Ka Rauka Ainei te Manakonakoanga Mou Tikai?

KUA kino toou uati. Ka inangaro koe kia maani i te reira, inara e maata te au ikianga. E maata te au akakitekiteanga no te aronga maani uati, pouroa ia ratou kua akakite papu mai e ka rauka i te maani i te reira inara kua emiemi koe i tetai pae. Akapeea ra me kite mai koe e ko te tangata e noo ra i te pae ia koe, e tangata kite e nana i maani i taau uati? Kapiti mai, ka inangaro aia i te tauturu ia koe kare e tutaki. Kua kite koe eaa taau ka rave, kare ainei?

E akaaite i tera uati ki toou manakonakoanga. Me kite mai koe e te iti atura toou manakonakoanga​—mei tei tupu ki te manganui i teia tuatau manamanata​—ka aere koe kiea no te tauturu? E maata te aronga tei akakite mai ka rauka ia ratou i te akatikatika i te manamanata, inara e tukeke te au manako e ka emiemi koe i tetai pae. Kare ainei ka aere koe ki Tei Anga i te tangata e tei oronga i te manakonakoanga no ratou? Karanga te Pipiria “kare ra aia i atea ke atu ia tatou katoa nei” e ka inangaro aia i te tauturu.​—Angaanga 17:27; 1 Petero 5:7.

Te Aiteanga Tikai o te Manakonakoanga

E mea maata atu e te umere ta te Pipiria akamāramaanga no te manakonakoanga me akaaiteia ki ta te au taote, aronga taieni, e te aronga kite e manako ra i teia tuatau. I roto i te reo taito o te Pipiria, kua uriia te tuatua “manakonakoanga” ei tiaki marie ma te tapapa i te meitaki. E rua tuanga to te manakonakoanga. Te ō maira te inangaro no te mea meitaki pera katoa te tumuanga no te irinaki e ka tupu te meitaki. Kare te manakonakoanga i roto i te Pipiria i te moemoea. E mea mou te reira tei akatumuia ki runga i te mea tika e te akapapuanga.

Ko te manakonakoanga, aite te reira ki te akarongo tei akatumuia ki runga i te au akapapuanga​—kare i te irinaki matapo ua. (Ebera 11:1) Noatu ra, te akataka maira te Pipiria i te tuke i rotopu i te akarongo e te manakonakoanga.​—1 Korinetia 13:13.

Ei akatutuanga: Me pati koe i tetai oa meitaki no te tauturu, penei ka manakonako koe e ka tauturu aia ia koe. E tumuanga meitaki toou no te manakonakoanga no te mea e akarongo toou e ka tauturu mai toou oa​—kua kite meitaki koe iaia, e kua kite koe i tana au angaanga takinga meitaki e te oronga ua i rave. Noatu e pirianga vaitata to te akarongo e te manakonakoanga, e tuke teia nga tu. Akapeea koe e rauka ai te manakonakoanga i roto i te Atua?

Te Tumuanga no te Manakonakoanga

Ko te Atua te tumu no te manakonakoanga mou. I te tuatau Pipiria, kua kapikiia a Iehova ko “te manakoanga o Iseraela.” (Ieremia 14:8) No ko mai iaia te manakonakoanga mou o tona iti tangata; te tika, koia to ratou manakonakoanga. Kare teia manakonakoanga i tupu no te mea e mea inangaro ua teia no ratou. Mari ra, kua oronga mai te Atua i te tumuanga no te manakonakoanga mou. I te au anere mataiti i tana akono anga ia ratou, kua papau aia i te au taputou e kua akatupu i te reira. Akakite to ratou arataki ko Iosua ki te ngati Iseraela: “Kua kite oki kotou ravarai . . . e kare rava tetai o te au mea meitaki ta to kotou Atua ta Iehova i tuatua mai ia kotou i poka.”​—Iosua 23:14.

I te au tauatini mataiti i muri mai, kare te Atua i taui. Kua kī te Pipiria i te au taputou umere a te Atua e te au tuatua enua tika tikai no tana akatupu anga i te reira. E mea papu tana au taputou e mei te mea e kua tupu takere i te tuatau i tataia te reira.

No reira tatou i kapiki ei i te Pipiria ei puka manakonakoanga. Me apii koe i ta te Atua akono anga i te tangata, ka inangaro maata atu koe i te akatupu i te manakonakoanga i roto iaia. Kua tata te apotetoro ko Paulo: “Te au tuatua ravarai oki i tataia i muatangana, i tataia ïa kia kite tatou; kia rauka to tatou tatari anga, i te akakoromaki e te pumaana o te tuatua i tataia ra.”​—Roma 15:4.

Eaa te Manakonakoanga ta te Atua ka Oronga Mai no Tatou?

Eaa te tuatau ka anoano tikai tatou i te manakonakoanga? Kare ainei me tupu tetai tumatetenga? Inara, me tupu teia ki te manganui​—ei akaraanga me mate tetai tei akaperepereia​—i te reira taime tikai kare e rauka te manakonakoanga. Ko te tika, eaa tei kino atu i te mate? Ka arumaki te reira ia tatou tataki tai e kare e tuku i te ‘au. Ka rauka ia tatou i te kopae i te reira no tetai tuatau ua, e kare o tatou mana i te akakore i te reira. Tau rai ta te Pipiria i akakite no runga i te mate e ko “taua enemi openga ra.”​—1 Korinetia 15:26.

Akapeea i reira e rauka ai ia tatou te manakonakoanga me tupu te mate? I roto i te irava tei kapiki i te mate ko taua enemi openga ra, te karanga katoa ra e ka “akakoreia ïa.” E ririnui atu te Atua ko Iehova i te mate. Kua akaari mai aia i tona mana i te au atianga ke ke. Akapeea ra? Na te akatuakaou mai i tei mate. Te akataka maira te Pipiria e iva atianga tukeke i taangaanga ai te Atua i tona mana ei akatuakaou mai i tei mate.

Ko tetai akaraanga takake, kua akamana a Iehova i tana Tamaiti ko Iesu kia akatuakaou mai i tona oa akaperepere ko Lazaro kua mate e ā rā. Kare a Iesu i rave ngaro ua i te reira mari ra i mua i te katoatoa.​—Ioane 11:38-​48, 53; 12:​9, 10.

Penei ka manako koe, ‘Eaa te tumu i akatuakaouia mai te tangata? Kare ainei kua pakari e kua mate akaou ratou?’ Ae, kua tupu teia. Noatu ra, no te au akaraanga mei teia rai no te tuakaouanga, kare tatou e inangaro ua kia ora akaou mai to tatou au akaperepere tei mate; mari ra e tumuanga to tatou kia irinaki e ka tupu te reira. Tera te aiteanga, e manakonakoanga mou to tatou.

Karanga a Iesu: “Ko au te tuakaouanga, e te ora.” (Ioane 11:25) Koia tei akamanaia e Iehova kia rave i te tuakaouanga takapini i teianei ao. Akakite a Iesu: “Te vaitata mai nei oki te ora, e akarongo ei te aronga katoa i roto i te rua i [to Iesu] reo, E kua aere mai ki vao.” (Ioane 5:​28, 29) Ae, ka rauka i te aronga katoa tei moe i roto i te vaarua te manakonakoanga kia akatuakaouia mai ki te oraanga i roto i te enua parataito.

Kua akataka mai te peroveta ko Isaia i teia akatutuanga pumaana no runga i te tuakaouanga: “Toou ra aronga mate, e ora ïa, to ratou kopapa mate, e tu akaou ïa: e ara, e imene, e tei noo ki te one-pueu: mei te au o te ngangaere ra, toou ra au, ka akapuaki mai oki te enua i te aronga i mate ra.”​—Isaia 26:19.

Kare ainei teia i te mea akapumaana? Kua paruruia te aronga i mate i te ngai meitaki tikai, aite rai ki te pepe tei paruruia i roto i te kopu o tona mama. Ko te tika, te akamaara ra te Atua Mana Katoatoa i te aronga pouroa te akangaroi ra i roto i te vaarua. (Luka 20:37, 38) E kare e roa atu, ka akatuakaouia ratou ki te oraanga i roto i te ao mataora e te ‘au, mei te pepe ou rai tei turouia e tei akaperepereia e tona nga metua! No reira e manakonakoanga to te aronga i mate.

Ta te Manakonakoanga ka Rave Noou

Apii mai a Paulo i te puapinga o te manakonakoanga. Akakite mai aia e e tuanga puapinga te reira no te rakei a te Atua​—te pare. (1 Tesalonia 5:8) Eaa te aiteanga o te reira? I te tuatau Pipiria, me aere te vaeau ki te tamaki ka aao aia i te pare, kua tapiriia a roto ki te pakiri manu. Ka riro te pare ei paruru i tona upoko kia kore e puta. Te apiianga a Paulo? Mei te pare rai te ka paruru i te upoko, ka riro te manakonakoanga ei paruru i toou aerenga manako. Me akatumuia toou manakonakoanga ki runga i te au akakoroanga o te Atua, ka vai ua te ngakau ‘au e kare koe e mataku e te taitaia me tupu te manamanata. Koai ia tatou kare e inangaro i teia pare?

Kua taangaanga katoa a Paulo i tetai akatutuanga taka meitaki no te manakonakoanga. Tata aia: “Ko ta tatou ïa tutau no te vaerua, e mea mauti kore e te mou meitaki.” (Ebera 6:​19) I te mea kua na roto a Paulo i te akangaa paī, kua kite aia i te puapinga o te tutau. Me tupu te uriia, ka tuku te au mataro i te tutau ki raro. Me mou meitaki te tutau ki runga i te akau, ka paruruia te paī i roto i te uriia e kare e apainaia ki runga i te toka kia ngaangaa.

Mei te reira katoa me riro te au taputou a te Atua ei mea “mauti kore e te mou meitaki” kia tatou, ka akakoromaki tatou i teia tuatau tumatetenga. Taputou a Iehova i te akakore te tamaki, te kino, te mii e te mate a te tuatau ki mua. (Akara i te pia i te kapi 10.) Me mou piri ki te manakonakoanga, ka tauturu ia tatou kia kopae i te tumatetenga na te akamaroiroi anga ia tatou kia akono i to te Atua au turanga i roto i teia ao viivii e te tau kore.

Kua oronga mai a Iehova i te manakonakoanga noou. Ka inangaro aia kia kite koe i te oraanga tana i akakoro. Koia “tei inangaro i te tangata katoatoa kia ora.” Akapeea ra? Mea mua, ka anoanoia koe “kia rauka te kite i te tuatua-mou.” (1 Timoteo 2:4) Te pati nei te aronga nenei o teia makatini ia koe kia apii i te au tuatua mou mei roto i te Pipiria. E meitaki roa atu te manakonakoanga ta te Atua ka oronga mai i tetai ua atu manakonakoanga ta teianei ao ka oronga mai.

Me tupu toou manakonakoanga, kare koe e manako papu kore no te mea ka akamaroiroi te Atua ia koe kia taeria tetai ua atu akakoroanga tei rotai ki tona anoano. (2 Korinetia 4:7; Philipi 4:​13) Ko teia tikai te manakonakoanga taau e anoano ra! No reira me ngere koe i te manakonakoanga e te iti ua atura, e akamaroiroi. Ka rauka te manakonakoanga!

[Pia/Tutu]

Tumuanga no te Manakonakoanga

Ka tauturu teia au irava i te akatupu i te manakonakoanga:

◼ Taputou mai te Atua i te oraanga meitaki a te tuatau ki mua.

Akakite tana Tuatua e ka riro te enua ei parataito e ka nooia e te iti tangata mataora e te taokotai.​—Salamo 37:11, 29; Isaia 25:8; Apokalupo 21:3, 4.

◼ Kare te Atua e pikikaa.

Te rikarika ra aia i te pikikaa. E tu tapunui e te apakore to Iehova, no reira kare rava aia e pikikaa.​—Maseli 6:​16-​19; Isaia 6:2, 3; Tito 1:2; Ebera 6:​18.

◼ E mana ririnui to te Atua.

Ko Iehova anake te mana katoatoa. Kare e apinga e tāpu iaia mei te akatupuanga i tana i taputou.​—Exodo 15:11; Isaia 40:25, 26.

◼ Inangaro te Atua kia ora koe e tuatau ua atu.

​—Ioane 3:​16; 1 Timoteo 2:3, 4.

◼ Akara te Atua i te meitaki i roto ia tatou.

Ka akamou aia ki runga i ta tatou tautaanga e te au tu meitaki, kare ki runga i ta tatou ara e te tu tarevake. (Salamo 103:12-​14; 130:3; Ebera 6:​10) Inangaro aia ia tatou kia rave i te mea tika e te rekareka ra tona ngakau me pera tatou.​—Maseli 27:11.

◼ Taputou mai te Atua i te tauturu ia koe kia taeria toou au akakoroanga pae vaerua.

Kare tona au tavini e anoanoia kia manako apikepike. Ka oronga ua mai te Atua i tona vaerua tapu, te mana ririnui roa atu, ei tauturu ia tatou.​—Philipi 4:​13.

◼ Kare rava toou manakonakoanga i te Atua e puapinga kore.

Ka irinaki pu tikai koe iaia, e kare rava aia e akaruke ia koe.​—Salamo 25:3.

[Tutu]

Ka paruru te pare i toou upoko, ka paruru te manakonakoanga i toou aerenga manako

[Tutu]

Mei te tutau rai, ka oronga te manakonakoanga mou i te tu ngaueue kore

[Akameitakianga]

Courtesy René Seindal/Su concessione del Museo Archeologico Regionale A. Salinas di Palermo