua​—Aea?

9. I naea a Iesu i akataoongaiai, e naai i rave?

⁹ E aea e naai oki tetai tangata e akataoongaia, e akamanako i te akatauanga a Iesu Karaiti. Kare ona pepa akataoonga anga me kare tetai turanga mei te apii teitei ra kia akapapu e koia tetai orometua, e kare oki aia i akataoongaia e tetai ua atu tangata. Akapeea e raukai ia tatou kia tuatua i reira, e e orometua aia? No te mea kua akatupuia ta Isaia ra au tuatua akauruia i roto iaia: “Tei rungao iaku te Vaerua o te Atu, koia i akatainu mai iaku ei tutu aere i te evangelia.” (Luka 4:​17-19; Isaia 61:1) Kare e ekokoanga e kua akaruke mai taua au tuatua ra e kua akataoongaia a Iesu kia tutu aere i te evangeria. Naai mai? I te mea na te vaerua o Iehova i akatainu iaia no taua angaanga ra, kua taka meitaki e na te Atua ko Iehova i akataoonga ia Iesu ra. I naea teia i tupu ei? Kua to maira te vaerua o Iehova ki rungao ia Iesu i tona papetito angaia. (Luka 3:​21, 22) No reira, no tona papetito anga i akataoongaiai aia ra.

10. Naai e akariro i tetai orometua Kerititiano kia “akatau katoa” ra?

¹⁰ Akapeea ta Iesu au pipi i te anere mataiti mua ra? To ratou turanga ei au orometua no ko mai ia Iehova ra. Kua tuatua a Paulo: “No ko maira i te Atua ra to matou tika; ko te akatau katoa ia matou ei [orometua] i te koreromotu ou nei.” (2 Korinetia 3:​5, 6, akaaite ia NW.) Akapeea ta Iehova ra akatau anga i te aronga akamori iaia ei au orometua? E akamanako i te akatauanga o Timoteo, ta Paulo i karanga ra ‘e tavini no te Atua i te evangelia o te Mesia.’​—1 Tesalonia 3:2.

11, 12. Akapeea to Timoteo ra tereanga ki mua kia riro ei orometua?

¹¹ Na te au tuatua aru mai nei tei tataia kia Timoteo ka tauturu ia tatou kia kite i akapeea aia i riro ei ei orometua: “Kia mou marie ra koe i taau i apii ra, i tei tukuia atu ia koe ra, kua kite oki koe i toou kite i kite ei koe ra; E mei te tamariki anga mairai toou kite i te tuatua tapu i tataia ra, ko te tuatua ïa i pakari ei koe e tae ua atu ki te ora i te akarongo i te Mesia ra ia Iesu.” (2 Timoteo 3:​14, 15) Te pange o to Timoteo ra akarongo, tei akakeu ra iaia kia rave i te tuatua anga, ko te kite ia i te au Tuatua Tapu ra. Ko tana tatau anga anake ainei tei umuumuia no teia? Kare. Kua umuumu a Timoteo i te tauturu kia rauka te kite tika e te vaerua akamaaraanga no tana i tatau ra. (Kolosa 1:9) No reira kua ‘kiteia’ a Timoteo. I te mea kua kite aia i te au Tuatua Tapu ‘mei te tamariki anga mairai,’ ko tona nga puapii mua ko te tika ko tona metua vaine e tona tupuna vaine oki, i te akaraanga kare tona metua tane i tetai tangata akarongo.​—2 Timoteo 1:5.

¹² Inara, e maata atu tei o mai ki to Timoteo ra riro anga ei orometua. Ko tetai apinga, kua akamaroiroiia tona akarongo na te taokotai anga ma te au Kerititiano i te au putuputuanga i te pae maira. Akapeea tatou i kite ei? No te mea i to Paulo aravei anga mua ia Timoteo ra, ko taua tangata ou ra “e tangata rongo meitaki oki aia i te au taeake i Lusetera e Ikonio.” (Angaanga 16:2) Kapiti katoa oki i taua tuatau ra kua tata atu etai au taeake i te au reta ki te au putuputuanga kia akamaroiroi atu ia ratou. E kua tutaka katoa oki te au akaaere ra kia patu ake ia ratou ra. Na taua au ravenga ra i tauturu i te au Kerititiano mei ia Timoteo ra kia tere ki mua i te pae vaerua.​—Angaanga 15:​22-32; 1 Petero 1:1.

13. I naea a Timoteo i akataoongaiai ei orometua, e eaa koe ka tuatuai e kare tona tereanga ki mua i te pae vaerua i akaopeia ki reira?

¹³ No ta Iesu akauenga tei tataia ra ia Mataio 28:​19, 20, ka papu ia tatou ea tetai atianga ka akakeu to Timoteo akarongo iaia kia aru ia Iesu e ka papetitoia. (Mataio 3:​15-17; Ebera 10:​5-9) E akatutu anga teia no to Timoteo akatapu anga ki te Atua ra ma tona ngakau katoa. I tona papetito anga kua riro a Timoteo ei orometua. Mei reira mairai kua riro tona oraanga, tona maroiroi, e tana au apinga ravarai na te Atua ra. Ko teianei tetai tuanga katoa o tana akamorianga e, “tetai tavinianga tapu.” Inara, kare a Timoteo i akaangaroi ua ki runga i tana i akaoti ra. Kua tupu ua atu aia i te pae vaerua, i te riroanga ei orometua Kerititiano pakari. Kua tupu teia no to Timoteo ra piri vaitata anga ma te au Kerititiano pakari mei ia Paulo rai, i tana uaorai apiianga, e tana angaanga tutuanga toto mapu oki.​—1 Timoteo 4:14; 2 Timoteo 2:2; Ebera 6:1.

14. I teia tuatau, akapeea tetai tei “akonoia no te ora mutu kore” i te tereanga ki mua kia riro ei orometua?

¹⁴ I teia tuatau, te aiteite ra te akataoonga anga no te angaanga orometua Kerititiano. Ko tetai tei “akonoia no te ora mutu kore ra” kua tauturuia kia kite i te Atua e tana au akakoroanga na tetai apiianga Pipiria. (Angaanga 13:48) Ka apii tetai kia akono i te au kaveinga Pipiria i tona oraanga e kia pure tau oki ki te Atua. (Salamo 1:​1-3; Maseli 2:​1-9; 1 Tesalonia 5:​17, 18) Ka taokotai atu aia ma etai atu aronga akarongo ra e ka akono oki i te au mea orongaia mai e te au akanoonoo anga tei raveia mai e “te tavini akono meitaki e te pakari.” (Mataio 24:​45-47; Maseli 13:20; Ebera 10:​23-25) No reira kua tere aia ki mua na roto i tetai apiianga akapapaia ra.

15. Eaa tei tupu me papetitoia tetai tangata? (Akara katoa i te tata anga i raro ake.)

¹⁵ I te openga, ko tei apii i te Pipiria ra, kua akatupu i tetai inangaro i te Atua ko Iehova ra e tetai akarongo maroiroi i te atinga oko ra, kua inangaro kia akatapu takiri iaia uaorai ki tona Metua i te rangi ra. (Ioane 14:1) Ka akono aia i taua akatapuanga ra na tana uaorai pureanga e ka papetitoia i reira ei akatutuanga akaraia e te au tangata no taua angaanga ngaro ra. Tona papetito anga ko tona akataoonga anga ia no te mea i reira aia ka kiteaia ei tavini akatapu katoaia, tetai di·aʹko·nos, no te Atua. Ka tika aia kia vai takake mei teianei ao. (Ioane 17:16; Iakobo 4:4) Kua oronga aia iaia katoa rai “ei atinga ora, e te tapu, e tau oki i te Atua” kare e arairai anga me kare e turanga ke. (Roma 12:1)b E orometua aia no te Atua, na te aruanga ia Karaiti.

Eaa te Angaanga Orometua Kerititiano?

16. Eaa etai apainga a Timoteo ra ei orometua?

¹⁶ Eaa tei kapitiia ra ma te angaanga orometua a Timoteo? E au angaanga taka ke tana ei oa tutaka aere no Paulo. I tona riroanga mai e ko tetai o te aronga pakari, kua rave maroiroi aia i te apiianga e te akamatutu anga i te au oa Kerititiano ra. Inara ko te tuanga o roto tikai i tana angaanga orometua, mei te tu ia Iesu raua ko Paulo ra, ko te tutuanga ia i te evangeria e te akariro anga tangata ei pipi. (Mataio 4:23; 1 Korinetia 3:5) Kua tuatua Paulo kia Timoteo: “E akamaroiroi ra koe i te au mea katoa ra, e akakoromaki rai i te kino, e rave i te angaanga a te apii evangelia, e rave akaope tikai i to taoonga na.”​—2 Timoteo 4:5.

17, 18. (a) I roto i teea angaanga orometua ta te au Kerititiano ra ka rave? (e) Eaa te puapinga maata o te angaanga tutuanga ki te orometua Kerititiano?

¹⁷ Mei te reira katoa te angaanga orometua Kerititiano i teia tuatau. Te rave ra ratou i te angaanga orometua i te ngai tangata, ko tetai angaanga evangeria, i te touanga ia etai ke ki te ora i runga i te tumu anga o to Iesu atinga e te apiianga i te aronga maru kia kapiki i te ingoa o Iehova. (Angaanga 2:21; 4:​10-12; Roma 10:13) Ka akapapu atu ratou mei te Pipiria e ko te Patireia anake te manakonakoanga no te au tangata te mamae nei e kia akaari atu e noatu rai i teianei ka meitaki mai te au apinga me ka akono tatou i te au kaveinga tau i te Atua ra. (Salamo 15:​1-5; Mareko 13:10) Inara kare tetai orometua Kerititiano e tutu aere i tetai evangeria akapiri anga i te au kaveinga Kerititiano ki te au manamanata akaaerenga tangata nei. Kareka ra, te apii ra aia e ko ‘te akono i te Atua e meitaki tei akakiteia mai to te reira i teianei ao, e te ao a muri atu.’​—1 Timoteo 4:8.

¹⁸ E tika, te maata anga o te au orometua e au aerenga kapitiia atu ta ratou kia tavini, penei e tuke ta tetai Kerititiano ki ta tetai ra. E manganui e au apainga ngutuare tangata ta ratou. (Ephesia 5:​21–​6:4) Te aronga pakari e te au tavini orometua e au angaanga ta ratou i roto i te putuputuanga. (1 Timoteo 3:​1, 12, 13; Tito 1:5; Ebera 13:7) E manganui te au Kerititiano te tauturu ra i te patuanga i te au Are Uipaanga Patireia. Ko tetai papaki te rave ra i te angaanga meitaki ei aronga rave angaanga i roto i tetai o te au ngutuare Betela o te Taiate Punanga Tiaki ra. Inara, te au orometua Kerititiano katoatoa ka rave i te tutu aereanga i te evangeria. Kare tetai e kapeia. Na te raveanga i teianei angaanga te akataka maira i tetai ki te au tangata ei orometua Kerititiano tikai.

Te Tu o Tetai Orometua Kerititiano

19, 20. Eaa te tu akono tika na te au orometua Kerititiano kia tatanu?

¹⁹ Te maataanga o te au orometua o Kerititome te manakonako ra kia orongaia atu e akangateitei anga taka ke, e ka rave ratou i te au taoonga mei te “reverend” ra e te “father.” Inara, te kite ra tetai orometua Kerititiano e ko Iehova anake ua te tau ra kia akatapuia. (1 Timoteo 2:​9, 10) Kare tetai orometua Kerititiano e tapa iaia ma taua turanga teitei ra me kare e kimi i te au taoonga taka ke. (Mataio 23:​8-12) Kua kite aia e ko te aiteanga tumu anga o te di·a·ko·niʹa e “angaanga tavini.” Ko te verepa kapitiia atu ma te reira i etai taime te taikuia ra i te Pipiria no te au tavini anga a te tangata, mei te akonokono anga i te au kaingakai rai. (Luka 4:39; 17:8; Ioane 2:5) Noatu rai ko tona taiku angaia ei orometua Kerititiano ra e teitei roa atu, te vaira te di·aʹko·nos e tavini ia.

²⁰ No reira kare e orometua Kerititiano e tau kia manako ngakau e puapinga maata ratou uaorai. Te au orometua Kerititiano tikai​—noatu ko te aronga e au apainga taka ke ta ratou i te putuputuanga​—e au tavini akaaka. Kua tuatua Iesu: “Ko te anoano i te akamaata i o kotou, kia riro ia ei tavini no kotou; e ko te inangaro kia maata aia i o kotou na, ei tavini akaaka aia no kotou.” (Mataio 20:​26, 27) I te akaarianga ki tana au pipi i te tu akono tika kia tatanu, kua orei atura Iesu i to ratou vaevae, i te raveanga i te angaanga a te tavini akaaka roa ra. (Ioane 13:​1-15) Mei teaa ra tetai tavini anga taakaaka! No reira, te au orometua Kerititiano ka tavini taakaaka ua i te Atua ko Iehova e ia Iesu Karaiti oki. (2 Korinetia 6:4; 11:23) Ka akaari ratou i te manako akaaka i te tavinianga tetai i tetai. E me tutu aere ratou i te evangeria, ka tavini noinoi kore ua ratou i to ratou au tangata tupu akarongo kore ra.​—Roma 1:​14, 15; Ephesia 3:​1-7.

E Akakoromaki i te Angaanga Orometua

21. Eaa to Paulo tutaki no te akakoromaki anga i te angaanga ei orometua?

²¹ No Paulo ra, te riroanga ei orometua kua riro ei akakoromaki anga. Kua tuatua aia ki to Kolosa e kua maata tona mamae anga kia raukai te tutu aereanga i te evangeria kia ratou ra. (Kolosa 1:​24, 25) Inara, no te mea kua akakoromaki aia, e manganui tei ariki i te evangeria e kua riro mai ei au orometua. Kua anauia mai ratou ei au tamariki na te Atua e ei au taeake no Iesu Karaiti, ma te manakonako kia riro ei au mea ora vaerua i te pae iaia i te rangi. Mei teaa ra tetai tutaki kaka no te akakoromaki anga!

22, 23. (a) Eaa i umuumuiai te au orometua Kerititiano kia akakoromaki i teia tuatau? (e) Eaa te uua anga meitaki no te akakoromaki anga Kerititiano mai?

²² Te umuumuia ra te akakoromaki anga i teia tuatau no te aronga e au orometua tikai na te Atua. E manganui te rave maata ra i te au ra taki tai ma te maki me kare no te ruaine. Te angaanga ngata ra te au metua​—e manganui ia ratou kare e tokorua​—kia utuutu i ta ratou tamariki. E meitaki ra, te arai ra te tamariki i te au mana tarevake te takapini ra ia ratou i te apii. E manganui te au Kerititiano te aro atura i te au akono anga ketaketa i te pae puapinga. E manganui te mamae ra i te takinga kino me kare te aro atura i te au tu ngata no teia tuatau ‘kino maata nei’! (2 Timoteo 3:1) Ae, te au orometua o Iehova te vaitata ra i te ono mirioni i teia tuatau nei ka rauka kia tuatua ma te apotetoro ko Paulo: “Te akakite ua nei ra matou ia matou uaorai e e rave angaanga na te Atua i te au mea katoa nei, i te akakoromaki maata.” (2 Korinetia 6:4) Kare te au orometua Kerititiano e unui ki muri. Ka tika oki ratou kia akapaapaaia no ta ratou akakoromaki anga.

²³ Pera katoa oki, mei tei tupu i to Paulo tu ra, te apai maira te akakoromaki anga i te uua anga meitaki. Na te akakoromakianga, ka akaora tatou i te pirianga vaitata ma Iehova e ka akariro i tona ngakau kia rekareka. (Maseli 27:11) Ka akamaroiroi tatou i to tatou uaorai akarongo e e ka akariro au tangata ei pipi, kia kapiti atu ki te taeake anga Kerititiano. (1 Timoteo 4:16) Kua akamaroiroi a Iehova i tona au orometua e kua akameitaki i ta ratou angaanga orometua i teia tuatau openga nei. Ei tupu anga, kua oti te akaputu anga i te tuanga openga o te 144,000 ra, e au mirioni ua atu te irinaki ra i te manakonako anga no te rekarekaanga i te ora mutu kore ki runga i te enua parataito. (Luka 23:43; Apokalupo 14:1) E tika tikai, ko te angaanga orometua Kerititiano e akakite anga i to Iehova aroa. (2 Korinetia 4:1) Kia akaapinganui tatou i te reira e kia akameitaki e ka vai ua tona au e tuatau ua atu.​—1 Ioane 2:17.

[Au Tataanga Rikiriki i Raro]

Ka Rauka Ainei ia Koe te Akataka?

• Eaa te apainga ta te au Kerititiano o te anere mataiti mua i rave?

• Aea e naai oki tetai orometua Kerititiano e akataoonga?

• Eaa te tu akono tau na te orometua Kerititiano kia tatanu?

• Eaa ra i tau ei tetai orometua Kerititiano kia akakoromaki i te aro atu i te au tu ngata ra?

[Au Tutu i te kapi 16, 17]

Kua apiiia a Timoteo i te Tuatua a te Atua mei te tamaiti rikiriki anga. Kua riro aia ei orometua akataoongaia i tona papetito angaia

[Tutu i te kapi 18]

Te akatutu ra te papetito anga i te akatapu anga ki te Atua e te akairo ra i to tetai akataoonga anga ei orometua

[Tutu i te kapi 20]

Te puareinga ra te au orometua Kerititiano i te tavini