Akapou i te Taime ki te Aronga Tei Inangaro ia Iehova

Eaa tatou ka akapou ei i to tatou taime ki te aronga tei inangaro ia Iehova? No te mea ka akakeu te aronga ta tatou ka kapiti atu ia tatou kia rave i te meitaki me kore te kino. (Mase. 13:20) Ei akaraanga, kua rave te Ariki ko Ioasa “te mea tika i mua i te aroaro o Iehova” me kapiti ua rai aia ki te Taunga Maata ko Iehoiada. (2 Para. 24:2) Te mate anga a Iehoiada, kua akaruke a Ioasa ia Iehova e kua kapiti atu ki te aronga rave kino.—2 Para. 24:17-19.

I te anere mataiti mua T.N., akaaite te apotetoro ko Paulo i te putuputuanga Kerititiano ki tetai “are maata” e te au mema o te putuputuanga ki te “au āriki,” me kore te apinga i roto i te ngutuare. Ka vai ua rai tatou “ei āriki no te meitaki” me kare tatou e kapiti ki tetai ua atu tangata, penei to tatou ngutuare tangata me kore tetai i roto i te putuputuanga, te rave ra i te au mea ka akamareka kore ia Iehova. (2 Timo. 2:20, 21) No reira, e tauta ua rai i te kapiti atu ki te aronga e inangaro ra ia Iehova e ka akamaroiroi ia tatou kia tavini iaia.

AKARA I TE VITIO AKAPEEA ME PATOI I TE AU KAPITIANGA KINO, E OTI E PAU I TEIA AU UIANGA:

• Eaa tetai au turanga te ō maira te kapitianga kino ki roto i to tatou oraanga?

• I roto i teia vitio, eaa tei tauturu i teia au Kerititiano e toru kia akaruke i te kapitianga kino?

• Eaa te au kaveinga Pipiria te ka tauturu ia koe kia iki meitaki i toou au oa?