Au Uianga a te Aronga Tatau
◼ Kua tuatua tika atu ainei te Atua ko Iehova kia Adamu, me kua tuatua atu aia na roto i te Tuatua (Logo, Ereni), te Tamaiti anau tai a te Atua?
Kare te Puka Tapu i oronga atea ua mai te pauanga ki teia uianga. Ka rauka rai oki i te Atua i te tuatua tika ua ki tana tamaiti tangata apakore i roto i Edene, e mea papu e kua pera aia i te pirianga manako kia Adamu koia oki na roto i te Tuatua.
E tuatua putuputu ana te Puka Tapu i ta te Atua au angaanga e rave ana inara kua raveia te reira na roto i etai me kare e au angela. Ei akaraanga, kua akakite mai te Genese 1:1: “I muatangana ra, kua anga iora te Atua i te rangi e te enua.” Mei te mea e ko teia ua ta te Puka Tapu i tuatua no te akamataanga o te ao e pini ua ake, ka manako i reira tatou e na te Atua tikai te reira i anga mei te mea atura e na tona nga rima tikai i anga. Kua akamaataia mai ra te marama e te Puka Tapu Kerisitiano i te reo Ereni. Tatau tatou e: “Na roto [i te Tamaiti a te Atua] kua angaia tetai atu au mea i te au rangi ra e i te enua ra, te au mea kiteaia e te au mea kitea koreia . . . kua angaia tetai atu au mea na roto iaia e nona ra.” (Kolosa 1:16, 17, NW) Kua akapapu mai tetai au irava i ta te tamaiti tuanga i te angaia anga te ao katoa. (Ioane 1:3, 10; Ebera 1:1, 2) No reira, tona turanga e tangata angaanga i raro ake ia Iehova, tei akatumu, akamana, e te akatere atu i te au mea angaia ra.—Salamo 19:1.
Kua tuatua atu te Atua ki te tangata mua: “E kai ua koe i to te au rakau katoa o te kainga nei.” (Genese 2:16, 17) Kare oki a Iehova e anoano atu i tetai apinga uira me kare e apinga akamaata i te reo me kare e ratio. Mei ta te Punanga Tiaki Anga o Noema 1, 1989 i tuatua e: “Kare te tangata i kite ana i tetai ke i te tuatua anga. Kua aere ua mai te reo mei te ngai kitea koreia, te tuanga akara koreia, e te tuatua maira ki aia. Te reo oki te reira o tei Anga mai i te tangata, ko Tei Anga ra! . . . Kare oki taua tangata ra i anoano i tetai apinga na te aronga kite o te ratio ei opu mai i te reo no ko mai i te Atua. Kua tuatua tika mai te Atua ki aia.”
Kua tuatua ainei te Atua na roto i tetai angela, penei te Logo, tei tuatuaia mai e ko Iesu? Ka tika rai oki te reira. Kia kore ra tatou e tuku tika atu, teia ta C. T. Russell i tata: “Penei e kauono a Iesu no te Atua kia Adamu i roto i te Kainga i Edene ra.” (Watch Tower, Peperuare 1, 1915) Ta te Atua Tamaiti i anau mua kua tavini ana aia i roto i teia turanga teitei ei “Tuatua” na tona Metua, me kare ei Vaa Tuatua, ki te au angela e te tangata. (Ioane 1:1; 12:49, 50; Apokalupo 1:1, 2) No reira mei te mea e kua oronga mai te akakite anga a Genese i te manako e kua tuatua tika mai te Atua kia Adamu anake, kare ra te reira e kopae atu Iaia kia tuatua na roto i te angela koia te Tuatua, te Tamaiti a Iehova no te rangi mai. Ka tano oki i te mea kua rave mai oki a Iehova i te Logo ei anga i te tangata i te akamata anga, e koia teia ‘e tei te au tamariki a te tangata ra toku mataora anga.’—Maseli 8:22, 31; Ioane 1:3.
E tamanako ana, ei akaraanga, i to Mose aere anga ki runga i te Maunga i Sinai. Kua akakite mai a Exodo 19:21-24 e: “Kua tuatua maira a Iehova kia Mose . . . Kua karanga atura Mose kia Iehova . . . Kua karanga maira Iehova kiaia.” I reira kua akakiteia mai te oronga angaia te Ture e Tai Ngauru mei teia: “Kua tuatua maira te Atua i teia katoa nei au tuatua, na ko maira.” (Exodo 20:1) Me ko te aiteanga ainei teia e na te Atua i tuatua i teia au tuatua o te Ture? Ko te reira manako ka turuia i te mea e kua akakiteia mai tatou e kua tuatua te Atua kia Mose “mata e te mata.”—Exodo 33:11.
Te vai katoa nei rai to tatou marama no runga i teia. Kua tata te aposetolo ko Paulo no runga i te Ture: “I tukuia mai te reira na roto i te au angela i te rima o te rotopu.” (Galatia 3:19, NW) I muri mai, kua akaaite atu a Paulo i te au akakiteanga na te Atua tei orongaia i roto i te Ture e ta te au Kerisitiano i oronga ia mai na roto ia Iesu: “E tuatua tinamou tikai tei tuatuaia mai e te au angela ra, e i tutaki naia te au ara e te akono kore katoa . . . eaa oki tatou e orai kia kore tatou e akono i te ora maata mei teianei? i tei tuatua mai anaia e te Atu i muatangana, e i akatinamouia mai ia tatou nei e te aronga i akarongo iaia.” (Ebera 2:2, 3) No reira kare te Atua i tuatua i te au tuatua o te Ture e nana te reira i tuatua mai, e kare katoa i rave mai i te Logo no te reira akakoroanga. Mari ra, kua iki aia i etai au angela ke no te reira.
Eaa ra te manako maata i reira? E mea matau oki me tatau tatou i te Atua i te tuatua anga ki te tangata, ka kite tatou e kua pera aia na roto i tetai au vaerua ora tei tuatua mai nona. (Akaaiteia atu kia Genese 18:2, 3, 33; 19:1; Exodo 3:2-4; Au Akava 6:11, 12, 20-22) Ko Iesu tei akariroia e ko te Tuatua, kua akaari mai te reira e koia ta te Atua i rave mai kia rauka te pirianga manako ki tana au mea ora. Me ko te tamaiti apakore a te Atua ko Adamu ainei tetai o te reira? Koia rai ia.—Luka 3:38.
E tika oki e i to te Logo noo anga i te enua nei, kua tuatua mai te Metua e toru taime e kua rongoia kia rauka katoa oki i teia “Adamu openga” kia akarongo atu. (1 Korinetia 15:45; Mataio 3:16, 17; 17:1-5; Ioane 12:28-30) I teia au tuatau nei, eaa i reira te Atua ka tuatua ei me kare no runga i tana Tamaiti akaperepere na roto i tetai angela ke? Te mea mako rava atu ra, kua tuatua tika atu a Iehova; ki tana Tamaiti apa kore e te au tangata ara tei vaitatao, tei akarongo i to te Atua uaorai reo. No reira i te angaia anga te tangata apa kore ko Adamu, ka rauka rai oki i tona Metua aroa kia aravei tika atu ki teia mea ou tei angaia e te apa kore oki. Inara, i te akaraanga o te au tu i mua ake, e tau katoa e kua taangaanga aia i te Tuatua.