Raveanga Akonoanga ma no te Akaoraanga

“Te akonoanga tei ma ra e te tika tikai i mua i te aroaro o te Atua Metua ra ka akaari iaia uaorai na te au apinga mei te . . . tiakianga iaia uaorai kia kore e viivii i teianei ao.”​—IAKOBO 1:27, Phillips.

1. I akapeea te akataka anga i te akonoanga ra, e tei iaai te tika kia akataka i te tuke anga i rotopu i te akonoanga pikikaa e te tika?

KUA akatakaia mai te akonoanga e “te akakite anga i te irinaki anga o te tangata i tetai mana ririnui ma te akatapu anga i tei matauia e ko tei anga maira e ko te kavana o te ao katoa e pini ua ake.” Tei iaai, i reira, te tika tau no te akataka anga i te tuke anga i rotopu i te akonoanga tika e te akonoanga pikikaa? E mea tika tikai ka tau ia ko Tei irinakiia ra e tei akatapuia ra, koia Tei Anga maira. Kua akapapa taka meitaki maira a Iehova i roto i tana Tuatua i tona turanga no te akonoanga tika e tei pikikaa.

Te Tuatua “Akonoanga” i Roto i te Puka Tapu

2. Akapeea ta te au puka akakite aiteanga te akataka anga i te tuatua Ereni akamata anga tei uriia ra e “tu akamori” me kare e “akonoanga,” e ka rauka te reira kia akapiriia atu ki teea nga tu akamori ra?

² Ko te tuatua Ereni tei uriia e “tu akamori,” me kare e “akonoanga,” e thre·skeiʹa. Te akataka maira, A Greek-English Lexicon of the New Testament i teia tuatua e ko “te akamori i te Atua, akonoanga, i te akakite anga iaia uaorai i roto i te angaanga akonoanga me kare te akatereanga akamori anga.” Te oronga katoa maira te Theological Dictionary of the New Testament i etai atu akakitekiteanga, i te tuatuaanga: “Te akaapaia ra te tuatua enua o te reira tuatua; . . . te akaperepere ra te aronga apiiia i teia tuatau nei i tetai kapiti anga ma te therap- (‘kia tavini atu’). . . . Ka tau katoa kia manakoia te tuke anga o te aiteanga. Ko te tu meitaki ko te ‘maroiroi no te akonoanga’ . . . , ‘akamori i te Atua,’ ‘akonoanga.’ . . . Inara te vai katoa ra tetai tu kino, koia oki, ‘e tere roa te tu akonoanga,’ te ‘akamori tarevake.’” E no reira, ko te thre·skeiʹa ka tau kia uriia ei “akonoanga” me kare ei “tu akamori,” te meitaki me kare te kino.

3. Eaa te aiteanga o ta te apotetoro ko Paulo ra taiku anga i te tuatua tei uriia ra e “tu akamori anga” e eaa te tuatua puapinga tei taikuia no te uri anga ia Kolosa 2:18 ra?

³ E a ua taime o teia tuatua e kiteaʼi i roto i te au Tuatua Tapu Ereni Kerititiano ra. E rua taime ta te apotetoro ko Paulo taiku anga i te reira no te akonoanga pikikaa. Ia Angaanga 26:5, kua tataia tana tuatuaanga e i mua ake i tona riroanga ei Kerititiano, “kia tau ki te akonoanga tikai o ta matou tu akamori [“akonoanga,” Phillips] i noo ua ana au ei Pharisea.” I tana reta ki to Kolosa, kua akamatakite atu aia: “Auraka kotou e ngere i to kotou tutaki i tetai tangata atu i te inangaro anga i te taakaaka e te akamori i te au angela.” (Kolosa 2:18) I te akaraanga kua raveia te reira akamori i te au angera i Pherigia i taua tuatau ra, inara e tu akonoanga pikikaa ia.a E mea tau ra kia manakoia, e noatu etai te au urianga Puka Tapu tei uri i te thre·skeiʹa “akonoanga,” ia Kolosa 2:18 ra ko te maataanga io ratou ra kua taiku i te tuatua “akamori” i reira. Kua uri tamou te New World Translation i te thre·skeiʹa “tu akamori,” i tetai tataanga i raro ake i te Reference Bible ra i te au taime tataki tai katoa i taikuiaʼi te “akonoanga” i roto i te au urianga Ratini.

“Ma e te Viivii Kore” i to te Atua ra Manako Anga

4, 5. (a) Kia tau ki ta Iakobo ra, noai te turanga puapinga maata rava no runga i te akonoanga ra? (e) Eaa te ka akariro i te tu akamori anga o tetai tangata kia puapinga kore ua, e eaa te aiteanga o taua tuatua tei uriia ra e e “puapinga kore”?

⁴ I etai atu taiku anga e rua i taua tuatua thre·skeiʹa ra tei roto ia i te reta na te pipi ko Iakobo ra i tata, koia tetai mema no te pupu akaaere i te anere mataiti mua o te putuputuanga Kerititiano ra. Kua tata aia e: “Me te manako ra tetai tangata iaia uaorai e e tangata akamori i tei matauia ra [“e tangata rave ‘akonoanga,’” Phillips] e kare ra e tapeka i tona arero, mari ra te akavare ua ra i tona uaorai ngakau, ko te tu akamori [“akonoanga,” Phillips] o te reira tangata e puapinga kore ia. Ko te tu akamori [“akonoanga,” Phillips] tei ma ra e te viivii kore i ta to tatou Atua Metua ra manako anga ko teia ia: kia akono i te matiroeroe e te au vaine takaua i to ratou mate anga, e kia akono iaia uaorai kia kore e viivii mai i teianei ao.”​—Iakobo 1:26, 27, NW.

⁵ Ae, e puapinga maata te akonoanga i ta Iehova i manako no runga i te akonoanga me te anoano ra tatou i tana akatika anga e kia ora atu ki roto i te ao ou tana i taputou maira. (2 Petero 3:13) Kua akaari maira a Iakobo e penei ka manako tetai tangata iaia uaorai e e akonoanga tika tona mari ra ko tona tu akamori e puapinga kore ia. Ko te tuatua Ereni tei uriia i konei e e “puapinga kore” te aite katoa ra e “e rave kore, kare e apinga o roto, kare e uua, kare e puapinga, e mana kore, te ngere ra i te tuatua mou.” Te aite ra te reira tu me te karanga ra tetai e e Kerititiano aia kare ra e tapeka i tona arero e ka taangaangaʼi i te reira ei akapaapaa atu i te Atua ra e ei akamaroiroi atu i tona au taeake Kerititiano. Te “akavare ua ra aia i tona uaorai ngakau” e kare e rave ana i te “akonoanga tei ma e te tika tikai i mua i te aroaro o te Atua.” (Phillips) Ko to Iehova ra manako te mea maata.

6. (a) Eaa te tumu manako o te reta a Iakobo ra? (e) Eaa te apinga maata no te akamori anga ma ta Iakobo i akaketaketa maira, e eaa ta te Pupu Akaaere o teia tuatau nei i tuatua no te reira tu?

⁶ Kare ra a Iakobo i taiku katoa mai i te au mea ravarai ta Iehova e umuumu maira no runga i te akamori ma ra. Kia tau ki te tumu manako o tana reta, koia oki te akarongo akapapuia na te au angaanga, e te umuumu anga kia matara ke mai i te oaanga ma te ao o Satani ra, e rua ua nga umuumu anga tei akamaataia mai e ia ra. Ko tetai “kia akono i te matiroeroe e te au vaine takaua i to ratou mate anga.” Te kapiti ra te reira i te aroa Kerititiano mou. Kua akaari tamou mairai a Iehova i te manako aroa no te matiroeroe e te au vaine takaua ra. (Deuteronomi 10:17, 18; Malaki 3:5) Ko tetai o te angaanga mua a te pupu akaaere o te putuputuanga Kerititiano i te anere mataiti mua ra koia oki no te au vaine takaua Kerititiano ra. (Angaanga 6:1-6) Kua oronga maira te apotetoro ko Paulo i te au akoanga taka meitaki no te akono anga aroa i te au vaine ruau takaua e putaua ra e kua akakite e tiratiratu ratou i te au mataiti i topa e kare o ratou ngutuare tangata ei tauturu atu ia ratou ra. (1 Timoteo 5:3-16) Kua oronga katoa mai oki te Pupu Akaaere o te Au Kite o Iehova i teia tuatau nei i te au akoanga tau no runga i te “Akonoanga i te Putaua,” i te tuatuaanga: “Te kapiti ra te akamori tika i te akonoanga i te aronga pikikaa kore e te tiratiratu tei umuumu ra i te tauturu no te pae kopapa.” (E akara i te puka Organized to Accomplish Our Ministry, nga kapi 122-3.) Te au pupu aronga pakari me kare Kerititiano tataki tai te akaari ra e kare o ratou uaorai manako no te reira tu te akakore ra i tetai tuanga puapinga maata o te tu akamori tei ma e te viivii kore mei ta to tatou Atua Metua i manako ra.

“Kare e Viivii Mai i Teianei Ao”

7, 8. (a) Eaa te rua o te apinga maata no te akonoanga tika ta Iakobo i taiku maira? (e) Te rave ra ainei te au orometua i te reira umuumu anga? (ng) Eaa te ka rauka kia tuatuaia no te Au Kite o Iehova?

⁷ Ko te rua o te umuumu anga no te akonoanga tika tei taikuia maira e Iakobo “kia akono iaia uaorai kia kore e viivii mai i teianei ao.” Kua na ko maira a Iesu: “Kare to teianei ao taku basileia”; e mea tamouia rai, ko tana au pipi mou ra “kare . . . i to teianei ao.” (Ioane 15:19; 18:36) Ka rauka ainei kia tuatuaia te reira no te au arataki akonoanga e te au orometua o etai ua atu au akonoanga o teianei ao? Te tauturu ra ratou i te Taokotai Anga Patireia. E manganui to ratou au arataki tei ariki i te patianga a te pope kia akaputu atu ki Assisi, i Italia, ia Okotopa 1986 kia taokotai i ta ratou au pure anga kia puapinga “te Mataiti no te Au a te Ao Katoa.” Inara, kua puapinga kore ua ta ratou au tautaanga, i te akaraanga i te au mirioni ua atu tei matemate i te au tamaki o te reira mataiti e te au mataiti o muri maira. E putuputu te au arataki akonoanga i te kapiti atu ma te aronga tutara poritiki ra, ma te pikikaa muna anga i etai akakoroanga ma to te tua patoi ra e no reira noatu koai te tutara ka manako maira ia ratou ei “oa.”​—Iakobo 4:4.

⁸ Kua akatupu te Au Kite o Iehova i tetai tu matauia no ratou uaorai ei au Kerititiano tei kore ra e o atu ki roto i te angaanga poritiki e pera katoa oki te au tamaki anga o teianei ao. Te tamou ra ratou i te reira turanga i te au enua mamaata ravarai e i te au patireia katoatoa oki, mei tei akakiteia ra i te au ripoti nuti pepa e te au tataanga tuatua enua o teia tuatau nei i roto i te au tuanga ravarai i teianei ao. E tika tikai “kia kore [ratou] e viivii mai i teianei ao.” Ko ta ratou rai te “akonoanga tei ma ra e te tika tikai i mua i te aroaro o te Atua ra.”​—Iakobo 1:27, Phillips.

Etai Atu Akairo o te Akonoanga Tika

9. Eaa te toru o te umuumu anga no te akonoanga tika, e no teaa ra?

⁹ Me te akonoanga ko “tetai mana ririnui ma te akatapu anga i tei matauia e ko tei anga maira e ko te kavana o te ao katoa e pini ua ake,” e mea tika tikai ka taki atu te akonoanga tika ra i te akamori anga ki te Atua mou okotai ra, koia a Iehova. Kare ia e tau kia arairai i te kiteanga te au tangata ra i te Atua na tetai apiianga ei Atua toru tai te kapiti ra i tona mana katoatoa, te kaka, e te mutu kore ma etai atu nga peretana e rua ra i roto i tetai Toru Tai ngaro ra. (Deuteronomi 6:4; 1 Korinetia 8:6) Ka tau katoa ia kia akakite i te ingoa aite koreia o te Atua ra, koia a Iehova, e kia akangateitei atu i taua ingoa ra, e kia rave i to te Atua ingoa ei au tangata tei akapapa meitakiia ra. (Salamo 83:18; Angaanga 15:14) No teia ka tau te aronga rave i te reira kia aru i te akaraanga a Iesu Karaiti. (Ioane 17:6) Koai ma te aronga i teia tuatau nei te akono ra i te reira umuumu anga i te pae atu i te Au Kite Kerititiano o Iehova ra?

10. E orongaʼi tetai akonoanga i te ora atu anga ki roto i te ao ou a te Atua ra, eaa te mea tau kia rave ia, e no teaa ra?

¹⁰ Kua karanga te apotetoro ko Petero e: “Kare rava oki e ora i tetai ke: kare atu oki e ingoa [Iesu Karaiti] i akakiteia mai ki te tangata i raro ake i teianei rangi, e oraʼi tatou nei.” (Angaanga 4:8-12) Ka tau te akonoanga ma te ka oronga i te ora atu anga ki roto i te ao ou o te Atua ra, kia akauru i te akarongo ia Karaiti e i te puapinga o te atinga oko ra. (Ioane 3:16, 36; 17:3; Ephesia 1:7) Pera katoa oki, ka tau te reira kia tauturu i te aronga akamori tika kia kauraro kia Karaiti ei Ariki tutara na Iehova e ei Taunga Maata tei akatainuia ra.​—Salamo 2:6-8; Philipi 2:9-11; Ebera 4:14, 15.

11. Eaa te tumu tau kia akanooia te akonoanga tika ki runga, e eaa te turanga o te Au Kite o Iehova no runga i teia tu?

¹¹ E mea tau ra kia akanooia te akonoanga ma ki runga i te anoano akakiteia maira o te Atua mou anake e auraka ki runga i te au ikuiku anga e te au apiianga a te tangata nei. Kare tatou e kite i tetai apinga no Iehova e tana au akakoroanga umere, kare katoa no Iesu e te atinga oko, naringa kare te Puka Tapu ra. Te akatupu ra te Au Kite o Iehova i te irinaki anga tu ketaketa ki roto i te au tangata ra no runga i te Puka Tapu. Te akakite papu katoa ra ratou na to ratou ora anga i te au ra tataki tai, e te akatika ra ratou i te tuatua anga a te apotetoro ko Paulo e: “Te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra. Kia apa kore te tangata o te Atua, ma te tau tikai i te au angaanga memeitaki katoa ra.”​—2 Timoteo 3:16, 17.

Te Akonoanga Tika​—E Ravenga ia no te Oraanga

12. Kapiti atu ki te akarongo, eaa te mea anoanoia tikai no te akamori anga, e na teea au tu te akonoanga tika i tau ei ei ravenga no te oraanga?

¹² Kua karanga a Iesu: “E Vaerua te Atua, e te aronga e akamori iaia ra, kia akamori ma te vaerua e te tuatua-mou ra e tikaʼi.” (Ioane 4:24) No reira, kare te akonoanga tika me kare tu akamori, i tetai oroa atinga, e peu, akaariari anga i te tu akono i te Atua ra. E tu vaerua to te akamori ma ra, tei akanooia ki runga i te akarongo. (Ebera 11:6) Inara, ko tera akarongo e mea tau te reira kia turuia e te au angaanga. (Iakobo 2:17) Ka kopae ke te akonoanga tika i te au peu rekaia ra. Ka aru ia i te au turanga Puka Tapu no te tu meitaki e te tuatua ma katoa. (1 Korinetia 6:9, 10; Ephesia 5:3-5) Ka tauta te aronga rave i te reira ma te ngakau tae kia akatupu i te au ua o te vaerua o te Atua ra i to ratou oraanga ngutuare tangata, i ta ratou angaanga, i te apii e pera katoa i ta ratou tarekareka anga. (Galatia 5:22, 23) Ka tauta te Au Kite o Iehova kia kore e ngaropoinaia te ako a te apotetoro ko Paulo ra e: “E teianei, te kai ra e te inu ra oki, e te au mea ravarai ta kotou e rave na, e rave anake ïa ma te akakakā i te Atua.” (1 Korinetia 10:31) Kare ta ratou akonoanga i te ravenga no te akara uaia; e ravenga ra no te oraanga.

13. Eaa te o atura ki te akamori anga tika, eaa ka raukai kia tuatuaia e e aronga akono tika tikai te Au Kite o Iehova i te Atua ra?

¹³ E tika rai, te kapiti ra te akonoanga tika i te au angaanga i te pae vaerua. Te kapiti ra i te pure ngutuare tangata e te aronga tataki tai, te apii putuputu i te Tuatua a te Atua ra e te au puka tauturu i te apii Puka Tapu katoa, ma te aereanga ki te au uipaanga o te putuputuanga Kerititiano mou ra. Ko teia mea openga nei te akamataia ra e te akaotiia ra na roto i te au imene akapaapaa ia Iehova e te au pure oki. (Mataio 26:30; Ephesia 5:19) Te akara matatioia ra te au tumu pae vaerua na te au akoanga e te au uriuri anga uianga e te pauanga i te au apinga neneiia te rauka maira na te katoatoa. Te raveia ra te reira au uipaanga ki roto i te au Are Uipaanga Patireia ma e te papa meitaki, te raveia ra no te au akakoroanga akonoanga anake ua: te au uipaanga putuputu, te au akaipoipo anga, e te au oroa akamaaraanga. Te akangateitei ra te Au Kite o Iehova i to ratou au Are Uipaanga Patireia e pera katoa te au Are Uipaanga mamaata atu no te Akaputu Anga ei ngai tei akatapuia no te akamori anga ia Iehova. Kare mei to te au ekaretia e manganui o Kerititome rai, kare te au Are Uipaanga Patireia i te ngai no te au pupu tamataora anga.

14. Eaa te aiteanga o te akamori ki to te aronga tuatua Epera ra, e eaa te angaanga te akataka ra i te Au Kite o Iehova i teia tuatau nei?

¹⁴ Kua kite tatou i mua akenei e kua kapitiia e te aronga apiiia ra te tuatua Ereni tei uriia ra e “tu akamori” me kare “akonoanga” ma te verepa “kia rave.” E meitaki kia manakoia, ko te tuatua Epera aiteite atu, e ‘avo·dhahʹ, ka rauka kia uriia “e angaanga” me kare “akamori anga.” (Akaaiteia atu ki te au tataanga i raro ake ia Exodo 3:12 e te Exodo 10:26.) Ki te au Epera, ko te aiteanga o te akamori e angaanga ia. E ko te reira katoa te aiteanga ki te aronga akamori tika i teia tuatau nei. Ko tetai akairo puapinga, taka meitaki o te akonoanga tika ko te katoa ravarai tei rave ra i te reira te o katoa atura ki taua angaanga akono i te Atua ra i te tutu aere anga i “teia tuatua meitaki o te patireia . . . ei kite ki te au pa enua ravarai.” (Mataio 24:14, NW; Angaanga 1:8; 5:42) Ko teea te akonoanga te matauia ra e pini ua ake te ao nei no tana akakitekiteanga ki te ngai tangata i te Patireia o te Atua ra ei manakonako anga anake ia no te au tangata katoa?

E Mana Papu, no te Taokotaianga

15. Eaa tetai tu meitaki roa o te akonoanga tika ra?

¹⁵ Te akatataka ke nei te akonoanga pikikaa. Kua akatupu ia, e te akatupu ua atu nei rai, i te makitakita e te akamaringi toto. I tetai pae, te taokotai ra te akonoanga tika. Kua karanga a Iesu e: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioane 13:35) Ko te aroa te taokotai ra i te Au Kite o Iehova tei runga roa atu ia i te au kotinga enua, te ravenga, akapuapinga anga, e te au iti tangata te akatataka ke ra i te toenga atu o te au tangata katoa ra. Ko te Au Kite te “tu ketaketaanga i te vaerua okotai, ma te meta okotai ma te tautaanga i te pae i tetai e i tetai no te akarongo i te tuatua meitaki ra.”​—Philipi 1:27, NW.

16. (a) Eaa te “tuatua meitaki” te tutu aereia ra e te Au Kite o Iehova? (e) Eaa nga totou te akatupuia ra ki runga i te au tangata o Iehova, e eaa te au akameitakianga tei aru maira?

¹⁶ Ko te “tuatua meitaki” ta ratou e tutu aere ra e kare e roa atu ka tupu ta te Atua ra akakoroanga taui koreia. Ka raveia tona anoano “mei to te rangi ra, pera katoa i te enua nei.” (Mataio 6:10, NW) Ka akatapuia te ingoa kaka o Iehova, e ka riro te enua ei parataito, ko te ngai ia e raukai i te aronga akamori tika ra i te noo e tuatau ua atu. (Salamo 37:29) E au mirioni tikai te au tangata no te pa enua ravarai te kapiti atura ma te Au Kite o Iehova, i te akatupu anga i te totou Puka Tapu te na ko anga: “Ka aru katoa matou ia kotou, no te mea kua rongo matou e tei ia kotou na te Atua.” (Zekaria 8:23, NW) Te akameitaki ra a Iehova i tona au tangata. Kua riro tikai “tei meangiti poepoe ra” “ei enua maroiroi” ia, e putuputuanga e pini ua ake te ao katoa nei kua taokotai takiriia i te au tu ravarai​—te manako, te angaanga, e te akamori. (Isaia 60:22) E apinga teia kare rava i rauka i te akonoanga pikikaa i te akatupu.

Te Autu Anga te Akonoanga Ma

17. Eaa te vai maira no Babulonia Maata, e ka akapeea te akatupu anga i te reira?

¹⁷ Kua totouia mai i te Tuatua a te Atua ra te akapouanga i te patireia o te akonoanga pikikaa o teianei ao, tei tapa akatutuia maira ko “Babulonia Maata.” Kua akakite katoa maira te Puka Tapu i te “au ariki,” me kare au tutara poritiki, o te enua nei na te akatutu anga ki nga tara o te puaka taae ra. Te akakite maira te reira kia tatou e ka tuku te Atua ki roto i te au ngakau o te reira aronga tutara i te akakoroanga kia akakore atu e kia akapou takiri i teia akaaerenga, mei te vaine akaturi rai, na Satani te Tiaporo ra.​—E akara ia Apokalupo 17:1, 2, 5, 6, 12, 13, 15-18.b

18. Eaa te tumu puapinga ta te Puka Tapu e oronga maira no te akapouanga ia Babulonia Maata, e i naea te akonoanga pikikaa i akamataʼi i teia ravenga kino?

¹⁸ Eaa ra i tau ei te akapouanga no Babulonia Maata? Te pau maira te Puka Tapu: “E tei roto iaia te toto o te au peroveta, e to te aronga tapu i te kitea anga ia, e to te aronga katoatoa i taia i teianei ao.” (Apokalupo 18:24) I te akaarianga e ko teia apa i te toto tei raveia e te akonoanga pikikaa no mua roa atu i te akanooanga ia Babulonia ra, kua akaapa atura Iesu i te au arataki akonoanga Ngati Iuda ra, tei akapiri atura iaia uaorai kia Babulonia Maata, i tana tuatua anga: “E te au ovi nei, e ta te vipera anaunga! Ea kotou e oraʼi i te mate i te po [ia Keena]? . . . Kia uriia mai ki runga ia kotou te toto ara kore katoa i maringi i te enua nei, mei te toto mairai o Abela tuatua-tika.” (Mataio 23:33-35) Ae, ko te akonoanga pikikaa, tei akamata mai i te enua nei i te tuatau o te meameaau i Edene ra, ka tau ia kia tutaki i tana apa kino rava i te toto.

19, 20. (a) Eaa ta te aronga akamori tika ka rave a muri ake i te akautunga angaia a Babulonia Maata? (e) Eaa te ka tupu i reira, eaa te manakonakoanga te ka tuera mai ki mua i te aronga akamori tika katoatoa?

¹⁹ A muri ake i te akapou angaia a Babulonia Maata, ka kapitiia te au reo o te aronga akamori tika ma te pupu o te rangi tei kapiki ra: “E akapaapaa kotou ia Ia! . . . No te mea kua akautunga oki aia i taua vaine akaturi maata ra . . . , e kua akaoko aia i te toto o tona au tavini tei akamaringiia e tona rima ra. . . . E kua peke atura te auai nona ki runga e tuatau e tuatau ua atu.”​—Apokalupo 19:1-3, NW.

²⁰ Ei reira etai atu tuanga o ta Satani Akaaerenga akara mataia ra e akapouiaʼi. (Apokalupo 19:17-21) Ei muri ake i te reira ka titiriiaʼi a Satani koia tei akamata maira i te au akonoanga pikikaa ravarai ratou ko tana au temoni katoa ra ki roto i te vaarua oonu ra. Kare e rauka akaou ia ratou kia takinga kino atu i te aronga akamori tika ia Iehova ra. (Apokalupo 20:1-3) Ka autu te akonoanga ma ki rungao i to te pikikaa ra. Te au tane e te au vaine tiratiratu tei akarongo ra i te akamatakiteanga a te Atua kia oro ke mai i teianei mei roto ia Babulonia Maata ra kia rauka ia ratou te tuatau no te ora atu e te tomo atu anga ki roto i te ao ou a te Atua ra. Ei reira, ka rauka ia ratou te rave i te akonoanga tika e te tavini akamori atu kia Iehova ra e tuatau ua atu.

[Au Tataanga Rikiriki i Raro]

Timataia Toou Maaraara Anga

◻ Naai te turanga puapinga maata roa no te akonoanga ra, e no teaa ra?

◻ Eaa nga tumu maata e rua no te akonoanga tika ta Iakobo i akaketaketa maira?

◻ Eaa etai atu umuumu anga no te akamori anga ma?

◻ Eaa “te tuatua meitaki” ta te Au Kite o Iehova e tutu aere nei?

◻ Akapeea e autu ei te akonoanga tika ki rungao i te akonoanga pikikaa?

[Tutu i te kapi 17]

Kua akaputuputu te au arataki akonoanga ki Assisi, i Italia, ia Okotopa 1986

[Tutu i te kapi 19]

Te kapiti katoa ra te akonoanga tika i te akaputuputu anga no te akamori