“Kia Akamaata Tikai i te Akono i te au Tuatua”

“E tau ia tatou kia akamaata tikai i te akono i te au tuatua ta tatou i akarongo akenei, ko te topa ua aea ia tatou a muri ake.”​—EBERA 2:1.

1. E akatutu mai e akapeea te akaanga keanga i te taki anga ki te tumatetenga.

TE MATE ra etai 37,000 tangata i te au tumatetenga motoka i te au mataiti takitai i Marike anake ua. Kua tuatua te aronga kite e e manganui o teia au tumatetenga ka rauka ua kia kopaeia naringa te aronga akaoro i akono meitaki tikai ki runga i te mataara. Tetai papaki o te aronga akaoro motoka te akara ke ra i te au akakiteanga e te au tataanga me kare te taangaanga ra i ta ratou cell phone. Te vai katoa ra te aronga te kaikai ra ia ratou e akaoro ra. I roto i teia au turanga katoatoa, ka rauka i te akaanga keanga kia taki atu ki te tumatetenga.

2, 3. Eaa te akamaroiroi anga ta Paulo i oronga ki te au Kerititiano Epera, e eaa i tau ei tana akoanga?

² E vaitata i te 2,000 mataiti i mua ake i te maani angaia te au motoka, kua akataka maira te apotetoro ko Paulo i tetai akaanga keanga tei riro ei mate ki tetai papaki o te au Kerititiano Epera ra. Kua akaketaketa mai a Paulo e kua orongaia kia Iesu Karaiti tei akatuia tetai turanga teitei i to te au angera katoa ra, no te mea kua akanooia aia ki te rima katau o te Atua. I reira kua tuatua atu te apotetoro ra: “E teianei, e tau ia tatou kia akamaata tikai i te akono i te au tuatua ta tatou i akarongo akenei, ko te topa ua aea ia tatou a muri ake.”​—Ebera 2:1.

³ Eaa ra te au Kerititiano Epera i umuumuiai “kia akamaata tikai i te akono i te au tuatua i akarongo akenei” no runga ia Iesu? No te mea e vaitata i te 30 mataiti kua topa mei to Iesu ra akaruke anga i te enua nei. I te koreanga o ratou Pu, kua akamata tetai papaki o te au Kerititiano Epera ra i te topa ua mei te akarongo mou ra. Kua akaanga keia ratou e te Akonoanga ngati Iuda, ta ratou tu akamori anga mua.

Kua Umuumuia Ratou kia Akono Vaitata Atu

4. Eaa tetai papaki o te au Kerititiano Epera i timataiai kia oki akaou ki te akonoanga ngati Iuda ra?

⁴ Eaa ra tetai Kerititiano ka timataiai kia oki akaou ki te Akonoanga ngati Iuda? I na, te akatereanga no te akamori anga i raro ake i te Ture te o atura te au mea akara mataia. Ka kite atu te au tangata i te kau taunga e ka ongi i te kakara o te au atinga tutungiia ra. Inara, i etai au turanga, e tuke maata te Akonoanga Kerititiano. E Taunga Maata to te au Kerititiano, ko Iesu Karaiti, inara kare aia i kiteia ana i runga i te enua no tetai toru ngauru mataiti. (Ebera 4:14) E iero to ratou, mari ra ko tona ngai tapu tei te rangi uaorai. (Ebera 9:24) Kare mei te peritome anga kopapa i raro ake i te Ture ra, ko te peritome anga Kerititiano koia oki ko to te “ngakau ra, . . . ko to te vaerua ra.” (Roma 2:29) No reira, ki te au Kerititiano Epera ra, penei kua akamata te Akonoanga Kerititiano i te akaraanga puapinga koreia te tu.

5. Akapeea ta Paulo akaari anga e ko te akatereanga o te akamori anga tei akamataia e Iesu ei teitei atu i to raro ake i te Ture ra?

⁵ Kua umuumuia te au Kerititiano Epera ra kia kite i tetai apinga puapinga maata atu no te akatereanga i te akamori anga tei orongaia maira e Karaiti. Kua akatumu maataia ki runga i te akarongo kare i te akara mata, inara e teitei atu ia i te Ture tei orongaia maira na roto i te peroveta ia Mose ra. “I tapu atura te tangata e mā atura te kopapa i te toto puakatoro e te toto puaka-nio, e te reu puakatoro ua i pîpîia ki runga i te aronga i viivii ra,” kua tata a Paulo, ‘ka tangaʼi oki i te toto o te Mesia ra, ko tei tuku iaia uaorai ma te kino kore i te Atua, i te tauturu o te vaerua mate kore ra, e maata atu ïa te mā o to kotou akava-ngakau i te angaanga mate, kia akamori i te Atua ora ra?’ (Ebera 9:13, 14) Ae, ko te akakoreanga ara tei rauka mai na roto i te akarongo i te atinga oko o Iesu Karaiti ra e teitei maata atu i te au tu e manganui ki tei orongaia mai na te au atinga orongaia i raro ake i te Ture.​—Ebera 7:26-28.

6, 7. (a) Eaa te turanga tei akariro ra kia akarapurapu i te au Kerititiano Epera ra “kia akamaata tikai i te akono i te au tuatua ta ratou i akarongo akenei”? (e) I ta Paulo tata anga i tana reta ki te au Epera ra, eaa te maata o te tuatau te toe ra no Ierusalema? (Akara i te tataanga i raro ake.)

⁶ Te vaira tetai atu tumu i tau ei te au Kerititiano Epera ra kia akono pakari i te au mea i akarongoia no Iesu ra. Kua totou aia e ka akapouia a Ierusalema. Kua tuatua a Iesu: “Te vaitata maira oki te tuatau, e akapiniiaʼi koe e to au enemi i te koro, e takako ratou ia koe e pini ua ake, ka tāpu ei ia koe i roto: E ka uri oki ia koe ki raro ki te one, e to tamariki i roto ia koe na; e kare oki tetai toka i roto ia koe na, e vaioia i rungao i tetai: ko koe kare i akamaara i toou na kite angaia mai.”​—Luka 19:43, 44.

⁷ Aea teia e tupu ei? Kare a Iesu i akakite ana i te ra e te ora. Kareka ra, kua oronga mai aia i teia apiianga: “Kia akara ra kotou ia Ierusalema i te takako angaia e te au nuku, kua vaitata rava tona pou i reira, kia kite mai kotou. Te aronga e noo i Iudea ra, ka oro ratou ki te maunga i reira; e to roto i te oire ra, ka aere ïa ki vao; e auraka to te au ngai katoa ra e tomo akaou ki roto i te oire.” (Luka 21:20, 21) I te tuatau o taua 30 mataiti i muri ake i ta Iesu ra tuatua anga i taua au tuatua ra, kua ngaro ke i etai o aua Kerititiano i Ierusalema ra to ratou tu rapurapu e kua akaanga keia. Kua akara ke to ratou au mata mei te mataara ra, i te akara anga. Naringa kare ratou i akatikatika i to ratou manakoanga, ka tupu taua tumatetenga ra. Noatu me ka manako ratou e ka tupu te reira e me kare, te papu ra te akapouanga o Ierusalema!a E mea manakonakoia ra, e kua oronga ta Paulo akoanga i tetai akaaraara anga ki te au Kerititiano tei varea moe i te pae vaerua i roto ia Ierusalema.

Akonoanga “Kia Akamaata Tikai i te Akono” i Teia Tuatau

8. Eaa tatou i tau ei “kia akamaata tikai i te akono” i te au tuatua mou o te Tuatua a te Atua ra?

⁸ Mei te au Kerititiano o te anere mataiti mua ra, ka umuumuia tatou “kia akamaata tikai i te akono” i te au tuatua mou o te Tuatua a te Atua ra. No teaa ra? No te mea te aro katoa atu nei tatou ki tetai akapou anga te vai maira, kare i to tetai pa enua okotai ua, mari ra to te akatereanga o te au mea katoa nei. (Apokalupo 11:18; 16:14, 16) E tika ra, kare tatou e kite i te ra e te ora e rave ei a Iehova i teianei angaanga. (Mataio 24:36) Tera ra, e aronga kite mata tatou i te tupu anga o te au totou Pipiria te akataka meitaki maira e te noo nei tatou i te “tuatau openga.” (2 Timoteo 3:1-5) No reira, ka tau tatou kia paruru i tetai ua atu mea te ka akaanga ke ia tatou. Ka tau tatou kia akono i te Tuatua a te Atua e kia tamou marie i te tu manako rapurapu. Na te raveanga anake i te reira e raukai ia tatou kia “ora i teianei au mea katoa e vaitata mai nei.”​—Luka 21:36.