E Irinaki ki te Maroiroi no te Atua Mai
Te au Akataka Anga a Timoteo Rua
TE ORONGA ra a Iehova i te ririnui ki tona au tavini no te akakoromaki i te au timata anga e te au takinga kinoanga. Akapeea a Timoteo e tetai pae au Kerititiano te anoano anga i te maroiroi no te Atua mai! Kua tupu tetai ai ki Roma i te 64 T.N., e kua aere te tuatua e na te Rangatira ko Nero i akamata. No te paruru iaia uaorai, kua akaapa aia i te au Kerititiano, e na teia i akamata i tetai ngaru takinga kinoanga. Te akara anga i te reira taime (mei te 65 T.N.), kua tapeka akaouia te apotetoro ko Paulo ki Roma. Noatu e te aro atura aia i te mate, kua tata aia i te rua o tana reta kia Timoteo.
Ta Paulo reta kia Timoteo kua akateateamamao te reira iaia no te patoi i te aronga tei akaruke i te akarongo e te tu ketaketa atu ki te takinga kinoanga. Kua akamaroiroi te reira iaia kia akono ua atu rai e kia tere ki mua i te pae vaerua e kua akakite i to Paulo au turanga i roto i te are auri. Te tauturu katoa ra te reta i te aronga tatau kia irinaki ki te maroiroi no te Atua mai.
Mamae i te Kino e te Apii ma te Maru
Te oronga maira te Atua i te maroiroi kia tatou no te akakoromaki i te takinga kinoanga ei aronga akakitekite i te tuatua meitaki. (2 Timoteo 1:1-18) Kare rava a Paulo i akangaropoina ana ia Timoteo i roto i tana pure, e kua maara iaia i tona akarongo pikikaa kore. Kua oronga te Atua ‘kare i te vaerua mataku mari ra e ririnui, te aroa, e te mako o te manako.’ No reira e tuku ua iaia kia kore e akama i te akakitekite aere e te mamae i te kino no te tuatua meitaki. Kua raurau katoaia aia kia “tāpu meitaki i te akonoanga tuatua tikai” tana i akarongo mei ia Paulo, e e tau kia aru pakari tatou i te tuatua mou Kerititiano tikai, noatu e te uri ke ra tetai pae mei te reira.
Te au mea ta Paulo i apii kua orongaia te reira ki te au tangata tei akono meitaki te ka apii i tetai pae. (2:1-26) Kua raurauia a Timoteo kia riro mai ei vaeau memeitaki o te Mesia, kia akono meitaki iaia e mamae ra i te kino. Kua mamae katoa a Paulo uaorai i te au tapeka anga no te tutu aereanga i te tuatua meitaki. Kua akamaroiroi aia ia Timoteo kia rave i tona maroiroi no te oronga iaia uaorai ei tangata angaanga akatikaia no te Atua, te kopae anga i te au tuatua puapinga kore te ka akakino i tei tapu ra. E kua akakiteia kiaia e kia apii tetai tavini o te Atu i tetai ke ma te tu maru.
Tutu Aere i te Tuatua!
Ka anoanoia te maroiroi no te Atua mai no te aro atu i te au ra openga e te turuturu i te tuatua mou o te Tuatua Tapu. (3:1-17) Mei rotopu i te aronga atua kore ka tupu ki te au tangata ‘te apii ua ra inara kare e rauka kia kite i te kite tikai o te mou tuatua.’ Ko teia ‘au tangata kino e te pikikaa ra ka kino ua atu, te arataki ke atu anga e te arataki keia.’ Inara, kia ‘tamou ua atu a Timoteo i te au mea i apiiia.’ E tau rai ia tatou, te kite anga e ‘te au tuatua tapu katoa i tataia ra e mea akauruia mai e te Atua, e mea meitaki ei apiianga, ei akoanga, ei akakiteanga apa, e ei akakite mai i te tuatua-tika, kia apa kore te tangata o te Atua, ma te tau tikai i te au angaanga memeitaki katoa ra.’
Kua tau kia patoi a Timoteo i te aronga tei akaruke i te akarongo e te akatupu i tana angaanga orometua. (4:1-22) Ka rauka iaia i te rave i te reira na te ‘tutu aereanga i te tuatua’ e te nooanga atu ki te reira. E puapinga tikai teia, i te mea e kua aro atu te putuputuanga i tetai “atianga tau kore” no te mea te apii ra etai pae i te apiianga pikikaa. Te mou piri katoa ra te au Kite o Iehova i teianei ki te Tuatua na te Atua, te tutu viviki anga i te reira i roto i te putuputuanga e ki te au tangata i vao, i te au turanga tau kore katoa. Kua “mou marie [a Paulo] i te akarongo” noatu e kua akangaropoinaia aia e etai pae. Kia irinaki katoa tatou ki runga i te maroiroi no te Atua mai e te rave ua atu rai i te tutu aere i te tuatua meitaki.
[Pia/Tutu i te kapi 31]
Vaeau Memeitaki: Kua raurau a Paulo ia Timoteo: “E akakoromaki marie koe i te kino, mei te toa meitaki ki o Iesu Mesia ra. Kare rava te tangata e aere ki te tamaki ra e taii iaia uaorai i te peu rikiriki no teianei ao, kia akarekareka i tei iki iaia ei toa ra.” (2 Timoteo 2:3, 4) Ei vaeau Roma kua ‘mamae aia i te kino’ iaia e apai ra i te au apinga tamaki teimaa, te toki, te kete, te kai no e toru ra, e tetai au apinga. (Ta Josephus Puka 3, pene 5 o te Wars of the Jews) Kare aia i aruaru ana i te au inangaro kimi puapinga, kare te reira e marekaia e tona mana akaaere, e kua tutakiia tana au apinga. Aiteite rai, ka mamae tetai Kerititiano i te au timata anga tei piri atu ki te riro anga mai ei “toa memeitaki o te Mesia ra.” Noatu e ka angaanga aia no te rave i tana au apainga Tuatua Tapu, auraka rava aia e tuku i te au apinganui kia tapu iaia mei te tamakianga i te tamaki i te pae vaerua. (1 Tesalonia 2:9) Tutu aere anga mei tera are i tera are, te taangaanga ra aia i “te koke a te Vaerua ra, koia te tuatua a te Atua” e te tauturu ra i te akamatara mai i te au tangata mei te au tarevake o te akonoanga. (Ephesia 6:11-17; Ioane 8:31, 32) I te mea e e puapinga te oraanga, kia tamou ua rai te au vaeau Kerititiano ravarai i te akamareka ia Iesu Mesia e te Atua ko Iehova na teia tu.