Eaa ta te Io e Akaari Maira?

E AKARA ki roto i te io. Eaa taau e kite ra? I etai taime, te akaari maira tetai akara anga ki roto i te io i te ngai kinokino i toou akara anga e te rekareka ra koe i te akatikatika i mua ake ka kite mai tetai i te reira.

Mei te io rai te Puka Tapu. Ka rauka i te reira i te tauturu ia tatou kia rauka tetai akaraanga tika ia tatou uaorai, te ka arai ia tatou mei te manakoanga maata roa​—me kore meangiti roa—​i to tatou tu puapinga i roto i nga mata o te Atua. (Mataio 10:29-31; Roma 12:3) Pera katoa, ka rauka i te Puka Tapu i te akaari mai i te au tu tarevake i roto i ta tatou au tuatua, au angaanga, me kore au tu ta tatou ka anoano i te akatikatika. Me tupu teia, ka kopae ainei koe i ta te io e akaari maira?

I tuatuaʼi te tata Puka Tapu ko Iakobo: “Ko te tangata oki e akarongo ua i te tuatua, e kare aia i rave, e tau aia i te tangata e akara ua i tona uaorai mata ki roto i te io ra: Te akara ra aia iaia uaorai, e aere atura, ngaropoina ua iora tona tu iaia uaorai i reira ra.”​—Iakobo 1:23, 24.

I te akatuke anga, kua akataka mai a Iakobo i tetai atu tangata, ko tetai “te akara ra ki roto i te ture tika rava o te rangatira ra, ma te tamou tikai.” (Iakobo 1:25) Te aite anga o te tuatua Ereni tei uriia e “akara ra” kia piko i te pae mai me kore kia piko ki mua i te akara atu. “E maata atu i te akara viviki ua teia e maroia nei,” i tuatuaʼi te Theological Dictionary of the New Testament. Te akataka maira te tuatua i tetai kimi anga matatio no tetai apinga uunaia. “Te vaira tetai apinga puapinga te inangaro ra tetai tangata akara i te kite atu, noatu e penei ka ngata iaia i te kite atu i te reira e te marama anga i tona aiteanga katoa,” i tata ei tetai tangata tuatua Puka Tapu ko R. V. G. Tasker.

Ka akara matatio ainei koe i reira ia koe uaorai i roto i te io o ta te Atua Tuatua e oti ka aru atu i tei umuumuia ra? Kua tamou ua atu a Iakobo: “No te mea kare aia i te tangata akangaropoina ua i te tuatua kia akarongo, e tangata rave ra aia i taua angaanga ra, e akameitakiia ïa aia i te rave anga.”​—Iakobo 1:25.