Te tu te Ka Akamanea i te Apiianga a te Atua

I nanai ua ake nei, kua tata te pupu manitia o tetai kamupani i Caracas i Venetuera, i tetai reta ki te aronga pakari e te au orometua tavini o tetai putuputuanga o te au Kite o Iehova i te pae mai. I roto kua tata ratou: “Kua tae mai kia matou tetai au tuatua meitaki no te tangata i roto i ta kotou akonoanga no runga i te tu o ta ratou apainga e te tiratiratu. No teia tumu i akavaitata atu ei matou i teianei. No te mea kare e rava ana to matou au aronga angaanga, te anoano viviki nei matou e rua peretana no te akaki i te au ngai ka aru mai: e tai no te akaoro e ko te tai ei akaaere i te are vairanga apinga. Ka ariki maata tikai matou i tetai ua atu akakite anga ta kotou ka oronga mai no tetai ua atu i roto i ta kotou putuputuanga me kore i tetai i te pae mai. Kare tikai matou e inangaro i tetai aronga angaanga kare i te au Kite. E akakite mai kia matou me kare tetai tangata e rauka mai ine, mei te mea ra e ka tiaki matou i ta kotou pau anga mai i mua ake ka tukuiaʼi tetai tukuanga.”

I muri ake i te kite anga i te reta i raro i te ngutupa o te Are Uipaanga Patireia, kua atoro atu tetai o te aronga pakari i te ona o te kamupani. Kua rave ana te ona i tetai au mea ki te au Kite o Iehova no tetai 15 mataiti e kua maara iaia e kare tetai au manamanata pakari i tupu mai ana ki tana aronga angaanga e au Kite. Kua tuatua aia ia ratou e aronga angaanga tika tikai, tu rave i te apainga, tiratiratu, e te aronga aruaru. I reira kua kapiti atu aia: “Kua kite au e kare kotou e tuku ua i te aronga rave kino, e te akatakake ra kotou ia ratou. Te akaari maira rai te reira e kare ta kotou putuputuanga e inangaro kia riro mai ei tauturu no te apa ma te reira aronga ra.”

Te akamanea ra teia tu i te apiianga a te Atua. (Tito 2:10) E no te anoano tika tikai no te aru vaitata i te au kaveinga tau tei tataia i roto i te Puka Tapu.