“Kua Okoia Kotou ki te Tutaki”
“Kua okoia kotou ki te tutaki. No reira, e akakaka i te Atua i roto i te kopapa o kotou na.”—1 KORINETIA 6:20, “NW.”
1, 2. (a) Na teaa i akatuera mai i “te mataara ki vao i te mate”? (e) Eaa tei raveia kia manaʼi to te Mesia ra atinga, mei tei akaataia maira e teaa?
“KO TO matou nei Atua [mou], ko te Atua ïa e oraʼi,” ta te tata salamo i tuatua, “no te Atu oki no Iehova, i oraʼi tatou i te au mate nei.” (Salamo 68:20) Na te atinga o Iesu Mesia i akatuera mai te reira mataara. Inara e mana tikai te reira atinga, kua anoanoia te Mesia kia aere atu ki mua tikai i te aroaro o te Atua uaorai.
2 Kua akaataia mai teia i te Ra Tapokiangaara i te tomo anga te taunga maata ki te Ngai Tapu Rava. (Levitiku 16:12-15) Kua tata te apotetoro ko Paulo e: “Ko te Mesia ra i tae maira ei taunga maata . . . , Kare oki ma te toto puaka-nio e te toto punua puakatoro, ma tona uaorai ra toto, i te tomo anga okotai i roto i te ngai-tapu ra, ma te ora mutu kore te rauka anga no tatou. Kare akenei te Mesia i tomo ki roto i nga ngai-tapu i angaia e te rima ra, i te akairo no te ngai-tapu tikai; tei te rangi mou ra, kia akakite aia iaia uaorai ki mua i te aroaro o te Atua no tatou i teianei ra.”—Ebera 9:11, 12, 24.
Te Mana o te Toto
3. (a) Eaa te manako o te aronga akamori ia Iehova no te toto, e no teaa ra? (e) Eaa te akakite maira e e mana tikai to te toto i te tapoki anga i te ara?
3 Eaa te tuanga a te toto o te Mesia ra ka akono e oraʼi tatou nei? Mei te tuatau mai ia Noa ra, kua manako te aronga akamori mou e, e tapu te toto. (Genese 9:4-6) E tuanga maata ta te toto e akono nei i te oraanga, no te mea te karanga ra te Puka Tapu e “tei te toto e oraʼi te meta [me kare te ora] e oraʼi te kopapa.” (Levitiku 17:11, NW) No reira kua akaueia te Ture a Mose e me ka tuku atingaia tetai manu, ka riringiia tona toto ki mua ia Iehova. I etai tuatau kua tuku katoaia te toto ki rungao i te au tara o te atarau. Te taka meitaki ra, e ko te mana tapokianga ara o te atinga tei roto ia i tona toto. (Levitiku 8:15; 9:9) “E kare e rainga te mea i kore i tamāia i te toto i ta te ture ra; e kare e toto i akataeia ra, kare rava e matara anga o te ara.”—Ebera 9:22.
4. (a) Eaa te akakoroanga tei akatupuia i ta te Atua ra tureanga i te taangaanga i te toto? (e) Eaa te tumu puapinga maata no runga i te mataara i tamateiaʼi a Iesu?
4 No reira rai, e, i raro ake i te Ture, ko te akono tarevake i te toto ka akautungaia i te mate! (Levitiku 17:10) Te kite pouroa nei tatou e me manga ngere mai i tetai apinga, me kare kia arai ketaketaia te taangaanga i te reira, ka kake mai tona puapinga. Na ta Iehova ra ture anga i te reira e manakoiaʼi te toto e, kare i tetai apinga noa ua nei tona puapinga, mari ra e oko maata, e puapinga maata ia. (Angaanga 15:29; Ebera 10:29) Kua tau teia ki te akakoroanga teitei ta te toto o te Mesia ra ka rave. E mea tau tikai, e kua mate aia na roto i te tu tei akariro ra kia akamaringiia tona toto. E no reira, kua papu e kare te Mesia i tuku atinga anake ua i tona kopapa tangata mari katoa ra kua riringi i tona meta, kua tuku atinga i tona oraanga tikai ei tangata apa kore ua ra! (Isaia 53:12) Kare a Iesu i tuku ua atu i tona tika no te reira oraanga e no te mea e apa tona, no reira ko tona toto tei akamaringiia ra e puapinga maata tona e kua rauka kia orongaia ki mua i te aroaro o te Atua ra ei tapokianga i te ara a te tangata nei.
5. (a) Eaa ta te Mesia i apai atu ki te rangi ra, e eaa te tumu? (e) Eaa i papu ei e kua ariki mai te Atua i te atinga o te Mesia?
5 Kare i rauka i te Mesia i te apai atu i tona toto tikai ki te rangi ra. (1 Korinetia 15:50) Mari ra kua rave atu aia i ta te reira toto i akatutu maira: koia te tika puapinga o tona oraanga tangata apa kore ua tei tuku atingaia ra. I mua tikai i te aroaro o te Atua ra, kua rauka iaia i te oronga atu i te reira oraanga ei oko no te au tangata ara nei. Kua akapapuia ta Iehova ra ariki anga i te reira atinga ia Penetekote 33 T.N., i te to anga mai te vaerua tapu ki rungao i te 120 au pipi i Ierusalema ra. (Angaanga 2:1-4) Kua riro i reira, ko te Mesia te pu, kua peke iaia te uanga tangata katoa na te oko. (Galatia 3:13; 4:5; 2 Petero 2:1) No reira, kua rauka kia tae atu te puapinga no te oko ra ki te au tangata katoa nei.
Te Aronga Mua Tei Puapingaia i te Oko
6. Eaa te au akanoonoo anga ta te Atua i akapapa no te akono anga i te au puapinga o te oko o te Mesia ra?
6 Inara, kare te aiteanga o teia e, ka oronga tikaia mai i reira te tu kopapa apa kore ua no te tangata nei, no te mea me ka kore e akakoreia atu te tu ara o te tangata nei, kare e rauka mai te tu kopapa apa kore ua i reira. (Roma 7:18-24) Akapeea e aea e raukai kia akakore atu i te tu ara nei? Kua na mua te Atua i te akanoo anga e 144,000 te aronga ‘ei kau taunga i te rangi na to tatou Atua kia tutara ei ui ariki i runga ake i te enua nei’ ma Iesu Mesia katoa. (Apokalupo 5:9, 10; 7:4; 14:1-3) Na roto mai ia ratou te tuku marie mai anga i te au puapinga no te oko ki te au tangata nei no te tuatau o te tauatini mataiti.—1 Korinetia 15:24-26; Apokalupo 21:3, 4.
7. (a) Eaa te koreromotu ou, koai ma nga tuanga i roto i te reira, e eaa tana akakoroanga te ka rave? (e) Eaa ra i anoanoiaʼi kia mate tetai ei akatupu kia rauka te koreromotu ou ra, e eaa te tuanga ta te toto o te Mesia ka rave?
7 I te taki atu anga ki te reira, ko te 144,000 au ariki kau taunga ra “i okoia ïa aronga no roto i te tangata nei.” (Apokalupo 14:4) Kua oti teia na roto i “te koreromotu ou.” Ko teia koreromotu e koreromotu ia i rotopu i te Atua ra ia Iehova e te Iseraela vaerua a te Atua kia riro tona au mema ei ui ariki e ei kau taunga. (Ieremia 31:31-34; Galatia 6:16; Ebera 8:6-13; 1 Petero 2:9) Inara, i akapeea i akatikaiaʼi tetai koreromotu i rotopu i te Atua e te au tangata apa ua nei? Kua akataka maira Paulo: “E koreromotu ra [i rotopu i te Atua e te tangata apa ua nei], kia mate tikai te mea e tinamou ei ra e tikaʼi. E atinga tei mate e tinamou ei te koreromotu kia akatau: kare ra e mana i te ora anga o te mea e tinamou ei ra.”—Ebera 9:16, 17.
8, 9. Eaa te pirianga o te oko ki te koreromotu ou ra?
8 No reira ko te atinga oko te tumuanga mua ia i te koreromotu ou, ko Iesu oki tona Rotopu. Kua tata a Paulo e: “Okotai oki Atua, okotai oki rotopu i rotopu i te Atua e te tangata, ko te tangata ia, ko Iesu Mesia, tei oronga ra iaia uaorai ei oko no te katoatoa—ko teia te mea te ka akakiteia i tona uaorai tuatau tau.” (1 Timoteo 2:5, 6, NW) Ko te reira au tuatua no te 144,000 tikai, ko ratou ra te aronga i akonoia atura taua koreromotu ou ra.
9 I ta Iehova akono anga i te koreromotu ma to Iseraela kopapa ra, kare te reira i mana kia tae roa ki te akamaringi anga i te toto manu ei atinga. (Ebera 9:18-21) Mei te reira katoa oki, i manaʼi te koreromotu ou ra, kua na mua te Mesia i te akatae anga i te “toto teia no te koreromotu.” (Mataio 26:28; Luka 22:20) I te Mesia e akono ra ei Taunga Maata e ei “arai no te koreromotu ou,” kua tuku te Atua i te puapinga o te toto o Iesu ki te aronga te apaiia maira ki roto i taua koreromotu ou ra, ma te akatikaanga ia ratou i te tuatua tika no te tangata nei. (Ebera 9:15; Roma 3:24; 8:1, 2) Kua rauka i te Atua i reira i te apai atu ia ratou ki roto i te koreromotu ou ra kia riro ei ui ariki kau taunga i te rangi! Ei Rotopu e te Taunga Maata no ratou, te tauturu ra a Iesu ia ratou i te akatinamouanga i te turanga ma ki mua i te aroaro o te Atua.—Ebera 2:16; 1 Ioane 2:1, 2.
Akaputuanga i te au Mea i te Enua Nei
10, 11. (a) Akapeea te totoa anga te oko kia tere atu i te aronga Kerititiano akatainuia ra? (e) Koai ma te urupu maata, e eaa to ratou turanga ma te Atua katoa ra?
10 Ko te au Kerititiano akatainuia anake ainei te ka kite i te matara anga na te oko, te akakore anga i ta ratou ara? Kare, te akaongi ra te Atua kiaia uaorai i te au mea ravarai nei na te akaauanga na roto i te toto tei akataeia ra i runga i te rakau tamamae anga, mei ta Kolosa 1:14, 20 e akakite maira. Te kapiti katoa ra teia i te au mea i te au rangi ra (te 144,000) pera katoa oki te au mea i runga i te enua nei. Ko teia aronga i muri nei ko ratou tei tau no te oraanga i te enua nei, te au tangata ko ratou te ka rekareka i te oraanga apa kore ua i Parataito i runga i te enua nei. E maata rava atu oki te tauta anga i te akaputu mai i teia aronga mei te 1935 mairai. Te akataka maira a Apokalupo 7:9-17 (NW) ia ratou ei “urupu maata” no ko mai i te Atua e te Punua Mamoe ra to ratou ora. Te anoanoia ra ratou kia ora mai te “Mate Maata” e kia ‘aratakiia ki te au pupui anga o te vai ora ra,’ no te mea te akaari maira a Apokalupo 20:5 e ko te reira aronga ka riro kia ora tikai, ma te oraanga tangata apa kore ua, a te openga o te Tauatini Mataiti Tutaraanga o te Mesia ra. Ko te aronga te ka ora atu i te timataanga openga i to ratou tu tangata apa kore ua ra ka akatikaia ratou ei aronga tuatua tika no te ora mutu kore ki runga i te enua nei.—Apokalupo 20:7, 8.
11 Inara, na te mataara no te akamata anga, kua rave te urupu maata i te “orei i to ratou kakau, e kua akateatea i te toto o te Punua-mamoe ra.” (Apokalupo 7:14) Kare te Mesia e akono ei Arai no ratou i taua koreromotu ou ra, tera ra ka puapingaia ratou i te reira koreromotu na roto i te angaanga a te Patireia o te Atua. Inara, ka akono te Mesia ei Taunga Maata no ratou, e na roto atu iaia ta Iehova tuku anga i te puapinga o te oko kia akatikaia ratou i teianei ei au oa tuatua tika no te Atua. (Akaaiteia atu kia Iakobo 2:23.) I te tuatau o te Tauatini Mataiti ra, ka “akaora katoaia [ratou] i te tapeka o te mate, kia rauka te rangatira meitaki o te tamariki a te Atua [ia ratou i te openga] ra.”—Roma 8:21.
12. Na runga i teea tumuanga ta te Atua ra akono anga i te aronga tiratiratu i mua ake i te tuatau Kerititiano ra?
12 I to ratou turanga ma te Atua, i te akaraanga e manga tuke to te urupu maata i to te aronga akamori i mua ake i te au Kerititiano ra. Inara, kua akono te Atua i te aronga tei taiku opengaia nei ma te akara atu anga i te oko a te tuatau ki mua ra. (Roma 3:25, 26) Kua rekareka ratou i te akakore anga i ta ratou ara na roto i te mataara poto ua. (Salamo 32:1, 2) Kare ra e ko te akamatara takiri anga i to ratou “manakonako akaou i te ara” kua akatupu ra te au atinga manu ra i “te manako i te ara.”—Ebera 10:1-3.
13. Eaa to tatou turanga meitaki atu i to te aronga tavini o te Atua i mua ake i to te Kerititiano ra?
13 E tuke rai no te au Kerititiano i teia tuatau nei. Te akamori ra ratou i runga i te tumuanga o te oko kua oti i te tutakiia! Na roto i to ratou Taunga Maata, e “akavaitata ua atu [ra ratou] i te terono o te aroa ua ma te mataku kore.” (Ebera 4:14-16) Te akaongi anga i te Atua ra kare ia i tetai manakonako anga kia tupu mai mari ra e tika tikai ia i teianei! (2 Korinetia 5:20) Me apa anake ratou, ka rauka ra ia ratou te akakore i te ara tika tikai. (Ephesia 1:7) Te rekareka ra ratou i te akava ngakau tei tama ravaia. (Ebera 9:9; 10:22; 1 Petero 3:21) E tongi anga mua teia au akameitakianga i te tu rangatira kaka no te au tamariki a te Atua te ka rekarekaia e te au tavini o Iehova a te tuatau ki mua!
Te Oonu o to te Atua Pakari e te Aroa
14, 15. I akapeea ta te oko akataka maata anga i to Iehova ra pakari kitea koreia, e pera katoa oki tona tuatua tika e te aroa?
14 E apinga aroa umere tikai te oko no ko mai ia Iehova ra! E ngoie ua ia i te maramaia, inara e oonu tona au tumu ei akatuki atu i te mataku ki roto i te tangata kite maata rava ra. Kua raraku ta tatou uriuri manako anga i runga ua o te au angaanga a te oko ra. Inara, ka tuatua katoa tatou ma te apotetoro ko Paulo e: “Aue te oonu o te apinga nui o te pakari e te kite i te Atua e! e te kimi anga taea kore o tana akatauanga e, tona au aerenga i te kitea kore kia kimi e!” (Roma 11:33) Kua kitea to Iehova pakari i te mea kua rauka iaia i te akaora i te au tangata nei e te akatika i tona tu ngateitei. Na te oko, “kua kitea mai nei te tuatua-tika a te Atua . . . Ko [te Mesia] ta te Atua i tuku mai ei akaongi, kia irinaki i tona toto.”—Roma 3:21-26.
15 Kare e akaapa anga te ka tau kia tukua atu ki te Atua no tana akakoreanga i te au ara tei raveia i te tuatau i topa ta te aronga akamori i mua atu i te Kerititiano ra. Pera katoa oki, kare e akaapa anga te ka tau kia tukuia atu kia Iehova no tana akatikaanga i te aronga tuatua tika tei akatainuia ra, ei tamariki nana me kare tana akatikaanga i te urupu maata ei oa nona. (Roma 8:33) E maata tana uaorai i tutaki, e tikaanga apa kore to te Atua, me kare e tika mou, i tana au ravenga, kua tau ei pau takiri atu i ta Satani tuatua pikikaa e e tutara tika kore a Iehova! Kua akakitea mai to te Atua ra aroa noinoi kore no tana au mea ora i anga maira e kare e ekoko anga no te reira.—Roma 5:8-11.
16. (a) Na teea mataara ta te oko i te akono anga e te akaoti i te maroanga no te tiratiratu o to te Atua ra au tavini? (e) Akapeea ta te oko oronga anga mai kia tatou i te tumuanga no te akarongo i te ao ou no te tuatua tika te aere maira?
16 Kua oti katoa oki te au maroanga no runga i te tiratiratu o te au tavini o te Atua ra, na te mataara i orongaia mai ei te oko ra. Kua oti te reira i to Iesu ra akarongo anga anake ua. (Maseli 27:11; Roma 5:18, 19) Inara kapiti katoa atu ki te reira ko te tu oraanga o te 144,000 au Kerititiano tei vai tiratiratu tae roa ki te mate, noatu rai ta Satani patoi anga! (Apokalupo 2:10) Na te oko i raukai i teia aronga te tutaki no ratou ei mate kore—e oraanga kare e rauka kia akapouia! (1 Korinetia 15:53; Ebera 7:16) Na teia i akaneneva atu i ta Satani tuatua e e tiratiratu kore te au tavini o te Atua! Kua oronga katoa mai te oko i te tumuanga ngaueue kore no te akarongo i ta te Atua au taputou. Te kite nei tatou i te akapapa anga no te ora tei “akamou tikaia” na roto i te atinga oko ra. (Ebera 8:6, NW) No reira kua akapapuia mai te ao ou no te tuatua tika!—Ebera 6:16-19.
Auraka e Akakore i Tona Akakoroanga
17. (a) Akapeea te akaari mai a tetai papaki e kua akakore ratou i te akakoroanga o te oko? (e) Eaa te ka akakeu ia tatou kia akatinamou i te tu viivii kore?
17 E puapingaiaʼi i te oko, e mea tau kia apii kia kite, kia akono i te akarongo, e kia rave i te au turanga a te Puka Tapu. (Ioane 3:16; 17:3) Inara, e tokoiti ua, te rekareka ra i te rave i te reira. (Mataio 7:13, 14) Noatu rai i rotopu i te au Kerititiano mou ra, ko tetai papaki “te ariki ra i te aroa ua o te Atua e te akakore ra i tona akakoroanga.” (2 Korinetia 6:1, NW) Ei akataunga, i te au mataiti kua topa e au tauatini ua atu te au taeake tei akaateaia ki vao i te akaputuputuanga no te akaturi. E mea tangi tikai ia i te manako anga i ta Iehova raua ko te Mesia i rave no tatou! Kare ainei e tau te ariki anga i te oko, kia akakeu i te tangata kia kopae ke i te tu “e kua ngaro iaia e, kua tamāia aia i muatangana i tana ara”? (2 Petero 1:9) Kua tau ta Paulo i akamaara atura i te au Kerititiano e: “Kua okoia kotou i te oko. No reira, e akakaka i te Atua i roto i te kopapa o kotou na.” (1 Korinetia 6:20, NW) Na te manakoanga i teia e oronga mai i te akakeu anga ririnui kia akatinamou i te tu viivii kore!—1 Petero 1:14-19.
18. Akapeea e raukai, i te Kerititiano tei topa ra ki roto i te rave ara kino, te rave kia puapinga akaouia aia i te oko ra?
18 Ka peea me kua topa ke ana tetai ki roto i te rave ara kino roa? Ka tau aia kia kimi i te akakore anga ara ta te oko e oronga maira, na te tauturu no ko mai i te au akaaere aroa ra. (Iakobo 5:14, 15) Noatu rai me ka anoanoia te ako anga pakari, kare te Kerititiano tei tataraara e tau kia akaruke ua atu no te mea kua papa akatikatikaia mai aia. (Ebera 12:5) Tei ia tatou nei teia akapapu anga meitaki no te Puka Tapu maira: “Kia aaki tatou i ta tatou ara, e tuatua-mou tana e te tika i te akakore anga mai i ta tatou ara, e te tamā anga ia tatou i te au tuatua-tika kore ravarai.”—1 Ioane 1:9.
19. Eaa te manako tau no te Kerititiano no runga i tana au tarevake i rave i mua ake i tona kite anga i te tuatua mou ra?
19 I etai tuatau kua akaapikepikeia te au Kerititiano no runga i te rave tarevake kua topa ra. Kua tata tetai taeake kua akaapikepike ra te manako e, “I mua ake i te aere mai anga ki roto i te tuatua mou, kua tu maua ko taku vaine i te maki [herpes]. I etai tuatau te manako ngakau ra maua e viivii maua, mei te mea rai kare i ‘tau’ no roto i ta Iehova ra akaaerenga viivii kore.” E tika rai, e noatu i muri ake i te riroanga ei Kerititiano, penei ka kokoti tetai papaki i tetai tuanga mamae anga no te au tarevake kua topa ra. (Galatia 6:7) Tera ra, kare rava e tumu no te manako ngakau anga e e viivii i nga mata o Iehova ra me kua tataraara tikai tetai. Ka rauka “i te toto o te Mesia” i “te mā o to tatou akava-ngakau i te angaanga mate.”—Ebera 9:14.
20. Akapeea e raukai i te irinaki anga i te oko ra i te akakore atu i te manako akaapa tau kore a te Kerititiano ra?
20 Ae, ka rauka i te akarongo i te oko ra i te tauturu mai ia tatou kia kore te au teimaa tau kore ua no te apa ra. Kua akakite tetai tuaine ou e: “E tautaanga taku no runga i te ravenga viivii i te amirimiri anga no te tere atu i te 11 mataiti i teianei. Kua vaitata roa au i te akaruke i te akaputuputuanga i tetai tuatau, no te manakoanga e kare rava a Iehova e inangaro i tetai peretana mei iaku rai te tu rikarika ei taviivii i tana akaaerenga.” Ka tau tatou kia maara, e ko Iehova “e meitaki e e viviki i te akakore mai i te ara” kia tauta pakari ra tatou i te maro atu i te au ravenga tuatua tika kore katoa, auraka e tuku ua atu ki te reira.—Salamo 86:5, NW.
21. Eaa te akatupu anga a te oko ki to tatou manako no te aronga tei akariri maira ia tatou?
21 Ka tau katoa kia mana mai te oko i roto i ta tatou akono anga ia etai ke ra. Ei akaraanga, ka peea taau akono me ka akariri mai tetai taeake Kerititiano ia koe? Ka oronga ua atu ainei koe i te akakore anga ara mei ta te Kerititiano rai? (Luka 17:3, 4) “Te ngakau maru aroa ua” ainei toou, “ma te akakore oki i te ara [a etai ke ra], mei ta te Atua i akakore mai [i taau] i te Mesia ra”? (Ephesia 4:32) Me kare te mou ra ainei koe i te riri e te akamoupuku ra? Kare te reira i tau tikai ki te akakoroanga o te oko ra.—Mataio 6:15.
22, 23. (a) Eaa te tupu anga tau no te oko maira i runga i ta tatou au akakoroanga e to tatou tu oraanga? (e) Eaa te tika tau na te au Kerititiano ravarai kia tuku no runga i te oko ra?
22 Ei tumu openga, ka tau te ariki anga i te oko ra ei akatikatika i ta tatou au akakoroanga e pera katoa to tatou tu oraanga. Kua na ko ra a Paulo: “Kua okoia kotou i te oko; auraka kotou e riro ei tavini no te tangata.” (1 Korinetia 7:23) Te riro ra ainei te au puapinga o teianei ao—te ngutuare, te angaanga, te kai, te kakau—e ko te apinga maata ia i toou oraanga? Me kare te kimi ra ainei koe i te Patireia na mua, ma te tukuanga i te akarongo ki runga i ta te Atua taputou i te oronga mai i tei anoanoia noou? (Mataio 6:25-33) Ka tavini atu ainei koe i toou pu angaanga mari ra kare e akataka i te tetai tuatau no ta te Atua ra angaanga? Kia maara e kua “oronga te [Mesia] iaia uaorai no tatou . . . e kia tamā aia ia tatou ei tangata tikai nona uaorai, e te maroiroi i te au angaanga memeitaki ra.”—Tito 2:14; 2 Korinetia 5:15.
23 “E akameitaki i te Atua na roto ia Iesu Mesia” no teia apinga aroa meitaki rava—koia te oko! (Roma 7:25, NW) Auraka roa tatou e akakore i te akakoroanga o te oko ra, mari ra e tuku i te reira kia mana tikai i to tatou oraanga. I te manako, i te tuatua, e te angaanga, kia akakaka tamou tatou i te Atua, ma te akamaara e te akameitaki anga e kua okoia tatou i te tutaki.
Au Uianga no te Uriuri Akaou
◻ Eaa ra i akamanakoiaʼi e e tapu te toto, e i akapeea te oronga anga i te toto o te Mesia ki mua i te aroaro o Iehova i te rangi ra?
◻ Eaa te tuanga tei akonoia e te toto o te Mesia ra i te akamana anga i te koreromotu ou?
◻ Peea ta te oko akapuapinga anga i te aronga akatainuia ra e te urupu maata katoa oki?
◻ Akapeea tatou kia akaari e kare tatou i akakore i te akakoroanga o te oko ra?
[Tutu i te kapi 16]
Te mana tapokiangaara o te atinga tei roto ia i tona toto ora ra
[Tutu i te kapi 17]
Ko tei manako ariki ra i ta te Atua akakore anga ara te rekareka ra i te akakore atu i te ara a etai ke ra