“Aronga Rave Oki Kotou i te Tuatua” ma te Rekareka

“Ka āriki marie ei ma te maru i te tuatua tanumia mai ki roto ra, e oraʼi oki to kotou vaerua. Ei aronga rave oki kotou i te tuatua nei, auraka ei aronga akarongo ua.”​—IAKOBO 1:21, 22.

1. Eaa te manako tau no ta tatou irava mataiti no te 1996?

“EI ARONGA RAVE OKI KOTOU I TE TUATUA.” Te apai ra teia tuatua anga mama ua i tetai akakiteanga ririnui. Kua kiritiia mai te reira mei roto mai i ‘Te Episetole a Iakobo’ i te Puka Tapu ra, e ka akaariia mai te reira i roto i te au Are Uipaanga Patireia ei te irava mataiti a te Au Kite o Iehova i te 1996 katoa.

2, 3. Eaa ra i tau ei na Iakobo e tata i te reta nona ra te ingoa i rungao?

² Ko Iakobo, e teina no te Atu no Iesu, i kite meitakiia ia i te putuputuanga Kerititiano mua ra. I tetai atianga i muri ake i te tuakaouanga o Iesu ra, kua mama atu to tatou Atu kia Iakobo tikai e ki te au apotetoro ravarai i muri ake. (1 Korinetia 15:7) I muri akera, i te arataki anga mai i te apotetoro ko Petero ra mei roto mai i te are tapekaanga ma te tu temeio, kua tuatua atu aia ki tetai pupu Kerititiano tei akaputu ra: “E akakite atu kia Iakobo e te au taeake.” (Angaanga 12:17) I te akara anga e ko Iakobo, noatu rai e kare aia uaorai i tetai apotetoro, koia tei akaaere i te uipaanga a te pupu akaaere i Ierusalema i te tuku anga tika a te au apotetoro e te aronga pakari e kare te au Kenitara tei ariu mai e umuumuia kia peritomeia. Na Iakobo i akakite oti mai te au tumu, e kua tukuia te tika akamanaia e te vaerua tapu ra ki te au putuputuanga katoatoa.​—Angaanga 15:1-29.

³ E mea tika ra, e meitaki maata tei apaiia e ta Iakobo ra manakoanga pakari. Inara, kua akakite taakaaka ua aia uaorai e “e tavini no te Atua, e no te Atu ra no Iesu Mesia” aia. (Iakobo 1:1) E apinganui te akoanga meitaki e te akamaroiroi anga i roto i tana reta akauruia ra no te au Kerititiano i teia tuatau nei. Kua oti te reira e vaitata i te a mataiti i mua ake i te koropini mua anga a to Roma ki runga ia Ierusalema i raro ake i te Rangatira Vaeau ko Cestius Gal­lus, i muri ake ka tutu aere maataiaʼi te tuatua meitaki i te “ki te tangata ravarai i raro ake i teianei rangi.” (Kolosa 1:23) E tuatau kino ia, e kua kite tikai te au tavini o Iehova e kua vaitata Tana akavaanga i te raveia ki runga i te iti tangata ngati Iuda ra.

4. Eaa te akakite maira e kua tuku te au Kerititiano mua ra i te irinaki anga maata ki roto i te Tuatua a te Atua?

⁴ Kua rauka i taua au Kerititiano ra te au Tuatua Tapu Epera katoa e e maata oki to te au Tuatua Tapu Ereni ra. Mei tei akakiteia mai na ta ratou au taiku anga e manganui ki te au tataanga o mua akera, e mea tika ra e e maata te irinaki anga o te au tata Puka Tapu Kerititiano i roto i te Tuatua a te Atua ra. Mei te reira katoa, ka tau tatou kia apii akatenga i te Tuatua a te Atua e kia akono i te reira i to tatou oraanga. E raukaʼi te akakoromaki, ka umuumu tatou i te ririnui e te maroiroi i te pae vaerua ta te au Tataanga Tapu e oronga maira.​—Salamo 119:97; 1 Timoteo 4:13.

5. Eaa tatou ka anoano ei i te arataki anga taka ke i teia tuatau nei, e ka kitea e tatou te reira ki ea?

⁵ I teia tuatau te tu nei te au tangata i te tapa o te “mate maata . . . kare ia mei muatangana mai i teianei ao, e tae rava akenei i teianei rā, e kare oki a muri atu.” (Mataio 24:21) Tei runga to tatou ora atu anga i te arataki anga tu-Atua. Akapeea e kiteiaʼi e tatou teia? Na te akatueraanga i to tatou ngakau ki te au apiianga a te Tuatua a te Atua tei akauruia ra e te vaerua. Na teia e taki atu ia tatou “ei aronga rave oki i te tuatua nei,” mei te au tavini tiratiratu o Iehova i te tuatau i mua ana ra. Ka tau tatou kia tatau e kia apii ma te ngakau tae i te Tuatua a te Atua ra e ka taangaangaʼi i te reira ei akapaapaa ia Iehova ra.​—2 Timoteo 2:15; 3:16, 17.

Akakoromaki Anga ma te Rekareka

6. Eaa tatou ka kite ei i te rekareka anga me rokoia e te au timata anga?

⁶ I te akamataanga i tana reta, kua taiku a Iakobo i te rekareka, koia te rua o te ua o te vaerua o te Atua ra. Kua tata aia: “E aku au taeake ra, kia rokoia kotou e te au timataanga e manganui te tu ra, ka tuatua e, e mea rekareka anake ïa; Kua kite oki kotou e, na taua timata anga i to kotou akarongo ra e akatupu i te akakoromaki. E tuku atu i ta te akakoromaki ra angaanga kia tika rava, kia meitaki rava kotou, ma te apa kore, auraka e ape toe.” (Iakobo 1:2-4; Galatia 5:22, 23) Akapeea e raukaʼi kia tuatuaia e “e mea rekareka anake ïa” kia rokoia e te au timataanga e manganui? E tika oki, noatu ko Iesu kua tuatua i tana Tuatua i runga i te Maunga ra: “E ao to kotou, kia akakino mai, e kia takinga kino mai, e kia tapepe pikikaa ua mai te tangata ia kotou i te au kino katoa nei, noku nei: E rekareka kotou, e kia rere ua i te rekareka; e tutaki maata oki ta kotou i te ao ra.” (Mataio 5:11, 12) E merengo anga rekareka to te kiteanga i ta Iehova ra akameitakianga i ta tatou au tauta anga ia tatou e rave maroiroi ra kia rauka te akakoro anga no te ora mutu kore.​—Ioane 17:3; 2 Timoteo 4:7, 8; Ebera 11:8-10, 26, 35.

7. (a) Ka akapeea te tauturu anga ia tatou kia akakoromaki? (e) Mei ia Iobu ra, akapeea tatou me tutakiia?

⁷ Kua akakoromaki a Iesu uaorai “i te meitaki i tukuia mai ki mua i tona aroaro.” (Ebera 12:1, 2) Na te akaraanga matariki i ta Iesu ra akatauanga maroiroi, ka rauka katoa ia tatou kia akakoromaki! Mei ta Iakobo i taiku ra i te vaitata anga te openga o tana reta, te tutaki meitaki nei a Iehova i te aronga tamou marie i te tiratiratu. “I na oki, te karanga nei tatou e, kua meitaki te aronga i tamou marie i te akakoromaki,” ta Iakobo i tuatua. “Kua kite kotou i te akakoromaki o Iobu ra, e kua kite oki kotou i ta te Atu i rave i te openga ra; e kua ki te Atu i te aroa e te takinga-meitaki maata.” (Iakobo 5:11) Ka maara ana i te tutaki angaia te tu tiratiratu o Iobu i te meitaki anga mai tona oraanga kopapa e te rekareka anga i tetai oraanga ki tikai, e te mataora ma te aronga tei akaperepereia ra. Ka rauka i te akakoromaki i te tiratiratu te apai mai i te rekarekaanga aiteite noou i te Parataito totouia maira i te ao ou o te Atua ra, ei take ki te rekareka no te tavinianga ia Iehova i teianei tikai.

Kimianga i te Pakari

8. Akapeea e kiteiaʼi e tatou te pakari mou, e te tau, e eaa ta te pure tuanga i te reira?

⁸ Na to tatou apii meitaki i te Tuatua a te Atua, kapiti katoa ma tona akono anga tau, ka akatupu i te pakari tau i te Atua ra, e raukaʼi ia tatou i te akakoromaki i te au timataanga i roto i te akatereanga viivii a Satani te mate atura. Akapeea tatou e papu ei i te kiteaanga taua pakari ra? Te akakite maira Iakobo kia tatou: “Kia ngere ra tetai tangata i te pakari, ka pati aia ki te Atua ra, ko tei oronga ua mai i ta te tangata ravarai ma te patoi kore; e e orongaia mai tana. E pati ra aia ma te akarongo, e te ekoko kore: ko tei ekoko ra, e tau ïa i te ngaru tai e puia e te matangi, e tikitiki akera.” (Iakobo 1:5, 6) Ka tau tatou kia pure akatenga, ma te irinaki anga ngaueue kore e ka akarongo mai a Iehova i ta tatou au patianga e ka pau aia i te reira i tana uaorai tuatau tau e tana mataara oki.

9. Akapeea ta Iakobo akatakaanga i te pakari tau i te Atua e tona aiteanga ra?

⁹ Ko te pakari tau i te Atua e apinga orongaia mai ia no ko mai ia Iehova ra. I te akatakaanga i taua au apinga orongaia maira, kua na ko maira Iakobo: “Te au mea memeitaki i o maiia ra, e te au mea tika ravarai, no runga ïa, no runga mai i te Metua o te au mārama ra, kare rava e tu ke ke iaia ra, kare oki e tu ke anga e ngai mea ngiti ua ake.” I muri ake i roto i tana reta, kua akataka mai a Iakobo i te tupu anga no te raukaanga te pakari mou i tana tuatua anga: “Koai te tangata pakari e te kite i roto ia kotou na? kia na te akono meitaki aia i te akakite mai i tana angaanga ma te maru e te pakari tikai. . . . Kareka te pakari no runga maira, e mea iro koreia ïa, e mea au ïa, e te maru, e te akarongo ngoie, kua ki ïa i te aroa, e te takinga-meitaki, kare oki e akatu ke i te tangata, kare oki e pikikaa.”​—Iakobo 1:17; 3:13-17.

10. Eaa te tuke anga te akonoanga pikikaa ma te akonoanga mou?

¹⁰ I roto i te patireia o te akonoanga pikikaa o teianei ao, me ia Kerititome me kare i etai atu enua ke, e putuputu te peu matauia no te aronga akamori kia imene i etai imene, e akarongo atu i te au pure taokiokiia, e penei kia akarongo atu i tetai ako anga. Kare e akamaroiroi anga e orongaia no te akakiteanga i tetai tuatua manakonako anga, no te mea kare te maataanga o te au akonoanga e kite ana i tetai manakonako anga marama no te tuatau ki mua. Kare te manakonako anga kaka o te Patireia Mesia o te Atua e taikuia ana, me kare te kite kore takiriia ra. Te tuatua ra a Iehova i tau ki te totou no te aronga aru ia Kerititome e: “Ka rua akenei ara i raveia e toku iti-tangata nei; kua akaruke akenei ratou iaku, te tumu o te vai ora; e kua pao i te au āriki vai no ratou uaorai, e au āriki ngaangaa ïa, kare e mou te vai ki roto.” (Ieremia 2:13) Kare o ratou au vai o te tuatua mou. Te ngere ra i te pakari no te rangi maira.

11, 12. (a) Eaa te akakeu anga tau ia tatou no te pakari tu-Atua? (e) Te akamatakite maira te pakari tu-Atua ia tatou i teaa?

¹¹ Mei teaa ra te tuke i roto i te Au Kite o Iehova i teia tuatau nei! Ma te ririnui na te Atua i oronga mai, te akaki ra ratou i te enua nei ma te tuatua meitaki o Tona Patireia te aere mai nei. Te pakari ta ratou e tuatua nei kua akatumu ngaueue koreia ki runga i te Tuatua a te Atua ra. (Akaaite ia Maseli 1:20; Isaia 40:29-31.) E tika ra, te taangaanga tau ra ratou i te kite mou e te marama i te akakiteanga i te au akakoro anga mekameka a to tatou Atua koia Tei Anga maira. Ka tau tatou kia anoano e ko te katoatoa i te putuputuanga “kia akakiia mai kotou i te kite i [to te Atua] anoano, i te pakari i te au mea ravarai e te kite i te vaerua.” (Kolosa 1:9) I te tuanga i teia tango, ka akakeuia te aronga ou e te ruaine oki kia riro “ei aronga rave oki i te tuatua.”

¹² Te akamatakite maira “te pakari no runga maira” ia tatou no te au ara te ka rauka kia akatupu i te mareka kore anga i te tu-Atua ra. “E teianei, e aku au taeake akaperepere e,” ta Iakobo i tuatua. “Kia rapurapu ua te tangata ravarai i te akarongo, kia tavarevare i te tuatua, kia tavarevare oki i te riri: Kare oki te riri o te tangata e akatupu i te tuatua-tika a te Atua.” Ae, ka tau tatou kia rapurapu, kia anoano, i te akarongo i te ako tu-Atua e kia akono i te reira. Inara, ka tau tatou kia paruru atu i te taangaanga tau kore ua i taua “melo mea ngiti” ra, koia te arero. Na te tuatua akateitei anga, tuatua tau kore i etai ke, tuatua akaparau, ka rauka i te arero te akaka akatutu anga i tetai ‘ngai maata te vaie’ i te ai. No reira ka tau tatou kia tatanu i te mareka anga e te akono meitaki i to tatou au taokotai anga ravarai.​—Iakobo 1:19, 20; 3:5.

13. Eaa ra i puapinga maataʼi kia ariki tatou i “te tuatua tanumia mai ki roto ra”?

¹³ “E tenana,” ta Iakobo i tata, “e tuku ke atu i te au mea kino maata ravarai, ka āriki marie ei ma te maru i te tuatua tanumia mai ki roto ra, e oraʼi oki to kotou vaerua.” (Iakobo 1:21) Teianei ao noinoi, ma tona tu oraanga ko au na mua akaariari, te apinganui e te au tu akono viivii, te vaitata nei i te taka ke atu. “Ko tei akono ra i to te Atua ra anoano, e tika ïa i te ora anga e tuatau ua atu.” (1 Ioane 2:15-17) Mei teaa ra te puapinga maata, i reira, kia ariki tatou i “te tuatua tanumia mai ki roto”! Te tuke ra te pakari tei orongaia mai e te Tuatua a te Atua ki te tu kino o teianei ao te mate atu nei. Kare tatou e anoano i taua tu kino ra. (1 Petero 2:1, 2) Ka anoanoia tatou kia inangaro i te tuatua mou e te akarongo ririnui kia tanumia ki roto i to tatou ngakau, kia manako papu ei tatou kia kore e tapae ke i te au aerenga tuatua tika o Iehova ra. Inara ka rava ainei kia akarongo ua i te Tuatua a te Atua ra?

“Ei Aronga Rave Oki Kotou i te Tuatua”

14. Akapeea ka raukaʼi ia tatou kia riro ei “aronga akarongo” e ei “aronga rave” katoa oki i te Tuatua?

¹⁴ Ia Iakobo 1:22, ka tatau tatou: “Ei aronga rave oki kotou i te tuatua nei, auraka ei aronga akarongo ua, i te pikikaa ua anga ia kotou uaorai.” “Ei aronga rave oki kotou i te tuatua”! Te akakite maataia ra teia tumu i te reta a Iakobo ra. Ka tau tatou kia akarongo, e kia “rave marie”! (Genese 6:22) E manganui te au tangata i teia tuatau te karanga ra e te rava ua ra kia akarongo atu i tetai ako anga me kare kia piri atu ki tetai tu akamori i etai atianga, mari ra kare ratou e rave kia maata atu. Penei ka manako ratou e kia akono ua ratou i tetai ‘oraanga meitaki’ kia tau ki ta ratou au turanga, kua rava ua te reira. Inara kua tuatua a Iesu Karaiti: “Ko tei inangaro i te aru mai iaku e akaruke aia iaia uaorai, e rave i tana satauro, ka aru mai ei iaku.” (Mataio 16:24) Te rave angaanga tuku atinga iaia uaorai ma te akakoromaki anga i te aruanga i ta Iesu akatauanga i te raveanga i to te Atua ra anoano te taka meitaki ra te umuumuia i te au Kerititiano mou. Te aiteite ra te anoano o te Atua no ratou i teia tuatau nei ki to te anere mataiti mua ra i te akaue anga a Iesu tei akatuakaouia ra e: “Ka aere kotou, e akariro i to te pa enua katoa ei pipi.” (Mataio 28:19) Akapeea ra taau raveanga i teia nei tu?

15. (a) Eaa te akatutu anga ta Iakobo i oronga maira, i te akaarianga e akapeea tatou e mataoraʼi ei ‘aronga rave i te tuatua’? (e) Eaa i kore ei e rava te akamori akameamea ua?

¹⁵ Me te akara ra tatou ki roto i te Tuatua a te Atua ra, ka riro ia mei tetai io i te akaataanga mai kia tatou e eaa tikai to tatou tu ei au tangata. Te karanga ra a Iakobo: “Ko te akara ra ki roto i te ture tika rava o te rangatira ra, ma te tamou tikai, no te mea kare aia i te tangata akangaropoina ua i te tuatua kia akarongo, e tangata rave ra aia i taua angaanga ra, e akameitakiia ïa aia i te rave anga.” (Iakobo 1:23-25) Ae, ka riro aia ei tetai ‘tangata rave i te tuatua’ ma te mataora. Pera katoa oki, e puapinga maata kia riro ei “tangata rave” i te au tu ravarai o to tatou oraanga Kerititiano. Auraka rava tatou e akavare ia tatou uaorai kia manako e ka rava ua te akamori akameamea ua. Te ako maira a Iakobo ia tatou kia rave i etai au tu o te akamori mou penei tei kore ra i raveia e te aronga Kerititiano maroiroi no te manako kore ua. Kua tata aia: “Ko te akono mou i te Atua e te kino kore i mua i te aroaro o te Atua, o to tatou Metua ra, ko teia ïa: Ko te takinga-meitaki i te matiroeroe e te au vaine takaua i to ratou mate anga e te tiaki iaia uaorai auraka ei viivii i teianei ao.”​—Iakobo 1:27.

16. I teea au mataara i riro ei a Aberahama ei “oa no te Atua,” e akapeea e raukaʼi ia tatou Tona akaoaanga?

¹⁶ Kare ia e rava kia tuatua ua e, ‘Te irinaki ra au i te Atua,’ e ka akaruke akapera ua atu ei. Mei ta Iakobo 2:19 e akakite maira: “Kua akarongo koe i te tuatua ra e, Okotai ua Atua; kua tika te reira: kua akarongo katoa oki te au demoni i te reira, e kua rurutakina.” Te akaketaketa maira Iakobo e “te akarongo, kare e angaanga, e mea mate ïa,” e kua taiku maira ia Aberahama, i te na ko anga: “Na te akarongo i akatupu i tana angaanga, e no te angaanga i tika ravaʼi te akarongo.” (Iakobo 2:17, 20-22) Kua kapiti ta Aberahama ra au angaanga i te orongaanga tauturu no tona kopu tangata, te akaarianga i te tu maoraora, te teateamamaoanga kia tuku atinga ia Isaaka, e te ‘aaki ua anga’ i te akarongo ngaueue kore i te taputou a te Atua i “te oire tumu mou,” koia te Patireia Mesia i te tuatau ki mua ra. (Genese 14:16; 18:1-5; 22:1-18; Ebera 11:8-10, 13, 14; 13:2) E mea tau ra no Aberahama kia “karangaia maira oki aia e, ‘E oa no te Atua.’” (Iakobo 2:23) Penei katoa oki ka tau tatou kia tuatuaia ei ‘oa no Iehova’ ia tatou e akakitekite marie ra i to tatou akarongo e te manakonako anga i tona Patireia tuatua tika te aere maira.

17. (a) Eaa ra a Rahaba i “akatikaiaʼi ei tuatua-tika,” e akapeea te tutaki anga iaia? (e) Eaa te papaanga roa ta te Puka Tapu e oronga maira no te aronga tei riro ‘ei aronga rave i te tuatua’? (ng) I akapeea te tutaki anga ia Iobu, e no teaa ra?

¹⁷ Ko tei riro “ei aronga rave . . . i te tuatua” kua “akatikaia [ratou] i te angaanga, kare i te akarongo anake ua.” (Iakobo 2:24) Ko Rahaba tetai tei kapiti atura i te angaanga ki tona akarongo i te “tuatua” tei akarongoia ra e ia no runga i ta Iehova au angaanga mana ra. Kua uuna aia i nga tangata tutaka no Iseraela ra e kua tauturu ia raua kia aere ke atura, e i reira kua akaputu mai aia i te ngutuare tangata o tona metua ra no te akaora anga. A te tuakaouanga, mei teaa ra tona rekareka i te kite anga e na tona akarongo, tei turuia e te angaanga, kua taki atu ki tona riroanga ei tetai tupuna vaine no te Mesia ra! (Iosua 2:11; 6:25; Mataio 1:5) Te oronga maira a Ebera pene 11 i tetai papaanga ingoa roa no etai atu tei riro ra “ei aronga rave” i te akakiteanga i to ratou akarongo, e ka tutaki meitakiia ratou. Auraka oki tatou e akangaropoina ia Iobu, tei tuatua ra i raro ake i te timataanga kino e: “Kia akameitakiia te ingoa o Iehova.” Mei ta tatou i kite takere, no tona akarongo e te angaanga i akatupu mai i tetai tutaki meitaki roa. (Iobu 1:21; 31:6; 42:10; Iakobo 5:11) Mei te reira katoa oki, na to tatou akakoromaki i teia tuatau nei ‘ei aronga rave i te tuatua’ ka apai mai i te katakata marekaanga o Iehova ra.

18, 19. Akapeea te au taeake roa te takinga kinoanga i riro ei ‘ei aronga rave i te tuatua,’ e eaa te akameitakianga tei apaiia mai e ta ratou angaanga?

¹⁸ I roto i te aronga tei maata ra te akakoromaki anga i te au mataiti kua topa ko to tatou au taeake i te pae Itinga o Europa ra. I teianei i te takore angaia te au arairai anga e manganui, kua riro tikai ratou ‘ei aronga rave oki i te tuatua’ i roto i to ratou turanga ou. Kua tomo atu te au mitinari e te au painia mei te au enua vaitata atura kia tauturu i te apiianga e te akapapaanga. Kua tono atu te opati manga o Vinirani e etai atu au opati manga i vaitatao no te Totaiete Punanga Tiaki i etai aronga karape i te akatu are, e kua oronga atu te taeake anga maoraora i te moni ei akatu i te au opati manga ou e te au Are Uipaanga Patireia katoa oki.​—Akaaite ia 2 Korinetia 8:14, 15.

¹⁹ Mei teaa ra te toto mapu taua au taeake takinga kinoia ra i te rave anga i te tutu aere! Te ‘angaanga pakari ra ratou e te uapou ra ratou uaorai’ kia oti ei te au angaanga kare ra i raveia i te “atianga tau kore.” (1 Timoteo 4:10, NW; 2 Timoteo 4:2) Ei akatauanga, i teia Aperira i topa akenei i Arapania, te ngai tei kino roa te takinga kinoanga, kua oti takiri te au Tuatua Patireia no te tumu “Eaa ra te Oraanga i Ki Roaʼi i te Au Manamanata?” i te tua aereia i nga ra e toru ua. Ko tetai aru anga meitaki teia i muri ake i te Akamaara Anga i to Iesu matenga, tei akaputu atura e 3,491 au tangata​—e manganui roa atu i to ratou au papuritia e 538 tei rave angaanga ra.

20. Eaa ta te au akaputu anga no te Akamaara Anga i ou ake nei i akakite mai, e akapeea e raukaʼi te tauturu anga i te aronga e manganui?

²⁰ Kua turu maata katoa oki etai atu enua i te au akaputu anga ki te Akamaara Anga, tei tupu maira i te au mataiti i ou ake nei kia tere atu i te 10,000,000. I te au ngai e manganui ko te aronga ou, kua akamaroiroiia to ratou akarongo na te akaputuanga e te akono anga i te Akamaara Anga, te riro maira ‘ei aronga rave i te tuatua.’ Ka rauka ainei ia tatou i te akamaroiroi kia maata atu te au taeake ou kia tau no taua angaanga ra?

21. Kia tau ki ta tatou irava mataiti, eaa te aerenga tau no tatou kia aruaru, e ma teea akakoro anga?

²¹ Mei taua aronga Kerititiano toto mapu i te anere mataiti mua ra, e te aronga katoa e manganui i muri maira, e akapapu tatou i te manako kia uapou ia tatou uaorai i “te aruaru atu na te akairo” no te ora mutu kore, me no te Patireia i te rangi me kare ki tona tuanga i te enua nei. (Philipi 3:12-14) E mea tau no tatou kia tauta pakari kia rauka te akairo akakoroia ra. Kare teia i te tuatau no te unui ki muri ei aronga akarongorongo ua, mari ra ko te tuatau teia o te au tuatau ravarai ‘kia akamaroiroi e kia angaanga.’ (Hagai 2:4; Ebera 6:11, 12) I te ‘ariki anga i te tanu anga ki roto i te tuatua,’ kia riro tatou ‘ei aronga rave rekareka i te tuatua’ i teianei e e tuatau mutu kore ua atu.

Akapeea Koe me Pau?

◻ Akapeea tatou e akakoromaki ei ma te rekareka?

◻ Eaa “te pakari no runga maira,” e akapeea tatou i te aruaru anga i te reira?

◻ Eaa tatou i tau ei ‘ei aronga rave oki i te tuatua nei, auraka ei aronga akarongo ua’?

◻ Eaa te au ripoti te tau ra kia akakeu ia tatou ‘ei aronga rave i te tuatua’?

[Tutu i te kapi 17]

Kia akatuera katoa tatou i to tatou au ngakau ki te apiianga tu-Atua

[Tutu i te kapi 18]

Kua tutakiia to Iobu tu tiratiratu i te oki akaou mai anga tona oraanga ki tikai, e te mataora ma te aronga tei akaperepereia ra