E Ririnui te Tuatua a te Atua

“E mea ora oki te tuatua a te Atua, e te ririnui.”​—EBERA 4:12.

AU IMENE: 37, 45

AKAPEEA KOE ME TUKU I TE MANA O TE TUATUA A TE ATUA KIA ANGAANGA . . .

i roto i toou oraanga?

i roto i te angaanga tutu aere?

me apii mei mua mai i te paata?

1. Eaa koe i papu ei e mana to te Tuatua a te Atua? (Akara i te tutu mua.)

KUA papu i te iti tangata o Iehova e ko tana tuatua ki te tangata, “e mea ora oki . . . e te ririnui.” (Ebera 4:12) Kua kite ana tatou i te mana o te Pipiria i roto i to tatou oraanga e te oraanga o tetai ke. I mua ake ka riro mai ei Au Kite, tetai pae e aronga keikeia, kai apinga akakona, e te rave ainga tau kore. Tetai pae e aronga rongonui e te apinganui inara kua ngere ratou i tetai apinga i roto i te oraanga. (Koheleta 2:3-11) Mea mataora, e manganui kare o ratou manakonakoanga e kare e kaveinga inara i teianei e arataki anga to ratou. I roto i Te Punanga Tiaki, kua mataora tatou i te tatau i te au tupuanga i roto i te atikara “Taui te Pipiria i te Oraanga.” E me riro mai te tangata ei au Kerititiano, ka anoanoia ratou kia akaketaketa i to ratou pirianga kia Iehova ma te tauturu a te Pipiria.

2. Akapeea te mana o te Tuatua a te Atua te akakeu anga i te tangata i te anere mataiti mua?

² Kare i te mea poitirere e manganui te tangata tei rave i te taui anga maata te apii anga tatou i te tuatua mou. Kua akapera te au taeake e te au tuaine o te anere mataiti mua e manakonakoanga to ratou no te rangi. (E tatau ia 1 Korinetia 6:9-11.) Te tuatua anga a Paulo no runga i te aronga kare e noo i te Patireia o te Atua, karanga katoa aia: “Mei te reira oki tetai papaki o kotou na.” Kua tauturu te Tuatua a te Atua e tona vaerua tapu ia ratou kia taui. Inara te riro anga mai tetai pae ei au Kerititiano, kua rave ratou i te au tarevake maata tei takino i to ratou pirianga kia Iehova. Ei akaraanga, te taiku ra te Pipiria i tetai taeake akatainuia tei akaateaia ki vao. I muri mai, kua rave aia i te au tauianga kia riro akaou mai ei mema no te putuputuanga Kerititiano. (1 Korinetia 5:1-5; 2 Korinetia 2:5-8) E mea akamaroiroi kua rave to tatou au taeake e te au tuaine i te au taui anga maata no te mana o te Tuatua a te Atua.

3. Eaa ta tatou ka uriuri?

³ E ririnui te Tuatua a te Atua. No te mea na Iehova i oronga mai i teia, ka inangaro tatou kia taangaanga meitaki i te reira. (2 Timoteo 2:15) Ka uriuri teia atikara eaa ta tatou ka rave kia taangaanga i te mana o te Pipiria (1) i roto i toou oraanga, (2) i roto i te angaanga tutu aere e te (3) me apii mei mua mai i te paata. Ta tatou ka apii i teianei, ka tauturu ia tatou kia inangaro e kia akameitaki i to tatou Metua i te rangi, tei apii ia tatou kia puapinga tatou.​—Isaia 48:17.

I ROTO I TOOU ORAANGA

4. (a) Eaa ta tatou ka rave kia tuku i te Tuatua a te Atua kia akakeu ia tatou? (e) Akapeea koe te akanoo anga i te taime no te tatau i te Pipiria?

⁴ Ei tuku i te Tuatua a te Atua kia akakeu ia tatou, ka anoanoia kia tatau putuputu i te reira. Ka tatau tatou i te reira i te au rā ravarai. (Iosua 1:8) Noatu te oraanga angaanga ua, auraka tatou e tuku i tetai ua atu apinga, kapiti mai ta tatou au apainga, kia arai ia tatou mei te tatauanga i te Pipiria. (E tatau ia Ephesia 5:15, 16.) Penei ka akanoo tatou i te taime i te popongi maiata, te avatea me kore i te po. Āriki tatou i ta te tata salamo i tata: “Te maata rava nei toku inangaro i taau ra ture! ko toku ïa maaraara anga i te au rā katoa nei.”​—Salamo 119:97.

5, 6. (a) No teaa ra tatou ka akamanako oonu ei? (e) Akapeea to tatou akamanako oonu anga e puapinga ai? (ng) Akapeea te tatauanga Pipiria e te akamanako oonu anga te tauturu anga ia koe?

⁵ Inara, kare e rava ua i te tatau i te Pipiria. Ka anoanoia kia manakonako me kore akamanako oonu i ta tatou e tatau ra. (Salamo 1:1-3) Ei reira tatou e taangaanga ai i te pakari o te Pipiria i roto i to tatou oraanga. No reira noatu e ka tatau i te Pipiria tei neneiia me kore i runga i te apinga apaipai, ka inangaro tatou kia tuku i te Tuatua a te Atua kia taui e kia akakeu ia tatou.

⁶ Akapeea to tatou akamanako oonu anga e puapinga ai? Me tatau i te Pipiria, ka tau tatou kia tāpu ma te ui ia tatou uaorai: ‘Eaa ta teia e akakite mai nei kiaku no runga ia Iehova? Akapeea taku taangaanga anga i teia i roto i toku oraanga? Eaa te au tauianga ka anoanoia rai au kia rave? Me akamanako oonu tatou i te Tuatua a te Atua ma te pure no runga i ta tatou e tatau ra, ka inangaro tatou i te taangaanga i te reira. Ka kite i reira tatou te mana o te Pipiria i roto i to tatou oraanga.​—2 Korinetia 10:4, 5.

I ROTO I TE ANGAANGA TUTU AERE

7. Akapeea tatou me taangaanga meitaki i te Tuatua a te Atua i roto i te angaanga tutu aere?

⁷ E puapinga kia taangaanga putuputu i te Tuatua a te Atua me tutu aere e me apii. Karanga tetai taeake, “Me ko korua ko Iehova e tutu aere ra mei tera ki tera are, ka maani ainei koe e naau ua e tuatua me ka tuku koe iaia kia tuatua?” Me tatau i te Pipiria ki tetai tangata, te tuku nei tatou ia Iehova kia tuatua kiaia. Ka riro tetai irava tau meitaki ei mea ririnui atu i tetai ua atu apinga ta tatou ka tuatua. (1 Tesalonia 2:13) Me rave koe i te angaanga tutu aere, ka tauta ainei koe i te taangaanga putuputu i te Pipiria?

8. Eaa te tumu kare e rava ua kia tatau i te au irava me tutu aere?

⁸ Inara, kare e rava ua i te tatau i tetai irava ki te aronga i te ngai tutu aere. Kare te maata anga o te tangata e mārama ana i te Pipiria. E tika teia i te anere mataiti mua, pera katoa i teia tuatau. (Roma 10:2) Eiaa tatou e manako e kua mārama te pu ngutuare i tetai irava ta tatou i tatau. Ka tauturu tatou iaia na te ripitianga i te au tuatua e te manako o te irava e oti e akamārama i te aiteanga o te reira. Na teia tu, ka akakeu te Tuatua a te Atua i te manako e te ngakau o te tangata.​—E tatau ia Luka 24:32.

9. Akapeea tatou me tauturu i te tangata kia akangateitei i te Pipiria na roto i ta tatou ka tuatua i mua ake ka tatau ei i te irava? Oronga mai i tetai akaraanga.

⁹ Ta tatou ka tuatua i mua ake ka tatau ei i tetai irava, ka riro ei tauturu i te pu ngutuare kia akangateitei i te Pipiria. Ei akaraanga, penei ka karanga tatou, “Ka akara ana taua eaa ta Tei Anga mai e tuatua ra no runga i teia.” Me tuatua tatou ki tetai tangata kare i te Kerititiano, penei ka karanga tatou, “Ka akara ana taua eaa ta te au Tataanga Tapu e akakite maira.” Me aravei tatou i tetai tangata kare ona irinakianga akonoanga, penei ka ui tatou, “Kua rongo ainei koe i teia tuatua taito?” Me akamaara tatou e tukeke te irinakianga o te tangata, ka rave tatou i te ka rauka kia akareka i ta tatou tuatua akamata anga.​—1 Korinetia 9:22, 23.

10. (a) Eaa tei tupu ki tetai taeake? (e) Akapeea koe te kite anga i te mana o te Tuatua a te Atua i roto i te angaanga tutu aere?

¹⁰ E manganui tei kite me taangaangaia te Tuatua a te Atua, ka riro ei akakeu anga ririnui ki runga i te tangata ta ratou e tutu atura. Ei akaraanga, kua atoro tetai taeake i te tangata pakarikari tei tatau i te au makatini no tetai tuatau roa. Tetai rā, kare teia taeake i oronga ua i te Punanga Tiaki ou, mari ra kua tatau i tetai irava. Tatau aia ia 2 Korinetia 1:3, 4, te na ko ra: “Te tumu o te aroa, e ko te Atua nona anake te pumaana; Ko tei akapumaana mai ia matou i to matou au mate katoa nei.” Kua pakia te ngakau o te tangata pakarikari e kua akakite ki te taeake e tatau akaou i te reira. E oti karanga aia e te inangaro tikai ra raua ko tana vaine i te akapumaana anga. No teia irava, kua inangaro aia kia kite maata atu i te Pipiria. E mea ririnui tikai me taangaanga i te Tuatua a te Atua i roto i te angaanga tutu aere!​—Angaanga 19:20.

ME APII MEI MUA MAI I TE PAATA

11. Eaa te apainga a te au taeake tei apii mei mua mai i te paata?

¹¹ E reka ana tatou te aere ki te au uipaanga, akaputuputuanga, e te au uruoaanga. Te tumu maata i aere ei tatou, no te akamori ia Iehova. Ka puapinga katoa tatou mei ta tatou e apii ra. Ko teia te tumu e tikaanga ngateitei e e apainga maata ta te au taeake tei apii mei mua mai i te paata. (Iakobo 3:1) Ka akapapu ratou kia akatumuia ta ratou e apii ra ki runga i te Tuatua a te Atua. Me rauka ia koe teia tikaanga, akapeea koe me taangaanga i te mana o te Pipiria kia akakeu i te katoatoa?

12. Akapeea te vaa tuatua te akapapu anga e kua akatumuia tana ako ki runga i te au Tuatua Tapu?

¹² Ka anoanoia te au Tuatua Tapu kia riro ei mea puapinga roa atu i roto i tetai ako. (Ioane 7:16) No reira e matakite eiaa te tu me oronga i taau ako e te au tupuanga me kore akatutuanga e riro ei mea puapinga atu i te Pipiria. Pera katoa, e akamaara kare te tatauanga i te Pipiria e aiteite ki te apiianga i te Pipiria. Te tika, me maata roa taau irava ka tatau, kare te tangata e akamaara i te reira. No reira e iki meitaki i te au irava taau ka inangaro i te taangaanga. E oti, akanoo i te taime no te tatau, akamārama, akatutu, e te taangaanga meitaki. (Nehemia 8:8) Me akatumuia te ako ki runga i te akapapaanga ako, e akapapu kia apii meitaki i te reira e te au irava tei taikuia. Tauta kia mārama i te pirianga o te akapapaanga ki te au irava. E oti e taangaanga i teia au irava ei apii i te au manako i roto i te akapapaanga. (Ka kite koe i te au manako meitaki i roto i te apii 21 ki te 23 o te puka Benefit From Theocratic Ministry School Education.) Tei puapinga rava atu, e pati ia Iehova kia tauturu ia koe kia apii i tona au manako akaperepere no roto mai i te Pipiria.​—E tatau ia Ezera 7:10; Maseli 3:13, 14.

13. (a) Akapeea tetai tuaine te akakeuia anga e tetai irava tana i rongo i ko i te uipaanga? (e) Akapeea te tu me taangaangaia te Pipiria i ko i te uipaanga te akakeu anga ia koe?

¹³ I tona tamariki anga, e maata te au mea kino tei tupu ki tetai tuaine i Autireria, e noatu kua kite mai aia ia Iehova i muri mai, kare rai aia i irinaki ana e te aroa maira a Iehova iaia. I ko i tetai uipaanga, kua rongo teia tuaine i tetai irava tei akakeu tikai iaia. Kua akamanako aia i te reira e kua rave i te kimikimi anga, tei taki atu iaia kia tatau i te au irava ke i roto i te Pipiria. Kua papu iaia e te aroa maira a Iehova iaia. a (Akara i te tataanga rikiriki i raro.) Kua rongo ainei koe i tetai irava i ko i te uipaanga, akaputuputuanga, me kore uruoaanga tei akakeu ia koe mei teia te tu?​—Nehemia 8:12.

14. Akapeea tatou me akaari e e puapinga e te inangaro ra tatou i te Tuatua a te Atua?

¹⁴ Kare ainei tatou e rekareka maata ia Iehova no tana Tuatua, te Pipiria? Taputou aia e ka vai ua rai te reira, e kua akono i tana i taputou. (1 Petero 1:24, 25) No reira ka inangaro tatou i te akapapu kia tatau putuputu i te Pipiria, akono i te reira i roto i to tatou oraanga, e te taangaanga i te reira ei tauturu i tetai ke. Me akapera tatou, te akaari ra i to tatou inangaro mou tikai e te akaperepere i teia apinga puapinga tikai, pera katoa tona Tata, te Atua ko Iehova.

[Tataanga Rikiriki i Raro]

[Tataanga i te kapi 22]

Auraka tatou e tuku i tetai ua atu apinga, kapiti mai ta tatou au apainga, kia arai ia tatou mei te tatauanga i te Pipiria

[Pia i te kapi 24, 25]

TAANGAANGA I TE MANA O TE TUATUA A TE ATUA

i roto i toou oraanga:

◼ Tatau putuputu

◼ Akamanako oonu

◼ Taangaanga i taau i apii mai

i roto i te angaanga tutu aere:

◼ Tatau putuputu i te au Tuatua Tapu

◼ Toʼu i te au manako meitaki e te akamārama i te irava taau i tatau

◼ Akaari i te irava Pipiria na roto i te mataara te ka tauturu i te tangata kia akangateitei i te Tuatua a te Atua

me apii mei mua mai i te paata:

◼ Akamou i te manako o te au Tuatua Tapu ki taau akoanga

◼ Eiaa te au tupuanga, akatutuanga e apai ke i te au manako o te Pipiria

◼ Akanoo i te taime no te akamārama, akatutu, e te taangaanga i te au irava taau e tatau ra

[Pia i te kapi 26]

“Taui Takiri Toku Manako”

No tetai tuatau roa i muri ake i te apii anga a Victoria i te tuatua mou, kua manako aia e kare rava te Atua e aroa iaia. Eaa tei akapapu kiaia e te aroa maira te Atua iaia? Teia tona tua:

“Mei tetai 15 mataiti i muri mai toku papetitoanga i taui takiri ei toku manako. I ko i tetai akoanga i te Are Uipaanga Patireia o te Au Kite o Iehova, kua taiku mai te vaa tuatua ia Iakobo 1:23, 24. Kua akaaite taua au irava ra i te Atua ki te io te ka akara tatou ia tatou uaorai mei te tu e akara maira a Iehova ia tatou. Kua akamata au i te akamanako e me e tuke rai taku e kite ra i roto iaku mei ta Iehova e kite ra. Te akamataanga, kua kopae au i teia manako ou. Te manako ra rai au e e maata roa kia tapapa atu ia Iehova kia aroa mai iaku.

“I etai rā i muri mai, tatau au i tetai irava tei taui i toku oraanga. Te irava i roto ia Isaia 1:18, tei taiku ia Iehova e karanga e: ‘E tenana, . . . e akatikatika ana tatou i te tuatua: aite ua rai ta kotou au ara ki te mea kutekute ra, e teatea ïa mei te kiona ra.’ Mei te mea rai e te tuatua maira a Iehova kiaku e: ‘E Vicky, aere mai, ka akatikatika ana taua i teia au mea. Kua kite au ia koe, e kua kite au i taau au ara, kua kite au i toou ngakau​—inangaro rai au ia koe.’

“Kare au i moe ana i tera po. Ekoko rai au e ka inangaro a Iehova iaku, i na kua akamata au i te akamanako no runga i te atinga oko a Iesu. I reira rai, nakiro mai iaku e e akakoromakianga roa tikai to Iehova iaku, te akaari mai anga e e maata te au mataara e inangaro maira aia iaku. E oti akera, te karanga nei au kiaia e: “Kare e rava ana toou aroa te itae mai iaku. Kare e rava ana te atinga a taau Tamaiti ei oko iaku.” Mei te mea rai e te akaoki akaou atura au i te oko kia Iehova. Kareka i teianei, na roto i te akamanako oonu anga i teia apinga aroa o te oko, akamata au i te kite i to Iehova aroa noku.”