“Ko te Akakoromaki ra te Tau ia Kotou”

KA ANOANO tatou i te “akakoromaki,” e raukaʼi ia tatou “te tutaki i tuatuaia maira.” (Ebera 10:36) Kua akamarama tetai tangata apii Puka Tapu i te tuatua Ereni no te “akakoromaki” ta te apotetoro ko Paulo i taangaanga i roto i teia irava i etai taime kua riro i te akataka “i te tu o tetai rakau kia noo i raro ake i te au turanga ngata e te tau kore.”

I te au maunga o Europa, te tupu ra tetai tiare mei te reira rai. Ma te umere tikai, kua kapikiia te reira e ora mutu kore. Ae, kare teia rakau maunga e ora mutu kore ua atu, inara e akakoromaki ana te reira i tera mataiti i tera mataiti, i te puera anga mai i te au tiare manea i te au tuatau raumati. Kua akamarama The New Encyclopædia Britannica e kua orongaia ki te rakau te ingoa ora mutu kore no te mea no tona “tu pakari e te tu ketaketa.” (Te aite anga katoa o te ingoa tainiti no teia au rakau o te tu Sempervivum e “ora mutu kore.”)

Ko tei akariro i teia rakau ketaketa ei mea umere tikai e tupu ana te reira i te au ngai reka kore tikai. Ka kiteaia te reira i runga i te au ngai maunga tariva matangitangi, i reira ka topa te au vaito anga reva e maata atu i te 35°C i roto i te 24 ora. Ka tupu te reira i te ngai toka ma te one meangiti i runga ra. Eaa ra etai o te au mea muna o tona tu akakoromaki i roto i te reira turanga maru kore?

E au rau ngote vai to te rakau ora mutu kore, te ka akaputu marie i te vai. Na teia e raukaʼi i te reira kia taangaanga maata i te mauu pouroa te rauka ra mei te ua me kore te au kiona tae. Pera katoa, ka tupu maviriviri te reira ei taokotai i to ratou tu ketaketa e raukaʼi i te mou pakari anga ki runga i to ratou turu anga mei te toka. Na te aka anga i te ngai toka, ka paruruia te reira mei te au mea o te reva, noatu penei e meangiti te one. Mei tera te tu, te tupu ra te reira na te rave anga i te maata anga o te meitaki o te au turanga ngata.

I te tuatua anga i te pae vaerua, penei ka kite tatou ia tatou uaorai i roto i te au turanga te ka timata i to tatou tu akakoromaki. Eaa ra te ka tauturu ia tatou kia akakoromaki i raro ake i te timata anga? Mei te rakau ora mutu kore, ka rauka ia tatou i te akono i te au vai oronga ora o te Tuatua a te Atua e kia piri vaitata ma te au Kerititiano mou no te turu anga e te paruru anga. Te mea maata rava atu, mei te tiare maunga, kia mou piri rai tatou ki to tatou “toka,” ko Iehova, e pera katoa ki tana Tuatua e ki tana akaaerenga.​—2 Samuela 22:3.

Tika rai, e akamaara anga manea te tiare ora mutu kore e, noatu i roto i te turanga maru kore, ka rauka ia tatou i te akakoromaki me taangaanga maata tatou i te au mea te rauka ra. Te akapapu maira a Iehova kia tatou e na te reira tu akakoromaki e arataki ki to tatou ‘tutaki i tuatuaia maira,’ ko te aite anga tikai kia ora e tuatau ua atu.​—Ebera 6:12; Mataio 25:46.