“Mei to Tamariki Anga Mairai Toou Kite”

KIA tau ki te au apii taineti i ou ake nei, te tuatuaanga ki te au pepe te akakeu oonu tikai ra i te tupu anga o to ratou au roro, te akatumuanga i to ratou rauka anga i te akamanako, te akamarama, e te akatikatika i te au manamanata. Ko teia tikai te turanga i te mataiti mua o te oraanga o tetai pepe. Te ripoti ra te International Herald Tribune e te irinaki ra etai aronga kimikimi i teianei e ko “te au tuatua te akarongo ra tetai pepe i te ra tataki tai e akakite anga puapinga maata ia i te tuatau i muri mai i te tu kite, manuia anga i te apii e te kite i te akaoa tangata.”

Inara, kia tuatuaia te au tuatua e tetai tangata. I te akara anga, kare e na te tivi me kare na te ratio e tupau i teia.

Kua karanga tetai vaine taineti apii i te au uaua i te Apii Teitei o Washington i Seattle, U.S.A.: “Kua kite matou i teianei e kua maaniia te au piri anga uaua manako i te akamata anga o te oraanga e te tiaki tikai ra te roro o te pepe i te au kite anga no te akataka e e akapeea te piri anga i te rave angaia. Kare matou i kite ana e tae ua mai ki teianei i te akamata vave anga o teia raveanga. Ei akaraanga, kua apii te au pepe i te au tangi anga o to ratou reo enua i te tae anga ki te ono marama.”

Kua maro te kimikimi anga i te manako totoa atea e ka tupu meitaki te au pepe i te pae kite me oronga maataia te aroa kia ratou. Te akataka katoa maira te reira i te tuanga a te au metua i roto i te tupu anga o tetai tamaiti.

Te akamaara maira teia i te au tuatua o te reta akauruia na te apotetoro ko Paulo kia Timoteo: “Mei to tamariki anga mairai toou kite i te tuatua tapu i tataia ra, ko te tuatua ïa i pakari ei koe e tae ua atu ki te ora.” Papu kua rave te au tataanga tapu, tei tuatuaia ki te pepe ko Timoteo e tona metua vaine e te mama ruau irinaki ra, i tetai tuanga maata i roto i tona tupu anga ei tavini puapinga no te Atua.​—2 Timoteo 1:5; 3:15.