E Akava Ngakau Tiratiratu

I TETAI ra i te oki anga ki te kainga mei te angaanga mai, kua ngaro te terepaoni cellular a Charles e tangata angaanga i tetai apii maata i Kenia. E apinga oko maataia rai e te inangaroia i Kenia.

“Kare roa au i manako ana e ka akaokiia mai teia e tetai tangata,” i tuatua ai a Charles. Inara, e nga ra i muri mai, kua poitirere aia i te taeanga mai tetai kapikianga terepaoni mei ko mai i te opati manga o te Au Kite o Iehova i Kenia. Aka angaanga i te irinaki i tana i akarongo nei i te patiia mai anga aia kia aere atu e tiki i tana terepaoni cellular! Kua kite mai aia e ko tetai orometua tamou o te Au Kite o Iehova tei kite i te terepaoni e tai o raua motoka ko Charles i aru ei. I te tautaanga kia kimi i te ona, kua apai mai te orometua i te terepaoni ki te opati manga, e te openga kua kiteaia a Charles e te aronga tauturu ua i reira na te akara anga i te numero tei akairiia i runga i te terepaoni.

“Te ariki maata nei au i te tautaanga tei raveia i te aravei anga iaku noatu te au tu ngata tei piri mai,” i tuatua ai a Charles i tana reta i tata ei ki te opati manga. “Te akameitaki nei au ma te ngakau tae tikai i te au mema o ta kotou akaaerenga tei kite mai i te terepaoni cellular, tei kitea mai e naku, e kua akaokiia mai te reira. Kare i te mea ngoie ua i te kite i tetai tangata tiratiratu i teia tuatau nei, inara e akamaroiroianga ia e e tokoiti ua tei tuke ei Au Kite mou no te Atua ko Iehova.”

Kua kite meitakiia te Au Kite o Iehova i te au ngai ravarai no to ratou tu tiratiratu. Kua aru ratou i ta te apotetoro ko Paulo, tei karanga e: “Te tika nei to matou akava-ngakau i te akakoro anga e, ei akono meitaki ta matou i te au mea katoa nei.” (Ebera 13:18; 1 Korinetia 11:1) Kua ariki ratou e ko taua tu meitaki ra te akakaka ra i te Atua ko Iehova, mei ta Iesu i tuatua ai: “Koia katoa to kotou mārama, kia kakā ïa ki mua i te aroaro o te tangata nei, kia akara ratou i ta kotou angaanga meitaki, e kia akameitaki ratou i to kotou Metua i te ao ra.”​—Mataio 5:16.