Oro i te Taemoemo Anga ma te Tamou Marie
“E oro tatou ma te tamou marie i te taemoemo anga tei tukuia maira ki mua ia tatou nei.”—EBERA 12:1, NW.
1. (a) Eaa tei akanooia maira ki mua ia tatou i ta tatou akatapuanga ia tatou ki te Atua ko Iehova ra? (e) Eaa te tu taemoemo anga te ka tau te Kerititiano kia teateamamao?
I TO tatou akatapu anga ia tatou uaorai kia Iehova na roto ia Iesu Karaiti, kua akanoo mai te Atua i te taemoemo anga akatutuia ki mua ia tatou. I te openga o te taemoemo anga, ka orongaia te tutaki ki rungao i te aronga katoatoa te ka akaoti meitaki. Eaa te tutaki? E ora mutu kore! E raukai teia tutaki meitaki rava, ka tau te Kerititiano tei oro ra kia teateamamao, kare no te oro viviki poto ua, mari ra no te oroanga roa e te mamao. E no reira ka anoanoia aia kia tamou marie. Ka tau katoa aia kia tamou marie i te roa o te rave anga i te taemoemo anga e pera katoa oki te au arairai anga te ka tupu mai i te tuatau o te taemoemo anga.
2, 3. (a) Eaa te ka tauturu ia tatou kia oro i te taemoemo anga Kerititiano kia tae roa ki tona openga? (e) Akapeea te rekareka i te tauturu anga ia Iesu kia oro i te taemoemo anga ma te tamou marie anga?
2 Eaa te ka tauturu ia tatou i te reira tu taemoemo anga e tae roa ki te openga? Na teaa i tauturu ia Iesu kia tamou marie iaia e tangata i te enua nei? Kua rauka iaia te maroiroi no roto mai no te tu rekareka. Te tatau ra ia Ebera 12:1-3 (NW) e: “No te mea e urupu maata o te au kite te takapini ra ia tatou, kia akaruke katoa tatou i te au teiaa ravarai e te ara tei akapuereere ra ia tatou, e oro tatou ma te tamou marie i te taemoemo anga tei tukuia maira ki mua ia tatou nei, ia tatou e akara tikai ra ki te Rima Rave Maata e te Akaoti i to tatou akarongo, ko Iesu. No te rekareka tei tukuia ki mua iaia ra kua tamou marie aia i te rakau tamamae anga, te akakoreanga i te akama, e kua noo ki raro i te tua katau o te terono o te Atua. Ae, e akamanako matariki oki iaia ko tei tamou marie i te au tuatua akakino a te aronga rave ara i akakore ra i te meitaki no ratou uaorai, kia kore kotou e akaroiroi e ka akaparuparu ei i to kotou meta.”
3 I roto i tana angaanga tutu aere ki te au tangata katoa, kua rauka ia Iesu te oro tamou i te taemoemo anga no te rekareka no ko ia Iehova ra. (Akaaiteia atu kia Nehemia 8:10.) Na tona rekareka i tauturu iaia kia tamou marie noatu ko te matenga rikarika ki runga i te rakau tamamae anga ra, i tupu ei te rekareka kare e rauka kia tuatuaia i te tu mai anga mei te mate e kake atura ki te rima katau o tona Metua, ei reira aia akaraʼi i te akaoti anga ta te Atua ra angaanga. Na tona tamou marie anga ei tangata i te pae o te Atua ra, kua mou tamou marie aia i tona tika no te ora mutu kore. Ae, mei ta Luka 21:19 (NW): “Na to kotou tamou marie anga ka ora ia kotou to kotou meta.”
4. Eaa te akatauanga ta Iesu i akanoo no tona au taeake oro ra, e eaa ta tatou ka tau kia tamou i to tatou manako ki rungao?
4 Kua akanoo mai a Iesu Karaiti i te au akatauanga meitaki rava no tona au oa oro kapipiti ra, e na tana akatauanga i akapapu mai kia tatou e ka rauka katoa ia tatou te re. (1 Petero 2:21) Ia Iesu i pati ia tatou nei kia rave, ka rauka ra ia tatou i te rave. Mei iaia i tamou marie ra, ka rauka katoa oki ia tatou. Ia tatou e mou tamou marie ra i te aru anga iaia, ka tau tatou kia akatinamou i to tatou manako ki runga i te au tumu no to tatou rekareka anga. (Ioane 15:11, 20, 21) Na te rekareka anga e akamaroiroi ia tatou kia tamou i te oro i taua oroanga i roto i ta Iehova ra angaanga e tae roa kia rauka mai te tutaki kaka no te ora mutu kore.—Kolosa 1:10, 11.
5. Akapeea tatou ka rekarekaʼi e ka maroiroi ei no te taemoemo anga i mua ia tatou nei?
5 Ei tauturu ia tatou kia rave tamou i te taemoemo anga, te oronga maira Iehova i te mana maata atu i tei matauia ra. Kia takinga kinoia mai tatou, ka riro na taua mana ra e te kite oki e eaa tatou i o atu ei ki roto i te takinga kino na te reira e akamaroiroi mai ia tatou. (2 Korinetia 4:7-9) Te au apinga pouroa tei rokoia maira no te akangateiteianga i te ingoa o te Atua ra e te mouanga i tona tu ngateitei e tumu ia no te rekareka te ka kore e rauka i tetai ke i te rave ke atu mei ia tatou nei. (Ioane 16:22) Te akataka maira teia i te tumu i rekarekaʼi te au apotetoro, i muri ake i to ratou papa angaia tei ikuikuia e te Sunederi ngati Iuda ra no te tuatua anga i te au mea umere ta te Atua ko Iehova i rave na roto ia Iesu ra, “i te mea, no tona ingoa i manakoiaʼi ratou e tau ia ratou taua takinga-kino ra.” (Angaanga 5:41, 42) Kare to ratou rekareka anga e no te takinga kino anga uaorai mari ra no te merengo anga oonu no roto mai i te kiteanga e te akamareka ra ratou ia Iehova raua ko Iesu.
6, 7. Eaa ka raukai i te Kerititiano oro ra kia akapaapaa noatu e te tupu ra te au tumatetenga kiaia, e eaa ta te reira ka akatupu mai?
6 Ko tetai atu mana akamatutu i roto i to tatou oraanga ko te manakonako anga ia ta te Atua i akanoo maira ki mua ia tatou nei. Mei ta Paulo i tuatua maira: “Kia rekareka tatou i te au ma te Atua na roto i to tatou Atu ia Iesu Karaiti, na roto ra iaia i raukaʼi ia tatou kia akavaitata atu na te akarongo ki roto i teia aroa ua te tuia nei e tatou i teianei; e kia rekareka tatou, i tei akanooia ki runga i te manakonako anga i to te Atua ra kaka. Kare ko te reira anake ua, mari ra kia rekareka katoa tatou i te au tumatetenga, i te mea kua kite tatou e na te tumatetenga e akatupu i te tamou marie; e na te tamou marie anga, e tupu mai ei te tu marekaia; na te tu marekaia, e raukaʼi te manakonako anga, e kare te manakonako anga e taki atu ki te mareka kore anga.”—Roma 5:1-5, NW.
7 Kare ra te au tumatetenga i te mea rekaia, inara ko te au ua no te au ta ratou ka akatupu mai a muri akera ko te reira te mea rekaia. Ko te reira au ua ko te tamou marie anga, te tu marekaia, te manakonako anga, e te tupu anga taua manakonako anga ra. Na to tatou tamou marie anga e taki atu kia rauka ia tatou te mareka anga mai a te Atua ra. Kia rauka mai ia tatou te mareka anga a te Atua ra, ei reira ka papu ia tatou te manakonako anga i te tupu anga te au taputou tana i totou maira. Na teia manakonako anga e akatinamou ia tatou ki to tatou mataara tika e ka taaki ia tatou ki runga kia maroiroi i raro ake i te tumatetenga e tae roa mai te tupu anga taua manakonako anga ra.—2 Korinetia 4:16-18.
E Rekareka to te Aronga Tamou Marie!
8. Eaa i kore ei i te kaimoumou taime no tatou teia tuatau tatarianga nei?
8 I te tatari anga i te tuatau akatakaia e te Atua no te tuaanga i te au tutaki ki te aronga oro ra, e au tauianga etai te ka kiteia e tatou nei. E au akameitaki anga te reira ia tatou i te pae vaerua te ka tupu mai no te autu anga i te au timataanga, e ka rauka mai i te reira te akaperepere anga maata no tatou ma te Atua ra. Na te reira e akapapu mai eaa tikai tatou e ka oronga mai i te tuatau no tatou kia akono i te au tu meitaki rai mei ta te aronga tiratiratu i mua ana i akakite maira, e maata roa atu oki to tatou Akaraanga, koia a Iesu Karaiti. Kua karanga te pipi ko Iakobo: “Kia manako i te reira au mea ei rekareka, e taku au taeake, me aravei kotou i te au timata anga tukeke, mei ta kotou i kite ra e na teia tu timataia o to kotou akarongo e akatupu i te tamou marie. Inara e tuku i te tamou marie kia angaanga takiri, kia ki katoa kotou e te meitaki i te au tu ravarai, te kore anga e ngere i tetai ua atu mea.” (Iakobo 1:2-4, NW) Ae, penei ka tapapa atu tatou i etai timata anga tuke tuke, inara na te reira e akariro ia tatou kia tatanu i te au tu meitaki katoa ra. Na te reira ta tatou akakite anga e ka vai rai tatou ki roto i teia oroanga e rauka roa mai te re no te tutaki, noatu e eaa te au arairai anga ka rokoia kia tatou.
9, 10. (a) Eaa i rekarekaʼi te aronga tei tamou marie ra i te au timataanga, e akapeea tatou me aravei atu i te au timataanga? (e) Koai ma te aronga rekareka i muatangana ra, e akapeea tatou ka kapitiia atu ei ki rotopu ia ratou ra?
9 No reira rai, a Iakobo i tuatuaʼi: “E mataora te tangata tei tamou marie ua atura i te timata anga, no te mea e akatikaiaʼi ka rauka iaia te korona o te oraanga, ta Iehova i taputou ki te aronga tei tamou ua atu i te inangaro iaia.”! (Iakobo 1:12, NW) E akakoromaki tamou tatou i te au timataanga, e mou i te au tu akono i te Atua ra te ka akamaroiroi ia tatou kia autu atu ia ratou katoa.—2 Petero 1:5-8.
10 Kia maara e ko te tu o ta te Atua akonoanga ia tatou nei kare i te mea ou e kare i kiteia ana. Te “urupu maata o te au kite” i te tuatau taito ra kua akonoia ma te tu rai ta ratou i akakite ra i to ratou tu tamou ki te Atua ra. (Ebera 12:1, NW) Kua tataia to te Atua ra mareka anga ia ratou ki roto i tana Tuatua, e kua manako tatou ia ratou katoatoa e e mataora no te mea kua autu ratou i te timataanga. Kua karanga a Iakobo: “E te au taeake, e akamanako i te au peroveta ei akaraanga i te mamaeanga i te kino e te akonoanga i te tapapa marie roa ra, ko tei tuatua i te ingoa o Iehova. Ina! Te karanga nei tatou e mataora to te aronga i tamou marie ra. Kua akarongo oki kotou i te tamou marie anga o Iobu ra e kua kite i te tupu anga ta Iehova i oronga atura, e ki oki a Iehova i te aroa e te takinga meitaki.” (Iakobo 5:10, 11, NW) Kua oti oki te totouia mai e i teia tuatau openga kino nei, ka mama mai tetai papaki tangata i te ao nei te ka tavini atu ia Iehova ma te tiratiratu, mei taua aronga peroveta i te au anere mataiti taito ra. Kare ainei tatou e rekareka e ko tatou te rave nei i te reira?—Daniela 12:3; Apokalupo 7:9.
Turuanga a te Tuatua Akamaroiroi a Iehova
11. Akapeea ka raukai i te Tuatua a te Atua kia tauturu ia tatou i te tamou marie, e eaa tatou ka kore ei e tau kia aite atu ki te ngai paikea o ta Iesu parapore ra?
11 Kua tou atura a Paulo ki tetai atu tauturu i te tamou marie anga i tana tuatua anga e “na te tapapa anga ma te tamou marie e na te akamaroiroi anga mei te Tuatua Tapu ra, ka rauka ia tatou kia mou ngaueue kore i to tatou manakonako anga.” (Roma 15:4, The Twentieth Century New Testament) Ka tau kia akaia kia oonu te tuatua mou, koia te Tuatua a te Atua ra, ki roto ia tatou kia raukai te uti mai mei roto ia tatou i te akono anga tika i te au tuatau ravarai. Kare e puapinga no tatou kia akaaite atu ki te ngai paikea tei akatakaia maira e Iesu i tana parapore no te tangata ruru i te ua ra: “Te ngai paikea ra i topa katoaia e tetai pae ua; koia te aronga i āriki i te tuatua ma te rekareka i te akarongo anga ra; kare ra i akaia i roto ia ratou, tāpu anga poto ua ta ratou: kia rokoia e te tumatetenga, e kia takinga-kinoia, i taua tuatua ra, maitu atura ïa ratou i reira.” (Mareko 4:16, 17) Kare te aka o te tuatua mou mei te Tuatua a te Atua i oonuia ki roto i te reira tu tangata; e no reira, i te au tuatau tumatetenga, kare e rauka ia ratou i te uti ake i te reira ei tumu mou no te maroiroi e te manakonako anga.
12. Eaa te manako kare tatou e tau kia tuku kia akavare mai ia tatou i to tatou arikianga i te tuatua meitaki ra?
12 Tetai ua atu tangata te ka ariki i te tuatua meitaki o te Patireia kare ia e tau kia manako akavare iaia uaorai e eaa te ka aru mai. Kua rave aia i tetai arataa no te oraanga te ka akatupu i te tumatetenga me kare takinga kino. (2 Timoteo 3:12) Inara ka tau aia kia manako i te reira “ei rekareka” kia o atu ki roto i te au timataanga tuke tuke no te mou ngaueue kore i te Tuatua a te Atua e te tuatuaanga i te reira kia etai ke ra.—Iakobo 1:2, 3, NW.
13. I akapeea, e eaa oki a Paulo i rekarekaʼi i te au Kerititiano i Tesalonia ra?
13 Kua akatupu te aronga patoi i Tesalonia ra i te pekapeka i ta Paulo tutu aere anga i te anere mataiti mua ra. I to Paulo aere atu anga ki Berea, kua aru atura teia aronga takinga kino iaia e akatupu kia maata atu te pekapeka i reira. Kua tata taua apotetoro tei takinga kinoia ra ki te aronga tiratiratu tei vai atura ki muri i Tesalonia ra: “Kua tikaia matou kia oronga ua rai i te akameitaki anga ki te Atua no kotou, e te au taeake, ei mea tau no te mea te tupu maata tikai ra to kotou akarongo e te aroa ia kotou tataki tai ravarai te tupu atura i tetai e tetai. Tei tupu te ngakau parau nei matou ia kotou i rotopu i te au putuputuanga a te Atua no te mea no to kotou tu tamou marie e te akarongo i ta kotou takinga kino anga katoatoa e te au tumatetanga ta kotou e akakoromaki ra. E akapapu anga teia i te akava anga tika a te Atua, te arataki anga atu ki to kotou tare angaia ei tau no te patireia o te Atua, koia oki ta kotou e mamae tikai ra.” (2 Tesalonia 1:3-5, NW) Noatu rai to ratou mamaeanga i te rima o te au enemi ra, kua tupu ra te tu mei to te Karaiti rai ki taua aronga Kerititiano i Tesalonia ra e pera katoa oki to ratou numero. Akapeea i raukai te reira? No te mea kua uti ake ratou i te ririnui no te Tuatua akamaroiroianga a Iehova ra. Kua akarongo ratou i te au ikuiku anga a te Atu ra e kua oro i te taemoemo anga ma te tamou marie anga.—2 Tesalonia 2:13-17.
No te Ora o Etai Ke Atura
14. (a) No teea au tumu tatou ka rave tamou rekarekaʼi i te angaanga tutu aere noatu te au turanga ngata? (e) Ka pure tatou no teaa, e eaa te tumu?
14 Te tumu maata no te akatikaanga i te Atua ra, kua akakoromaki tiratiratu tatou i te au tu ngata e te takinga kinoanga ma te kore e akaapa anga. Inara te vaira tetai atu tumu noinoi kore i kauraro ei tatou i te reira au apinga: kia raukai ia tatou i te tua atu i te tuatua meitaki o te Patireia kia etai ke atura kia akamaataia mai te aronga tutu aere i te Patireia o te Atua ra kia “aaki te tuatua e kia rauka atu te ora.” (Roma 10:10) Ka tau te aronga te rave ra i te angaanga a te Atua kia pure i te Atu o te mou ra kia akameitakiia mai ta ratou angaanga na te unga mai anga kia maata atu te aronga tutu aere i te Patireia. (Mataio 9:38) Kua tata a Paulo kia Timoteo e: “E te au tuatua taau i akarongo iaku nei i te aroaro o te au kite katoa e manganui ra, ko taau ïa e tuku ki te aronga tuatua-mou, ko te tau kia apii atu ia etai ke ra. E akakoromaki marie koe i te kino, mei te toa meitaki ki o Iesu Mesia ra.”—2 Timoteo 2:2, 3.
15. Eaa tatou ka tau ei kia akono ia tatou uaorai mei te au toa vaeau rai e mei te aronga “kia kukumi ra”?
15 Te akataka ke ra tetai toa vaeau iaia uaorai mei te oraanga kare e arairai anga mei to te aronga kare ra i roto i te vaeau. Mei te reira katoa oki, ka tau tatou kia kore e ere atu ia tatou uaorai ki te au apinga o te aronga kare ra i roto i te nuku vaeau a te Atu mari ra, ko te tika, tei te tua patoi ratou. E no reira, kua tata katoa a Paulo kia Timoteo: “Kare rava te tangata e aere ki te tamaki ra e taii iaia uaorai i te peu rikiriki no teianei ao, kia akarekareka i tei iki iaia ei toa ra. E te tangata oki kia kukumi ra, kia kore aia e kukumi ma te akono i te ture ra, kare ïa e akakoronaia.” (2 Timoteo 2:4, 5) I te tautaanga kia autu i te taemoemo anga no “te korona ora,” ka tau te aronga oro kia rave i te akono meitaki e kia kopae i te au teimaa puapinga kore e te au ereere anga. Na teia mataara ka rauka ia ratou te tauta pakari i te apaianga i te tuatua meitaki o te ora kia etai ke ra.—Iakobo 1:12; akaaiteia atu kia 1 Korinetia 9:24, 25.
16. Eaa te ka kore e rauka kia tapekaia, e ei puapinga noai ma tatou ka tamou marie ei?
16 I te mea te aroa nei tatou i te Atua e te aronga katoa mei te mamoe rai te tu te kimi ra iaia, ka rekareka ua tatou i te akakoromaki anga maata kia itae atu kia etai ke ra ma te tuatua meitaki o te ora ra. Penei ka tapekaia tatou e te au enemi no te tutu aere anga i te Tuatua a te Atua ra. Inara kare e rauka i te tapeka i te Tuatua a te Atua, e te tuatua anga i te reira ei ora no etai ke ra kare rava e rauka kia riia. Kua akataka atura Paulo kia Timoteo i te tumu i rekarekaʼi aia i te akakoromaki anga i te timataanga: “E akamaara e kua akatuia mai a Iesu Karaiti ki runga mei te mate maira e no te uanga a Davida ra, i tau ki te tuatua meitaki taku e tutu ra; te piri atura ki taku e mamae nei i te kino e tae ua atu ki te tapeka anga are auri ei tangata rave kino. Noatu rai, kare te tuatua na te Atua i tapekaia. No teia tu i tamou marie ei au nei i te au mea ravarai no te aronga ikiia ra, kia rauka katoa rai ia ratou te ora koia oki na roto ia Karaiti ra ko Iesu pera katoa te kaka mutu kore ra.” (2 Timoteo 2:8-10, NW) I teia tuatau nei te akamanako nei tatou kare i te toenga tokoiti anake o te aronga tau no te Patireia o te rangi ra mari ra no te urupu maata katoa oki o te au mamoe ke atu a te Tiaki Mamoe Meitaki ra, koia a Iesu Karaiti, ka rauka i te urupu maata te Parataito i te enua nei i raro ake i te Patireia o Karaiti ra.—Apokalupo 7:9-17.
17. Eaa ka kore ei tatou e tau kia akamutu ua i te taemoemo anga, eaa te ka tupu me ka oro tamou tatou i te taemoemo anga e tae roa ki te openga?
17 Me e aronga akamutu ua tatou nei, kare e rauka ia tatou te tauturu ia tatou uaorai pera katoa oki etai ke atura kia ora. Na te tamou marieanga i te taemoemo anga Kerititiano ra, noatu eaa te au arairai anga no te akono atu, ka rave tamou tatou ia tatou uaorai kia tau no te tutaki e ka rauka i te tauturu tika atu ia etai ke ra ki te ora, ei akaraanga akamaroiroi atu ia etai ke. Noatu rai e eaa to tatou manakonako anga, me no te rangi e me no te enua, e meitaki te aru i to Paulo ra tu akono kia ‘aruaru atu na te akairo, kia rauka te tutaki.’—Philipi 3:14, 15.
Tamou Ngaueue Kore i te Oroanga
18. Tei runga i teaa te reanga i te tutaki ra, inara e tae ei ki te openga roa, eaa te ka tau kia kopaeia?
18 Te akaotianga i to tatou mataara Kerititiano kia autu ei akatikaanga ia Iehova e kia rauka te tutaki tana i akataka no tatou nei te vaira ki runga i to tatou tamou ngaueue kore kia tae roa ki te openga o te taemoemo anga roa katoa ra. Kare ra e rauka ia tatou i te mou ua atu e tae roa ki te openga me ka rave tatou i te apainga teimaa na tatou uaorai ma te au apinga kare ei akonoanga i te ravenga no te tuatua tika. Noatu rai me ka takoreia atu te reira au apinga, te vaira te au umuumuanga maata te anoanoia kia tauta pakari tatou i te akamaroiroi kia ngaueue kore te manako. E no reira, kua ako maira Paulo: “Kia akaruke katoa tatou i te au teiaa ravarai e te ara tei akapuereere ra ia tatou, e oro tatou ma te tamou marie i te taemoemo anga tei tukuia maira ki mua ia tatou nei.” (Ebera 12:1, NW) Mei ia Iesu rai eiaa tatou e tuatua akamaata i te au mamaeanga no te akakoromaki anga mari ra e akamanako atu i te reira e e oko meangiti ua ia no te oko mai i te tutaki rekareka ra.—Akaaiteia atu kia Roma 8:18.
19. (a) Eaa te manako papu ta Paulo i akakite i te vaitata anga te openga o tona oraanga ra? (e) Ia tatou e akavaitata atura ki te openga o te taemoemo anga no te tamou marie anga, eaa te manako papu tau no tatou no te tutaki tei taputouia maira?
19 I te vaitata anga te openga tona oraanga, kua rauka ia Paulo kia tuatua e: “I kukumi ana au i te kukumianga meitaki, kua oti toku oro anga, i mou marie na au i te akarongo: E teianei te vaioia nei te korona o te tuatua-tika noku.” (2 Timoteo 4:7, 8) Tei roto tatou i teia taemoemo anga no te tamou marie anga kia rauka te tutaki no te ora mutu kore. Me ka ope to tatou tamou marie anga no te mea ua e i roa atu te taemoemo anga i ta tatou i manako i to tatou akamata anga i te reira, ka puapinga kore ua tatou ia tatou e akavaitata nei ki te rauka anga te tutaki tei taputouia maira. Ka papu ra ia koe. Kare e ekoko anga e te vai maira te tutaki.
20. Eaa te akakoro anga tikai na tatou e itae roa atu ki te openga o te taemoemo anga ra?
20 E no reira auraka to tatou nga mata e akaroiroi i te akara atu anga kia akamata mai taua mate maata ra, ma te apaianga mai i te akapouanga kia Babulonia Maata na mua e ki te toenga atu o te akaaerenga a te Tiaporo i muri akera. (2 Petero 3:11, 12) I te manako anga i te au akairo katoatoa takapini ia tatou nei, e akara tatou ki mua ma te akarongo. E tatua tatou i to tatou taukupu o te mana no te tamou marie, e kia rave tamou atu rai tatou i te taemoemo anga ma te maroiroi i ta te Atua ko Iehova i akanoo maira ki mua ia tatou nei, e kia itae roaia te openga e kia rauka te tutaki rekareka, ei akatikaanga ia Iehova na roto ia Iesu Karaiti ra.
Akapeea Koe me Pau?
◻ Eaa te tu taemoemo anga te ka tau te Kerititiano kia teatea mamao atu?
◻ Eaa i puapinga maataʼi te rekareka i te rave anga i te taemoemo anga ra?
◻ Eaa nga tumu maata no tatou kia vai tamou i te angaanga tutu aere noatu te au turanga ngata?
◻ Eaa tatou kia kore ei e akamutu ua i te taemoemo anga ta te Atua i tuku maira ki mua ia tatou nei?
[Tutu i te kapi 15]
Mei roto i te taemoemo anga mamao ra, ka tau rai te au Kerititiano kia tamou marie
[Tutu i te kapi 17]
I te itae atu anga i “te korona ora,” ka tau rai te aronga oro ra kia rave i te akono meitaki